တၢ်မၤလိ ၁၅
တၢ်ဘူၣ်ထီၣ်ဘါထီၣ်ယွၤလၢ ကျဲမ့ၢ်ကျဲတီ
၁. ပကဘၣ်ဘူၣ်ထီၣ်ဘါထီၣ် ယဟိဝၤယွၤဒ်လဲၣ်အဂ့ၢ်န့ၣ် မတၤတဂၤဒုးသ့ၣ်ညါပှၤသ့ဝဲလဲၣ်.
တၢ်ဘူၣ်တၢ်ဘါအါတက့ၢ်န့ၣ် စံးဝဲလၢ အဝဲသ့ၣ်သိၣ်လိ တၢ်မ့ၢ်တၢ်တီ ဘၣ်ဃးဒီးကစၢ်ယွၤလီၤ. ဘၣ်ဆၣ် တမ့ၢ်ဒ်န့ၣ်ဘၣ်. ကစၢ်ယွၤမ့ၢ်ပှၤဒ်လဲၣ်တဂၤလဲၣ် ဒီးပကဘၣ်ဘူၣ်ထီၣ်ဘါထီၣ်အီၤဒ်လဲၣ်န့ၣ် တၢ်ဘူၣ်တၢ်ဘါသ့ၣ်တဖၣ် သိၣ်လိတၢ်န့ၣ် လီၤဆီလိာ်အသးဒိၣ်မးလီၤ. ကျဲမ့ၢ်ကျဲတီလၢ ပကဘူၣ်ထီၣ်ဘါထီၣ်ကစၢ်ယွၤန့ၣ် ပသ့ၣ်ညါကသ့ဒ်လဲၣ်. ထဲယဟိဝၤယွၤတဂၤဧိၤန့ၣ် ဒုးသ့ၣ်ညါပှၤလၢ ပကဘၣ်ဘူၣ်ထီၣ်ဘါထီၣ်အီၤဒ်လဲၣ်အဂ့ၢ် သ့ဝဲလီၤ.
၂. တၢ်ဘူၣ်ထီၣ်ဘါထီၣ် ယွၤလၢကျဲမ့ၢ်ကျဲတီန့ၣ် နမၤလိန့ၢ်အီၤသ့ဖဲလဲၣ်.
၂ ဒ်သိးပဘူၣ်ထီၣ်ဘါထီၣ် ယဟိဝၤယွၤ လၢကျဲမ့ၢ်ကျဲတီကသ့အဂီၢ် ကစၢ်ယွၤဟ့ၣ်လီၤပှၤလံာ်စီဆှံလီၤ. လၢတၢ်န့ၣ်အဃိ မၤလိလံာ်စီဆှံတက့ၢ်. ဒီးမ့ၢ်လၢယဟိဝၤယွၤသူၣ်အိၣ်သးအိၣ်နၤအဃိ အဝဲကမၤစၢၤနၤ ဒ်သိးနကဒိးန့ၢ်ဘၣ်တၢ်အဘျုးလီၤ.—ယၡါယၤ ၄၈:၁၇.
၃. ကစၢ်ယွၤအဲၣ်ဒိးလၢ ပကမၤတၢ်မနုၤလဲၣ်.
၃ ပှၤတနီၤနီၤစံးဝဲလၢ ကစၢ်ယွၤတူၢ်လိာ်ဝဲ တၢ်ဘူၣ်တၢ်ဘါ ကိးမံၤဒဲးလီၤ. ဘၣ်ဆၣ် ယ့ၣ်ၡူးတသိၣ်လိပှၤဒ်န့ၣ်ဘၣ်. အဝဲစံးဝဲလၢ– “ပှၤလၢအစံးဘၣ်ယၤ, ကစၢ်ဧၢ, ကစၢ်ဧၢန့ၣ် တမ့ၢ်အကလဲၤနုာ်ဆူ မူခိၣ်အဘီအမုၢ်ကိးဂၤဒဲးဘၣ်. မ့ၢ်ထဲ ပှၤလၢအမၤဝဲဖဲဒၣ် ယပၢ်အိၣ်လၢမူခိၣ် အသးန့ၣ်ဧိၤလီၤ.” လၢတၢ်န့ၣ်အဃိ အရ့ဒိၣ်ဒိၣ်မးလၢ ပကဃုသ့ၣ်ညါ ကစၢ်ယွၤအတၢ်ဘၣ်သးလီၤ. မ့ၢ်လၢယ့ၣ်ၡူးပာ်ဖျါထီၣ်ဝဲလၢ ပှၤလၢအတမၤတၢ်ဘၣ်ယွၤအသးန့ၣ် လီၤဂာ်ဒ် “ပှၤလၢအမၤ တၢ်အၢတၢ်သီ” န့ၣ်လီၤ.—မးသဲ ၇:၂၁-၂၃.
၄. ဘၣ်ဃးဒီး တၢ်မၤယွၤအတၢ်ဘၣ်သးန့ၣ် ယ့ၣ်ၡူးသိၣ်လိပှၤဒ်လဲၣ်.
၄ ယ့ၣ်ၡူးဟ့ၣ်ပလီၢ်ပှၤလၢ ပမ့ၢ်အဲၣ်ဒိးမၤ ကစၢ်ယွၤအတၢ်ဘၣ်သးန့ၣ် ပကကွၢ်ဆၢၣ်မဲာ်ဘၣ် တၢ်ကီတၢ်ခဲတဖၣ်လီၤ. အဝဲစံးဝဲလၢ– “လဲၤနုာ်လၢကျဲစၢၤ အအံၣ်န့ၣ်တက့ၢ်. အဂ့ၢ်ဒ်အံၤ, ကျဲစၢၤမ့ၢ်အလဲၢ်, ဒီးကျဲမ့ၢ်အဒိၣ်လၢ အဆှၢဝဲဆူတၢ်ဟးဂူာ်ဟးဂီၤန့ၣ်, ဒီးပှၤလၢအလဲၤနုာ်လၢအီၤတဖၣ် အိၣ်အါဂၤလီၤ. မ့မ့ၢ်ကျဲစၢၤမ့ၢ်အအံၣ်, ဒီးကျဲမ့ၢ်အဆံးလၢ အဆှၢဝဲဆူတၢ်မူန့ၣ်, ဒီးပှၤလၢ အထံၣ်န့ၢ်အီၤတဖၣ် အိၣ်စှၤဂၤလီၤ.” (မးသဲ ၇:၁၃, ၁၄) ကျဲလၢအအံၣ်န့ၣ် မ့ၢ်တၢ်ဘူၣ်ထီၣ်ဘါထီၣ် ယွၤလၢကျဲမ့ၢ်ကျဲတီန့ၣ်လီၤ. ကျဲအဝဲအံၤကဆှၢပှၤဆူ တၢ်မူအထူအယိာ်လီၤ. မ့မ့ၢ်ကျဲလၢအလဲၢ်န့ၣ် မ့ၢ်တၢ်ဘူၣ်ထီၣ်ဘါထီၣ်လၢ ကစၢ်ယွၤတဘၣ်အသးန့ၣ်လီၤ. ဒီးကျဲအံၤ ကဆှၢပှၤဆူတၢ်သံန့ၣ်လီၤ. ဘၣ်ဆၣ် ယဟိဝၤယွၤ တဘၣ်အသးလၢ ပှၤကသံနီတဂၤဘၣ်. လၢတၢ်န့ၣ်အဃိ အဝဲဟ့ၣ်ပှၤကိးဂၤဒဲးအခွဲး လၢကမၤလိဘၣ်အဂ့ၢ်လီၤ.—၂ ပ့းတရူး ၃:၉.
တၢ်ဘူၣ်ထီၣ်ဘါထီၣ် ယွၤလၢကျဲမ့ၢ်ကျဲတီ
၅. ပှၤလၢအဘူၣ်ထီၣ်ဘါထီၣ် ယွၤလၢကျဲမ့ၢ်ကျဲတီန့ၣ် နသ့ၣ်ညါနီၤဖးအီၤ ကသ့ဒ်လဲၣ်.
၅ ယ့ၣ်ၡူးစံးဝဲလၢ ပှၤဘူၣ်ထီၣ်ဘါထီၣ်ယွၤ လၢကျဲမ့ၢ်ကျဲတီန့ၣ် ပနီၤဖးအီၤသ့ဝဲလီၤ. ဒ်သိးပမၤဒ်န့ၣ်ကသ့အဂီၢ် ပကဘၣ်သမံသမိးကွၢ် တၢ်လၢအဝဲသ့ၣ်နာ်ဝဲဒီး တၢ်လၢအဝဲသ့ၣ်မၤဝဲတဖၣ်န့ၣ်လီၤ. ဒီးယ့ၣ်ၡူးစံးဝဲလၢ– “သုကသ့ၣ်ညါအီၤလၢ အတၤသၣ်လီၤ.” အဝဲစံးကဒီးဝဲလၢ– “ကယဲၢ်သ့ၣ်အဂ့ၤ ကိးထံးဒဲးန့ၣ် သၣ်ထီၣ်တၤသၣ်အဂ့ၤလီၤ.” (မးသဲ ၇:၁၆, ၁၇) တၢ်အံၤတအဲၣ်ဒိးစံးဝဲလၢ ပှၤလၢအဘူၣ်ထီၣ်ဘါထီၣ်ယွၤန့ၣ် ကကဲထီၣ်ပှၤလၢပှၤပှဲၤဘၣ်. ဘၣ်ဆၣ်သနာ်က့ ယွၤအခ့အပှၤတဖၣ်န့ၣ် ဂုာ်ကျဲးစၢးမၤတၢ် လၢအဘၣ်ထီဘိလီၤ. ဒ်သိးပသ့ၣ်ညါနီၤဖး ပှၤလၢအဘူၣ်ထီၣ်ဘါထီၣ် ယွၤလၢကျဲမ့ၢ်ကျဲတီကသ့အဂီၢ် ပကသမံသမိးကွၢ်သကိး တၢ်ဂ့ၢ်တၢ်ကျိၤတနီၤလီၤ.
၆, ၇. ဘၣ်မနုၤအဃိ တၢ်ဘူၣ်တၢ်ဘါအမ့ၢ်အတီအတၢ်သိၣ်လိတဖၣ်န့ၣ် ဘၣ်ဒိးသန့ၤထီၣ်အသးလၢ လံာ်စီဆှံအပူၤလဲၣ်. ဒီးယ့ၣ်ၡူးအဒိအတဲာ်န့ၣ် သိၣ်လိပှၤဒ်လဲၣ်.
၆ ပတၢ်သိၣ်လိတဖၣ်န့ၣ် ကြၢးဒိးသန့ၤထီၣ်အသး လၢလံာ်စီဆှံအပူၤလီၤ. လံာ်စီဆှံ စံးဝဲလၢ– “ကယဲၢ်တၢ်ကွဲးအသးခဲလၢာ်န့ၣ်, ကွဲးအသးလၢ ယွၤအသးစီဆှံ, ဒီးဂ့ၤလၢ သိၣ်တၢ်သီတၢ်အဂီၢ်, လၢသိၣ်ဃီၣ်တၢ်အဂီၢ်, လၢဃၣ်လိၤတၢ်အဂီၢ်, လၢသိၣ်လိနဲၣ်လိတၢ်လၢ တၢ်တီတၢ်လိၤအပူၤအဂီၢ်, ဒ်သိးယွၤအပှၤကညီ ကလၢထီၣ်ပှဲၤထီၣ်, ဒီးကအိၣ်ကတဲာ်ကတီၤအသး လၢလၢပှဲၤပှဲၤ, လၢကယဲၢ်တၢ်မၤဂ့ၤ တမံၤလၢ်လၢ်အဂီၢ်လီၤ.” (၂ တံၤမသ့း ၃:၁၆, ၁၇) တၢ်မၢဖိပီလူး ကွဲးလံာ်ဆူ ခရံာ်ဖိတဖၣ်အအိၣ် ဒီးစံးဝဲလၢ– “လၢသုဒိးန့ၢ် ယွၤအကလုၢ်အကထါလၢ သုနၢ်ဟူလၢပှၤန့ၣ် သုတဒိးန့ၢ်ဘၣ်အီၤဒ် ပှၤကညီအကလုၢ်အသိးဘၣ်. မ့မ့ၢ်သုဒိးန့ၢ်အီၤ ဒ်အမ့ၢ်နီၢ်နီၢ်အသိး, လၢယွၤလၢအမၤတၢ်လၢ ပှၤစူၢ်က့ၤနာ်က့ၤတၢ်သုဝဲအပူၤ အကလုၢ်န့ၣ်လီၤ.” (၁ သ့းစၤလနံ ၂:၁၃) တၢ်ဘူၣ်တၢ်ဘါ အမ့ၢ်အတီအတၢ်သိၣ်လိတဖၣ်န့ၣ် ဒိးသန့ၤထီၣ်အသးလၢ ကစၢ်ယွၤအကလုၢ်ကထါ လံာ်စီဆှံအပူၤလီၤ. တဒိးသန့ၤထီၣ်အသး လၢပှၤဟီၣ်ခိၣ်ဖိ အတၢ်ဆိကမိၣ်, အတၢ်ဆဲးတၢ်လၤ မ့တမ့ၢ်လၢတၢ်အဂုၤအဂၤတဖၣ် အဖီခိၣ်ဘၣ်.
၇ တၢ်လၢယ့ၣ်ၡူးသိၣ်လိဝဲ ကိးမံၤဒဲးန့ၣ် ဒိးသန့ၤထီၣ်အသးလၢ ယွၤအကလုၢ်ကထါအပူၤလီၤ. (ဖး ယိၤဟၣ် ၁၇:၁၇ တက့ၢ်.) ဒီးအဝဲသူဝဲ လံာ်စီဆှံတၢ်ကွဲးအသး ခဲအံၤခဲအံၤလီၤ. (မးသဲ ၄:၄, ၇, ၁၀) ယွၤအခ့အပှၤ လၢအမ့ၢ်အတီတဖၣ် ကွၢ်လိမၤဒိးဝဲ ယ့ၣ်ၡူးအဒိအတဲာ် ဒီးအဝဲသ့ၣ်အတၢ်သိၣ်လိ ကိးမံၤဒဲးန့ၣ် ဒိးသန့ၤထီၣ်အသးလၢ လံာ်စီဆှံအပူၤလီၤ.
၈. ဘၣ်ဃးဒီးတၢ်ဘူၣ်ထီၣ်ဘါထီၣ် ယဟိဝၤယွၤန့ၣ် ယ့ၣ်ၡူးစံးဝဲဒ်လဲၣ်.
၈ ပကြၢးဘူၣ်ထီၣ်ဘါထီၣ်ထဲ ယဟိဝၤယွၤတဂၤဧိၤလီၤ. စံးထီၣ်ပတြၢၤ ၈၃:၁၈ စံးဝဲလၢ– “ဒီးကသ့ၣ်ညါလၢ နဲဒၣ်တဂၤဃီလၢ နမံၤမ့ၢ်ယဟိဝၤန့ၣ် မ့ၢ်တၢ်ထီကတၢၢ်တဂၤလၢ ဟီၣ်ခိၣ်ဒီဘ့ၣ်ညါ အဖီခိၣ်လီၤ.” ယ့ၣ်ၡူးအဲၣ်ဒိးဝဲလၢ ပှၤဟီၣ်ခိၣ်ဖိတဖၣ် ကသ့ၣ်ညါဝဲလၢ ယွၤအမ့ၢ်အတီန့ၣ် မ့ၢ်မတၤလဲၣ်. ဒီးအဝဲသိၣ်လိပှၤဟီၣ်ခိၣ်ဖိတဖၣ် လၢယွၤအမံၤလီၤ. (ဖး ယိၤဟၣ် ၁၇:၆ တက့ၢ်.) ယ့ၣ်ၡူးစံးဝဲလၢ– “ယွၤနကစၢ်န့ၣ် နဘၣ်ဘူၣ်ထီၣ်ဘါထီၣ်အီၤ, ဒီးနဘၣ်မၤထဲ အဝဲဒၣ်အတၢ်ဧိၤလီၤ.” (မးသဲ ၄:၁၀) လၢတၢ်န့ၣ်အဃိ ဒ်ပမ့ၢ်ယွၤအခ့အပှၤတဖၣ်အသိး ပမၤထွဲယ့ၣ်ၡူးအဒိအတဲာ်လီၤ. ပဘူၣ်ထီၣ်ဘါထီၣ်ထဲ ယဟိဝၤယွၤတဂၤဧိၤ ဒီးပသူယွၤအမံၤစ့ၢ်ကီးလီၤ. တကးဒံးဘၣ် ပသိၣ်လိ ပှၤအဂၤလၢကစၢ်ယွၤအမံၤ ဒီးကစၢ်ကမၤတၢ်လၢ ပဂီၢ်ဒ်လဲၣ်အဂ့ၢ်န့ၣ်လီၤ.
၉, ၁၀. ပပာ်ဖျါထီၣ် တၢ်အဲၣ်လိာ်သးကဒဲကဒဲ သ့လၢကျဲဒ်လဲၣ်.
၉ ပကဘၣ်ပာ်ဖျါထီၣ် တၢ်အဲၣ်နီၢ်နီၢ် လၢပှၤဟီၣ်ခိၣ်ဖိအဂီၢ်. ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ အဝဲသ့ၣ် ကဘၣ်အဲၣ်လိာ်သး ကဒဲကဒဲန့ၣ်လီၤ. (ဖး ယိၤဟၣ် ၁၃:၃၅ တက့ၢ်.) ပအိၣ်ဟဲလၢ တၢ်လီၢ်တပူၤဂ့ၤတပူၤဂ့ၤ, ပတၢ်ဆဲးတၢ်လၤမၤအသးဒ်လဲၣ်ဂ့ၤဒ်လဲၣ်ဂ့ၤ ဒီးပကဲဒိၣ်မ့ၢ်ဂ့ၤ, ဖှီၣ်မ့ၢ်ဂ့ၤတမ့ၢ်တၢ်လၢ အရ့ဒိၣ်ဘၣ်. ခီဖျိလၢ ပအဲၣ်လိာ်ပသး ကဒဲကဒဲအဃိ ပအိၣ်ဃူအိၣ်ဖိးဒ် ဒီပုၢ်ဝဲၢ်မုၣ်ဒီပုၢ်ဝဲၢ်ခွါအသိးလီၤ. (ကလီးစဲ ၃:၁၄) လၢတၢ်န့ၣ်အဃိ ပတဒုးတၢ်ဒီးမၤသံပှၤဂၤဘၣ်. လံာ်စီဆှံ စံးဝဲလၢ– “ယွၤအဖိ, ဒီးမုၣ်ကီၤလံၢ်အဖိ အိၣ်ဖျါဝဲလီၤ. ကယဲၢ်ပှၤလၢ အတမၤဘၣ်တၢ်တီတၢ်လိၤ, ဒီးပှၤလၢအတအဲၣ်ဘၣ် အဒီပုၢ်ဝဲၢ်န့ၣ်, တဘၣ်ဃးဘၣ်ဒီးယွၤဘၣ်.” ဒီးစံးကဒီးဝဲလၢ– “ဒ်သိး ပကအဲၣ်လိာ်ကွံလိာ်ပသးလီၤ. တမ့ၢ်ဘၣ်ဒ် စီၤကၤယံၣ်လၢ အဘၣ်ဃးဒီး ပှၤအၢတဂၤ, ဒီးမၤသံအဒီပုၢ်ဝဲၢ် အသိးန့ၣ်ဘၣ်.”—၁ ယိၤဟၣ် ၃:၁၀-၁၂; ၄:၂၀, ၂၁.
၁၀ ပသူပတၢ်ဆၢကတီၢ်, ပဂံၢ်ပဘါဒီး ပစုလီၢ်ခီၣ်ခိၣ် လၢပကမၤစၢၤလိာ်သးဒီး ဟ့ၣ်ဂံၢ်ဟ့ၣ်ဘါလိာ်သး ကဒဲကဒဲလီၤ. (ဧ့ၤဘြံၤ ၁၀:၂၄, ၂၅) ဒ်လံာ်စီဆှံစံးဝဲအသိး မ် “ပမၤဂ့ၤတၢ်လၢ ပှၤကညီကိးဂၤဒဲးတက့ၢ်.”—ကလၤတံ ၆:၁၀.
၁၁. ဘၣ်မနုၤအဃိ ပဘၣ်တူၢ်လိာ်ယ့ၣ်ၡူး ဒ်အမ့ၢ်ကျဲလၢအဆှၢပှၤဆူ ကစၢ်ယွၤအအိၣ်န့ၣ်လဲၣ်.
၁၁ ခီဖျိလၢ ယ့ၣ်ၡူးမ့ၢ်ကျဲလၢအဆှၢပှၤဆူ ကစၢ်ယွၤအအိၣ်အဃိ ပကဘၣ်ဒိကနၣ်အကလုၢ်လီၤ. လံာ်စီဆှံစံးဝဲလၢ– “တၢ်အုၣ်က့ၤခီၣ်က့ၤလၢ ပှၤဂၤအပူၤန့ၣ်, တအိၣ်ဘၣ်နီတဂၤဘၣ်. အဂ့ၢ်ဒ်အံၤ, မံၤအဂုၤအဂၤလၢ ပှၤကညီအကျါ, လၢမူခိၣ်အဖီလာ်, တၢ်တဟ့ၣ်ဘၣ်ဝဲလၢ ပဘၣ်တုၤလၢ တၢ်အုၣ်က့ၤခီၣ်က့ၤလၢ အပူၤနီတမံၤဘၣ်.” (မၤတၢ် ၄:၁၂) လၢတၢ်မၤလိ ၅ အပူၤန့ၣ် ပမၤလိဘၣ်လၢ ယဟိဝၤယွၤဆှၢလီၤ ယ့ၣ်ၡူးလၢကဟ့ၣ်လုၢ်ထီၣ်အသးသမူ ဒ်တၢ်ပှ့ၤက့ၤလၢ ပှၤဟီၣ်ခိၣ်ဖိအဂီၢ်န့ၣ်လီၤ. (မးသဲ ၂၀:၂၈) ယဟိဝၤယွၤ ဃုထၢထီၣ်ယ့ၣ်ၡူးလၢ စီၤပၤဒ်သိးကပၢဝဲ ဟီၣ်ခိၣ်ဒီဘ့ၣ်န့ၣ်လီၤ. လၢတၢ်န့ၣ်အဃိ လံာ်စီဆှံစံးဘၣ်ပှၤလၢ ပမ့ၢ်အဲၣ်ဒိးအိၣ်မူလီၤထူလီၤယိာ်န့ၣ် ပကဘၣ်ဒိကနၣ် ယ့ၣ်ၡူးအကလုၢ်လီၤ.—ဖး ယိၤဟၣ် ၃:၃၆ တက့ၢ်.
၁၂. ဘၣ်မနုၤအဃိ ပတမၤဘၣ်ဃးပသးဒီး ထံဂ့ၢ်ကီၢ်ဂ့ၢ်လဲၣ်.
၁၂ ပတကြၢးမၤဘၣ်ဃးပသးဒီး ထံဂ့ၢ်ကီၢ်ဂ့ၢ်ဘၣ်. ယ့ၣ်ၡူးတမၤဘၣ်ဃးအသးဒီး ထံဂ့ၢ်ကီၢ်ဂ့ၢ်ဘၣ်. ဖဲရိမ့ၤအပဒိၣ်ဖးဒိၣ်စီၤပံၤလး သမံသမိးယ့ၣ်ၡူးအဆၢကတီၢ်န့ၣ် အဝဲစံးဆၢက့ၤအီၤလၢ– “ယဘီယမုၢ် တဘၣ်ဃးဘၣ်ဒီး ဟီၣ်ခိၣ်အံၤဘၣ်.” (ဖး ယိၤဟၣ် ၁၈:၃၆ တက့ၢ်.) ဒ်ယ့ၣ်ၡူးအသိး ပဝဲသ့ၣ်စ့ၢ်ကီး ပတီဒီးယွၤအဘီအမုၢ်လၢမူခိၣ်လီၤ. လၢတၢ်န့ၣ်အဃိ ပမ့ၢ်အိၣ်လၢ တၢ်လီၢ်ဖဲလဲၣ်ဖဲလဲၣ်ဘၣ်ဆၣ် ပတပၣ်ဃုာ်လၢ ထံဂ့ၢ်ကီၢ်ဂ့ၢ်အကျါဘၣ်. ဒ်လဲၣ်ဂ့ၤဒ်လဲၣ်ဂ့ၤ လံာ်စီဆှံစံးဘၣ်ပှၤလၢ ပကဘၣ်ဒိကနၣ် “တၢ်စိတၢ်ကမီၤအဒိၣ်တဖၣ်” လီၤ. တၢ်အံၤအဲၣ်ဒိးစံးဝဲ ပဒိၣ်အတၢ်ပၢတၢ်ပြးတဖၣ်လီၤ. (ရိမ့ၤ ၁၃:၁) ဖဲပအိၣ်တၢ်လီၢ်တပူၤဂ့ၤတပူၤဂ့ၤ ပဒိကနၣ်ထံကီၢ်အတၢ်သိၣ်တၢ်သီတဖၣ်လီၤ. ဘၣ်ဆၣ်သနာ်က့ ဖဲတၢ်သိၣ်တၢ်သီတဖၣ် ထီဒါလိာ်အသး ဒီးယွၤအတၢ်သိၣ်တၢ်သီန့ၣ် ပကွၢ်လိပှၤတၢ်မၢဖိတဖၣ် လၢအစံးဝဲ– “ပဘၣ်စူၢ်ယွၤအါန့ၢ် ပစူၢ်ပှၤကညီတက့ၢ်လီၤ.”—မၤတၢ် ၅:၂၉; မၢ်ကူး ၁၂:၁၇.
၁၃. ပစံၣ်တဲၤတဲလီၤတၢ် ဘၣ်ဃးဒီး တၢ်ဂ့ၢ်မနုၤလဲၣ်.
၁၃ ပနာ်လၢထဲယွၤအဘီအမုၢ် တၢ်ပၢတခါန့ၣ် မၤလီၤမၢ်ကွံာ် ဟီၣ်ခိၣ်တၢ်ကီတၢ်ခဲသ့ဝဲလီၤ. ယ့ၣ်ၡူးစံးဝဲလၢ “ဘီမုၢ်အတၢ်သးခု အကစီၣ်” ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်လီၤ. (ဖး မးသဲ ၂၄:၁၄ တက့ၢ်.) တၢ်လၢယွၤအဘီအမုၢ် မၤန့ၢ်ပှၤသ့ဝဲန့ၣ် ဟီၣ်ခိၣ်အပဒိၣ်ပပှၢ်တဖၣ် မၤန့ၢ်ပှၤတသ့ဘၣ်. (စံးထီၣ်ပတြၢၤ ၁၄၆:၃) ယ့ၣ်ၡူးသိၣ်လိပှၤလၢ ပကဘၣ်ဃ့ထုကဖၣ် လၢယွၤအဘီအမုၢ်ကဟဲဝဲလီၤ. အဝဲစံးဝဲလၢ– “နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး ဖဲဒၣ်နသးတက့ၢ်.” (မးသဲ ၆:၉, ၁၀) လံာ်စီဆှံ ပာ်ဖျါထီၣ်ဝဲလၢ ယွၤအဘီအမုၢ်ကမၤဟးဂီၤကွံာ် ဟီၣ်ခိၣ်အတၢ်ပၢတၢ်ပြးခဲလၢာ်ဒီး “မ့မ့ၢ်အဝဲန့ၣ် ကအိၣ်လီၤထူလီၤယိာ်လီၤ.”—ဒၤနံးယ့လး ၂:၄၄.
၁၄. မ့ၢ်နနာ်လၢမတၤတဖၣ် ဘူၣ်ထီၣ်ဘါထီၣ် ယွၤလၢကျဲမ့ၢ်ကျဲတီန့ၣ်လဲၣ်.
၁၄ ဖဲပမၤလိ တၢ်ဂ့ၢ်တၢ်ကျိၤတဖၣ်အံၤ ဝံၤအလီၢ်ခံန့ၣ် ကြၢးပသံကွၢ်လီၤက့ၤပသးလၢ မတၤတဖၣ် အတၢ်သိၣ်လိန့ၣ် ဒိးသန့ၤထီၣ်အသးလၢ လံာ်စီဆှံအပူၤလဲၣ်. မတၤတဖၣ် တဲဘၣ်ပှၤဂၤလၢ ယွၤအမံၤလဲၣ်. မတၤတဖၣ် ပာ်ဖျါထီၣ်တၢ်အဲၣ်ကဒဲကဒဲလဲၣ် ဒီးနာ်ဝဲလၢ ကစၢ်ယွၤဆှၢလီၤ ယ့ၣ်ၡူးလၢကမၤပူၤဖျဲး ပှၤဟီၣ်ခိၣ်ဖိလဲၣ်. မတၤတဖၣ် တပၣ်ဃုာ်လၢ ထံဂ့ၢ်ကီၢ်ဂ့ၢ်အကျါလဲၣ်. မတၤတဖၣ် စံၣ်တဲၤတဲလီၤတၢ်လၢ ထဲယွၤအဘီအမုၢ်န့ၣ် မၤလီၤမၢ်ကွံာ် ပတၢ်ကီတၢ်ခဲသ့ဝဲလဲၣ်. မ့ၢ်ထဲယဟိဝၤပှၤအုၣ်အသးတဖၣ်လီၤ.—ယၡါယၤ ၄၃:၁၀-၁၂.
နကမၤဒ်လဲၣ်
၁၅. ပမ့ၢ်အဲၣ်ဒိးလၢ ကစၢ်ယွၤကတူၢ်လိာ် ပတၢ်ဘူၣ်ထီၣ်ဘါထီၣ်န့ၣ် ပကဘၣ်မၤတၢ်မနုၤလဲၣ်.
၁၅ ထဲပနာ်ယွၤန့ၣ် တလၢပှဲၤဒံးဘၣ်. တၢ်ဝံတၢ်နါဒၣ်လဲာ် နာ်လၢယွၤအိၣ်ဝဲလီၤ. ဘၣ်ဆၣ် အဝဲသ့ၣ်တဒိကနၣ်ယွၤအကလုၢ်ဘၣ်. (ယၤကိာ် ၂:၁၉) ပမ့ၢ်အဲၣ်ဒိးလၢ ကစၢ်ယွၤတူၢ်လိာ် ပတၢ်ဘူၣ်ထီၣ်ဘါထီၣ်န့ၣ် ပကဘၣ်နာ်အီၤ တကးဒံးဘၣ် ပကဘၣ်အိၣ်မူမၤထွဲ ဒ်ကစၢ်ယွၤတဲဝဲအသိးန့ၣ်လီၤ.
၁၆. ဘၣ်မနုၤအဃိ ပကဘၣ်ပာ်တ့ၢ်ကွံာ် တၢ်ဘူၣ်တၢ်ဘါအကမၣ်လဲၣ်.
၁၆ ဒ်သိးကစၢ်ယွၤကတူၢ်လိာ် ပတၢ်ဘူၣ်ထီၣ်ဘါထီၣ်အဂီၢ် ပကဘၣ်ပာ်တ့ၢ်ကွံာ် တၢ်ဘူၣ်တၢ်ဘါလၢ အကမၣ်တဖၣ်န့ၣ်လီၤ. ဝံယၡါယၤ ကွဲးဝဲလၢ– “ဟးထီၣ်လၢ အသးကံၢ်ပူၤန့ၣ်တက့ၢ်. ကဆှီထီၣ်တက့ၢ်.” (ယၡါယၤ ၅၂:၁၁; ၂ ကရံၣ်သူး ၆:၁၇) လၢတၢ်န့ၣ်အဃိ ပကဘၣ်စူးကွံာ်ညိကွံာ် တၢ်လၢအဘၣ်ထွဲလိာ်အသးဒီးတၢ်ဘူၣ်တၢ်ဘါအကမၣ်န့ၣ်လီၤ.
၁၇, ၁၈. “ဘၤဘူၤလိၣ်ဖးဒိၣ်” န့ၣ်မ့ၢ်တၢ်မနုၤလဲၣ်. ဒီးဘၣ်မနုၤအဃိ ပကဘၣ်ပာ်တ့ၢ်ကွံာ်အီၤလၢအဆိအချ့လဲၣ်.
၁၇ တၢ်ဘူၣ်တၢ်ဘါအကမၣ်န့ၣ် အဲၣ်ဒိးစံးဝဲတၢ်မနုၤလဲၣ်. အဲၣ်ဒိးစံးဝဲ တၢ်ဘူၣ်တၢ်ဘါတခါဂ့ၤတခါဂ့ၤလၢ အတၢ်သိၣ်လိတဖၣ်န့ၣ် ထီဒါလိာ်အသးဒီး ယွၤအကလုၢ်ကထါန့ၣ်လီၤ. တၢ်ဘူၣ်တၢ်ဘါလၢ အကမၣ်ခဲလၢာ်န့ၣ် လံာ်စီဆှံကိးဝဲလၢ “ဘၤဘူၤလိၣ်ဖးဒိၣ်” လီၤ. (လီၣ်ဖျါ ၁၇:၅) ဘၣ်မနုၤအဃိလဲၣ်. ဖဲထံလုၢ်ဘၢတၢ်လၢ စီၤနိအၤအစိၤဝံၤအလီၢ်ခံန့ၣ် တၢ်ဘူၣ်တၢ်ဘါအတၢ်သိၣ်လိလၢ အကမၣ်တဖၣ်စးထီၣ်အသးလၢ ဝ့ၢ်ဘၤဘူၤလိၣ်အပူၤလီၤ. တၢ်သိၣ်လိလၢအကမၣ်တဖၣ်အံၤ ရၤလီၤအသးလၢ ဟီၣ်ခိၣ်ဒီဘ့ၣ်လီၤ. အဒိ ပှၤအိၣ်လၢဝ့ၢ်ဘၤဘူၤလိၣ် အပူၤတဖၣ် ဘူၣ်ထီၣ်ဘါထီၣ်ဝဲ ယွၤသၢဂၤတဂၤဃီလီၤ. မုၢ်မဆါတနံၤအံၤစ့ၢ်ကီး တၢ်ဘူၣ်တၢ်ဘါအါမးန့ၣ် သိၣ်လိဝဲယွၤသၢဂၤတဂၤဃီလီၤ. ဘၣ်ဆၣ်သနာ်က့ လံာ်စီဆှံသိၣ်လိဝဲလၢ ယွၤအမ့ၢ်အတီန့ၣ် အိၣ်ထဲယဟိဝၤယွၤတဂၤဧိၤလီၤ. ဒီးယ့ၣ်ၡူးန့ၣ် မ့ၢ်အဖိခွါလီၤ. (ယိၤဟၣ် ၁၇:၃) ပှၤအိၣ်လၢ ဝ့ၢ်ဘၤဘူၤလိၣ်အပူၤန့ၣ် နာ်စ့ၢ်ကီးဝဲလၢ ဖဲပှၤသံဝံၤအလီၢ်ခံ အကလၤလၢအသံတသ့န့ၣ် အိၣ်မူဒံးဝဲလီၤ. ဒီးအကလၤလၢအသံတသ့အံၤ တူၢ်ဘၣ်ဝဲတၢ်နးတၢ်ဖှီၣ်လၢ လရာ်မ့ၣ်အူအပူၤသ့ဝဲလီၤ. ဘၣ်ဆၣ် တၢ်သိၣ်လိတဖၣ်အံၤ တမ့ၢ်တၢ်လၢ အမ့ၢ်အတီဘၣ်.—ကွၢ်တၢ်ဂ့ၢ် ၁၄ ဒီး ၁၇ လၢလံာ်အကတၢၢ်တက့ၢ်.
၁၈ ကစၢ်ယွၤ တဲဆိပာ်စၢၤဝဲလၢ တယံာ်လၢၤဘၣ်န့ၣ် တၢ်ကမၤဟးဂီၤကွံာ် တၢ်ဘူၣ်တၢ်ဘါအကမၣ်ခဲလၢာ်န့ၣ်လီၤ. (လီၣ်ဖျါ ၁၈:၈) ဘၣ်မနုၤအဃိ ပကဘၣ်ဟးထီၣ်ကွံာ် လၢတၢ်ဘူၣ်တၢ်ဘါအကမၣ်အပူၤ လၢအဆိအချ့လဲၣ်န့ၣ် မ့ၢ်နနၢ်ပၢၢ်ဧါ. ယဟိဝၤယွၤအဲၣ်ဒိးဝဲလၢ နကမၤဒ်အံၤချ့ချ့ မ့တမ့ၢ်ဘၣ်ဒီး နကစဲၤခံဘၣ်ဖုးလီၤ.—လီၣ်ဖျါ ၁၈:၄.
နမ့ၢ်မၤသကိးတၢ်ဒီး ယဟိဝၤယွၤအပှၤဂီၢ်မုၢ်န့ၣ် နကပၣ်ဃုာ်လၢ ဟီၣ်ခိၣ်ဒီဘ့ၣ် အဒူၣ်ဖိထၢဖိအကျါန့ၣ်လီၤ
၁၉. နမ့ၢ်ဆၢတဲာ်လီၤနသးလၢ နကမၤယဟိဝၤယွၤ အတၢ်မၤန့ၣ် အဝဲကကဟုကယာ်နၤဒ်လဲၣ်.
၁၉ ဖဲနဆၢတဲာ်လီၤနသးလၢ နကပာ်တ့ၢ်ကွံာ် တၢ်ဘူၣ်တၢ်ဘါလၢအကမၣ် ဒီးမၤယဟိဝၤယွၤအတၢ်မၤန့ၣ် ဘၣ်သ့ၣ်သ့ၣ် နကကွၢ်ဆၢၣ်မဲာ်ဘၣ် တၢ်ကီတၢ်ခဲတနီၤလီၤ. မ့ၢ်လၢနတံၤသကိး မ့တမ့ၢ်နဟံၣ်ဖိဃီဖိ တနီၤန့ၣ်တနၢ်ပၢၢ် နတၢ်ဆၢတဲာ်အဃိ ဘၣ်သ့ၣ်သ့ၣ် အဝဲသ့ၣ်ကမၤကီမၤခဲနၤလီၤ. ဘၣ်ဆၣ် ယဟိဝၤယွၤ တပာ်တ့ၢ်နၤနီတဘျီဘၣ်. အဝဲကကဟုကယာ်နၤဒ်လဲၣ်. အဒိ နကပၣ်ဃုာ်လၢ ဟီၣ်ခိၣ်ဒီဘ့ၣ် အဒူၣ်ဖိထၢဖိအကျါလီၤ. ဒူၣ်ဖိထၢဖိတဒူၣ်အံၤ အဲၣ်လိာ်ကွံလိာ်အသးနီၢ်ကီၢ် ဒီးအဝဲသ့ၣ်အနီၣ်ဂံၢ် အိၣ်ဝဲလၢအကကွဲၢ်တဖၣ်လီၤ. နကအိၣ်ဒီးတၢ်မုၢ်လၢ်လၢ နကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤလီၤထူလီၤယိာ်လီၤ. (မၢ်ကူး ၁၀:၂၈-၃၀) နတံၤသကိးဒီး နဟံၣ်ဖိဃီဖိတနီၤ လၢအထီဒါနတၢ်ဆၢတဲာ် လၢနကမၤယွၤအတၢ်ဘၣ်သးန့ၣ် လၢခံအသးဆီတလဲသ့ဝဲလီၤ. ဘၣ်သ့ၣ်သ့ၣ် အဝဲသ့ၣ်ကအဲၣ်ဒိးမၤလိ လံာ်စီဆှံလီၤ.
၂၀. ဘၣ်မနုၤအဃိ အရ့ဒိၣ်လၢ ပကဘူၣ်ထီၣ်ဘါထီၣ် ယဟိဝၤယွၤ လၢကျဲမ့ၢ်ကျဲတီန့ၣ်လဲၣ်.
၂၀ တယံာ်လၢၤဘၣ်န့ၣ် ကစၢ်ယွၤကမၤဟးဂီၤကွံာ် တၢ်အၢတၢ်သီခဲလၢာ် ဒီးအဘီအမုၢ်န့ၣ် ကပၢက့ၤဟီၣ်ခိၣ်ဒီဘ့ၣ်လီၤ. (၂ ပ့းတရူး ၃:၉, ၁၃) တၢ်အံၤကမ့ၢ် တၢ်ဆၢကတီၢ်လၢ အလီၤသူၣ်ဖှံသးညီဒိၣ်မးလီၤ. ပှၤကိးဂၤဒဲးကဘူၣ်ထီၣ်ဘါထီၣ်ဝဲ ယဟိဝၤယွၤဒ်ကစၢ်ဘၣ်အသးအသိးန့ၣ်လီၤ. လၢတၢ်န့ၣ်အဃိ အရ့ဒိၣ်လၢခဲအံၤန့ၣ် နကဆၢတဲာ်လီၤနသးလၢ နကဘူၣ်ထီၣ်ဘါထီၣ် ယဟိဝၤယွၤလၢ ကျဲမ့ၢ်ကျဲတီန့ၣ်လီၤ.
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
မ့ၢ်ယဟိဝၤပှၤအုၣ်အသးတဖၣ် မၢဆူၣ်ပှၤဂၤလၢ ကဆီတလဲအတၢ်ဘူၣ်တၢ်ဘါဧါ
ယဟိဝၤပှၤအုၣ်အသးတဖၣ် အတၢ်စံၣ်တဲၤတဲလီၤန့ၣ် ဆီတလဲပှၤတၢ်ဘူၣ်တၢ်ဘါဧါ. အဝဲသ့ၣ် မၢဆူၣ်ပှၤဂၤလၢ ကဆီတလဲအတၢ်ဘူၣ်တၢ်ဘါဧါ.
