တၢ်မၤလိ ၁၃
ပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် သးသမူ
၁. သးသမူန့ၣ် ဟဲလၢမတၤအအိၣ်လဲၣ်.
ယဟိဝၤယွၤ “မ့ၢ် ကစၢ်လၢအမူဝဲ” လီၤ. (ယံးရမံယၤ ၁၀:၁၀) ကစၢ်ယွၤမ့ၢ် ပတၢ်ဘၣ်တ့ကစၢ်ဒီး အဝဲဟ့ၣ်ပှၤ သးသမူလီၤ. လံာ်စီဆှံစံးဝဲလၢ– “ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်, ဒီးမ့ၢ်နသးအိၣ်ဒီး, ကဲထီၣ်ဝဲ, ဒီးဘၣ်တၢ်တ့လီၤအီၤလီၤ.” (လီၣ်ဖျါ ၄:၁၁) ယဟိဝၤယွၤ အဲၣ်ဒိးလၢ ပကအိၣ်မူဘၣ်လီၤ. သးသမူမ့ၢ် တၢ်ဟ့ၣ်အလုၢ်ဒိၣ်ပှ့ၤဒိၣ်တခါလၢ အဟဲလၢယွၤအအိၣ်လီၤ.—ဖး စံးထီၣ်ပတြၢၤ ၃၆:၉ တက့ၢ်.
၂. ဒ်သိးပတၢ်အိၣ်မူ ကပှဲၤဒီးတၢ်သူၣ်ဖှံသးညီအဂီၢ် ပကဘၣ်မၤတၢ်မနုၤလဲၣ်.
၂ ဒ်သိးပကအိၣ်မူဘၣ်အဂီၢ် ယဟိဝၤယွၤ ကတဲာ်ကတီၤန့ၢ်ပှၤ တၢ်အီၣ်လၢပကအီၣ်အဂီၢ် ဒီးထံလၢပကအီအဂီၢ်လီၤ. (မၤတၢ် ၁၇:၂၈) အါန့ၢ်အန့ၣ် ကစၢ်ယွၤအဲၣ်ဒိးဝဲလၢ ပတၢ်အိၣ်မူကပှဲၤဒီး တၢ်သူၣ်ဖှံသးညီလီၤ. (မၤတၢ် ၁၄:၁၅-၁၇) ဒ်သိးပတၢ်အိၣ်မူ ကပှဲၤဒီးတၢ်သူၣ်ဖှံသးညီအဂီၢ် ပကဘၣ်ဒိကနၣ် ယွၤအတၢ်သိၣ်တၢ်သီတဖၣ်လီၤ.—ယၡါယၤ ၄၈:၁၇, ၁၈.
သးသမူန့ၣ် ကစၢ်ယွၤထံၣ်ဝဲဒ်လဲၣ်
၃. ဖဲစီၤကၤယံၣ်မၤသံ စီၤဟ့းဘ့းလးဝံၤအလီၢ်ခံ ယဟိဝၤယွၤ မၤအီၤဒ်လဲၣ်.
၃ လံာ်စီဆှံသိၣ်လိပှၤလၢ ပသးသမူ ဃုာ်ဒီးပှၤဂၤအသးသမူန့ၣ် မ့ၢ်တၢ်လုၢ်ဒိၣ်ပှ့ၤဒိၣ် လၢယွၤအဂီၢ်လီၤ. အဒိ ဖဲနီၢ်အံၣ်အုဒီး စီၤအၤဒၣ်အဖိခွါ စီၤကၤယံၣ်သးပှံၢ်ထီၣ် အပုၢ်စီၤဟ့းဘ့းလးအခါ ယဟိဝၤယွၤဟ့ၣ်ပလီၢ်အီၤလၢ အကပၢၤဃာ်အတၢ်သးဒိၣ်လီၤ. ဘၣ်ဆၣ် စီၤကၤယံၣ်တဒိကနၣ်ဝဲဘၣ်. ဒီးအသးဒိၣ်ထီၣ် တုၤဒၣ်လဲာ်အဝဲ “ဂဲၤထၢၣ်ထီဒါအပုၢ် စီၤဟ့းဘ့းလး, ဒီးမၤသံအီၤလီၤ.” (၁ မိၤၡ့ ၄:၃-၈) မ့ၢ်လၢစီၤကၤယံၣ်မၤသံ အပုၢ်စီၤဟ့းဘ့းလးအဃိ ယဟိဝၤယွၤစံၣ်ညီၣ်အီၤလီၤ. (၁ မိၤၡ့ ၄:၉-၁၁) လၢတၢ်န့ၣ်အဃိ တၢ်သူၣ်ဒိၣ်သးဖျိး ဒီးတၢ်သးဟ့န့ၣ် မ့ၢ်တၢ်လၢအလီၤဘၣ်ယိၣ် ခီဖျိလၢ အဆီၣ်ထွဲပှၤလၢ ပကမၤဆူၣ်မၤစိးပှၤဂၤ ဒီးကဲထီၣ်ပှၤလၢ တၢ်သူၣ်ကညီၤသးကညီၤ တအိၣ်အဃိလီၤ. ပှၤလၢ အမၤတၢ်ဒ်အံၤသ့ၣ်တဖၣ်န့ၣ် ဒိးန့ၢ်ဘၣ် တၢ်မူအထူအယိာ်တသ့ဘၣ်. (ဖး ၁ ယိၤဟၣ် ၃:၁၅ တက့ၢ်.) ဒ်သိးပမၤ တၢ်ဘၣ်ယဟိဝၤယွၤအသး ကသ့အဂီၢ် ပကဘၣ်ဂုာ်ကျဲးစၢး အဲၣ်ပှၤကိးဂၤဒဲးလီၤ.—၁ ယိၤဟၣ် ၃:၁၁, ၁၂.
၄. တၢ်မၤလိာ်တခါလၢ ကစၢ်ယွၤဟ့ၣ်လီၤ ပှၤအံၣ်စရ့လးဖိတဖၣ်န့ၣ် သိၣ်လိပှၤဒ်လဲၣ်.
၄ အနံၣ်လၢ အကထိတဖၣ် လဲၤပူၤကွံာ်ဝံၤ အလီၢ်ခံန့ၣ် ဖဲယဟိဝၤယွၤဟ့ၣ်လီၤ တၢ်မၤလိာ်အဘီတဆံဆူ စီၤမိၤၡ့အအိၣ်အခါ အဝဲပာ်ဖျါထီၣ်ဝဲလၢ သးသမူန့ၣ် မ့ၢ်တၢ်လုၢ်ဒိၣ်ပှ့ၤဒိၣ် လၢအဂီၢ်လီၤ. လၢတၢ်မၤလိာ်တဖၣ်အံၤအကျါ တခါန့ၣ် စံးဝဲလၢ– “မၤသံတၢ်တဂ့ၤ.” (၅ မိၤၡ့ ၅:၁၇) ပှၤလၢ အမၤသံဘၣ်ပှၤတဂၤဂၤန့ၣ် ကဘၣ်တၢ်မၤသံအီၤ စ့ၢ်ကီးလီၤ.
၅. ဘၣ်ဃးဒီး တၢ်မၤဟးဂီၤဟုးန့ၣ် ကစၢ်ယွၤထံၣ်ဝဲဒ်လဲၣ်.
၅ ဘၣ်ဃးဒီး တၢ်မၤဟးဂီၤဟုးန့ၣ် ကစၢ်ယွၤထံၣ်ဝဲဒ်လဲၣ်. ဖိသၣ်လၢ အတအိၣ်ဖျဲၣ်ထီၣ်ဒံးဒၣ်လဲာ် အသးသမူန့ၣ်မ့ၢ် တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လီၤ. ဖဲယဟိဝၤယွၤ ဟ့ၣ်လီၤပှၤအံၣ်စရ့လးဖိတဖၣ် တၢ်သိၣ်တၢ်သီအဆၢကတီၢ်န့ၣ် ကစၢ်စံးဝဲလၢ ပှၤတဂၤဂၤ မ့ၢ်မၤဘၣ်ဒိ ပိာ်မုၣ်လၢအအိၣ်ဒီး အဟုးအသး ဒီးအဟုးမ့ၢ်ဟးဂီၤကွံာ်န့ၣ် ပှၤအဝဲန့ၣ် ကဘၣ်တၢ်မၤသံအီၤလီၤ. (ဖး ၂ မိၤၡ့ ၂၁:၂၂, ၂၃ တက့ၢ်; စံးထီၣ်ပတြၢၤ ၁၂၇:၃) တၢ်အံၤသိၣ်လိပှၤလၢ တၢ်မၤဟးဂီၤဟုးန့ၣ် မ့ၢ်တၢ်လၢအကမၣ်လီၤ.—ကွၢ်တၢ်ဂ့ၢ် ၂၇ လၢလံာ်အကတၢၢ်တက့ၢ်.
၆, ၇. ပထံၣ်သးသမူ ဒ်အမ့ၢ် တၢ်လုၢ်ဒိၣ်ပှ့ၤဒိၣ်တခါန့ၣ် ပပာ်ဖျါထီၣ် ကသ့ဒ်လဲၣ်.
၆ ပပာ်လုၢ်ပာ်ပှ့ၤ ပသးသမူဒီးပှၤဂၤအသးသမူန့ၣ် ပပာ်ဖျါထီၣ်ကသ့ဒ်လဲၣ်. ပပာ်ဖျါထီၣ်သ့ ခီဖျိလၢ ပတမၤတၢ်လၢ အကကဲထီၣ်တၢ်ဘၣ်ယိၣ် လၢပသးသမူဒီး ပှၤဂၤအသးသမူအဂီၢ်နီတမံၤဘၣ်. လၢတၢ်န့ၣ်အဃိ ပတသူညါသူး, သဘျုၣ်သဲးသၣ်ဒီး ကသံၣ်မူၤဘှီးတဖၣ်ဘၣ်. မ့ၢ်လၢတၢ်သ့ၣ်တဖၣ်အံၤ မၤဘၣ်ဒိပတၢ်အိၣ်ဆူၣ်အိၣ်ချ့ ဒီးမၤသံပှၤသ့ဝဲအဃိလီၤ.
၇ မ့ၢ်လၢ ကစၢ်ယွၤဟ့ၣ်လီၤပှၤ သးသမူဒီးပနီၢ်ခိအဃိ ပကြၢးအိၣ်မူဒ် အတၢ်ဘၣ်သးအသိးလီၤ. လၢတၢ်န့ၣ်အဃိ ပကဘၣ်အံးထွဲကွၢ်ထွဲလီၤ ပနီၢ်ခိဂ့ၤဂ့ၤဘၣ်ဘၣ်လီၤ. ပမ့ၢ်တမၤဒ်န့ၣ်န့ၣ် ပတဖျါကဆှဲကဆှီလၢ ယွၤအမဲာ်ညါဘၣ်. (ရိမ့ၤ ၆:၁၉; ၁၂:၁; ၂ ကရံၣ်သူး ၇:၁) တကးဒံးဘၣ် ပမ့ၢ်တပာ်လုၢ်ပာ်ပှ့ၤ သးသမူလၢ ယဟိဝၤယွၤ ဟ့ၣ်လီၤပှၤန့ၣ် ပမၤတၢ်ဘၣ်ကစၢ်အသး တသ့ဘၣ်. မ့ၢ်ကီလၢပကပာ်ပတုာ် လုၢ်လၢ်လၢ အတကဆှီတဖၣ်အံၤဒၣ်လဲာ် ပမ့ၢ်ဂုာ်ကျဲးစၢးလၢ အဂ့ၤကတၢၢ်န့ၣ် ယဟိဝၤယွၤ ကမၤစၢၤပှၤလီၤ.
၈. ဒ်သိး တၢ်ဘၣ်ယိၣ်သုတကဲထီၣ်လၢ ပသးသမူဒီး ပှၤဂၤအသးသမူတဂ့ၤအဂီၢ် ပကဘၣ်မၤဒ်လဲၣ်.
၈ ပမၤလိဘၣ်လၢ သးသမူန့ၣ် မ့ၢ်တၢ်လၢ အလုၢ်ဒိၣ်ပှ့ၤဒိၣ်လီၤ. ယဟိဝၤယွၤ နာ်န့ၢ်ပှၤလၢပတမၤတၢ်လၢ အကကဲထီၣ်တၢ်ဘၣ်ယိၣ်လၢ ပသးသမူဒီးပှၤဂၤအသးသမူအဂီၢ်ဘၣ်. လၢတၢ်န့ၣ်အဃိ ပကဘၣ်အိၣ်ဒီး တၢ်ပလီၢ်သူၣ်ပလီၢ်သး ဖဲပနီကါဒီး ဆဲးကဲးအခါန့ၣ်လီၤ. ဟးဆှဲးတၢ်လၢ အလီၤဘၣ်ယိၣ်ဒီး တၢ်လိာ်ကွဲလၢ ကကဲထီၣ်တၢ်ဘၣ်ဒိဘၣ်ထံး မ့တမ့ၢ် ကဲထီၣ်တၢ်လၢ အလီၤဘၣ်ယိၣ်တဖၣ်န့ၣ်တက့ၢ်. (စံးထီၣ်ပတြၢၤ ၁၁:၅) တကးဒံးဘၣ် ပကဘၣ်ကတဲာ်ကတီၤ ပဟံၣ်ပဃီဂ့ၤဂ့ၤဘၣ်ဘၣ် ဒ်သိးပသးသမူဒီး ပှၤဂၤအသးသမူ သုတကဲထီၣ် တၢ်ဘၣ်ယိၣ်တဂ့ၤအဂီၢ်လီၤ. ယဟိဝၤယွၤ မၤလိာ်ပှၤအံၣ်စရ့လးဖိတဖၣ်လၢ– “တုၤနမၤဟံၣ်သီတဖျၢၣ်ဒီး, နဘၣ်မၤနဟံၣ်ခိၣ်အခိၣ်ဒူ, ဒ်သိးပှၤမ့ၢ်လီၤတဲာ် ဖဲန့ၣ်ဒီး, နသုတဒုးဘၣ်တၢ်သွံၣ်လၢ နဟံၣ်တဂ့ၤလီၤ.”—၅ မိၤၡ့ ၂၂:၈.
၉. ပကြၢးထံၣ် ဆၣ်ဖိကီၢ်ဖိတဖၣ်အသးသမူဒ်လဲၣ်.
၉ ဆၣ်ဖိကီၢ်ဖိအသးသမူဒၣ်လဲာ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအမဲာ်ညါလီၤ. အဝဲဟ့ၣ်ပှၤအခွဲးလၢ ပကမၤသံ ဆၣ်ဖိကီၢ်ဖိလၢ ပကအီၣ်အဂီၢ်ဒီး လၢတၢ်ကူတၢ်သိးအဂီၢ် မ့တမ့ၢ် လၢပကဒီသဒၢလီၤပသးအဂီၢ်လီၤ. (၁ မိၤၡ့ ၃:၂၁; ၉:၃; ၂ မိၤၡ့ ၂၁:၂၈) ဘၣ်ဆၣ် ပကြၢးအိၣ်ဒီးတၢ်သးကညီၤ လၢဆၣ်ဖိကီၢ်ဖိအဖီခိၣ် ဒီးပတဘၣ်မၤသံမၤဝီအီၤ ကလီကလီဘၣ်.—ကတိၤဒိ ၁၂:၁၀.
ပာ်ဖျါထီၣ်တၢ်ပာ်ကဲ သးသမူလၢ အမ့ၢ်တၢ်လုၢ်ဒိၣ်ပှ့ၤဒိၣ်တက့ၢ်
၁၀. တၢ်သွံၣ်ဘၣ်တၢ်ပာ်ပနီၣ်အီၤ ဒ်သးသမူအသိးန့ၣ် ပသ့ၣ်ညါဘၣ်လၢ ကျဲဒ်လဲၣ်.
၁၀ တၢ်သွံၣ်န့ၣ် စီဆှံဝဲလၢ ယဟိဝၤယွၤ အမဲာ်ညါလီၤ. မ့ၢ်လၢတၢ်သွံၣ်န့ၣ် ဘၣ်တၢ်ပာ်ပနီၣ်အီၤ ဒ်သးသမူအသိးလီၤ. ဖဲစီၤကၤယံၣ်မၤသံဝဲ စီၤဟ့းဘ့းလးဝံၤအလီၢ်ခံန့ၣ် ယဟိဝၤယွၤစံးဘၣ် စီၤကၤယံၣ်လၢ– “နပုၢ်အသွံၣ်အသီၣ် ကိးထီၣ်ယၤလၢ ဟီၣ်ခိၣ်လာ်လီၤ.” (၁ မိၤၡ့ ၄:၁၀) စီၤဟ့းဘ့းလးအသွံၣ်န့ၣ် ဘၣ်တၢ်ပာ်ပနီၣ်အီၤဒ်အသးသမူအသိးလီၤ. ဒီးယဟိဝၤယွၤ စံၣ်ညီၣ်ဝဲစီၤကၤယံၣ် မ့ၢ်လၢအဝဲမၤသံ စီၤဟ့းဘ့းလးအဃိန့ၣ်လီၤ. ဖဲထံလုၢ်ဘၢတၢ်လၢ စီၤနိအၤအစိၤဝံၤအလီၢ်ခံ ယဟိဝၤယွၤပာ်ဖျါထီၣ်ကဒီးဝဲလၢ တၢ်သွံၣ်န့ၣ် ဘၣ်တၢ်ပာ်ပနီၣ်အီၤဒ်သးသမူအသိးလီၤ. ယဟိဝၤယွၤ ဟ့ၣ်လီၤစီၤနိအၤဒီး အဟံၣ်ဖိဃီဖိအခွဲးလၢ ကအီၣ်ဝဲတၢ်ဖံးတၢ်ညၣ်လီၤ. ဒီးအဝဲစံးဝဲလၢ– “ကယဲၢ်တၢ်ဂဲၤလၢ အမူဝဲတမံၤလၢ်လၢ်န့ၣ် ကကဲထီၣ်တၢ်အီၣ်လၢသုဂီၢ်, ဒ်တၢ်မဲတၢ်မါအသံကစဲာ်အသိးန့ၣ် ယဟ့ၣ်လီၤသုလၢ တၢ်ခဲလၢာ်လီၤ.” ဘၣ်ဆၣ်သနာ်က့ တၢ်လၢအဝဲသ့ၣ် အီၣ်ဝဲတန့ၢ်ဘၣ်န့ၣ် အိၣ်ဝဲတမံၤလီၤ. ကစၢ်ယွၤမၤလိာ် အဝဲသ့ၣ်လၢ တဘၣ်အီၣ်– “တၢ်ညၣ်အိၣ်ဒီး အတၢ်မူ ဒ်ပစံးတၢ်အသိး အသွံၣ်” န့ၣ်တဂ့ၤ.—၁ မိၤၡ့ ၁:၂၉; ၉:၃, ၄.
၁၁. ဘၣ်ဃးဒီးတၢ်သွံၣ်န့ၣ် ကစၢ်ယွၤမၤလိာ် ပှၤအံၣ်စရ့လးဖိဒ်လဲၣ်.
၁၁ ယဟိဝၤယွၤ စံးဘၣ်စီၤနိအၤလၢ တဘၣ်အီၣ်တၢ်သွံၣ်တဂ့ၤ. ဒီးပူၤကွံာ်အနံၣ် ၈၀၀ ဃၣ်ဃၣ်န့ၣ် ကစၢ်ယွၤမၤလိာ်ကဒီး အပှၤဂီၢ်မုၢ်လၢ– “ပှၤအံၣ်စရ့လးဖိမ့ၢ်ဂ့ၤ, ပှၤတခီဘီမုၢ်ဖိလၢ အအိၣ်လၢသုကျါမ့ၢ်ဂ့ၤ, ဖဲဒၣ်ပှၤလၢအခိးခးတၢ်, ဒီးမၤန့ၢ်ဆၣ်ဖိကီၢ်ဖိမ့ၢ်ဂ့ၤ, ထိၣ်ဧိၤလံၣ်ဧိၤမ့ၢ်ဂ့ၤ, လၢပှၤဂ့ၤအီၣ်ဘၣ်တမံၤမံၤ, ဘၣ်ဂၢ်လီၤကွံာ်အသွံၣ်, ဒီးကျၢၢ်ဘၢအီၤဒီး ဟီၣ်ခိၣ်အကမူၣ်လီၤ.” ဒီးအဝဲစံးဝဲလၢ– “သုတအီၣ်တၢ်ညၣ်အသွံၣ် နီတမံၤတဂ့ၤ.” (၃ မိၤၡ့ ၁၇:၁၃, ၁၄) ဖဲန့ၣ်အဆၢကတီၢ် ယဟိဝၤယွၤအဲၣ်ဒိးလၢ အခ့အပှၤတဖၣ် ကထံၣ်တၢ်သွံၣ်ဒ်အမ့ၢ် တၢ်လၢအစီအဆှံတခါန့ၣ်လီၤ. အဝဲသ့ၣ် အီၣ်တၢ်ဖံးတၢ်ညၣ် သ့ဝဲဘၣ်ဆၣ် အီၣ်တၢ်သွံၣ်တသ့ဘၣ်. ဖဲအဝဲသ့ၣ်မၤသံ ဆၣ်ဖိကီၢ်ဖိအခါ ကဘၣ်လူလီၤကွံာ်ဝဲ အသွံၣ်လၢဟီၣ်ခိၣ်အလိၤလီၤ.
၁၂. ခရံာ်ဖိတဖၣ် ကြၢးထံၣ်ဝဲတၢ်သွံၣ် ဒ်လဲၣ်.
၁၂ ဖဲယ့ၣ်ၡူးသံဝံၤအလီၢ်ခံ တၢ်ဆၢကတီၢ်လဲၤပူၤကွံာ်ဝဲဒီး ခီဖျိလၢ တၢ်ဂ့ၢ်ကီဟဲအိၣ်ထီၣ်ဝဲအဃိ တၢ်မၢဖိဒီး ပှၤသူၣ်က့သးပှၢ်တဖၣ် ဘၣ်အိၣ်ဖှိၣ်ရိဖှိၣ်ဝဲလၢ ဝ့ၢ်ယရူၤၡလ့ၣ်အပူၤလီၤ. ဖဲအဝဲသ့ၣ်အိၣ်ဖှိၣ်ရိဖှိၣ်ဝဲအဆၢကတီၢ် ဆၢတဲာ်ဝဲလၢ ခရံာ်ဖိတဖၣ်န့ၣ် မ့ၢ်အဝဲသ့ၣ်ကဘၣ်မၤထွဲဝဲ စီၤမိၤၡ့အတၢ်သိၣ်တၢ်သီ တနီၤနီၤဒံးဧါ. (ဖး မၤတၢ် ၁၅:၂၈, ၂၉ တက့ၢ်; မၤတၢ် ၂၁:၂၅) ယဟိဝၤယွၤ မၤစၢၤအဝဲသ့ၣ်ဒ်သိး ကနၢ်ပၢၢ်ထီၣ်ဝဲလၢ တၢ်သွံၣ်န့ၣ်မ့ၢ်တၢ်လုၢ်ဒိၣ်ပှ့ၤဒိၣ်လၢ ယွၤအဂီၢ်ဒံးလီၤ. ဒီးအဝဲသ့ၣ် ကဘၣ်ပာ်လုၢ်ပာ်ပှ့ၤ တၢ်သွံၣ်ဒံးလီၤ. ခရံာ်ဖိလၢညါတဖၣ် တဘၣ်အီၣ်တၢ်သွံၣ်ဒီး ဆၣ်ဖိကီၢ်ဖိလၢ တၢ်တဂၢ်လီၤအသွံၣ် ဂ့ၤဂ့ၤဘၣ်ဘၣ်တဖၣ်န့ၣ်ဘၣ်. အဝဲသ့ၣ်မ့ၢ်အီၣ်တၢ်သွံၣ်န့ၣ် အတၢ်ကမၣ်ဒိၣ်ထဲသိးဒီး တၢ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်ဒီး တၢ်မၤကမၣ်မုၣ်ကမၣ်ခွါန့ၣ်လီၤ. စးထီၣ်ဖဲန့ၣ်အဆၢကတီၢ် ခရံာ်ဖိလၢ အမ့ၢ်အတီတဖၣ် တအီၣ်တၢ်သွံၣ်ဘၣ်. ဆၢကတီၢ်ခဲအံၤ ယဟိဝၤယွၤအဲၣ်ဒိးစ့ၢ်ကီးလၢ ပကပာ်လုၢ်ပာ်ပှ့ၤ တၢ်သွံၣ်ဒ်အမ့ၢ်တၢ်လၢ အစီဆှံတခါန့ၣ်လီၤ.
၁၃. ဘၣ်မနုၤအဃိ ပှၤခရံာ်ဖိတဖၣ် တတူၢ်လိာ်တၢ်သွီသွံၣ်န့ၣ်လဲၣ်.
၁၃ ယဟိဝၤယွၤ မၤလိာ်ပှၤဒ်သိး ပသုတအီၣ်တၢ်သွံၣ်တဂ့ၤန့ၣ် အဲၣ်ဒိးစံးဝဲလၢ ခရံာ်ဖိတဖၣ် ကြၢးဟးဆှဲးတၢ်သွီတၢ်သွံၣ်ဧါ. အဒိ ကသံၣ်သရၣ်တဂၤ မ့ၢ်တဲနၤလၢ နတဘၣ်အီသံးတဂ့ၤန့ၣ် မ့ၢ်နကြၢးဆဲးနုာ်အီၤလၢ နသွံၣ်အကျါဧါ. တမ့ၢ်လ့ၤတက့ၤဘၣ်. ဒ်န့ၣ်အသိး တၢ်မၤလိာ်လၢ တဘၣ်အီၣ်တၢ်သွံၣ်တဂ့ၤန့ၣ် အဲၣ်ဒိးစံးဝဲလၢ ပတကြၢးတူၢ်လိာ် တၢ်သွီတၢ်သွံၣ်ဘၣ်.—ကွၢ်တၢ်ဂ့ၢ် ၂၈ လၢလံာ်အကတၢၢ်တက့ၢ်.
၁၄, ၁၅. တၢ်ဒိကနၣ် ယဟိဝၤယွၤအကလုၢ် ဒီးတၢ်ပာ်လုၢ်ပာ်ပှ့ၤသးသမူန့ၣ် အရ့ဒိၣ်ဝဲထဲလဲၣ်.
၁၄ တဘျီတခီၣ် ကသံၣ်သရၣ်ကတဲပှၤလၢ ပမ့ၢ်တသွီတၢ်သွံၣ်န့ၣ် ပကသံဝဲလီၤ. မ့မ့ၢ်ဒ်န့ၣ်န့ၣ် ပကဘၣ်မၤဒ်လဲၣ်. ပကဒိကနၣ် ယွၤအတၢ်သိၣ်တၢ်သီဧါ တဒိကနၣ်ဧါန့ၣ် ပှၤတဂၤစုာ်စုာ် ကဘၣ်ဆၢတဲာ်လီၤအသး လၢအနီၢ်ကစၢ်ဒၣ်ဝဲလီၤ. ခရံာ်ဖိတဖၣ် ပာ်လုၢ်ပာ်ပှ့ၤဝဲ ကစၢ်ယွၤအတၢ်ဟ့ၣ် လၢအမ့ၢ်သးသမူန့ၣ်လီၤ. လၢတၢ်န့ၣ်အဃိ ပဃုတၢ်ကူစါယါဘျါလၢ ပကအိၣ်မူဘၣ်အဂီၢ် ဘၣ်ဆၣ်သနာ်က့ ပတတူၢ်လိာ် တၢ်သွီတၢ်သွံၣ်ဘၣ်.
၁၅ ဒ်သိး ပကအိၣ်ဆူၣ်အိၣ်ချ့အဂီၢ် တသ့ဖဲအသ့န့ၣ် ပကွၢ်ကတဲာ်ကတီၤလီၤ ပတၢ်အိၣ်ဆူၣ်အိၣ်ချ့လီၤ. ဘၣ်ဆၣ် ပသးသမူန့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယွၤအဂီၢ်အဃိ ပတတူၢ်လိာ်တၢ်သွံၣ်ဘၣ်. ဒီးတၢ်ထုးယံာ်ထီၣ်ပသးသမူ ထဲတစိၢ်ဖိန့ၣ် အရ့တဒိၣ်ထဲသိးဒီး တၢ်ဒိကနၣ်ယဟိဝၤယွၤအကလုၢ်ဘၣ်. ယ့ၣ်ၡူးစံးဝဲလၢ– “ဖဲဒၣ်ပှၤလၢ တၢ်မိၣ်အုၣ်က့ၤခီၣ်က့ၤလီၤအသး တဂၤဂၤန့ၣ် ကမၤဟါမၢ်ကွံာ်ဝဲလီၤ. ဒီးဖဲဒၣ်ပှၤလၢ အဒုးဟါမၢ်အသးလၢ ယဃိတဂၤဂၤန့ၣ်, ကထံၣ်န့ၢ်က့ၤအီၤလီၤ.” (မးသဲ ၁၆:၂၅) ပအဲၣ်ဒိးဒိကနၣ် ယဟိဝၤယွၤအကလုၢ် မ့ၢ်လၢပအဲၣ်အီၤအဃိလီၤ. ကစၢ်ယွၤသ့ၣ်ညါဝဲ တၢ်အဂ့ၤကတၢၢ်လၢပဂီၢ်လီၤ. ဒီးအဂၤတမံၤန့ၣ် ပထံၣ်သးသမူဒ်အမ့ၢ် တၢ်လုၢ်ဒိၣ်ပှ့ၤဒိၣ်ဒီး တၢ်စီဆှံလၢ ယဟိဝၤယွၤအဂီၢ်လီၤ.—ဧ့ၤဘြံၤ ၁၁:၆.
၁၆. ဘၣ်မနုၤအဃိ ယွၤအခ့အပှၤတဖၣ် ဒိကနၣ်အကလုၢ်လဲၣ်.
၁၆ ကစၢ်ယွၤ အခ့အပှၤတဖၣ် ဆၢတဲာ်လီၤအသး ဂၢၢ်ဂၢၢ်ကျၢၤကျၢၤလၢ ကဒိကနၣ်ဝဲ ယွၤအတၢ်သိၣ်တၢ်သီလၢ အဘၣ်ဃးဒီးတၢ်သွံၣ်န့ၣ်လီၤ. အဝဲသ့ၣ် တအီၣ်တၢ်သွံၣ်ဘၣ်. ဒီးလၢတၢ်အိၣ်ဆူၣ်အိၣ်ချ့အဂီၢ်န့ၣ် တတူၢ်လိာ်ဝဲ တၢ်သွီတၢ်သွံၣ်စ့ၢ်ကီးဘၣ်. * ဒ်သိးအသုတသံတဂ့ၤအဂီၢ် တူၢ်လိာ်ဝဲ တၢ်ကူစါယါဘျါလၢ ကျဲအဂၤတဖၣ်န့ၣ်လီၤ. အဝဲသ့ၣ်တဖၣ် နာ်ဝဲသပှၢ်ကတၢၢ်လၢ ကစၢ်လၢအတ့လီၤ သးသမူဒီး တၢ်သွံၣ်န့ၣ် သ့ၣ်ညါဝဲတၢ်အဂ့ၤကတၢၢ် လၢအဝဲသ့ၣ်အဂီၢ်လီၤ. မ့ၢ်နနာ်ဒ်န့ၣ် စ့ၢ်ကီးဧါ.
ယဟိဝၤယွၤ ဟ့ၣ်အခွဲးလၢ တၢ်ကသူဝဲတၢ်သွံၣ် ထဲလၢတၢ်ပျၢ်တၢ်ဒဲးဘးအဂီၢ်
၁၇. ယဟိဝၤယွၤ ဟ့ၣ်အခွဲးလၢ ပှၤအံၣ်စရ့လးဖိတဖၣ် ကသူဝဲတၢ်သွံၣ်ထဲလၢ တၢ်မနုၤအဂီၢ်လဲၣ်.
၁၇ ဖဲယဟိဝၤယွၤ ဟ့ၣ်လီၤစီၤမိၤၡ့ တၢ်သိၣ်တၢ်သီ အဆၢကတီၢ် အဝဲစံးဝဲလၢ– “တၢ်ညၣ်အသးသမူ အိၣ်လၢအသွံၣ်, ဒီးယဟ့ၣ်အီၤလၢသု လၢတၢ်လုၢ်လီၢ်အဖီခိၣ်, ဒ်သိးအကမၤတၢ်ပူၤဖျဲးလၢ သုသးအဂီၢ်လီၤ. အဂ့ၢ်ဒ်အံၤ, တၢ်သွံၣ်န့ၣ် မၤတၢ်မၤပူၤဖျဲးလၢ ပှၤအသးအဂီၢ်လီၤ.” (၃ မိၤၡ့ ၁၇:၁၁) ဖဲပှၤအံၣ်စရ့လးဖိတဖၣ် မၤတၢ်ဒဲးဘးအဆၢကတီၢ် အဝဲသ့ၣ်ဃ့ပျၢ်အတၢ်ကမၣ် လၢယဟိဝၤယွၤအအိၣ် သ့ဝဲလီၤ. ဘၣ်ဆၣ်အဝဲသ့ၣ် ကဘၣ်လုၢ်ထီၣ် ဆၣ်ဖိကီၢ်ဖိတဒုဒီး မၢပှၤလုၢ်တၢ်အဒိၣ် လူလီၤတၢ်သွံၣ်တနီၤလၢ တၢ်လုၢ်လီၢ်လီၤ. ယဟိဝၤယွၤဟ့ၣ်အခွဲးလၢ ပှၤအံၣ်စရ့လးဖိတဖၣ် ကသူဝဲတၢ်သွံၣ် ထဲလၢတၢ်ပျၢ်တၢ်ဒဲးဘးအဂီၢ်လီၤ.
၁၈. ခီဖျိလၢယ့ၣ်ၡူး အတၢ်ဟ့ၣ်လုၢ်ထီၣ်သးအဃိ ပဒိးန့ၢ်ဘၣ်တၢ်ခွဲးတၢ်ယာ်ဒ်လဲၣ်.
၁၈ ဖဲယ့ၣ်ၡူး ဟဲလီၤလၢဟီၣ်ခိၣ်ချၢအခါ အဝဲမၤကတၢၢ်ကွံာ်ဝဲ တၢ်လုၢ်ထီၣ်ဆၣ်ဖိကီၢ်ဖိတဖၣ် ခီဖျိလၢ အဝဲဟ့ၣ်လီၤကွံာ်အသးသမူ လၢအမ့ၢ် အသွံၣ်ဒ်သိး ပတၢ်ဒဲးဘး ကဘၣ်တၢ်ပျၢ်ကွံာ်အီၤအဂီၢ်န့ၣ်လီၤ. (မးသဲ ၂၀:၂၈; ဧ့ၤဘြံၤ ၁၀:၁) ယ့ၣ်ၡူးအသးသမူန့ၣ် အလုၢ်ဒိၣ်ပှ့ၤဒိၣ်ဝဲ ဒိၣ်မးလီၤ. လၢတၢ်န့ၣ်အဃိ ဖဲယဟိဝၤယွၤ မၤသမူထီၣ်က့ၤယ့ၣ်ၡူး ဆူမူခိၣ်အဆၢကတီၢ်န့ၣ် ယဟိဝၤယွၤဟ့ၣ်ပှၤဟီၣ်ခိၣ်ဖိ ကိးဂၤဒဲးတၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ်လီၤ.—ယိၤဟၣ် ၃:၁၆; ဧ့ၤဘြံၤ ၉:၁၁, ၁၂; ၁ ပ့းတရူး ၁:၁၈, ၁၉.
နပာ်ဖျါထီၣ် တၢ်ပာ်ကဲသးသမူဒီး တၢ်သွံၣ်သ့လၢကျဲဒ်လဲၣ်
၁၉. ဒ်သိးပက “ကဆှီဒီး ပှၤကညီအသွံၣ် ကိးဂၤဒဲး” အဂီၢ်ပကဘၣ်မၤ တၢ်မနုၤလဲၣ်.
၁၉ ပစံးဘျုးဘၣ် ယဟိဝၤယွၤလၢ အဝဲဟ့ၣ်ပှၤတၢ်ဟ့ၣ်လၢ အမ့ၢ်သးသမူအဃိန့ၣ်လီၤ. ဒီးပအဲၣ်ဒိးတဲဘၣ်ပှၤဂၤ လၢအဝဲသ့ၣ်မ့ၢ်စူၢ်က့ၤနာ်က့ၤ ယ့ၣ်ၡူးန့ၣ်ကဒိးန့ၢ်ဘၣ် တၢ်မူလီၤ. ပအဲၣ်ပှၤဂၤဒီး တသ့ဖဲအသ့န့ၣ် ပဂုာ်ကျဲးစၢးသိၣ်လိအီၤ ဒ်သိးအဝဲသ့ၣ် ကဒိးန့ၢ်ဘၣ်တၢ်မူအဂီၢ်လီၤ. (ယဃ့းစက့လး ၃:၁၇-၂၁) ပမ့ၢ်မၤဒ်တၢ်မၢဖိ ပီလူးမၤဝဲအသိးန့ၣ် ပဝဲစ့ၢ်ကီး ပစံးသ့လၢ– “မ်ဒ်န့ၣ်ဒီး အအံၤတနံၤအံၤ, ယအုၣ်ယသးလၢ သုမဲာ်ညါ လၢယကဆှီဒီး ပှၤကညီအသွံၣ် ကိးဂၤဒဲးလီၤ. အဂ့ၢ်ဒ်အံၤ, ယတဟးဆှဲး စံၣ်တဲၤတဲလီၤသုလၢ ယွၤအတၢ်ကူၣ်တၢ်ဖး နီတမံၤဘၣ်.” (မၤတၢ် ၂၀:၂၆, ၂၇) ပမ့ၢ်တဲဘၣ်ပှၤဂၤလၢ ယဟိဝၤယွၤအဂ့ၢ် ဒီးတဲဘၣ်စ့ၢ်ကီးအဝဲသ့ၣ်လၢ သးသမူမ့ၢ်တၢ်လုၢ်ဒိၣ်ပှ့ၤဒိၣ် လၢယွၤအဂီၢ်ထဲလဲၣ်န့ၣ် မ့ၢ်ဒၣ်ပပာ်ဖျါထီၣ်လၢ ပပာ်လုၢ်ပာ်ပှ့ၤသးသမူဒီး တၢ်သွံၣ်န့ၣ်လီၤ.
^ လံာ်အဆၢ. 16 ဒ်သိးနကထံၣ်ဘၣ် တၢ်ဂ့ၢ်ဘၣ်ဃးဒီး တၢ်သွီတၢ်သွံၣ်အဂီၢ်န့ၣ် ကွၢ်လံာ် လၢယဟိဝၤပှၤအုၣ်အသး ထုးထီၣ်ဝဲလၢအခိၣ်တီမ့ၢ်ဝဲ “အိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံပူၤတက့ၢ်” လံာ်ကဘျံးပၤ ၇၇-၇၉ န့ၣ်လီၤ.
