တၢ်မၤလိ ၁၁
ဘၣ်မနုၤအဃိ တၢ်နးတၢ်ဖှီၣ်အိၣ်အါ ထဲအံၤညါလဲၣ်
၁, ၂. ပှၤအါဂၤသံကွၢ်ဝဲ တၢ်သံကွၢ်မနုၤတဖၣ်လဲၣ်.
စူၣ်နၣ်မံး မၤဟးဂီၤဝဲ သဝီတဖျၢၣ်လီၤ. ပိာ်ခွါတဂၤ နုာ်လီၤခးတၢ်လၢ သရိာ်ပူၤဒီးမၤသံပှၤအါဂၤလီၤ. မိၢ်လၢအအိၣ်ဒီး အဖိယဲၢ်ဂၤဘၣ်သံဝဲလၢ ခဲစၢၣ်တၢ်ဆါအဃိလီၤ.
၂ ဖဲန့ဆၢၣ် အတၢ်ဘၣ်ဒိဘၣ်ထံးဒီး တၢ်သူၣ်အုးသးအုး အိၣ်ထီၣ်ဝဲအခါ ပှၤဟီၣ်ခိၣ်ဖိအါဂၤ သံကွၢ်ဝဲလၢ “ဘၣ်မနုၤအဃိလဲၣ်.” တကးဒံးဘၣ် ပှၤအါဂၤန့ၣ် သံကွၢ်ဝဲလၢ ဘၣ်မနုၤအဃိ ဟီၣ်ခိၣ်အံၤပှဲၤဒီး တၢ်သးဟ့ဒီးတၢ်နးတၢ်ဖှီၣ်လဲၣ်. ဘၣ်ဃးဒီး တၢ်သံကွၢ်တဖၣ်အံၤန့ၣ် မ့ၢ်နဆိကမိၣ်ဘၣ်တဘျီဘျီဧါ.
၃, ၄. (က) ဝံဃဘးကူာ်သံကွၢ်ဝဲ တၢ်သံကွၢ်မနုၤတဖၣ်လဲၣ်. (ခ) ယဟိဝၤယွၤ စံးဆၢက့ၤအီၤဒ်လဲၣ်.
၃ လၢလံာ်စီဆှံအပူၤ ပမၤလိဘၣ်လၢ ယွၤအခ့အပှၤလၢ အိၣ်ဒီးတၢ်နာ်န့ၣ် သံကွၢ်ဝဲတၢ်သံကွၢ် ဒ်အံၤတဖၣ်လီၤ. အဒိ ဝံဃဘးကူာ် သံကွၢ်ဝဲယဟိဝၤယွၤလၢ– “နဒုးထံၣ်ဘၣ်ယၤလၢ တၢ်အၢတၢ်သီ, ဒီးနဒုးကွၢ်ယၤလၢ တၢ်နးတၢ်ဖှီၣ် မ့ၢ်အဘၣ်မနုၤလဲၣ်. တၢ်မၤသယုၢ်, ဒီးတၢ်မၤန့ၢ်ဆူၣ် အိၣ်ဝဲလၢယမဲာ်ညါ, ဒီးတၢ်အ့ၣ်လိာ်ဆိးက့လိာ် အိၣ်ထီၣ်ဝဲ, ဒီးတၢ်ဂ့ၢ်လိာ်ဘှီလိာ် ပာ်ထီၣ်ထီအသးလီၤ.”—ဃဘးကူာ် ၁:၃.
၄ ဖဲ ဃဘးကူာ် ၂:၂, ၃ န့ၣ်ပထံၣ်ဘၣ်လၢ ကစၢ်ယွၤစံးဆၢက့ၤ ဝံဃဘးကူာ် အတၢ်သံကွၢ်တဖၣ် ဒီးအၢၣ်လီၤဝဲလၢ အဝဲကမၤဂ့ၤထီၣ်က့ၤ တၢ်အိၣ်သးတဖၣ်လီၤ. လံာ်စီဆှံစံးဝဲလၢ ကစၢ်ယွၤ “သးအိၣ်သု” အဃိပသ့ၣ်ညါဘၣ်လၢ ယဟိဝၤယွၤ အဲၣ်ပှၤဟီၣ်ခိၣ်ဖိသပှၢ်ကတၢၢ်န့ၣ်လီၤ. (၁ ပ့းတရူး ၅:၇) ကစၢ်ယွၤ သးဟ့ဝဲတၢ်နးတၢ်ဖှီၣ် ဒိၣ်န့ၢ်ဒံးပှၤလီၤ. (ယၡါယၤ ၅၅:၈, ၉) လၢတၢ်န့ၣ်အဃိ ပကသမံသမိးကွၢ် တၢ်သံကွၢ်တဖျၢၣ်လၢ ဘၣ်မနုၤအဃိ တၢ်နးတၢ်ဖှီၣ် အိၣ်အါထဲအံၤညါလဲၣ်.
ဘၣ်မနုၤအဃိ တၢ်နးတၢ်ဖှီၣ် အိၣ်အါထဲအံၤညါလဲၣ်
၅. ဘၣ်ဃးဒီး တၢ်နးတၢ်ဖှီၣ်န့ၣ် တၢ်ဘူၣ်တၢ်ဘါခိၣ်နၢ်တဖၣ် စံးဝဲဒ်လဲၣ်, ဒီးလံာ်စီဆှံ သိၣ်လိဝဲဒ်လဲၣ်.
၅ တၢ်အိၣ်ဖှိၣ်သရၣ်တဖၣ်, စီၤသီတဖၣ် ဒီးတၢ်ဘူၣ်တၢ်ဘါ ခိၣ်နၢ်တဖၣ် စံးဝဲလၢ တၢ်နးတၢ်ဖှီၣ်လၢ အဟဲအိၣ်ထီၣ်အသးသ့ၣ်တဖၣ်အံၤ မ့ၢ်တၢ်ဘၣ်ယွၤအသးလီၤ. ပှၤတနီၤစံးဝဲလၢ တၢ်လၢ အဟဲကဲထီၣ်အသး ဃုာ်ဒီးတၢ်နးတၢ်ဖှီၣ်လၢ ပကွၢ်ဆၢၣ်မဲာ်ဘၣ်အီၤတဖၣ်န့ၣ် ကစၢ်ယွၤရဲၣ်ကျဲၤပာ်စၢၤဝဲ ဝံၤလံ. ဒီးအဝဲသ့ၣ်စံးဝဲလၢ ဘၣ်မနုၤအဃိ ကစၢ်ယွၤမၤဝဲ ဒ်အံၤလဲၣ်န့ၣ် ပနၢ်ပၢၢ်အီၤတသ့ဘၣ်. မ့မ့ၢ်ပှၤအဂၤတနီၤန့ၣ် စံးဝဲလၢ ကစၢ်ယွၤ ကိးက့ၤပှၤဟီၣ်ခိၣ်ဖိတဖၣ် ဃုာ်ဒီးဖိဒံဖိသၣ် ဒ်သိးအဝဲသ့ၣ် ကက့ၤအိၣ်ဒီးအီၤလၢ မူခိၣ်လီၤ. ဘၣ်ဆၣ်အဝဲသ့ၣ် အတၢ်ကတိၤတဖၣ်အံၤ ကမၣ်ဝဲလီၤ. ယဟိဝၤယွၤ တဒုးအိၣ်ထီၣ် တၢ်အၢတၢ်သီနီတဘျီဘၣ်. လံာ်စီဆှံစံးဝဲလၢ– “မ်တၢ်တတီတလိၤ အိၣ်ယံၤဒီးယွၤတက့ၢ်, ဒီးမ်တၢ်အၢတၢ်သီ အိၣ်ယံၤဒီး တၢ်သ့တၢ်လၢာ်တက့ၢ်.”—ယိၤဘး ၃၄:၁၀.
၆. ဘၣ်ဃးဒီး တၢ်နးတၢ်ဖှီၣ်လၢ ဟီၣ်ခိၣ်ချၢအံၤန့ၣ် ဘၣ်မနုၤအဃိ ပှၤအါဂၤပာ်တၢ်ကမၣ်လၢ ကစၢ်ယွၤအလိၤလဲၣ်.
၆ ဟီၣ်ခိၣ်အံၤပှဲၤဒီးတၢ်အၢတၢ်သီ ဒီးတၢ်နးတၢ်ဖှီၣ်တဖၣ်လီၤ. ပှၤအါဂၤပာ်တၢ်ကမၣ်လၢ ကစၢ်ယွၤအလိၤ ခီဖျိလၢ အဝဲသ့ၣ်ဆိကမိၣ်ဝဲလၢ ယွၤပၢဟီၣ်ခိၣ်အဃိန့ၣ်လီၤ. ဘၣ်ဆၣ် ဒ်ပမၤလိဘၣ်လၢ တၢ်မၤလိ ၃ အသိး ပှၤပၢဟီၣ်ခိၣ်နီၢ်နီၢ်န့ၣ် မ့ၢ်ဝဲမုၣ်ကီၤလံၢ်န့ၣ်လီၤ.
၇, ၈. ဘၣ်မနုၤအဃိ ဟီၣ်ခိၣ်အံၤ ပှဲၤဒီးတၢ်နးတၢ်ဖှီၣ်လဲၣ်.
၇ လံာ်စီဆှံစံးဝဲလၢ “ဟီၣ်ခိၣ်ခဲလၢာ် မံလီၤဝဲလၢ တၢ်အၢတၢ်သီတဂၤန့ၣ် အပူၤလီၤ.” (၁ ယိၤဟၣ် ၅:၁၉) ဟီၣ်ခိၣ်အံၤ မုၣ်ကီၤလံၢ်ပၢဝဲလီၤ. ဒီးအဝဲမ့ၢ် ပှၤလၢအသူၣ်အၢသးသီလၢ အတအိၣ်ဒီးတၢ်သူၣ်ကညီၤသးကညီၤဘၣ်. တကးဒံးဘၣ် အဝဲ “လီန့ၢ်ပှၤဟီၣ်ခိၣ်ဖိ ခဲလၢာ်” လီၤ. (လီၣ်ဖျါ ၁၂:၉) ပှၤဟီၣ်ခိၣ်ဖိအါဂၤန့ၣ် ကွၢ်လိမၤဒိးအီၤလီၤ. လၢတၢ်န့ၣ်အဃိ ဟီၣ်ခိၣ်အံၤ ပှဲၤဝဲဒီးတၢ်လီတၢ်ဝ့ၤ, တၢ်သူၣ်ဟ့သးဟ့ဒီး တၢ်အၢတၢ်သီန့ၣ်လီၤ.
၈ ဘၣ်မနုၤအဃိ ဟီၣ်ခိၣ်အံၤပှဲၤဒီး တၢ်နးတၢ်ဖှီၣ်လဲၣ်န့ၣ် တၢ်ဂ့ၢ်အိၣ်ဒံးဝဲတနီၤလီၤ. ဖဲနီၢ်အံၣ်အုဒီး စီၤအၤဒၣ် ပူထီၣ်ထီဒါတၢ်ဝံၤအလီၢ်ခံ အဖိသ့ၣ်တဖၣ် ဒိးန့ၢ်ဘၣ်ဝဲတၢ်ဒဲးဘးလၢ အဝဲသ့ၣ်အအိၣ်လီၤ. ခီဖျိလၢ ပှၤဟီၣ်ခိၣ်ဖိတဖၣ်မ့ၢ် ပှၤတၢ်ဒဲးဘးဖိအဃိ ဒုးအိၣ်ထီၣ်ဝဲ တၢ်ကီတၢ်ခဲ အကလုာ်ကလုာ် ဒီးအဲၣ်ဒိး ဒိၣ်စိဝဲလၢပှၤဂၤအဖီခိၣ်လီၤ. လၢတၢ်န့ၣ်အဃိ အဝဲသ့ၣ်အ့ၣ်လိာ်ဆိးက့လိာ်အသး, ဒုးတၢ်ယၤတၢ် ဒီးဆီၣ်တံၢ်မၤနၢၤ ပှၤအဂၤတဖၣ်လီၤ. (စံၣ်တဲၤတဲလီၤတၢ် ၄:၁; ၈:၉) တဘျီတခီၣ်န့ၣ် ပှၤဟီၣ်ခိၣ်ဖိတဖၣ် ထံၣ်ဘၣ်ဝဲတၢ်ကီတၢ်ခဲ ခီဖျိလၢ “တၢ်အဆၢအကတီၢ် ဒီးတၢ်ဘၣ်အတီၤ” အဃိလီၤ. (စံၣ်တဲၤတဲလီၤတၢ် ၉:၁၁) တၢ်အံၤအဲၣ်ဒိးစံးဝဲ, လၢတၢ်တပာ်သူၣ်ပာ်သးအပူၤန့ၣ် တၢ်အၢတၢ်သီ ဒီးတၢ်ကီတၢ်ခဲအဂၤတဖၣ် ဟဲကဲထီၣ်အသး သတူၢ်ကလာ်သ့ဝဲလီၤ.
၉. ဘၣ်မနုၤအဃိ ပနာ်သ့လၢ ယဟိဝၤယွၤအိၣ်ဒီး တၢ်ဂ့ၢ်အဂ့ၤလၢ အကပျဲဒံး တၢ်နးတၢ်ဖှီၣ်အခွဲးန့ၣ်လဲၣ်.
၉ တၢ်နးတၢ်ဖှီၣ်လၢပထံၣ်ဘၣ်န့ၣ် ယဟိဝၤယွၤတဒုးအိၣ်ထီၣ်ဝဲဘၣ်. တၢ်ဒုးတၢ်ယၤ, တၢ်အၢတၢ်သီ, တၢ်ဆီၣ်တံၢ်မၤနၢၤ, န့ဆၢၣ်အတၢ်ဘၣ်ဒိဘၣ်ထံး ဒ်သိးဟီၣ်ခိၣ်ဟူးဝး, ကလံၤမုၢ်ဖးဒိၣ် ဒီးစူၣ်နၣ်မံးတဖၣ်န့ၣ် ကစၢ်ယွၤ တဒုးအိၣ်ထီၣ်ဝဲအဃိ ပပာ်တၢ်ကမၣ်လၢအလိၤ တသ့လ့ၤတက့ၤဘၣ်. ဘၣ်သ့ၣ်သ့ၣ် နကဆိကမိၣ်ဘၣ်လၢ ‘ယဟိဝၤယွၤ မ့မ့ၢ်ပှၤလၢ အစိအကမီၤဒိၣ်ကတၢၢ်န့ၣ် ဘၣ်မနုၤအဃိ အဝဲတမၤပတုာ်ဝဲ တၢ်လီၤပျံၤလီၤဖုးလၢ အဟဲကဲထီၣ်အသး သ့ၣ်တဖၣ်အံၤလဲၣ်.’ ပသ့ၣ်ညါဘၣ်လၢ ကစၢ်ယွၤသူၣ်အိၣ်သးအိၣ်ပှၤ သပှၢ်ကတၢၢ်အဃိ တၢ်ဂ့ၢ်တၢ်ကျိၤလၢအဂ့ၤ ကဘၣ်အိၣ်ဝဲလီၤ.—၁ ယိၤဟၣ် ၄:၈.
ဘၣ်မနုၤအဃိ ယွၤဟ့ၣ်အခွဲးလၢ တၢ်နးတၢ်ဖှီၣ်ကဟဲကဲထီၣ်အသးလဲၣ်
၁၀. ဘၣ်ဃးဒီး ယဟိဝၤယွၤအတၢ်ပၢန့ၣ် မုၣ်ကီၤလံၢ် ထုးထီၣ်တၢ်သံကွၢ်ဒ်လဲၣ်.
၁၀ လၢဧ့ၤဒ့ၣ်တၤသၣ်အလီၢ်ပူၤန့ၣ် မုၣ်ကီၤလံၢ်ကွဲန့ၢ်လွဲန့ၢ် နီၢ်အံၣ်အုဒီး စီၤအၤဒၣ်လီၤ. ဒီးမုၣ်ကီၤလံၢ်စံးဝဲလၢ ကစၢ်ယွၤမ့ၢ် ပှၤပၢတၢ်လၢအတကြၢးတဘၣ်န့ၣ်လီၤ. အဝဲပာ်တၢ်ကမၣ်လၢ ယွၤအလိၤဒီး စံးဝဲလၢကစၢ်ယွၤ တအဲၣ်ဒိးဟ့ၣ်လီၤ နီၢ်အံၣ်အုဒီး စီၤအၤဒၣ် တၢ်လၢအဂ့ၤဘၣ်. မုၣ်ကီၤလံၢ် အဲၣ်ဒိးဒုးနာ်န့ၢ်အဝဲသ့ၣ်လၢ အတၢ်ပၢန့ၣ်ဂ့ၤန့ၢ်ဒံး ယဟိဝၤယွၤအတၢ်ပၢ ဒီးအဝဲသ့ၣ် တလိၣ်ဘၣ် ကစၢ်ယွၤလၢၤဘၣ်.—၁ မိၤၡ့ ၃:၂-၅; ကွၢ်တၢ်ဂ့ၢ် ၂၆ လၢလံာ်အကတၢၢ်တက့ၢ်.
၁၁. ပကစံးဆၢ တၢ်သံကွၢ်မနုၤလဲၣ်.
၁၁ နီၢ်အံၣ်အုဒီး စီၤအၤဒၣ်တဒိကနၣ် ယဟိဝၤယွၤအကလုၢ် ဒီးပူထီၣ်ထီဒါအီၤလီၤ. ဒီးအဝဲသ့ၣ် ဆိကမိၣ်ဝဲလၢ တၢ်အဘၣ်ဒီး တၢ်အကမၣ်န့ၣ် ဆၢတဲာ်ဝဲလၢ အနီၢ်ကစၢ်သ့ဝဲလီၤ. ပှၤပူထီၣ်တၢ်တဖၣ်အံၤ ကမၣ်ဝဲန့ၣ် ယဟိဝၤယွၤ ပာ်ဖျါထီၣ်ဝဲ ကသ့ဒ်လဲၣ် ဒီးကစၢ်ယွၤသ့ၣ်ညါ တၢ်အဂ့ၤကတၢၢ်လၢပဂီၢ်န့ၣ် အဝဲပာ်ဖျါထီၣ် ကသ့ဒ်လဲၣ်.
၁၂, ၁၃. (က) ဘၣ်မနုၤအဃိ ယဟိဝၤယွၤ တမၤဟးဂီၤကွံာ် ပှၤပူထီၣ်တၢ်တဘျီဃီလဲၣ်. (ခ) ဘၣ်မနုၤအဃိ ယဟိဝၤယွၤ ဟ့ၣ်မုၣ်ကီၤလံၢ်အခွဲးလၢ ကပၢဝဲဟီၣ်ခိၣ်လဲၣ် ဒီးဟ့ၣ်ပှၤဟီၣ်ခိၣ်ဖိတဖၣ်အခွဲးဒ်သိး ကပၢလီၤအသးလဲၣ်.
၁၂ ယဟိဝၤယွၤ တမၤဟးဂီၤကွံာ် နီၢ်အံၣ်အုဒီး စီၤအၤဒၣ်တဘျီဃီဘၣ်. လၢတၢ်န့ၣ်အလီၢ် အဝဲဟ့ၣ်အခွဲးလၢ နီၢ်အံၣ်အုဒီးစီၤအၤဒၣ် ကအိၣ်ဒီးအဖိတဖၣ်လီၤ. နီၢ်အံၣ်အုဒီးစီၤအၤဒၣ် အဖိတဖၣ် ကဒိးပၢအသးလၢ မတၤတဂၤအဖီလာ်လဲၣ်န့ၣ် အဝဲသ့ၣ် ဃုထၢဝဲလၢအနီၢ်ကစၢ် သ့ဝဲလီၤ. ယဟိဝၤယွၤ အိၣ်ဒီးအတၢ်တိာ်ပာ်လၢ ဟီၣ်ခိၣ်အံၤ ကဘၣ်ပှဲၤဝဲဒီး ပှၤဟီၣ်ခိၣ်ဖိလၢ အလၢအပှဲၤန့ၣ်လီၤ. မုၣ်ကီၤလံၢ်ဂုာ်ကျဲးစၢးမၤဝဲ ဒ်လဲၣ်ဒ်လဲၣ်ဘၣ်ဆၣ် ယဟိဝၤယွၤ အတၢ်တိာ်ပာ် လၢအဘၣ်ဃးဒီးဟီၣ်ခိၣ်အံၤ ကဟဲလၢထီၣ်ပှဲၤထီၣ်ဝဲ သပှၢ်ကတၢၢ်လီၤ.—၁ မိၤၡ့ ၁:၂၈; ယၡါယၤ ၅၅:၁၀, ၁၁.
၁၃ လၢမူခိၣ်ကလူးအကကွဲၢ်တဖၣ် အမဲာ်ညါန့ၣ် မုၣ်ကီၤလံၢ် ထုးထီၣ်ဝဲတၢ်သံကွၢ်လၢ အဘၣ်ဃးဒီး ယဟိဝၤယွၤအတၢ်ပၢန့ၣ်လီၤ. (ယိၤဘး ၃၈:၇; ဒၤနံးယ့လး ၇:၁၀) ယဟိဝၤယွၤ ဟ့ၣ်မုၣ်ကီၤလံၢ် တၢ်ဆၢကတီၢ် ဒ်သိးကပာ်ဖျါထီၣ်ဝဲ တၢ်ဂ့ၢ်လၢမုၣ်ကီၤလံၢ်တဲဝဲန့ၣ် မ့ၢ်အဘၣ်ဧါ တဘၣ်ဧါန့ၣ်လီၤ. တကးဒံးဘၣ် ကစၢ်ယွၤဟ့ၣ် ပှၤဟီၣ်ခိၣ်ဖိအခွဲးဒ်သိး အဝဲသ့ၣ်ကပၢလီၤအသးလၢ မုၣ်ကီၤလံၢ် အတၢ်ပၢဖီလာ်န့ၣ်လီၤ. ကစၢ်ယွၤ မ့ၢ်တဆီၣ်ထွဲမၤစၢၤ အဝဲသ့ၣ်အတၢ်ပၢတၢ်ပြးတဖၣ်န့ၣ် တၢ်ကကဲထီၣ်အသးဒ်လဲၣ်. တၢ်ဆၢကတီၢ် ကပာ်ဖျါထီၣ်တၢ်စံးဆၢလီၤ.
၁၄. ခီဖျိလၢ ကစၢ်ယွၤ ဟ့ၣ်တၢ်ဆၢကတီၢ်အဃိ ပသ့ၣ်ညါထီၣ်တၢ်ဂ့ၢ် မနုၤလဲၣ်.
၁၄ ပှၤဟီၣ်ခိၣ်ဖိတဖၣ် ပၢလီၤအသးန့ၣ် အိၣ်လံအနံၣ် လၢအကထိတဖၣ်လံ. ဘၣ်ဆၣ် အဝဲသ့ၣ်အတၢ်ပၢန့ၣ် တကဲထီၣ်လိၣ်ထီၣ်ဝဲဘၣ်. တၢ်ဂ့ၢ်တဖၣ်အံၤ ပာ်ဖျါထီၣ်ဝဲလၢ မုၣ်ကီၤလံၢ် မ့ၢ်ပှၤကတိၤကဘျံးကဘျၣ်တၢ်တဂၤလီၤ. ပသ့ၣ်ညါသပှၢ်ကတၢၢ်လၢ ပှၤဟီၣ်ခိၣ်ဖိတဖၣ် လိၣ်ဘၣ်ဝဲယွၤအတၢ်မၤစၢၤန့ၣ်လီၤ. ဝံယံးရမံယၤ စံးဝဲလၢ– “ယွၤဧၢ, ယသ့ၣ်ညါလၢ ပှၤကညီတပၢဘၣ်အကျဲဘၣ်, ဒီးပှၤလၢ အလဲၤတၢ်န့ၣ် စံၣ်ညီၣ်အထွဲတၢ် တသ့ဘၣ်ဝဲဘၣ်.”—ယံးရမံယၤ ၁၀:၂၃.
ဘၣ်မနုၤအဃိ ယဟိဝၤယွၤဘၣ်ဟ့ၣ်တၢ်ဆၢကတီၢ် ယံာ်ထဲအံၤညါလဲၣ်
၁၅, ၁၆. (က) ဘၣ်မနုၤအဃိ ယဟိဝၤယွၤ ဟ့ၣ်တၢ်အၢတၢ်သီအခွဲး ယံာ်ထဲအံၤညါလဲၣ်. (ခ) ဘၣ်မနုၤအဃိ ယဟိဝၤယွၤ တမၤဂ့ၤထီၣ် တၢ်ဟးဂူာ်ဟးဂီၤလၢ မုၣ်ကီၤလံၢ်ဒုးအိၣ်ထီၣ်ဝဲလဲၣ်.
၁၅ ဘၣ်မနုၤအဃိ ယဟိဝၤယွၤဟ့ၣ်တၢ်နးတၢ်ဖှီၣ်အခွဲး ယံာ်ထဲအံၤညါလဲၣ်. တၢ်အၢတၢ်သီလၢ အဟဲကဲထီၣ်အသးန့ၣ် ဘၣ်မနုၤအဃိ အဝဲတမၤပတုာ်ဝဲလဲၣ်. အဝဲဟ့ၣ်တၢ်ဆၢကတီၢ် ဒ်သိးကပာ်ဖျါထီၣ်ဝဲလၢ မုၣ်ကီၤလံၢ်အတၢ်ပၢန့ၣ် တကဲထီၣ်လိၣ်ထီၣ်ဝဲဘၣ်. ဒီးပှၤဟီၣ်ခိၣ်ဖိတဖၣ် ဒုးအိၣ်ထီၣ်ဝဲတၢ်ပၢတၢ်ပြး အကလုာ်ကလုာ် ဘၣ်ဆၣ် တၢ်တကဲထီၣ်လိၣ်ထီၣ်ဝဲနီတခါဘၣ်. အဝဲသ့ၣ် လဲၤထီၣ်လဲၤထီလၢ စဲအ့ၣ်တၢ်ကူၣ်ဘၣ်ကူၣ်သ့ဒီး စဲးဖီကဟၣ်တကပၤ သနာ်က့ တၢ်တတီတလိၤ, တၢ်ဖှီၣ်တၢ်ယာ်, တၢ်အၢတၢ်သီ ဒီးတၢ်ဒုးတၢ်ယၤတဖၣ် အိၣ်အါန့ၢ်ဒံးလၢညါလီၤ. လၢတၢ်န့ၣ်အဃိ ပသ့ၣ်ညါသပှၢ်ကတၢၢ်လၢ ကစၢ်ယွၤ မ့ၢ်တဆီၣ်ထွဲမၤစၢၤပှၤန့ၣ် ပပၢလီၤပသး တသ့လ့ၤတက့ၤဘၣ်.
၁၆ အဂၤတမံၤန့ၣ် ဖဲမုၣ်ကီၤလံၢ် ပၢတၢ်အဆၢကတီၢ် ယဟိဝၤယွၤ တမၤပတုာ်ကွံာ်ဝဲ တၢ်ကီတၢ်ခဲလၢ မုၣ်ကီၤလံၢ်ဒုးအိၣ်ထီၣ်ဝဲတဖၣ်ဘၣ်. ကစၢ်ယွၤ မ့ၢ်မၤပတုာ်ကွံာ်တၢ်ကီတၢ်ခဲတဖၣ်အံၤန့ၣ် ကကဲထီၣ်တၢ်မၤစၢၤလၢ မုၣ်ကီၤလံၢ်အတၢ်ပၢတၢ်ပြးအဂီၢ်လီၤ. တကးဒံးဘၣ် ပှၤဟီၣ်ခိၣ်ဖိတဖၣ် ကနာ်ဝဲလၢ အဝဲသ့ၣ်ပၢလီၤအသးဒၣ်ဝဲ သ့ဝဲလီၤ. ဘၣ်ဆၣ် တၢ်အံၤမ့ၢ်တၢ်လံၣ်တၢ်လီအဃိ ယဟိဝၤယွၤ တဆီၣ်ထွဲမၤစၢၤအဝဲသ့ၣ်စ့ၢ်ကီးဘၣ်. ဒီးယဟိဝၤယွၤ လီတၢ်တသ့ဘၣ်.—ဧ့ၤဘြံၤ ၆:၁၈.
၁၇, ၁၈. ဘၣ်ဃးဒီး တၢ်ဟးဂူာ်ဟးဂီၤလၢ မုၣ်ကီၤလံၢ်ဒုးအိၣ်ထီၣ်ဝဲတဖၣ်န့ၣ် ယဟိဝၤယွၤ ကမၤဝဲဒ်လဲၣ်.
၁၇ တၢ်ဟးဂူာ်ဟးဂီၤလၢ မုၣ်ကီၤလံၢ်ဒီး ပှၤဟီၣ်ခိၣ်ဖိတဖၣ် ဒုးအိၣ်ထီၣ်ဝဲန့ၣ် မ့ၢ်ယဟိဝၤယွၤ မၤဂ့ၤထီၣ်ကဒါက့ၤသ့ဧါ. သ့ဝဲလီၤ. ကစၢ်ယွၤ မၤတၢ်သ့ခဲလၢာ်လီၤ. ဘၣ်ဆၣ်သနာ်က့ ဒ်သိး အဝဲကစံးဆၢက့ၤ တၢ်သံကွၢ်တဖၣ်လၢ မုၣ်ကီၤလံၢ်ထုးထီၣ်ဝဲန့ၣ် တၢ်ဆၢကတီၢ်လိၣ်ဝဲလီၤ. တၢ်ဆၢကတီၢ် ကဘၣ်ယံာ်ဝဲထဲလဲၣ်န့ၣ် ယဟိဝၤယွၤသ့ၣ်ညါဝဲလီၤ. အဆၢကတီၢ်မ့ၢ်ဘၣ်န့ၣ် ကစၢ်ယွၤ ကဒုးကဲထီၣ်က့ၤ ဟီၣ်ခိၣ်လၢ ပၤရဒံစူးလီၤ. ကယဲၢ်ပှၤအိၣ်လၢ “တၢ်သွၣ်ခိၣ်အပူၤ” ခဲလၢာ် ကဂဲၤဆၢထၢၣ်က့ၤဝဲလီၤ. (ယိၤဟၣ် ၅:၂၈, ၂၉) ပှၤဟီၣ်ခိၣ်ဖိတဖၣ် တဆူးတဆါဒီး တသံဝဲလၢၤဘၣ်. ဒီးယ့ၣ်ၡူး ကမၤဂ့ၤထီၣ်က့ၤ တၢ်ဟးဂူာ်ဟးဂီၤလၢ မုၣ်ကီၤလံၢ် ဒုးအိၣ်ထီၣ်ဝဲခဲလၢာ်န့ၣ်လီၤ. ယဟိဝၤယွၤ ကသူဝဲယ့ၣ်ၡူး “ဒ်သိး အကမၤဟးဂီၤကွံာ် မုၣ်ကီၤလံၢ် အတၢ်မၤတဖၣ်လီၤ.” (၁ ယိၤဟၣ် ၃:၈) ပစံးဘျုးဘၣ် ယဟိဝၤယွၤဒိၣ်မး မ့ၢ်လၢအသးစူၤလၢပဖီခိၣ် ဒီးအဝဲဟ့ၣ်ပှၤအခွဲးလၢ ပကသ့ၣ်ညါထီၣ်အီၤ ဒီးဃုထၢအီၤဒ် ပတၢ်ပၢကစၢ် အသိးန့ၣ်လီၤ. (ဖး ၂ ပ့းတရူး ၃:၉, ၁၀ တက့ၢ်.) ဖဲပတူၢ်ဘၣ် တၢ်နးတၢ်ဖှီၣ် အဆၢကတီၢ်ဒၣ်လဲာ် အဝဲမၤစၢၤပှၤလၢ ပတူၢ်တၢ်ကကဲအဂီၢ်လီၤ.—ယိၤဟၣ် ၄:၂၃; ဖး ၁ ကရံၣ်သူး ၁၀:၁၃ တက့ၢ်.
၁၈ ယဟိဝၤယွၤ တမၢဆူၣ်ပှၤလၢ ပကဃုထၢအီၤဒ် ပတၢ်ပၢကစၢ်အသိးဘၣ်. ဒီးယဟိဝၤယွၤ ဟ့ၣ်ပှၤဟီၣ်ခိၣ်ဖိ တၢ်သဘျ့လၢ အကဃုထၢတၢ်လၢအနီၢ်ကစၢ်ဒၣ်ဝဲလီၤ. တၢ်ဟ့ၣ်လၢ အလုၢ်ဒိၣ်ပှ့ၤဒိၣ်အံၤကဲဘျုးလၢ ပဂီၢ်ဒ်လဲၣ်န့ၣ် ပကသမံသမိး ကွၢ်အီၤလီၤ.
တၢ်ဟ့ၣ်လၢအမ့ၢ် တၢ်သဘျ့လၢ နကဃုထၢတၢ်လၢ နနီၢ်ကစၢ်ဒၣ်နဲန့ၣ် နကသူအီၤဒ်လဲၣ်
၁၉. ယဟိဝၤယွၤ ဟ့ၣ်ပှၤတၢ်ဟ့ၣ်လၢ အလုၢ်ဒိၣ်ပှ့ၤဒိၣ် မနုၤလဲၣ်. ဒီးဘၣ်မနုၤအဃိ ပကြၢးစံးဘျုးစံးဖှိၣ်အီၤလဲၣ်.
၁၉ ပှၤဟီၣ်ခိၣ်ဖိန့ၣ် လီၤဆီဒီး ဆၣ်ဖိကီၢ်ဖိတဖၣ်ဒိၣ်မးလီၤ. ပဝဲဒၣ်အံၤ ပကသူပတၢ်အိၣ်မူ ဒ်လဲၣ်ဒ်လဲၣ်န့ၣ် ပဃုထၢလၢ ပနီၢ်ကစၢ်သ့ဝဲလီၤ. တကးဒံးဘၣ် မ့ၢ်ပအဲၣ်ဒိးမၤ ယွၤအတၢ်ဘၣ်သးဧါ တအဲၣ်ဒိးမၤဧါန့ၣ် ပဃုထၢသ့စ့ၢ်ကီးလီၤ. (ကတိၤဒိ ၃၀:၂၄) ကစၢ်ယွၤတတ့လီၤပှၤဒ် စဲးအသိးဘၣ်. မ့ၢ်ပအဲၣ်ဒိး ကဲထီၣ်ပှၤဒ်လဲၣ်, ပသးလီပတံၤသကိး ဒ်လဲၣ်တဖၣ်လဲၣ် ဒီးပအဲၣ်ဒိးမၤတၢ်မနုၤလဲၣ်န့ၣ် ပဃုထၢတၢ်လၢ တၢ်သဘျ့အပူၤသ့ဝဲလီၤ. ယဟိဝၤယွၤ အဲၣ်ဒိးလၢ ပတၢ်အိၣ်မူကပှဲၤဒီး တၢ်သူၣ်ဖှံသးညီလီၤ.
၂၀, ၂၁. ဆၢကတီၢ်ခဲအံၤ တၢ်ဃုထၢအဂ့ၤကတၢၢ် လၢနဂီၢ်န့ၣ် မ့ၢ်မနုၤလဲၣ်.
၂၀ ယဟိဝၤယွၤ အဲၣ်ဒိးလၢ ပကအဲၣ်အီၤလီၤ. (မးသဲ ၂၂:၃၇, ၃၈) ပၢ်တဂၤ မ့ၢ်နၢ်ဟူဘၣ် အဖိတဲအီၤလၢ “ယအဲၣ်နၤ” လၢအသးဒီဖျၢၣ်န့ၣ် အဝဲကသးခုဒိၣ်မးလီၤ. ယဟိဝၤယွၤ လီၤဂာ်ဒ်သိးဒီး ပၢ်တဂၤန့ၣ်လီၤ. ကစၢ်ဟ့ၣ်ပှၤတၢ်သဘျ့အဃိ ပဆၢတဲာ်လီၤပသးလၢ ပကမၤအတၢ်ဘၣ်သး သ့ဝဲလီၤ. ပမ့ၢ်ဆၢတဲာ်လီၤပသးလၢ ပကမၤကစၢ်ယွၤအတၢ်ဘၣ်သးန့ၣ် အဝဲကသးခုဒိၣ်မးလီၤ. မုၣ်ကီၤလံၢ်, နီၢ်အံၣ်အုဒီး စီၤအၤဒၣ် ပာ်လီၤအသးလၢ အဝဲသ့ၣ်ကပာ်တ့ၢ်ကွံာ်ယွၤလီၤ. မ့မ့ၢ်နၤန့ၣ် နကသူ နတၢ်သဘျ့လၢ နကဃုထၢတၢ်လၢ နနီၢ်ကစၢ်ဒၣ်နဲန့ၣ်ဒ်လဲၣ်.
၂၁ သူနတၢ်သဘျ့လၢ နကမၤယွၤအတၢ်ဘၣ်သးတက့ၢ်. ပှၤလၢအကကွဲၢ်တဖၣ် ဃုထၢဝဲလၢ အဝဲသ့ၣ်ကမၤယွၤအတၢ်ဘၣ်သးဒီးတြီဆၢ မုၣ်ကီၤလံၢ်န့ၣ်လီၤ. (ကတိၤဒိ ၂၇:၁၁) တယံာ်တမီၢ်န့ၣ် ကစၢ်ယွၤ ကမၤကတၢၢ်ကွံာ်ဝဲ တၢ်အၢတၢ်သီ ဒီးတၢ်နးတၢ်ဖှီၣ်ခဲလၢာ်လီၤ. ဒ်သိး နကအိၣ်မူဘၣ်လၢ ကစၢ်ယွၤ အတၢ်ရဲၣ်တၢ်ကျဲၤအသီအပူၤန့ၣ် ဆၢကတီၢ်ခဲအံၤ နကဘၣ်မၤ တၢ်မနုၤလဲၣ်. တၢ်မၤလိ လၢခံတခါန့ၣ် ကစံးဆၢက့ၤ တၢ်သံကွၢ်တဖျၢၣ်အံၤလီၤ.
