တၢ်ကတိၤဆှၢနုာ်
ပူတဖၣ်လၢ အအိၣ်လၢလံာ်အံၤအပူၤန့ၣ် မ့ၢ်တၢ်ဂ့ၢ်အမ့ၢ်အတီတဖၣ်န့ၣ်လီၤ. ပူတဖၣ်အံၤ ဘၣ်တၢ်ဟံးန့ၢ်အီၤလၢ လံာ်အဒိၣ်အမုၢ်ကတၢၢ် လၢဟီၣ်ခိၣ်ချၢ လၢအမ့ၢ်လံာ်စီဆှံအပူၤန့ၣ်လီၤ. ပူတဖၣ်အံၤ ပာ်ဖျါထီၣ် ဟီၣ်ခိၣ်အတၢ်စံၣ်စိၤတဲစိၤတဖၣ်တၢ်မၤအသး စးထီၣ်လၢ ယွၤတ့လီၤသီတၢ်ဒီး တုၤလၢ ပစိၤအဂ့ၢ်န့ၣ်လီၤ. တဲဖျါဃာ်ဝဲ တၢ်လၢယွၤစံးပာ်ကမၤဝဲ လၢခါဆူညါဒၣ်လဲာ် န့ၣ်လီၤ.
လံာ်အဝဲအံၤ ဟ့ၣ်ဒုသ့ၣ်ညါနၤ လံာ်စီဆှံဒီဘ့ၣ်ညါ အတၢ်သးအိၣ်စံးန့ၣ်လီၤ. တဲဝဲ ပှၤလၢလံာ်စီဆှံပူၤတဖၣ် ဒီးတၢ်လၢအမၤတ့ၢ်ဝဲအသးတဖၣ် အဂ့ၢ်အကျိၤ, အမဲာ်ညါန့ၣ် ပာ်ဖျါထီၣ်စ့ၢ်ကီး တၢ်မုၢ်လၢ်လၢ ပှၤကညီကအိၣ်မူဘၣ်ဒီးတၢ်မူအထူအယိာ် လၢဟီၣ်ခိၣ်ပၤရဒံစူး လၢယွၤဟ့ၣ်တ့ၢ်အဝဲသ့ၣ် အပူၤန့ၣ်လီၤ.
လၢလံာ်အံၤအပူၤန့ၣ် ပူအိၣ် ၁၁၆ ယုၢ်န့ၣ်လီၤ. ပူတဖၣ် ဘၣ်တၢ်နီၤဖးအီၤဃိးတီၤန့ၣ်လီၤ. လံာ်ကဘျံးပၤလၢ တၢ်နီၤဖးစုာ်စုာ်အခီၣ်ထံးန့ၣ် ပာ်ဖျါထီၣ်တၢ်ကွဲးဖုၣ်ဘၣ်ဃး တၢ်ဂ့ၢ်တဖၣ်လၢ တၢ်နီၤဖးဝဲန့ၣ်အပူၤလီၤ. ပူတဖၣ်န့ၣ် ဘၣ်တၢ်ကျဲၤအီၤဒီးပာ်ဖျါထီၣ်အီၤ ဒ်တၢ်စံၣ်စိၤတဲစိၤတၢ်မၤတ့ၢ်အသးတဖၣ် ပိာ်ထွဲလိာ်အသးတခါဘၣ်တခါအသိးန့ၣ်လီၤ. မ့ၢ်လၢတၢ်မၤတ့ၢ်အသး တဖၣ်န့ၣ် ဘၣ်ထွဲလိာ်အသးအဃိ တၢ်ရဲၣ်တၢ်ကျဲၤအံၤ ကမ့ၢ်တၢ်မၤစၢၤလၢ နကသ့ၣ်ညါတၢ်မၤအသးတခါန့ၣ် ကဲထီၣ်ဖဲ တၢ်စံၣ်စိၤတဲစိၤအကတီၢ်မတၤလဲၣ်န့ၣ်လီၤ.
ပူတဖၣ်န့ၣ် ဘၣ်တၢ်ကွဲးအီၤလၢတၢ်ကတိၤညီညီဖိအဃိ သုဝဲဖိသၣ်နီၢ်ဆံးတဖၣ် သုဖးဒၣ်သုတၢ်ကသ့န့ၣ်လီၤ. မိၢ်ပၢ်တဖၣ်စ့ၢ်ကီး ကထံၣ်ဘၣ်ဝဲသ့ၣ်လၢ ဖိသၣ်တဖၣ်ဘၣ်အသးဒိၣ်မး ဖဲတၢ်ဖးန့ၢ်အီၤပူတဖၣ် ခဲအံၤခဲအံၤအခါန့ၣ်လီၤ. လၢလံာ်အံၤအပူၤန့ၣ် နကထံၣ်ဘၣ် တၢ်ဂ့ၢ်တဖၣ်လၢ လီၤသူၣ်ဟုသးဂဲၤဒိၣ်မး လၢဖိသၣ်တဖၣ်ဒီး သးပှၢ်တဖၣ်အဂီၢ်စ့ၢ်ကီးန့ၣ်လီၤ.
ပူခဲလၢာ်စုာ်စုာ်အကတၢၢ်န့ၣ် လံာ်စီဆှံအဆၢလၢ ဘၣ်ထွဲလိာ်အသးဒီးတၢ်ဂ့ၢ်တၢ်ကျိၤ အိၣ်ဝဲန့ၣ်လီၤ. ပအဲၣ်ဒိးဟ့ၣ်ဂံၢ်ဟ့ၣ်ဘါနၤလၢ နကဖးကွၢ်လံာ်စီဆှံအဆၢတဖၣ် လၢပူတဖၣ်အံၤအိၣ်သူၣ်လီၤအသးန့ၣ်လီၤ.