မူခိၣ်​ဒီး​ဟီၣ်ခိၣ်န့ၣ် ဟဲ​ကဲထီၣ်​ဒ်လဲၣ်. မုၢ်ဧိၤ, လါဧိၤ, ဆၣ်ဧိၤ​ဒီး တၢ်ဖိတၢ်လံၤ​အါအါဂီၢ်ဂီၢ်တဖၣ် လၢ​အိၣ်​လၢ​ဟီၣ်ခိၣ်ချၢအံၤ ဟဲ​လၢ​လဲၣ်. လံာ်စီဆှံ​ဟ့ၣ်ပှၤ​တၢ်စံးဆၢ​အမ့ၢ်အတီ​လၢ တၢ်​တဖၣ်အံၤန့ၣ် ယွၤ​တ့လီၤ​အဃိ ဟဲ​ကဲထီၣ်ဝဲ​န့ၣ်လီၤ. တၢ်​န့ၣ်​အဃိ ပ​လံာ်ဝဲအံၤ စးထီၣ်လၢ တၢ်ဘၣ်တ့​အပူ​န့ၣ်လီၤ.

တၢ်လၢ ယွၤ​စးထီၣ်​တ့လီၤ​အဆိကတၢၢ်န့ၣ် မ့ၢ်ဝဲ ပှၤနီၢ်သးဖိတဖၣ် လၢ​အလီၤဂာ်ဒီး​အီၤန့ၣ်​လီၤ. မူခိၣ်ကလူး​တဖၣ်လီၤသၢၣ်. ဘၣ်ဆၣ် မ့မ့ၢ်​ဟီၣ်ခိၣ်​တခီန့ၣ် တ့လီၤဝဲဒၣ်​လၢ ပှၤကညီ​ဒ်​ပဝဲသ့ၣ်တဖၣ် က​အိၣ်​အဂီၢ်လီၤ. လၢ​တၢ်​န့ၣ်​အဃိ ယွၤ​တ့လီၤ​ပှၤပိာ်ခွါ​ဒီး ပိာ်မုၣ်​လၢ​အမံၤ​မ့ၢ်ဝဲ အၤဒၣ်, ဒီး​အံၣ်အု​န့ၣ်​ဝံၤ ပာ်လီၤဝဲဒၣ်​လၢ တၤသၣ်​အလီၢ်​ဃံလၤ​ဖိ​တခါ​အပူၤ​န့ၣ်လီၤ. ဘၣ်ဆၣ် မ့ၢ်လၢ​အဝဲသ့ၣ် တဒိကနၣ် ​ကစၢ်ယွၤ​အတၢ်ကတိၤ​အဃိ အခွဲး​အ​ယၣ်​လၢ က​အိၣ်မူဘၣ်​ဆူညါ​အဂီၢ်န့ၣ် ဘၣ်​လီၤမၢ်ကွံာ်​ဝဲဒၣ်န့ၣ်သၢၣ်.

စးထီၣ်လၢ​အၤဒၣ်​ဘၣ်​တၢ်တ့လီၤအီၤ ဒီး​တုၤလီၤလၢ ထံလုၣ်ဘၢတၢ်​အကတီၢ်န့ၣ် အိၣ်​အနံၣ် ၁,၆၅၆ န့ၣ်လီၤ. ဖဲ​ဆၢကတီၢ်န့ၣ်​အဘၢၣ်စၢၤ ပှၤ​အအၢ​အသီတဖၣ် အိၣ်​အါအါဂီၢ်ဂီၢ်​လီၤ. မ့မ့ၢ်​လၢ​မူခိၣ်​တခီန့ၣ် ပှၤနီၢ်သးဖိ​လၢ ပ​ထံၣ်​အီၤ​လၢ​ပ​မဲာ်​တသ့တဖၣ် အိၣ်ဝဲ​ဒၣ်​လီၤ. စၤတၣ်​ဒီး​အက​လူး အအၢ​အသီတဖၣ်​န့ၣ်လီၤသၢၣ်. မ့မ့ၢ်​လၢ​ဟီၣ်ခိၣ်ချၢ​တခီ ပှၤအၢတဖၣ်​ဒ်​ကၤယံၣ်​အသိး အိၣ်​အါမး​န့ၣ်လီၤ. ပှၤ​အအၢအသီ​လၢ​အဂံၢ်ဆူၣ်​ဘါဆူၣ်​ဒိၣ်​န့ၣ် ပှၤ​မုၢ်ဆ့ၣ်မုၢ်ဂီၤ​တ​ဖၣ်​စ့ၢ်ကီး အိၣ်ဝဲ​ဒၣ်​န့ၣ်လီၤ. လၢ​ဟီၣ်ခိၣ်ချၢန့ၣ် ပှၤဂ့ၤတဖၣ်​ဒ်သိး ဟ့း​ဘ့း​လး​, ဃ​နိာ်, နိအၤ​သ့ၣ်​စ့ၢ်ကီး အိၣ်ဝဲ​လီၤ. လၢ တၢ်နီၤဖး ၁ အပူၤန့ၣ် ပ​က​ဖး​ကွၢ်သကိး ပှၤတဖၣ်အံၤ​အဂ့ၢ် ဒီး​တၢ်မၤအသးတဖၣ်​အဂ့ၢ်န့ၣ်​တက့ၢ်.