ပူ ၃
ပှၤပိာ်ခွါဒီးပှၤပိာ်မုၣ်အဆိကတၢၢ် အဂ့ၢ်
လၢတၢ်ဂီၤအံၤအပူၤ နထံၣ်ဘၣ်တၢ်လီၤဆီမနုၤလဲၣ်. အၢၣ်, မ့ၢ်ဝဲသၢၣ်. လၢတၢ်ဂီၤပူၤအံၤ, ကျဲၣ်ဃုာ်ဒီး ပှၤကညီတဖၣ်လီၤ. အဝဲသ့ၣ်မ့ၢ်ဝဲ ပှၤပိာ်ခွါဒီး ပှၤပိာ်မုၣ်အဆိကတၢၢ်လီၤ. မတၤမၤကဲထီၣ်အဝဲသ့ၣ်လဲၣ်. ကစၢ်ယွၤလီၤသၢၣ်. သုသ့ၣ်ညါကစၢ်ယွၤအမံၤဧါ. ကစၢ်ယွၤအမံၤန့ၣ် မ့ၢ်ယဟိဝၤလီၤ. ပိာ်ခွါဒီးပိာ်မုၣ်အံၤန့ၣ် ဘၣ်တၢ်ကိးအီၤလၢ အၤဒၣ် ဒီးအံၣ်အု န့ၣ်လီၤ.
ယွၤတ့လီၤအၤဒၣ် ဒ်အံၤလီၤ. ဟံးထီၣ်ဝဲဟီၣ်ခိၣ်ကမူၣ်တနီၤ လၢဟီၣ်ခိၣ်အံၤဒီး မၤကဲထီၣ်ဝဲ ပိာ်ခွါအနီၢ်ခိအက့ၢ်အဂီၤ လၢအလၢအပှဲၤတခါန့ၣ်လီၤ. ဝံၤဒီး အူသဖှိနုာ်ကလံၤဆူ အနါစ့ၤပူၤ ဒီးအၤဒၣ်န့ၣ် မူထီၣ်ဂဲၤထီၣ်ဝဲန့ၣ်လီၤ.
ယဟိဝၤယွၤ ကမၢအၤဒၣ်မၤအဂီၢ် တၢ်မၤအိၣ်တခါန့ၣ်လီၤ. ယွၤမၢအၤဒၣ်လၢကဟ့ၣ် ဆၣ်ဖိကီၢ်ဖိအကလုာ်ကလုာ် အမံၤန့ၣ်လီၤ. ဒ်သိး အၤဒၣ်ဟ့ၣ် ဆၣ်ဖိကီၢ်ဖိတဖၣ်အမံၤ အဂ့ၤအဘၣ်ကတၢၢ် ကသ့အဂီၢ် ကဘၣ်အိၣ်ခိးကွၢ်ဝဲဒၣ် ယံာ်ယံာ်ကလဲာ်န့ၣ်လီၤ. ဖဲအၤဒၣ်ဟ့ၣ် ဆၣ်ဖိကီၢ်ဖိတဖၣ်အမံၤအခါ အဝဲဒၣ်ပလီၢ်ဘၣ်အသးတၢ်တခါလီၤ. တၢ်မနုၤလဲၣ်နသ့ၣ်ညါဧါ.
မ့မ့ၢ်ဆၣ်ဖိကီၢ်ဖိတဖၣ်န့ၣ် အိၣ်ခံဒုစုာ်စုာ်, ကဆီပါပၢ်ဒီးကဆီမိမိၢ်, ပါပၢ်ခ့ယုၢ်ဖါဒီး မိမိၢ်ခ့ယုၢ်မိၢ်တဖၣ်လီၤ. ဘၣ်ဆၣ်သနာ်က့ အၤဒၣ်တခီ အသကိးတအိၣ်ဝဲဘၣ်. တၢ်န့ၣ်အဃိ ကစၢ်ယွၤန့ၣ် ဒုးမံအၤဒၣ်လၢ တၢ်မံယိာ်အပူၤ ဒီးထုးထီၣ်ဝဲဒၣ်အဂုာ်ဃံတဘိန့ၣ်လီၤ. ယွၤစူးကါဂုာ်ဃံဝဲအံၤဒီး တ့လီၤဝဲပိာ်မုၣ်တဂၤလၢ အၤဒၣ်အဂီၢ်န့ၣ်လီၤ. ဒီး ပိာ်မုၣ်န့ၣ် ကဲထီၣ်အၤဒၣ်အမါလီၤ.
မ့မ့ၢ်ခဲအံၤ, အၤဒၣ်သးခုလၢတၢ်သးခုဖးဒိၣ်လံသၢၣ်, အံၣ်အုစ့ၢ်ကီး အိၣ်ဘၣ်ဝဲလၢ တၤသၣ်လီၢ်ဃံလၤထဲအံၤအပူၤအဃိ ကသးခုဝဲဆံးဒိၣ်လဲၣ်န့ၣ် ကွၢ်ဆိကမိၣ်တက့ၢ်. မ့မ့ၢ်ခဲအံၤန့ၣ် အဝဲသ့ၣ် မၤန့ၢ်အဖိတဖၣ်ဒီး အိၣ်ဃုာ်ဆိးဃုာ်တပူၤဃီ လၢတၢ်သူၣ်ဖှံသးညီ သ့လံသၢၣ်.
ယဟိဝၤန့ၣ် အဲၣ်ဒိးဝဲလၢ အၤဒၣ်ဒီးအံၣ်အု ကအိၣ်မူဝဲထီဘိန့ၣ်လီၤ. ယွၤသးအိၣ်လၢ အဝဲသ့ၣ်ကမၤကဲထီၣ်ဟီၣ်ခိၣ်ဒီဘ့ၣ် ကဃံလၤဒ် ဧ့ၤဒ့ၣ်တၤသၣ်အလီၢ်အသိးန့ၣ်လီၤ. ဖဲအၤဒၣ်ဒီးအံၣ်အုဆိကမိၣ် ကဘၣ်မၤဝဲသ့ၣ်တၢ်အံၤအခါ ကသးခုဝဲသ့ၣ်ဒိၣ်မးန့ၣ်လီၤ. သုတအဲၣ်ဒိးမၤသကိးတၢ်လၢ ဟီၣ်ခိၣ်အံၤ ကကဲထီၣ်တၢ်လီၢ်အဃံလၤဒိၣ်မး ဒ်တၤသၣ်အလီၢ်ဖိအံၤအသိးဘၣ်ဧါ. ဘၣ်ဆၣ်သနာ်က့ အၤဒၣ်ဒီးအံၣ်အုအတၢ်သးခုန့ၣ် တယံာ်ဘၣ်. ဟါမၢ်ကွံာ်လီၤ. ဘၣ်မနုၤအဃိလဲၣ်န့ၣ် မ်ပကကွၢ်သကိးတက့ၢ်.