ပူ ၂၀
ဒံနၤ ထံၣ်ဘၣ်တၢ်ကီတၢ်ခဲ အဂ့ၢ်
နထံၣ်ဒံနၤလဲၤဟးဆူမတၤအအိၣ်လဲၣ်. လဲၤဟးဝဲဆူ ကနၤဧၣ်မုၣ် တဖၣ်အအိၣ်လီၤ. နဆိကမိၣ်လၢ အပါပၢ်ကဘၣ်အသးဧါ. လၢပကသ့ၣ်ညါတၢ်သံကွၢ်အံၤ အတၢ်စံးဆၢအဂီၢ်, မ်ပကသ့ၣ်နီၣ်ထီၣ်က့ၤ အၤဘြၤဟၣ်ဒီးအံၤစဲး ပာ်အသးလၢ ကနၤဧၣ်မုၣ်တဖၣ်အဖီခိၣ် ဒ်လဲၣ်န့ၣ်လီၤ.
အၤဘြၤဟၣ်န့ၣ် အဲၣ်ဒိးအဖိခွါအံၤစဲးကန့ၢ်အမါလၢ ပိာ်မုၣ်လၢကီၢ်ကနၤဧၣ်န့ၣ်ဧါ. တအဲၣ်ဒိးဝဲလ့ၤတက့ၤဘၣ်. အံၤစဲးဒီးရံးဘကၤတခီလဲၣ်. မ့ၢ်အဲၣ်ဒိးဒုးအိၣ်ဃုာ်ဝဲအဖိခွါယၤကိာ်လၢ ကနၤဧၣ်မုၣ်တဂၤစ့ၢ်ကီးဧါ. တအဲၣ်ဒိးဒုးဟံးန့ၢ်ဝဲဘၣ်. ဘၣ်မနုၤအဃိလဲၣ်နသ့ၣ်ညါဧါ.
အဂ့ၢ်တခီတမ့ၢ်တၢ်ဂၤဘၣ်. ပှၤလၢကနၤဧၣ်တဖၣ်န့ၣ် ဘူၣ်ဝဲဘါဝဲသ့ၣ် ယွၤလၢအကမၣ်တဖၣ်အဃိလိၤ. အဝဲသ့ၣ်တမ့ၢ်ပှၤအဂ့ၤလၢ ကြၢးဃုထၢ ဒ်ဝၤ, ဒ်မါတဖၣ် အသိးန့ၣ်ဘၣ်. တမ့ၢ်ပှၤလၢအဂ့ၤတဖၣ် လၢကြၢးရ့ဒ်တံၤသကိးစ့ၢ်ကီးဘၣ်. လၢတၢ်န့ၣ်အဃိ ယၤကိာ်န့ၣ် တမ့ၢ်ကဘၣ်အသးလၢ အဖိမုၣ်လဲၤရ့တံၤရ့သကိးဒီး ပှၤကနၤဧၣ်မုၣ်တဖၣ်န့ၣ် လ့ၤတက့ၤဘၣ်.
ဒ်ပဆိကမိၣ်အသိး ဒံနၤထံၣ်ဘၣ်တၢ်ကီတၢ်ခဲလံ. လၢတၢ်ဂီၤပူၤန့ၣ် နထံၣ်ဘၣ်ပှၤကနၤဧၣ်တဂၤလၢ အကွၢ်ဒံနၤန့ၣ်ဧါ. အမံၤမ့ၢ်ဝဲၡက့ၣ်လီၤ. ဘၣ်မုၢ်တနံၤ ဖဲဒံနၤဟဲဟးလိာ်ကွဲဝဲအခါ အဝဲကိးဆူၣ်ဒံနၤဒီး မံဃုာ်ဒီးအီၤလီၤ. နီၢ်နီၢ်တခီ တကြၢးမၤဒ်အံၤဘၣ်. ဘၣ်မနုၤအဃိလဲၣ်န့ၣ် ထဲပိာ်မုၣ်ဒီးဖိာ်ခွါလၢ အဖျီအသးဧိၤဒၣ် မံဃုာ်ဝဲသ့န့ၣ်လီၤ. ၡက့ၣ်မၤဝဲဒံနၤဒ်အံၤအဃိ တၢ်ကီတၢ်ခဲအိၣ်ထီၣ်ဝဲအါမးန့ၣ်လီၤ.
ဒံနၤအဝဲၢ်တဖၣ်နၢ်ဟူ တၢ်မၤအသးဒ်အံၤသိးတဖၣ်ဒီး အသးထီၣ်ဝဲသ့ၣ်ဒိၣ်မးန့ၣ်လီၤ. လၢအဝဲသ့ၣ်အကျါခံဂၤ, စူၤမ့းအိၣ်ဒီး လ့ၤဝံ သးထီၣ်ဝဲဒိၣ်မး တုၤလၢအစိာ်ထီၣ်ဃဲာ်ဂၤဘ့ၣ်ဒီး ဖဲပှၤဝ့ၢ်ဖိတဖၣ်တပလီၢ်ဘၣ်အသးအခါ နုာ်လီၤဒုးဝဲဝ့ၢ်န့ၣ်လီၤ. အဝဲသ့ၣ်ဒီး အဝဲသ့ၣ်အဒီပုၢ်ဝဲၢ်တဖၣ် မၤသံၡက့ၣ်ဒီး ပိာ်ခွါလၢအအိၣ်တ့ၢ်ခဲလၢာ်န့ၣ်လီၤ. ယၤကိာ်အသးထီၣ်ဒိၣ်မးလၢ အဖိခွါတဖၣ် မၤတၢ်အၢတၢ်သီဒ်သိးအံၤအဃိန့ၣ်လီၤ.
တၢ်နးတၢ်ဖှီၣ်ဒ်အံၤတဖၣ် ဟဲကဲထီၣ်ဝဲဒ်လဲၣ်. စးထီၣ်လၢ ဒံနၤရ့တံၤရ့သကိးဒီး ပှၤလၢတတိၢ်န့ၢ် ယွၤအတၢ်သိၣ်တၢ်သီတဖၣ်န့ၣ်လီၤ. ပတအဲၣ်ဒိးရ့တံၤရ့သကိးဒီး ပှၤတဖၣ်အံၤဘၣ်, တမ့ၢ်ဘၣ်ဧါ.
