ပူ ၃၀
တပှီာ်လၢမ့ၣ်အူအီၣ်အီၤ အဂ့ၢ်
မိၤၡ့လူၤဃုတပံၢ်လၢ အသိတဖၣ်ကအီၣ်အဂီၢ်အခါ လဲၤတုၤဝဲလၢ ကစၢၢ်ဃိၤရ့းန့ၣ်လီၢ်. ဖဲန့ၣ် ထံၣ်ဘၣ်ဝဲတပှီာ်တခါလၢ မ့ၣ်အူအီၣ်အီၤန့ၣ်လီၤ. ဘၣ်ဆၣ် တပှီာ်န့ၣ် တလီၤကဘိၣ်ဒီးကဲထီၣ်ချါဘၣ်.
မိၤၡ့ဆိကမိၣ်ဝဲဒၣ် ‘လီၤလးဒိၣ်မးန့ၣ်လီၤ. ယကသုးဘူးယသးဒီး ကွၢ်အီၤတဘီ.’ တုၤအသုးဘူးအသးဒီး တၢ်ကလုၢ်တခါ သီၣ်ထီၣ်လၢတပှီာ်ကျါ စံးဝဲ, ‘သုးနသးဆူညါတဂ့ၤ. ဘ့ၣ်လီၤကွံာ်နခီၣ်ဖံးတက့ၢ်. ဟီၣ်ခိၣ်လၢနယီၢ်ဃာ်အီၤန့ၣ် မ့ၢ်ဟီၣ်ခိၣ်စီဆှံလီၤ.’ ယွၤကတိၤတၢ် ခီဖျိလၢမူခိၣ်ကလူးန့ၣ်လီၤ. လၢတၢ်န့ၣ်အဃိ မိၤၡ့မၤဘၢဃာ်အမဲာ်န့ၣ်လီၤ.
လၢတၢ်န့ၣ်အလီၢ်ခံ ကစၢ်ယွၤစံးဝဲဒၣ်, ‘ယထံၣ်ဘၣ်လံ ယပှၤတဖၣ် တူၢ်ဘၣ်တၢ်နးတၢ်ဖှီၣ် လၢကီၢ်အဲၤကူပတူးဒ်လဲၣ်န့ၣ်လီၤ. လၢတၢ်န့ၣ်အဃိ ယကမၤပူၤဖျဲးအဝဲသ့ၣ်လီၤ. ယကမၢလီၤနၤလၢ နကထုးထီၣ်ယပှၤဂီၢ်မုၢ် လၢကီၢ်အဲၤကူပတူးအပူၤလီၤ.’ ယဟိဝၤကတဲာ်ကတီၤဝဲဒ်သိး ကလဲၤကိးအပှၤဂီၢ်မုၢ်ဆူ ကီၢ်လၢအဃံလၤ ကနၤဧၣ်အပူၤန့ၣ်လီၤ.
ဘၣ်ဆၣ်သနာ်က့ မိၤၡ့စံး ‘ယတမ့ၢ်တၢ်နီတမံၤဘၣ်. ယမၤတၢ်အံၤကသ့ဒ်လဲၣ်. ယမ့ၢ်လဲၤယဲဒၣ်လဲာ် ပှၤအံၣ်စရ့လးဖိ မ့ၢ်သံကွၢ်ယၤလၢ, “မတၤမၢလီၤနၤလဲၣ်” န့ၣ်သၢပျၢၤ ယကဘၣ်စံးဆၢက့ၤအဝဲသ့ၣ်ဒ်လဲၣ်.’ န့ၣ်လီၤ.
ကစၢ်ယွၤစံးဆၢက့ၤအီၤဒ်အံၤလီၤ. ‘နကဘၣ်စံးအဝဲသ့ၣ်ဒ်အံၤ, အၤဘြၤဟၣ်အယွၤ, အံၤစဲးအယွၤဒီး ယၤကိာ်အယွၤလၢအမ့ၢ် ယဟိဝၤမၢလီၤယၤန့ၣ်လီၤ.’ ဝံၤဒီးယဟိဝၤစံးကဒီးဝဲ ‘မံၤအဝဲအံၤ မ့ၢ်ယမံၤအစိၤစိၤအဃၣ်ဃၣ်န့ၣ်လီၤ.’
မိၤၡ့စံးကဒီးဝဲ, ‘နမၢလီၤယၤန့ၣ် မ့ၢ်တနာ်ဝဲတခီန့ၣ်လဲၣ်.
ယွၤသံကွၢ်အီၤ, ‘လၢနစုပူၤမနုၤအိၣ်လဲၣ်.’
မိၤၡ့စံးဆၢ, ‘အိၣ်နီၣ်ထိးဘိတဘိလီၤ.’
ယွၤစံး, ‘တ့ၢ်လီၤအီၤဆူဟီၣ်ခိၣ်လိၤတက့ၢ်.’ ဖဲမိၤၡ့တ့ၢ်လီၤဝဲနီၣ်ထိးဘိအခါ ကဲထီၣ်ဂုၢ်သ့ၣ်န့ၣ်လီၤ. ဝံၤဒီး ယဟိဝၤဒုးနဲၣ်ဝဲ တၢ်လီၤလးလၢခံတခါလီၤ. ‘ဒၢနုာ်နစုဆူနဆ့ကၤအပူၤတက့ၢ်.’ ဒ်အစံးဝဲအသိး မိၤၡ့မၤဝဲဝံၤ ဖဲအထုးထီၣ်ကဒါက့ၤအစုအခါ အစုဝါဝဲဒ်ပစီၤဖီအသိးန့ၣ်လီၤ. လီၤဂာ်မးဒ်တၢ်ဆါအၢ မ့တမ့ၢ် တၢ်နုၢ်ဘၣ်အီၤအသိးန့ၣ်လီၤ. ဝံၤဒီး ယဟိဝၤဟ့ၣ် မိၤၡ့ တၢ်စိတၢ်ကမီၤလၢ မၤဝဲကသ့တၢ်လီၤလးသၢခါတခါအဂီၢ်န့ၣ်လီၤ. လၢခံကတၢၢ်န့ၣ် ယွၤစံးဘၣ်မိၤၡ့ ‘နမ့ၢ်ဒုးနဲၣ်တၢ်လီၤလးတဖၣ်အံၤလၢ ပှၤအံၣ်စရ့လးဖိတဖၣ်န့ၣ်သၢပျၢၤ ကနာ်ဝဲသ့ၣ်လၢ ယမၢလီၤနၤန့ၣ်လီၤ.’
လၢတၢ်န့ၣ်အလီၢ်ခံ မိၤၡ့က့ၤဝဲဆူဟံၣ်ဒီး တဲဘၣ်ယံးသရိၤလၢ, ‘ဒ်သိးယကသ့ၣ်ညါဘၣ် ယဘူးယတံၢ်လၢ ကီၢ်အဲၤကူပတူးတဖၣ် မ့ၢ်အိၣ်ဝဲဆိးဝဲဒ်လဲၣ်အဂီၢ် ဟ့ၣ်ယၤအခွဲးလၢ ယကက့ၤတက့ၢ်’ န့ၣ်လီၤ. ဒ်န့ၣ်ဒီး ယံးသရိၤစံးမိၤၡ့ တၢ်ကတိၤဟးဖးန့ၣ်လီၤ. မိၤၡ့စ့ၢ်ကီး ဟးထီၣ်ဝဲဆူ ကီၢ်အဲၤကူပတူးန့ၣ်လီၤ.