ပူ ၁၂
ပှၤကညီတဖၣ် သူၣ်ထီၣ် တၢးဖးဒိၣ်တဖျၢၣ်
နံၣ်တဖၣ်လဲၤပူၤကွံာ်တ့ၢ်လံ အါနံၣ်လံန့ၣ်လီၤ. နိအၤအဖိခွါတဖၣ် မၤန့ၢ်အဖိခွါအဖိမုၣ်အါမးန့ၣ်လီၤ. အဝဲသ့ၣ်အဖိအလံၤတဖၣ်စ့ၢ်ကီး ဒိၣ်ထီၣ်ဝဲသ့ၣ်ဒီး အိၣ်ဖျဲၣ်ထီၣ်ကဒီး အဖိခွါ, ဖိမုၣ်တဖၣ်န့ၣ်လီၤ. မၤသးဒ်န့ၣ်ဒီး တယံာ်ဘၣ်န့ၣ် ပှၤအါထီၣ်ဂီၢ်ထီၣ် လၢဟီၣ်ခိၣ်လိၤန့ၣ်လီၤ.
ပှၤလၢအဝဲသ့ၣ်အကျါတဂၤန့ၣ် မ့ၢ်နိအၤအလိၤ နံးမရိးန့ၣ်လီၤ. နံမရိးမ့ၢ်ပှၤအၢပှၤသီတဂၤလီၤ. အဝဲဟးမၤသံ ဆၣ်ဖိကီၢ်ဖိ, ဃုာ်ဒီးပှၤကညီန့ၣ်လီၤ. ကဲစီၤပၤလၢပှၤဂၤအဖီခိၣ်စ့ၢ်ကီးန့ၣ်လီၤ. ယွၤတဘၣ်အသးလၢနံးမရိးဘၣ်.
ပှၤအိၣ်လၢခါဖဲန့ၣ်တဖၣ်ခဲလၢာ် ကတိၤတၢ်ကတိၤတကျိာ်ဃီလီၤ. နံးမရိးတခီ သးအိၣ်ပာ်ဖှိၣ် ပှၤခဲလၢာ်လၢတၢ်လီၢ်တပူၤဃီလီၤ. မ့ၢ်မၤဒ်န့ၣ်မးဒီး ပၢဝဲပှၤတဖၣ်န့ၣ်ကန့ၢ်ဝဲသၢၣ်. လၢတၢ်န့ၣ်အဃိ မၤဝဲဒ်လဲၣ်နသ့ၣ်ညါဧါ. မၢပှၤသူၣ်ထီၣ်ဝ့ၢ်တဝ့ၢ်ဒီး အတၢးဖးဒိၣ်တဖျၢၣ် ဖဲန့ၣ်လီၤ. လၢတၢ်ဂီၤပူၤ ကွၢ်ပှၤမၤအူးခဲတဖၣ်န့ၣ်ဘီၣ်.
သူၣ်ထီၣ်ဝဲသ့ၣ်ဒ်အံၤန့ၣ် တဘၣ်ယဟိဝၤယွၤအသးဘၣ်. ယွၤအဲၣ်ဒိးလၢပှၤခဲလၢာ် ကအိၣ်ရၤလီၤအသး သကုၤဟီၣ်ခိၣ် လၢတၢ်လီၢ်ကိးပူၤဒဲးန့ၣ်လီၤ. ဘၣ်ဆၣ်သနာ်က့ ပှၤကညီတဖၣ်စံး, ‘ဟဲ, မ်ပကသူၣ်ထီၣ်သကိး ဝ့ၢ်တဝ့ၢ် ဒီးတၢးထီလၢ အအိၣ်ဒီးအခိၣ်ထိးတုၤဆူမူခိၣ် န့ၣ်တက့ၢ်. မ့ၢ်မၤဒ်န့ၣ်ဒီး ပမံၤကဟူန့ၣ်လီၤ.’ ပှၤကညီတဖၣ် လၢကမၤလၤကပီၤယွၤအလီၢ်န့ၣ် အဲၣ်ဒိးမၤလၤကပီၤလီၤအသးန့ၣ်လီၤ.
လၢတၢ်န့ၣ်အဃိ ကစၢ်ယွၤဆိကတီၢ်အဝဲသ့ၣ် အတၢ်သူၣ်ထီၣ်န့ၣ်လီၤ. မၤဝဲဒ်လဲၣ်နသ့ၣ်ညါဧါ. ဖဲပှၤတဖၣ်အံၤကတိၤတၢ်ကတိၤ တကလုာ်ဃီအခါန့ၣ် မၤကဲထီၣ် တၢ်ကတိၤအါကလုာ်အါမၠိ သတူၢ်ကလာ်န့ၣ်လီၤ. ပှၤသူၣ်ထီၣ်တၢ်တဖၣ် တနၢ်ပၢၢ်လိာ်အတၢ်ကတိၤ တဂၤဒီးတဂၤလၢၤဘၣ်လီၤ. လၢတၢ်န့ၣ်အဃိ အဝဲသ့ၣ် အဝ့ၢ်န့ၣ် ဘၣ်တၢ်ကိးအီၤလၢ ဘၤဘ့းလး, မ့တမ့ၢ် ဘၤဘူၤလိၣ် န့ၣ်လီၤ. အခီပညီမ့ၢ်တၢ်သဘံၣ်ဘုၣ်န့ၣ်လီၤ.
မၤသးဒ်န့ၣ်ဒီး ပှၤကညီတဖၣ် ဟးဖးလိာ်အသးလၢ ဘၤဘ့းလးန့ၣ်လီၤ. ပှၤအဖုအဂီၢ်တဖၣ်လၢ အတၢ်ကတိၤဒ်သိးလိာ်အသးတဖၣ် လဲၤဒီးအိၣ်ဝဲဆိးဝဲလၢ ဟီၣ်ခိၣ်အတကပၤစုာ်စုာ်န့ၣ်လီၤ.