ပူ ၂၈
ဖိသၣ်အီၣ်နုၢ်မိၤၡ့ အသးသမူပူၤဖျဲးတ့ၢ်ဒ်လဲၣ် အဂ့ၢ်
ကွၢ်ဖိသၣ်အီၣ်နုၢ်ဖိဟီၣ်န့ၣ်တက့ၢ်. ဖီၣ်ဃာ်ဝဲပိာ်မုၣ်တဂၤအစုယူာ်စ့ၢ်ကီးန့ၣ်လီၤ. ဖိသၣ်ဖိအံၤမ့ၢ် မိၤၡ့န့ၣ်လီၤ. မုၣ်ဃံလၤဖိအံၤ မ့ၢ်မတၤလဲၣ်နသ့ၣ်ညါဧါ. ကီၢ်အဲၤကူပတူးအစီၤပၤ ဖၤရိၤ အဖိမုၣ်လီၤ.
မိၤၡ့အမိမိၢ်တခီ ပာ်ခူသူၣ်တ့ၢ်မိၤၡ့ တုၤအဒိၣ်ထီၣ်သၢလါန့ၣ်လီၤ. ဘၣ်ယိၣ်ဝဲလၢ ပှၤအဲၤကူပတူးတဖၣ် ကဟဲမၤသံဘၣ်ဖုးအီၤအဃိလီၤ. ဘၣ်ဆၣ် သ့ၣ်ညါဝဲလၢ တနံၤနံၤန့ၣ် ပှၤကထံၣ်မိၤၡ့ဒီး ကမၤသံအီၤလီၤအဃိ ဒ်သိးအတဘၣ်တၢ်မၤသံအီၤအဂီၢ် မၤတ့ၢ်ဝဲဒ်အံၤလီၤ.
ဟံးန့ၢ်ဝဲဖၣ်ဖိတဖျၢၣ်ဝံၤ မၤဝဲဒ်သိးထံသုတလဲၤနုာ်လီၤ, ဝံၤဒီး ဒၢနုာ်လီၤဝဲမိၤၡ့ဖိဆူဖၣ်အပူၤလီၤ. လၢတၢ်န့ၣ်အလီၢ်ခံ ပာ်လီၤဝဲဖၣ်ဖိန့ၣ်လၢ ထံကျိနံၤလါအကၢၢ်နံၤ လၢတပိၢ်ဆှဲတဖၣ်အကျါန့ၣ်လီၤ. ဒီးမၢမိၤၡ့အဝဲၢ်မုၢ်လၢ အကခိးကွၢ်ဝဲဖဲန့ၣ် ဒ်သိးကသ့ၣ်ညါ တၢ်ကမၤအသးဒ်လဲၣ်အဂီၢ်န့ၣ်လီၤသၢၣ်.
ဖဲတယံာ်ဘၣ်ဝဲန့ၣ် ဖၤရိၤအဖိမုၣ် ဟဲလီၤဝဲဆူထံကျိနံၤလါပူၤ လၢကလုၣ်ထံအဂီၢ်လီၤ. လၢတၢ်တမုၢ်လၢ်ဘၣ်အပူၤ ထံၣ်ဘၣ်ဝဲဖၣ်ဖိတဖျၢၣ် လၢတပိၢ်ဆှဲအကျါန့ၣ်လီၤ. အဝဲမၢလီၤအကုၢ်မုၣ်တဂၤ လၢအကလဲၤဟံးန့ၢ် ဖၣ်ဖိန့ၣ်လီၤ. ဖဲစီၤပၤအဖိမုၣ်အိးထီၣ်ဝဲဖၣ်ဖိအခါ ထံၣ်ဘၣ်ဝဲ ဖိသၣ်လၢအဃံလၤဒိၣ်မးလီၤ. ဒီးမိၤၡ့ဖိတခီ ဟီၣ်ဝဲဒၣ်ဒီး စီၤပၤဖိမုၣ် သးကညီၤဘၣ်အီၤလီၤ. တအဲၣ်ဒိးဘၣ်တၢ်မၤသံအီၤဘၣ်.
အခါဖဲန့ၣ် မံးရယၣ်ဟဲဝဲဆူအကပၤလီၤ. ပထံၣ်အီၤလၢတၢ်ဂီၤပူၤန့ၣ်သ့လီၤ. မံးရယၣ်သံကွၢ်ဝဲဒၣ် ဖၤရိၤအဖိမုၣ်လၢ ‘ကစၢ်မုၣ်အဂီၢ် ယကဘၣ်ဟဲကိးန့ၢ် ပှၤအံၣ်စရ့လးမုၣ်လၢ အကွၢ်န့ၢ်ဖိသၣ်ဧါ.’ န့ၣ်လီၤ.
စီၤပၤအဖိမုၣ်စံး ‘အၢၣ်, ဝံသးစူၤလဲၤကိးန့ၢ်တဘီ.’
ဒ်န့ၣ်ဒီး မံးရယၣ်က့ၤတဲဘၣ်အမိၢ် လၢအချ့န့ၣ်လီၤ. ဖဲမိၤၡ့အမိၢ်ဟဲတုၤဝဲအခါ စီၤပၤအဖိမုၣ်စံးဝဲ, ‘က့ၤစိာ်ဖိသၣ်အံၤဒီး ကွၢ်အီၤလၢယဂီၢ်တက့ၢ်. ယကဟ့ၣ်နၤ တၢ်ကွၢ်ဖိသၣ်အဘုးအလဲန့ၣ်လီၤ.’
ထဲန့ၣ်ဒီး မိၤၡ့အမိၢ်န့ၣ် အံးထွဲကွၢ်ထွဲက့ၤဘၣ် အသွံၣ်အထံန့ၣ်လီၤသၢၣ်. ဖဲမိၤၡ့ဒိၣ်ထီၣ်ဝဲအခါ အမိမိၢ်လဲၤကိးအီၤဆူ ဖၤရိၤအဖိမုၣ်အအိၣ်လီၤ. စီၤပၤအဖိမုၣ်လုၢ်ဖိက့ၤမိၤၡ့ ဒ်အဖိအသိးန့ၣ်လီၤ. လၢတၢ်မၤအသးဒ်အံၤအဃိ မိၤၡ့န့ၣ် ဒိၣ်ထီၣ်ဝဲဒၣ်လၢ ဖၤရိၤအနီပူၤန့ၣ်လီၤ.