ပူ ၂၅
ဒူၣ်ဖိထၢဖိတဒူၣ်သုးအလီၢ် ဆူကီၢ်အဲၤကူပတူး အဂ့ၢ်
ယိၤသးကီၤပအုၣ် အသးဘၣ်ဒိန့ၣ် ယံာ်ယံာ်တန့ၢ်လၢၤဘၣ်. လၢတၢ်န့ၣ်အဃိ ခါလီၤအကလုၢ်ဒ်သိးအကုၢ်ခဲလၢာ် ကဟးထီၣ်ကွံာ် လၢဒၢးပူၤလီၤ. ဖဲအိၣ်တ့ၢ်ထဲ အဝဲဒၣ်ဒီးအဝဲၢ်တဖၣ်အခါ ယိၤသးဟီၣ်ဝဲဒၣ်လီၤ. ပဆိကမိၣ်ကွၢ်သ့လၢ အဝဲၣ်တဖၣ်ကကမၢကမၣ် ဆံးဒိၣ်လဲၣ်န့ၣ်လီၤ. တသ့ၣ်ညါဝဲသ့ၣ်လၢ ဘၣ်မနုၤယိၤသးဟီၣ်ဝဲလဲၣ် အဃိန့ၣ်လီၤ. လၢခံကတၢၢ်တခီ စံးဝဲဒၣ်, ‘ယမ့ၢ်ယိၤသးလီၤ. ယပၢ်မ့ၢ်အအိၣ်မူဒံးဧါ.’ န့ၣ်လီၤ.
အဝဲၢ်တဖၣ် ကမၢကမၣ် တုၤဒၣ်လဲာ် အကတိၤထီၣ်က့ၤတၢ် တသ့လၢၤဘၣ်န့ၣ်လီၤ. ပျံၤတၢ်ဒိၣ်ဒိၣ်ကလဲာ်လီၤ. ဘၣ်ဆၣ်ဒီး ယိၤသးစံးအဝဲသ့ၣ် ‘ဟဲသုးဘူးသုသးဆူယအိၣ်တက့ၢ်.’ တုၤအတုၤဝဲသ့ၣ်လၢအကပၤဒီး တဲဝဲဒၣ် ‘ယမ့ၢ်သုပုၢ်ယိၤသးလၢ သုဆါလီၤအီၤဆူ ကီၢ်အဲၤကူပတူးန့ၣ်လီၤ.’
ယိၤသးစံးဆၢက့ၤအဝဲသ့ၣ်လၢ တၢ်သူၣ်ကပုာ်သးကပုာ်အပူၤန့ၣ်လီၤ. ‘မ့ၢ်လၢသုဆါလီၤကွံာ်ယၤဆူအံၤအဃိ သုတပာ်လီၤက့ၤတၢ်ကမၣ်လၢသုလိၤတဂ့ၤ. ကစၢ်ယွၤပျၢ်လီၤယၤ ဆူကီၢ်အဲၤကူပတူး ဒ်သိးကအုၣ်က့ၤခီၣ်က့ၤ ပှၤအသးသမူတဖၣ်အဂီၢ် န့ၣ်လီၤ. ဖၤရိၤမၤလၤကပီၤယၤလၢ ယကမ့ၢ်ကီၢ်အံၤအစီၤပၤန့ၣ်လီၤ. လၢတၢ်အံၤအဃိ က့ၤဆူယပါပၢ်အအိၣ်လၢအချ့ဒီး တဲဘၣ်အီၤလၢ တၢ်ဂ့ၢ်တၢ်ကျိၤအံၤတက့ၢ်. တဲဘၣ်စ့ၢ်ကီးအီၤလၢ ကဟဲအိၣ်လၢအံၤတက့ၢ်.’
ဝံၤဒီး ယိၤသးဖိးအဝဲၢ်တဖၣ် ဒီးနၢမူအီၤန့ၣ်လီၤ. တုၤဖၤရိၤနၢ်ဟူလၢ ယိၤသးအဝဲၢ်တဖၣ်ဟဲတုၤန့ၣ် တဲဘၣ်ဝဲယိၤသးဒ်အံၤလီၤ. ‘မၢအက့ၤစိာ်လ့ၣ်တဖၣ်ဒီး မၢအဟဲကိးအပၢ်ဒီးအပှၤဟံၣ်ဖိဃီဖိတဖၣ်ဆူအံၤတက့ၢ်. ယကဟ့ၣ်အဝဲသ့ၣ် တၢ်လီၢ်အဂ့ၤကတၢၢ်လၢ ကီၢ်အဲၤကူပတူးအပူၤန့ၣ်လီၤ.’
ဒ်ဖၤရိၤစံးဝဲအသိး ဟဲကိးဝဲသ့ၣ်လီၤ. ယၤကိာ်ဒီးအဟံၣ်ဖိဃီဖိဒီတဒူၣ်ညါ ဟဲတုၤလၢကီၢ်အဲၤကူပတူးအခါ ထံၣ်လိာ်သးဒီးယိၤသး, ဒ်ပထံၣ်အီၤသ့လၢတၢ်ဂီၤအံၤအပူၤန့ၣ်လီၤ.
ယၤကိာ်အပှၤဟံၣ်ဖိဃီဖိတဖၣ် ဒိၣ်ထီၣ်အါထီၣ်ဝဲဒိၣ်မးန့ၣ်လီၤ. ဖဲအဟဲသုးလီၤအသးဆူ ကီၢ်အဲၤကူပတူးအခါ ယၤကိာ်ဒီးအဖိအလံၤတဖၣ်ခဲလၢာ် အိၣ်အဂၤ ၇၀ လီၤ. ပၣ်ဃုာ်ဒီး အဝဲသ့ၣ်အမါတဖၣ်စ့ၢ်ကီးန့ၣ်လီၤ. ကုၢ်တဖၣ်စ့ၢ်ကီး ကအိၣ်ဝဲအါဂၤလီၤ. အဝဲသ့ၣ်ခဲလၢာ် သူၣ်လီၤအတၢ်အိၣ်တၢ်ဆိးအလီၢ် လၢကီၢ်အဲၤကူပတူးပူၤန့ၣ်လီၤ. ဘၣ်တၢ်ကိးအဝဲသ့ၣ်လၢ ပှၤအံၣ်စရ့လးဖိလီၤ. ဘၣ်မနုၤအဃိလဲၣ်န့ၣ် မ့ၢ်လၢယွၤဆီတလဲယၤကိာ်အမံၤဆူ အံၣ်စရ့လးအဃိန့ၣ်လီၤ. ပှၤအံၣ်စရ့လးဖိတဖၣ် ကဲထီၣ်ဝဲပှၤလီၤလးတကလုာ် လၢကစၢ်ယွၤအဂီၢ် န့ၣ်လီၤ. တၢ်ဂ့ၢ်အဝဲန့ၣ်ပကထံၣ်ဘၣ်လၢခံလီၤ.
