လၢ​တၢ်ဂီၤ​ပူၤန့ၣ် အၤဘြၤဟၣ်​မၤ​မနုၤလဲၣ်န့ၣ်​န​ထံၣ်ဧါ. လၢ​အစု​ပူၤန့ၣ် အိၣ်ဒီး​ဒီတဘ့ၣ် ဒ်သိး​အက​မၤသံ​အဖိခွါ​န့ၣ်လီၤ. ဘၣ်မနုၤ​အဃိဘၣ်​မၤဝဲဒ်န့ၣ်​လဲၣ်. အဆိ​ပ​က​က​ကွၢ်သကိး အၤဘြၤဟၣ်​ဒီး​စၤရါ မၤန့ၢ်​ဖိခွါဝဲအံၤ​ဒ်လဲၣ်​န့ၣ်လီၤ.

တိၢ်နီၢ်ဃာ်​လၢ ယွၤ​မၤတၢ်​အၢၣ်လီၤအီလီၤ​ဒီး​အဝဲသ့ၣ်​လၢ က​မၤန့ၢ်​ဖိခွါ​တဂၤန့ၣ်​တက့ၢ်. ​ဘၣ်ဆၣ်​သနာ်က့ အၤဘြၤဟၣ်​ဒီး​စၤရါ​အသးပှၢ်တ့ၢ်မးလံ​န့ၣ်​အဃိ လီၤဂာ်​ကဲထီၣ်​တသ့ဘၣ်. မ့ၢ်​ဒ်န့ၣ်​ဘၣ်ဆၣ် အၤဘြၤဟၣ်​တခီ နာ်ဝဲဒၣ် တၢ်မၤ​လၢ​လီၤဂာ်​ကဲထီၣ်​တသ့​န့ၣ် ယွၤ​မၤ​ကဲထီၣ်ဝဲ​သ့န့ၣ်​လီၤ. ထဲန့ၣ်ဒီး တၢ်မၤအသး​ဆူညါ​ဒ်လဲၣ်.

ကစၢ်ယွၤ​ဟ့ၣ် တၢ်အၢၣ်လီၤအီလီၤအံၤ​ဝံၤအလီၢ်ခံ တၢ်ဆၢကတီၢ်လၢာ်တ့ၢ် တနံၣ်လံ​န့ၣ်လီၤ. ဖဲ​အကတီၢ်န့ၣ်, ဖဲ​အၤဘြၤဟၣ်​အသးအိၣ် အနံၣ် ၁၀၀, စၤရါ​အသးအိၣ် အနံၣ် ၉၀ အခါ မၤန့ၢ်ဝဲ​သ့ၣ်​ဖိခွါ​တဂၤ လၢ​အမံၤ​မ့ၢ် အံၤစဲး​န့ၣ်လီၤ. ယွၤ​အတၢ်စံးပာ်​တီဝဲဒၣ်လီၤ.

ဘၣ်ဆၣ်​သနာ်က့ ဖဲအံၤ​စဲး​ဒိၣ်ထီၣ်​အခါ ယဟိဝၤန့ၣ်​မၤ​ကွၢ်ဝဲ အၤဘြၤဟၣ်​အတၢ်စူၢ်တၢ်နာ်​န့ၣ်လီၤ. ကိး​ထီၣ်ဝဲ, ‘အၤဘြၤဟၣ်ဧၢ,’ ဒီး​အၤဘြၤဟၣ်​ကိးဆၢဝဲ​ဒီး​စံး, ‘ကစၢ်ဧၢ, ယ​အိၣ်​ကစီဒီ​လီၤ.’ တုၤနုၤ​တစု, ကစၢ်ယွၤ​စံး, ‘ကိး​န​ဖိခွါ​ထဲတဂၤ​လၢအမ့ၢ်​နသွံၣ်နထံ​ဝံၤ လဲၤ​ဆူ​ကစၢၢ်​တဖျၢၣ်​လၢ ယ​က​ဒုးနဲၣ်​နၤ​တက့ၢ်. မၤသံ​န​ဖိခွါ​ဖဲန့ၢ်ဒီး လုၢ်ထီၣ်​အီၤ​လၢ​ယၤ​တက့ၢ်.’

အၤဘြၤဟၣ်​လၢ​အအဲၣ်​အဖိခွါ တုၤ​အသးကနိးဝဲ​တဂၤန့ၣ် နၢ်ဟူဘၣ်​တၢ်ကတိၤအံၤ​တဘျီဃီ​ဒီး သးအုးဝဲ​ဒိၣ်မးန့ၣ်လီၤ. ဝံၤဒီး, သ့ၣ်နီၣ်ထီၣ်​လၢ, ယွၤ​စံး​ပာ်တ့ၢ်​အၤဘြၤဟၣ်​လၢ အဖိအလံၤတဖၣ် က​အိၣ်ဘၣ်ဝဲသ့ၣ်​လၢ ကီၢ်ကနၤဧၣ်န့ၣ်ဘီၣ်. အံၤစဲး​မ့ၢ်​သံ​သၢပျၢၤ တၢ်စံးပာ်​အဝဲန့ၣ် ကဲထီၣ်​ကသ့​ဒ်လဲၣ်. အၤဘြၤဟၣ်​နၢ်ပၢၢ်​တသ့ဘၣ်. ထဲအံၤ​ဒၣ်လဲာ် ဒိကနၣ်ဝဲ​ယွၤ​အတၢ်ကတိၤ​လီၤ.

ဖဲ​အၤဘြၤဟၣ်​တုၤလၢ​ကစၢၢ်ခိၣ်​အခါ စၢဃာ်​အဖိခွါ​အံၤစဲး​အစု​လၢ​ပျံၤ​ဝံၤ ပာ်ထီၣ်ဝဲ​လၢ တၢ်လုၢ်လီၢ်​လၢ​အမၤဃာ်ဝဲ​အဖီခိၣ်​န့ၣ်လီၤ. ဝံၤဒီး ထုးထီၣ်ဝဲ​ဒီတဘ့ၣ်​ဝံၤ က​မၤသံဝဲ​အဖိခွါ​လီၤ. ဘၣ်ဆၣ်​သနာ်က့, ဖဲ​အဆၢကတီၢ်ဝဲန့ၣ် ယွၤ​အမူခိၣ်ကလူး ကိးထီၣ်ဝဲဒၣ်, ‘အၤဘြၤဟၣ်, အၤဘြၤဟၣ်’ န့ၣ်လီၤ. ဒီး​အၤဘြၤဟၣ်​ကိးဆၢဝဲ​ဒီး​စံး, ‘မ့ၢ်, ယ​အိၣ်​ယဲဒၣ်​လီၤ.’

ကစၢ်ယွၤ​စံးဝဲဒၣ်, ‘မၤဆါ​ဖိသၣ်အံၤ​တဂ့ၤ, မၤ​အီၤ​တၢ်နီတမံၤ​တဂ့ၤ. န​ဖိခွါ​လၢ အိၣ်​ထဲတဂၤဧိၤန့ၣ် န​တလိးကီ​အီၤ​ဒီး န​လုၢ်ထီၣ်​ယၤ​အဃိ ယ​သ့ၣ်ညါ​လၢ န​စူၢ်ယၤနာ်ယၤ​နီၢ်နီၢ်​န့ၣ်လီၤ.’

ကွၢ်, အၤဘြၤဟၣ် စူၢ်က့ၤနာ်က့ၤ​ကစၢ်ယွၤ ဆံးဒိၣ်လဲၣ်န့ၣ်​တက့ၢ်. အၤဘြၤဟၣ်​နာ်ဝဲ​လၢ တၢ်လၢ​ယဟိဝၤ​မၤ​တသ့ တအိၣ်ဘၣ်​နီတမံၤဘၣ်, ဒီး​ယွၤ​မၤမူထီၣ်က့ၤ​အံၤစဲး လၢ​တၢ်သံန့ၣ်​သ့ဝဲဒၣ်​န့ၣ်လီၤ. နီၢ်နီၢ်​တခီ ကစၢ်ယွၤ​အသး​တအိၣ်ဘၣ်လၢ အၤဘြၤဟၣ်​က​မၤသံ​အဖိခွါ​ဘၣ်. လၢတၢ်န့ၣ်အဃိ​သတးဒီး ကစၢ်ယွၤ​မၤ​အိၣ်ထီၣ် သိ​တဒု​အနၢၤ​က​ဘျး​လၢ​တပှီာ် ဖဲ​အဘူးအတံၢ်​န့ၣ်​ဝံၤ စံးဘၣ် အၤဘြၤဟၣ်​ကလုၢ်ထီၣ်သိဝဲန့ၣ် လၢ​အဖိခွါ​အလီၢ်​န့ၣ်လီၤ.