ပူ ၃၄
တၢ်အီၣ်လၢ အလီၤဆီတမံၤ အဂ့ၢ်
လၢတၢ်ဂီၤအံၤအပူၤ ပှၤတဖၣ်လူၤထၢတၢ် လၢဟီၣ်ခိၣ်လိၤမနုၤလဲၣ်န့ၣ် နသ့ၣ်ညါဧါ. တၢ်လၢအဝဲသ့ၣ်လူၤထၢန့ၣ် လီၤဂာ်လၢ ဘှ့ၣ်လီၤသကၤကိၢ်လိၢ်န့ၣ်လီၤ. တၢ်န့ၣ် ဝါဒီးမၤအသးဘူကဘျံးဒံးဖိလီၤ. နီၢ်နီၢ်တခီတမ့ၢ်ဘှ့ၣ်ကိၢ်လိၢ်ဘၣ်. မ့ၢ်တၢ်အီၣ်တကလုာ်လီၤ.
ပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးန့ၣ် အိၣ်ဒံးဒၣ်ထဲ တလါဃၣ်ဃၣ်န့ၣ်လီၤ. ဟဲတုၤလၢပှၢ်လၢ်ကျါလံ. ဒီးဖဲန့ၣ် တၢ်အီၣ်တၢ်အီကၤဒိၣ်မးန့ၣ်လီၤ. လၢတၢ်န့ၣ်အဃိ ပှၤတဖၣ်ကဒူးကဒ့ၣ်တၢ်ဒ်အံၤလီၤ. ‘ယဟိဝၤမ့ၢ်မၤသံတ့ၢ်ပှၤလၢ ကီၢ်အဲၤကူပတူးန့ၣ် ကဂ့ၤတခီလီၤ. မ့မ့ၢ်လၢကီၢ်အဲၤကူပတူးန့ၣ် တၢ်အီၣ်တၢ်အီလၢပဆၢန့ၢ်ဘၣ်အီၤ အိၣ်ခဲလၢာ်လီၤ.’
လၢတၢ်န့ၣ်အဃိ ယဟိဝၤစံးဝဲ, ‘ယကဒုးစူၤလီၤ တၢ်အီၣ်တၢ်အီလၢမူခိၣ်’ န့ၣ်လီၤ. ဒ်အစံးဝဲအသိး ယဟိဝၤမၤဝဲလီၤ. တုၤလၢခံတနံၤဒီး ပှၤအံၣ်စရ့လးဖိ ထံၣ်ဘၣ်ဝဲလၢ တၢ်ဝါကဖီဖိတဖၣ် လီၤတဲာ်အိၣ်လၢဟီၣ်ခိၣ်လိၤဒီး တဂၤဒီးတဂၤ သံကွၢ်လိာ်အသး, ‘တၢ်အံၤမ့ၢ်မနုၤလဲၣ်’ န့ၣ်လီၤသၢၣ်.
မိၤၡ့စံးဘၣ်အဝဲသ့ၣ်, ‘တၢ်အံၤမ့ၢ်တၢ်အီၣ်လၢ ယဟိဝၤဟ့ၣ်သုလၢသုကအီၣ်အီၤန့ၣ်လီၤ.’ တၢ်အံၤ ပှၤတဖၣ်ကိးအီၤလၢ ကိၣ်မၤနၤ န့ၣ်လီၤ. အဘိၣ်အဘဲတခီ လီၤဂာ်ကိၣ်ဘ့ၣ်ဘၣ်လၢ တၢ်မၤဃာ်အီၤဒီးကနဲစီန့ၣ်လီၤ.
မိၤၡ့တဲဘၣ်ကမျၢၢ်လၢ ‘သုကဘၣ်ထၢဒၣ်ထဲ တဂၤဖဲအအီၣ်ဝဲကဲန့ၣ်လီၤ.’ လၢတၢ်န့ၣ်အဃိ အဝဲသ့ၣ်မၤဝဲဒ်န့ၣ် ကိးမုၢ်ဂီၤဒဲးန့ၣ်လီၤ. ဖဲမုၢ်ကိၢ်ထီၣ်ဝဲအခါ မၤနၤလၢအအိၣ်တ့ၢ်လၢ ဟီၣ်ခိၣ်လိၤတဖၣ်န့ၣ် အထံပှံၢ်ထီၣ်ဝဲလီၤ.
မိၤၡ့စံးစ့ၢ်ကီးအဝဲသ့ၣ်လၢ ‘ပှၤနီတဂၤ တဘၣ်ပာ်ကိၣ်မၤနၤအံၤ တုၤလၢခံတနံၤဘၣ်’ န့ၣ်လီၤ. ဘၣ်ဆၣ်သနာ်က့ ပှၤတနီၤနီၤ တဒိကနၣ်ဝဲသ့ၣ်ဘၣ်. ဒ်န့ၣ်အဃိ ကဲထီၣ်မနုၤလဲၣ်န့ၣ် နသ့ၣ်ညါဧါ. ကိၣ်မၤနၤတဖၣ်လၢ ပာ်ဝဲသ့ၣ်တုၤလၢခံတသီန့ၣ် လၢၢ်လီၤဒီး နၢအုၣ်ထီၣ်ဝဲဒၣ်လီၤ.
ဘၣ်ဆၣ် တနွံန့ၣ်အိၣ်တသီလၢ ကထၢဖှိၣ်ဝဲကိၣ်မၤနၤခံဆးအဂီၢ် ယဟိဝၤမၤလိာ်ပာ်ပှၤတဖၣ်န့ၣ်လီၤ. မုၢ်နံၤအဝဲန့ၣ် မ့ၢ်မုၢ်ဃုနံၤတနံၤန့ၣ်လီၤ. ယဟိဝၤစံးအဝဲသ့ၣ်လၢ ပာ်ကိၢ်တနီၤတုၤလၢခံတနံၤ သ့န့ၣ်လီၤ. ဘၣ်မနုၤအဃိလဲၣ်န့ၣ် မ့ၢ်လၢယွၤတဒုးဟဲလီၤ ကိၣ်မၤနၤ လၢမုၢ်နွံနံၤအဃိန့ၣ်လီၤ. ပှၤတဖၣ်န့ၣ် ဖဲအပာ်ဝဲကိၣ်မၤနၤတုၤလၢ မုၢ်နွံနံၤတနံၤအခါ လၢၢ်တထီၣ်ဘၣ်, ဒီးတနၢအုၣ်ဘၣ်. တၢ်အံၤစ့ၢ်ကီး မ့ၢ်တၢ်လီၤဆီတခါန့ၣ်လီၤ.
ပှၤအံၣ်စရ့လးဖိတဖၣ် ဖဲအအိၣ်ဝဲသ့ၣ်လၢ ပှၢ်လၢ်ကျါဒီကတီၢ်န့ၣ် ယဟိဝၤလုၢ်အီၣ်အဝဲသ့ၣ်လၢ ကိၣ်မၤနၤန့ၣ်လီၤ.
