ပူ ၅၂
ကံးဒဧိၣ်ဒီး အပှၤ ၃၀၀ အဂ့ၢ်
မ့ၢ်နထံၣ်တၢ်မၤအသးဖဲအံၤဒ်လဲၣ်န့ၣ်ဧါ. ပှၤတဖၣ်အံၤမ့ၢ် ပှၤအံၣ်စရ့လး အပှၤဒုးသုးတဖၣ်န့ၣ်လီၤ. ပှၤလၢအသကုးလီၤအသးတဖၣ် မ့ၢ်အီထံဝဲသ့ၣ်လီၤ. ပှၤစံၣ်ညီၣ်ကွီၢ် ကံးဒဧိၣ်တခီ မ့ၢ်ပှၤလၢအဆၢထၢၣ်လၢ အဝဲသ့ၣ်အကပၤန့ၣ်လီၤ. အဝဲသ့ၣ်မၤအီထံဒ်လဲၣ်န့ၣ် ကွၢ်ဝဲဒၣ်န့ၣ်လီၤ.
အဝဲသ့ၣ်မၤအီထံ အသနူဒ်လဲၣ်န့ၣ် ကွၢ်လီၤတံၢ်လီၤဆဲးတက့ၢ်. တနီၤန့ၣ် ကျးလီၤအမဲာ်လၢထံမဲာ်ဖံးခိၣ် ဒီးအီဝဲသ့ၣ်လီၤ. ဘၣ်ဆၣ် မ့မ့ၢ်ပှၤတဂၤန့ၣ် ဘျၢၣ်အီထံလၢအစု, ဒ်သိးထံၣ်တၢ်မၤအသးလၢ အဃိၣ်အဃၢၤ ကသ့အဂီၢ်န့ၣ်လီၤ. တၢ်အံၤမ့ၢ် တၢ်လၢအကါဒိၣ်လီၤ. ဘၣ်မနုၤအဃိလဲၣ်န့ၣ် ယဟိဝၤစံးဘၣ်ကံးဒဧိၣ်လၢ ကဃုထၢထီၣ်ဒၣ်ထဲ ပှၤတဖၣ်လၢ ကွၢ်အဃိၣ်အဃၢၤဒီးတၢ်ပလီၢ်ပဒီ ဖဲအအီထံအခါန့ၣ်လီၤ. မ့မ့ၢ်ပှၤလၢ အအိၣ်လီၤတဲာ်တ့ၢ်တဖၣ်န့ၣ် ကြၢးဘၣ်တၢ်ဆှၢက့ၤအီၤဆူဟံၣ်န့ၣ်လီၤ. ဘၣ်မနုၤအဃိလဲၣ်. မ်ပကကွၢ်သကိးတက့ၢ်.
ပှၤအံၣ်စရ့လးဖိတဖၣ် တူၢ်ဘၣ်ခီၣ်ဘၣ်ဝဲ တၢ်နးတၢ်ဖှီၣ် အါမံၤအါမၠိကဒီးလံ. အဂ့ၢ်တခီ မ့ၢ်လၢတဒိကနၣ် ယဟိဝၤအဃိန့ၣ်လီၤ. ပှၤမံးဒယၣ်ဖိ မၤနၢၤမၤထး မၤနးမၤဖှီၣ် အဝဲသ့ၣ်န့ၣ်လီၤ. လၢတၢ်န့ၣ်အဃိ ပှၤအံၣ်စရ့လးဖိတဖၣ် ကိးသသြီထီၣ်ဆူ ယဟိဝၤအအိၣ်ဒီး ဃ့တၢ်မၤစၢၤန့ၣ်လီၤ. ယဟိဝၤစ့ၢ်ကီး ဒိကနၣ်ဝဲဒၣ် အဝဲသ့ၣ်အတၢ်ကိးသသြီထီၣ်န့ၣ်လီၤ.
ယဟိဝၤစံးဘၣ် ကံးဒဧိၣ်လၢကစူးရိဖှိၣ် သုးဖိတဖၣ်အဃိ စူးရိဖှိၣ်ဝဲသုးဖိ အဂၤ ၃၂,၀၀၀ န့ၣ်လီၤ. ဘၣ်ဆၣ် ဒုၣ်ဒါလၢအဟဲဒုး ပှၤအံၣ်စရ့လးဖိ တခီအိၣ် အဂၤ ၁၃၅,၀၀၀ န့ၣ်လီၤ. တၢ်န့ၣ်ဒၣ်လဲာ် ယဟိဝၤစံးဘၣ် ကံးဒဧိၣ်လၢ ‘နသုးဖိန့ၣ် အါဒိၣ်မးန့ၣ်လီၤ.’ ဘၣ်မနုၤလၢ ယဟိဝၤစံးဝဲဒ်အံၤန့ၣ်လဲၣ်.
ပှၤအံၣ်စရ့လးဖိ မ့ၢ်နၢၤတၢ်ဒုးန့ၣ် ကစံး ပဒုးတၢ်ဒီး မၤနၢၤပတၢ်ဒၣ်ဝဲအဃိန့ၣ်လီၤ. ကဆိကမိၣ်ဝဲသ့ၣ်လၢ ပကနၢၤတၢ်ဒုးအဂီၢ် ယဟိဝၤမၤစၢၤပှၤ အလီၢ်တအိၣ်ဘၣ်န့ၣ်လီၤ. လၢတၢ်န့ၣ်အဃိ ယဟိဝၤစံးဘၣ်ကံးဒဧိၣ်, ‘ပှၤလၢအပျံၤတၢ်တဖၣ်န့ၣ် မၢအက့ၤဆူဟံၣ်တက့ၢ်.’ ဖဲကံးဒဧိၣ်ပျဲက့ၤပှၤဆူဟံၣ်အခါ ပှၤသုးဖိ ၂၂,၀၀၀ က့ၤဝဲသ့ၣ်ဆူ ဟံၣ်န့ၣ်လီၤ. တုၤနုၤတစု, ပှၤလၢကဘၣ်ဒုးဒုၣ်ဒါအသုး ၁၃၅,၀၀၀ န့ၣ် အိၣ်တ့ၢ်ဒၣ် အဂၤ ၁၀,၀၀၀ န့ၣ်လီၤ.
ဘၣ်ဆၣ် ယဟိဝၤစံးအီၤဒ်လဲၣ်န့ၣ် ဒိကနၣ်တက့ၢ်. ‘နပှၤတဖၣ်အါဝဲဒံးလီၤ.’ လၢတၢ်န့ၣ်အဃိ ယွၤစံးဘၣ်ကံးဒဧိၣ်လၢ လဲၤကိးပှၤတဖၣ် ဆူထံကျိပူၤဒီး မၢအအီထံတက့ၢ်. ပှၤလၢအကျးလီၤအမဲာ်လၢထံဖံးခိၣ်ဒီး အီထံတဖၣ်န့ၣ် မၢအက့ၤဆူဟံၣ်တက့ၢ်. ယဟိဝၤအၢၣ်လီၤကံးဒဧိၣ် ဒီးစံးဝဲဒၣ်, ‘ယကဒုးမၤနၢၤနၤတၢ်လၢ ပှၤအဂၤ ၃၀၀ ဒၣ်, လၢကွၢ်အဃိၣ်အဃၢၤဒီး တၢ်ပလီၢ်ပဒီဖဲအီထံအခါ န့ၣ်လီၤ.’
ကဘၣ်ဒုးတၢ် အဆၢကတီၢ်ဟဲတုၤဝဲလံ. ကံးဒဧိၣ်နီၤဖး အပှၤ ၃၀၀ န့ၣ်လၢ ပှၤသၢဖုလီၤ. ကိးဂၤဒဲးန့ၣ် ဘၣ်တၢ်ဟ့ၣ်ပာ်အီၤလၢ ကွဲၤတဖျၢၣ်, ဒီးသပၢၤတဖျၢၣ်လၢ ဆှီအိၣ်လၢအပူၤန့ၣ်လီၤ. ဖဲဖးဖီမုၢ်ဘူးကတုၤအခါ အဝဲသ့ၣ်ကဝီၤဝးတရံးဃာ် ဒုၣ်ဒါအတၢ်သူၣ်ဒဲအလီၢ်လီၤ. ဝံၤဒီး အူထီၣ်ကွဲၤတဘျီဃီ, တီၢ်သ့ၣ်ဖးသပၢၤ ဒီးကိးပသူထီၣ်ဝဲ ‘ယဟိဝၤ, ဒီးကံးဒဧိၣ် အနးတဘ့ၣ်’ န့ၣ်လီၤ. ဖဲဒုၣ်ဒါတဖၣ် ဖုးသံနီၢ်ထီၣ်အခါ သဘံၣ်ဘုၣ်ဝဲ ဒီးပျံၤတၢ်ဒိၣ်မးန့ၣ်လီၤ. ဝံၤဒီးဃ့ၢ်ကွံာ်ဝဲခဲလၢာ်န့ၣ်လီၤ. ထဲန့ၣ်ဒီး ပှၤအံၣ်စရ့လးဖိ မၤနၢၤတၢ်ဒုးန့ၣ်လီၤ.
စံၣ်ညီၣ်ကွီၢ်အဆၢဒိၣ် ၆ တုၤလၢ ၈.
