ပူ ၄၅
တၢ်ခီဂာ်ထံကျိယၢ်ဒ့ၣ် အဂ့ၢ်
ကွၢ်တဘီ. ပှၤအံၣ်စရ့လးဖိတဖၣ် ခီဂာ်ဝဲသ့ၣ်ထံကျိယၢ်ဒ့ၣ်န့ၣ်လီၤ. ထံတခီ အိၣ်ဖဲလဲၣ်. ဖဲကတီၢ်အဝဲန့ၣ် မူခိၣ်စူၤဝဲဒိၣ်ဒိၣ်ကလဲာ်အဃိ လၢအပူၤကွံာ်စှၤမံးနံးအတီၢ်ပူၤန့ၣ် ထံကျိမိၢ်ပှၢ်ပှဲၤလုၣ်ကွံာ်ဝဲလီၤ. ဘၣ်ဆၣ်သနာ်က့ မ့မ့ၢ်ခဲအံၤ ထံလီၤကွံာ်လၢာ်လံ. ဒီးပှၤအံၣ်စရ့လးဖိလဲၤတၢ်လၢအခီၣ် လၢဟီၣ်ခိၣ်ဃ့ထီအဖီခိၣ် ဒ်အခီဂာ်တ့ၢ်ဝဲပီၣ်လဲၣ်ဂီၤအသိးန့ၣ်လီၤ. ထံလဲၤတုၤဆူလဲၣ်န့ၣ် ပကကွၢ်သကိးတက့ၢ်.
ဖဲပှၤအံၣ်စရ့လးဖိသ့ၣ်တဖၣ် တုၤကခီဂာ်ထံကျိယၢ်ဒ့ၣ်အခါန့ၣ် ယဟိဝၤမၤလိာ်ယိၤၡူလၢ ကစံးဘၣ်ပှၤဂီၢ်မုၢ်ဒ်အံၤလီၤ. ‘ပှၤလုၢ်တၢ်အခိၣ်တဖၣ် ကယိးထီၣ် တၢ်အၢၣ်လီၤအီလီၤ အတလါစီဆှံ ဒီးကလဲၤတၢ်လၢပမဲာ်ညါလီၤ. အဝဲသ့ၣ်အခီၣ်တုၤအပာ်လီၤဝဲ ဆူထံမိၢ်ပှၢ်ယၢ်ဒ့ၣ်အပူၤဒီး ထံကအိၣ်ပတုာ်ဝဲလီၤ.’
လၢတၢ်အံၤအဃိ ပှၤလုၢ်တၢ်အခိၣ်တဖၣ် ယိးထီၣ် တၢ်အၢၣ်လီၤအီလီၤ အတလါစီဆှံဝံၤ လဲၤတၢ်လၢပှၤဂီၢ်မုၢ်အမဲာ်ညါလီၤ. ဖဲအလဲၤတုၤလၢ ထံမိၢ်ပှၢ်ယၢ်ဒ့ၣ်အခါ လဲၤလီၤဝဲသ့ၣ်ဆူထံကျါလိၤလိၤန့ၣ်လီၤ. ထံယွၤဆူၣ်ဒိၣ်မး, ယိာ်ဝဲဒိၣ်မးစ့ၢ်ကီး ဘၣ်ဆၣ် အဝဲသ့ၣ်အခီၣ် ဘၣ်ဒီးထံအခါ ထံလၢအယွၤန့ၣ် အိၣ်ပတုာ်လီၤ. လီၤလးဒိၣ်မးနးလဲၣ်. ယဟိဝၤဒုးအိၣ်ပတုာ်ဃာ်ထံလၢ ထံကျိထးခီ န့ၣ်လီၤ. ဒ်န့ၣ်အဃိ ဖဲတစိၢ်ဖိအတီၤပူၤန့ၣ် လၢထံမိၢ်ပှၢ်အပူၤ ထံလီၤသံးကွံာ်ဝဲန့ၣ်လီၤ.
ပှၤလုၢ်တၢ်အခိၣ်လၢ အယိး တၢ်အၢၣ်လီၤအီလီၤအတလါစီဆှံ သ့ၣ်တဖၣ်န့ၣ် လဲၤဝဲသ့ၣ်ဆူ ထံကျိလၢအလီၤသံးဃ့ထီ အခၢၣ်သးန့ၣ်လီၤ. လၢတၢ်ဂီၤပူၤန့ၣ် သုထံၣ်အီၤဧါ. ဖဲအဝဲသ့ၣ်ဆၢထၢၣ် လၢတၢ်လီၢ်အဝဲန့ၢ်အခါ ပှၤအံၣ်စရ့လးဖိခဲလၢာ် ခီဂာ်ထံကျိယၣ်ဒ့ၣ် လၢအခီၣ်န့ၣ်လီၤ.
ဖဲအခီဂာ်ဝဲတအိၣ်တ့ၢ်လၢၤဘၣ် နီတဂၤအခါ ယဟိဝၤစံးဘၣ်ယိၤၡူလၢ ကမၤလိာ်ပိာ်ခွါဂံၢ်ဆူၣ်ဘါဆူၣ် ၁၂ ဂၤဒ်အံၤလီၤ. ‘လဲၤလီၤဆူထံကျိအပူၤ ဖဲပှၤလုၢ်တၢ်အခိၣ်တဖၣ်လၢအယိး တၢ်အၢၣ်လီၤအီလီၤ အတလါစီဆှံအလီၢ် ဒီးဖဲန့ၣ် ထၢန့ၢ်လၢၢ် ၁၂ ဖျၢၣ်န့ၣ်တက့ၢ်. ပာ်ဆၢထၢၣ်အီၤဖဲ သုကမံတဟါညါအံၤအလီၢ်န့ၣ်တက့ၢ်. လၢခံလၢလာ် ဖဲသုဖိသုလံၤတဖၣ် မ့ၢ်သံကွၢ်သုလၢ လၢၢ်တဖၣ်အံၤအခီပညီမ့ၢ်ဒ်လဲၣ် အခါ သုဘၣ်စံးဘၣ်က့ၤအဝဲသ့ၣ်လၢ ဖဲယဟိဝၤအတၢ်အၢၢ်လီၤအီလီၤအတလါစီဆှံ ခီဂာ် ထံကျိယၢ်ဒ့ၣ်အခါ ထံအိၣ်ပတုာ်ဝဲဒၣ်န့ၣ်လီၤ. လၢၢ်တဖၣ်အံၤ ကမၤသ့ၣ်နီၣ်ထီၣ်က့ၤ တၢ်လီၤလးအတၢ်လီၤဆီ လၢအမၤတ့ၢ်အသးန့ၣ်လီၤ.’ ယိၤၡူဒုးဆၢထၢၣ် လၢၢ် ၁၂ ဖျၢၣ် လၢထံကျိအခၢၣ်သး, လၢပှၤလုၢ်တၢ်အခိၣ်တဖၣ်ဆၢထၢၣ်တ့ၢ်ဝဲအလီၢ် စ့ၢ်ကီးန့ၣ်လီၤ.
လၢခံကတၢၢ်န့ၣ် ယိၤၡူစံးဘၣ် ပှၤလုၢ်တၢ်အခိၣ်တဖၣ်လၢအယိး တၢ်အၢၣ်လီၤအီလီၤအတလါစီဆှံ ‘ဟဲက့ၤထီၣ်လၢ ထံကျိယၢ်ဒ့ၣ်အပူၤတက့ၢ်’ န့ၣ်လီၤ. တုၤအဝဲသ့ၣ်ဟဲက့ၤထီၣ်ဒီး ထံကျိအထံ ဟဲက့ၤယွၤလီၤကဒါက့ၤဝဲန့ၣ်လီၤ.