ပူ ၃၆
ဂီၤဖံးထူအဂီၤ အဂ့ၢ်
အိ, အိ, ပှၤတဖၣ်မၤတၢ်မနုၤန့ၣ်လဲၣ်. ဃ့ထုကဖၣ်တၢ်လၢ ဂီၤဖံးဖိတဒုအဂီၤအမဲာ်ညါန့ၣ်လီၤ. ဘၣ်မနုၤအဃိဘၣ်မၤဝဲဒ်အံၤန့ၣ်လဲၣ်.
မိၤၡ့အိၣ်လၢကစၢၢ်ခိၣ် ယံာ်ဒိၣ်မးအဃိ စံးဝဲသ့ၣ် ‘ပတသ့ၣ်ညါ တၢ်မၤအသးဒီးမိၤၡ့ဒ်လဲၣ် န့ၣ်ဘၣ်. ဒ်န့ၣ်အဃိ ပကဟးထီၣ်ဖဲတၢ်လီၤအံၤအဂီၢ် ပကမၤသကိးယွၤတဂၤလၢ အလဲၤတၢ်လၢပမဲာ်ညါတက့ၢ်’ န့ၣ်လီၤ.
မိၤၡ့အဝဲၢ်အၤဟရိၣ်စံးဝဲ, ‘ဂ့ၤလံ. ဘ့ၣ်လီၤသုနၢ်ကွီၤထူတဖၣ်ဒီး ဟဲစိာ်ဆူယအိၣ်တက့ၢ်’ န့ၣ်လီၤ. တုၤပှၤသ့ၣ်တဖၣ် ဟဲစိာ်အနၢ်ကွီၤန့ၣ် အၤဟရိၣ်မၤပှံၢ်အထံဝံၤဒီး မၤန့ၢ်အဝဲသ့ၣ် ဂီၤဖံးထူအဂီၤန့ၣ်လီၤ. ဝံၤဒီး ပှၤတဖၣ်တဲဝဲသ့ၣ်လၢ ‘ယွၤလၢအအုၣ်က့ၤခီၣ်က့ၤပှၤလၢ အဲၤကူပတူးန့ၣ် မ့ၢ်ဒၣ်ယွၤအဝဲအံၤလီၤ’. ဝံၤဒီး အံၣ်စရ့လးဖိတဖၣ် မၤဘူၣ်ပွဲဖးဒိၣ်ဒီး ဘါဝဲသ့ၣ်ဂီၤဖံးထူအဂီၤန့ၣ်လီၤ.
ဖဲယဟိဝၤထံၣ်တၢ်အံၤအခါ သးထီၣ်ဝဲဒိၣ်ဒိၣ်ကလဲာ်လီၤ. ဒ်န့ၣ်အဃိ စံးဝဲမိၤၡ့ ‘က့ၤလီၤချ့ချ့တက့ၢ်. ပှၤတဖၣ်အၢထီၣ်သီထီၣ်ဒိၣ်ဒိၣ်ကလဲာ်လံ. သးပ့ၤနီၣ်ယတၢ်သိၣ်တၢ်သီလံ. ဘါထီၣ်ဝဲသ့ၣ်ဂီၤဖံးထူအဂီၤလံ’ န့ၣ်လီၤ.
မိၤၡ့စံၣ်လီၤက့ၤဆူ ကစၢၢ်ဂံၢ်ထံး လၢအချ့ဒီး တုၤလၢအဂီၤထံးန့ၣ် ထံၣ်ဘၣ်ဝဲ ဒ်လၢတၢ်ဂီၤပူၤအံၤအသိးန့ၣ်လီၤသၢၣ်. ပှၤတဖၣ် တရံးဝဲဂီၤဖံးထူအဂီၤဝံၤ သးဝံၣ်တၢ် ဒီးစံၣ်ဂဲၤကလံၣ်ဝဲသ့ၣ်န့ၣ်လီၤ. မိၤၡ့သးထီၣ်ဝဲဒၣ်ဆံးအါလဲၣ်န့ၣ် တုၤဒၣ်လဲာ် စုးသ့ၣ်ဖးကွံာ်ဝဲ လၢၢ်ဘ့ၣ်ဘၣ်လၢအအိၣ်ဒီး တၢ်မၤလိာ်အဘီတဆံန့ၣ်လီၤ. လၢၢ်ဘ့ၣ်ဘၣ်တဖၣ် စ့ၢ်ကီးဘျဲးဘျီးလီၤကလဲကွံာ်ဝဲန့ၣ်လီၤ. ဝံၤဒီး ဟံးန့ၢ်ဝဲဂီၤဖံးထူအဂီၤဝံၤ မၤပှံၢ်ဝဲအထံလီၤ. ဒီးဂံာ်ဘျဲးကွံာ်ဝဲတုၤလၢ ကဲထီၣ်အကမူၣ်လီၤ.
ပှၤတဖၣ်အံၤ မၤတၢ်မၤအၢအၢသီသီန့ၣ်လီၤ. အဃိသတးဒီး မိၤၡ့မၢပှၤတနီၤလၢ ကဟံးထီၣ်အနး ဒီးစံးဝဲဒၣ် ‘ပှၤအၢပှၤသီလၢ အဘါထီၣ် ဂီၤဖံးထူအဂီၤတဖၣ်န့ၣ် ကဘၣ်သံဝဲလီၤ.’ ထဲန့ၣ်ဒီး ပှၤတဖၣ်န့ၣ် မၤသံပှၤ ၃,၀၀၀ န့ၣ်လီၤ. တၢ်အံၤပာ်ဖျါထီၣ် ပကဘၣ်ပလီၢ်သူၣ်ပလီၢ်သးလၢ ပတဘၣ်ဘူၣ်ဘၣ်ဘါ ယွၤကမူၤကမၣ်တဖၣ်ဘၣ်, ကဘၣ်ဘူၣ်ထီၣ်ဘါထီၣ် ထဲဒၣ်ယဟိဝၤတဂၤဧိၤလီၤ, တမ့ၢ်ဘၣ်ဧါ.