ပူ ၄၁
ဂုၢ်တိၢ်ဘီအဂီၤအဂ့ၢ်
ဂုၢ်လၢအဘံတရံးတၢၣ်အံၤ တလီၤဂာ်ဒီးဂုၢ်နီၢ်ကီၢ်န့ၣ်ဘၣ်ဧါ. နီၢ်နီၢ်တခီန့ၣ် တမ့ၢ်ဂုၢ်နီၢ်နီၢ်ဘၣ်. အိၣ်ဒၣ် တၢ်မၤဃာ်အီၤလၢ တိၢ်ဘီန့ၣ်လီၤ. ယွၤမၢမိၤၡ့ပာ်ကစီၤထီၣ်ဂုၢ်အဂီၤအံၤလၢ တၢၣ်အလိၤ ဒ်သိးပှၤတဖၣ်ကကွၢ်တၢ်န့ၣ်လၢ အသးသမူကပူၤဖျဲးအဂီၢ်န့ၣ်လီၤ. ဘၣ်ဆၣ် ဂုၢ်လၢအအိၣ်လၢ ဟီၣ်ခိၣ်လိၤတဖၣ်န့ၣ် မ့ၢ်ဂုၢ်နီၢ်နီၢ်လီၤ. အဝဲသ့ၣ် အ့ၣ်ပှၤတဖၣ်ဒီး ပှၤတဖၣ်န့ၣ်အစုၣ်ထီၣ်အီၤန့ၣ်လီၤ. ဘၣ်မနုၤအဃိလဲၣ်နသ့ၣ်ညါဧါ.
မ့ၢ်လၢပှၤအံၣ်စရ့လးဖိတဖၣ် ကတိၤကမၣ်ဘၣ် ကစၢ်ယွၤ ဒီးမိၤၡ့အဃိန့ၣ်လီၤ. အဝဲသ့ၣ်ကဒူးကဒ့ၣ်တၢ်ဒ်အံၤ, ‘ဘၣ်မနုၤအဃိ ဘၣ်ဟဲကိးထုးထီၣ်ပှၤလၢ ကီၢ်အဲၤကူပတူး ဒ်သိးပကဟဲသံလၢပှၢ်လၢ်ကျါအဂီၢ်န့ၣ်လဲၣ်, ဖဲအံၤထံစ့ၢ်ကီးတအိၣ်ဘၣ်. တၢ်အီၣ်စ့ၢ်ကီးတအိၣ်ဘၣ်. ကိၣ်မၤနၤအံၤ ပကအီၣ်ဆူညါကဒီးန့ၣ် ပအီၣ်တကဲလၢၤဘၣ်’န့ၣ်လီၤ.
နီၢ်နီၢ်တခီ ကိၣ်မၤနၤန့ၣ် မ့ၢ်တၢ်အီၣ်လၢအဝံၣ်ဒိၣ်မးန့ၣ်လီၤ. ယဟိဝၤဟ့ၣ်အဝဲသ့ၣ်လၢ တၢ်လီၤလးအစိကမီၤန့ၣ်လီၤ. ဒီးဟ့ၣ်ဝဲထံစ့ၢ်ကီးလၢ တၢ်လီၤလးအပူၤန့ၣ်လီၤ. ဘၣ်ဆၣ်သနာ်က့ ယွၤဒုးအီၣ်ဒုးအီဒီး အံးထွဲကွၢ်ထွဲအဝဲသ့ၣ်ဒ်အံၤဘၣ်ဆၣ် တစံးဘျုးစံးဖှိၣ်ဝဲသ့ၣ်ဘၣ်. လၢတၢ်အံၤအဃိ ယဟိဝၤပျဲလီၤ ဂုၢ်ဒ်အံၤလၢအစုၣ်အိၣ်တဖၣ်ဒီး သိၣ်ဃီၣ်အဝဲသ့ၣ်န့ၣ်လီၤ. ပှၤလၢဂုၢ်အ့ၣ်အီၤဒီးသံဝဲတဖၣ် အိၣ်အါမးန့ၣ်လီၤ.
လၢခံကတၢၢ် ပှၤတဖၣ်ဟဲဆူမိၤၡ့အအိၣ် ဒီးစံးဝဲဒၣ် ‘ပမၤကမၣ်ဘၣ်တၢ်လံ. ပကတိၤကမၣ်ဘၣ်ယဟိဝၤဒီးနၤလံ. ဃ့ဘါထုကဖၣ်တၢ်ဆူယဟိဝၤအအိၣ် ဒ်သိးကဒုးဟးထီၣ်ပျီကွံာ် ဂုၢ်တဖၣ်အံၤတက့ၤ’ န့ၣ်လီၤ.
မ်ဒ်န့ၣ်ဒီး မိၤၡ့ဃ့ဘါထုကဖၣ်တၢ် လၢပှၤတဖၣ်အံၤအဂီၢ်လီၤ. ယဟိဝၤစံးဘၣ်မိၤၡ့လၢ ကမၤဂုၢ်တိၢ်ဘီအံၤဒီး မၢအပာ်ကစီၤထီၣ်အီၤလၢ တၢၣ်အလိၤန့ၣ်လီၤ. ပှၤလၢဂုၢ်အံၣ်အီၤ တဂၤလၢ်လၢ်န့ၣ် ကဘၣ်ကွၢ်ထီၣ်ဝဲတၢ်ဂီၤအံၤန့ၣ်လီၤ. မိၤၡ့မၤဝဲဒ်ယွၤစံးဘၣ်အီၤအသိးန့ၣ်လီၤ. ပှၤလၢဂုၢ်အ့ၣ်အီၤသ့ၣ်တဖၣ်စ့ၢ်ကီး ကွၢ်ထီၣ်ဂုၢ်အဂီၤဒီး ဂ့ၤထီၣ်က့ၤဝဲသ့ၣ်လီၤ.
လၢတၢ်မၤသးအံၤအဃိ ပန့ၢ်ဘၣ်တၢ်မၤလိတခါန့ၣ်လီၤ. ပဝဲခဲလၢာ်စ့ၢ်ကီး ပလီၤဂာ်ဒီးပှၤအံၣ်စရ့လးဖိ လၢဂုၢ်အ့ၣ်အီၤတဖၣ် လၢကျဲတဘိန့ၣ်လီၤ. ပဝဲခဲလၢာ်အံၤ ပအိၣ်လၢတၢ်သံအလီၢ်န့ၣ်လီၤ. ကွၢ်ဝးတရံးတၢ်တက့ၢ်. ပှၤတဖၣ်အသးဘၣ်ပှၢ်, ဘၣ်ဆူးဘၣ်ဆါ, ဒီးပကထံၣ်ဘၣ်လၢ ဘၣ်သံဝဲသ့ၣ်န့ၣ်လီၤ. တၢ်ဘၣ်ကဲထီၣ်ဒ်အံၤန့ၣ် မ့ၢ်လၢ ပိာ်ခွါဒီးပိာ်မုၣ်အဆိကတၢၢ်, အၤဒၣ် ဒီးအံၣ်အု ဃၣ်ဒူချၢတ့ၢ်အသးလၢ ယဟိဝၤဒီး ပဝဲသ့ၣ်အံၤ ပမ့ၢ်ဖိလံၤတဖၣ်လၢ အဟဲလီၤစၢၤလီၤသွဲၣ်လၢအဝဲသ့ၣ်အဃိ န့ၣ်လီၤ. ဘၣ်ဆၣ်သနာ်က့ ဒ်သိးပဝဲသ့ၣ်တဖၣ်အံၤ ပမူဝဲထီဘိကသ့အဂီၢ် ယဟိဝၤအိးထီၣ်ဃာ်ကျဲတဘိန့ၣ်လီၤ.
ယဟိဝၤပျၢ်လီၤအဖိခွါယ့ၣ်ၡူးခရံာ် ဆူဟီၣ်ခိၣ်အံၤန့ၣ်လီၤ. မ့ၢ်လၢ ပှၤအါဂၤပာ်အီၤဒ် ပှၤအၢပှၤသီအဃိ ဘၣ်တၢ်ပျၤထီအီၤလၢ သ့ၣ်ဖျၢၣ်ထူၣ်အဖီခိၣ်န့ၣ်လီၤ. ဘၣ်ဆၣ်သနာ်က့ ယဟိဝၤန့ၣ် ဟ့ၣ်လီၤပှၤယ့ၣ်ၡူး လၢကအုၣ်က့ၤခီၣ်က့ၤပှၤအဂီၢ်န့ၣ်လီၤ. ပမ့ၢ်ကွၢ်လၢ်ကစၢ်ယ့ၣ်ၡူးဒီး မ့ၢ်ပိာ်အခံန့ၣ် ပကန့ၢ်ဘၣ်တၢ်မူအထူအယိာ်န့ၣ်လီၤ. ပကသ့ၣ်ညါအါထီၣ်တၢ်ဂ့ၢ်အံၤ လၢခံဒံးလီၤ.
