ပူ ၅၀
ပိာ်မုၣ်လၢအသူၣ်ဒူသးဒူခံဂၤ အဂ့ၢ်
ဖဲပှၤအံၣ်စရ့လးဖိတဖၣ် ဘၣ်တၢ်ကီတၢ်ခဲအခါ ကိးပသူထီၣ်ဝဲသ့ၣ်ဒီး ဃ့ထီၣ်တၢ်မၤစၢၤလၢ ယဟိဝၤအအိၣ်န့ၣ်လီၤ. ယဟိဝၤစ့ၢ်ကီး ဒုးအိၣ်ထီၣ်ဝဲ ပှၤခိၣ်ပှၤနၢ်လၢအဒူအဃိၤဒီး အုၣ်က့ၤခိၣ်က့ၤ အဝဲသ့ၣ်လီၤ. ပှၤခိၣ်ပှၤနၢ်တဖၣ်အံၤ လံာ်စီဆှံကိးအီၤလၢ ပှၤစံၣ်ညီၣ်ကွီၢ်တဖၣ်န့ၣ်လီၤ. ယိၤၡူမ့ၢ်ပှၤစံၣ်ညီၣ်ကွီၢ်အဆိကတၢၢ်တဂၤန့ၣ်လီၤ. လၢအဝဲဒၣ်အလီၢ်ခံ ပှၤစံၣ်ညီၣ်ကွီၢ်လၢအဟဲ ဖျါထီၣ်တနီၤမ့ၢ် ဧီၤသန့လး, အ့ဟူာ် ဒီးၡးမကၢ်တဖၣ်န့ၣ်လီၤ. ပှၤလၢအအုၣ်က့ၤခီၣ်က့ၤ ပှၤအံၣ်စရ့လးဖိတဖၣ်အကျါ ပိာ်မုၢ်ခံဂၤလၢအမ့ၢ် ဒဘိရၤဒီးယဧ့လးခံဂၤစ့ၢ်ကီး ကျဲၣ်ဃုာ်ဝဲန့ၣ်လီၤ.
ဒဘိရၤမ့ၢ်ဝံမုၣ်န့ၣ်လီၤ. ယွၤဒုးသ့ၣ်ညါအီၤလၢ ခါဆူညါဝံအတၢ်ကတိၤ တဖၣ်န့ၣ်လီၤ. အဝဲစံးဘၣ်တဲဘၣ်က့ၤပှၤဂၤ ယဟိဝၤအတၢ်ကတိၤတဖၣ်န့ၣ်လီၤ. ဒဘိရၤမ့ၢ်စ့ၢ်ကီး ပှၤစံၣ်ညီၣ်ကွီၢ်တဂၤန့ၣ်လီၤ. အဝဲဒၣ်န့ၣ် ဆ့ၣ်နီၤဝဲဒၣ်လၢ ကစၢၢ်ခိၣ်တၢ်လီၢ်ဖဲ စူၣ်ပလူၣ်ထူၣ်တထူၣ်အဖီလာ်ဒီး ပှၤဟဲဆူအအိၣ် လၢကစံၣ်ညီၣ်န့ၢ်ပှၤတဖၣ် အတၢ်မူးတၢ်ရၢ်အဂီၢ်န့ၣ်လီၤ.
ဖဲဆၢကတီၢ်အဝဲန့ၣ် ယၤဘံၣ်မ့ၢ် ကနၤဧၣ်အစီၤပၤလီၤ. အဝဲအိၣ်ဒီးလ့ၢ်ကဟၣ်ထး ၉၀၀ လီၤ. အသုးမုၢ်န့ၣ် အဂံၢ်ဆူၣ်ဘါဆူၣ်ဒိၣ်မးလီၤ. လၢတၢ်န့ၣ်အဃိ ပှၤအံၣ်စရ့လးဖိ ကဲထီၣ်ယၤဘံၣ် အကုၢ်အါမးန့ၣ်လီၤ. ယၤဘံၣ်အသုးခိၣ်ကျၢၢ်န့ၣ် တၢ်ကိးအမံၤလၢ စံစရၤန့ၣ်လီၤ.
ဘၣ်မုၢ်တနံၤန့ၣ် ဒဘိရၤမၢပှၤလဲၤကိး ပှၤစံၣ်ညီၣ်ကွီၢ်ဘါရးဒီး တဲအီၤလၢ ‘ယဟိဝၤစံးဒ်အံၤ, “ဟံးန့ၢ်ပှၤ ၁၀,၀၀၀, လဲၤကိးအဝဲသ့ၣ်ဒီးနၤဆူကစၢၢ် တၤဘိၢ်န့ၣ်တက့ၢ်. ဖဲန့ၣ်ယကဆှၢလီၤ စံစရၤ ဆူနအိၣ်လီၤ. ယကဟ့ၣ်နၤတၢ်မၤနၢၤလၢ အဝဲဒၣ်ဒီး အသုးမုၢ်ဖးဒိၣ်အဖီခိၣ်လီၤ.”’
ဘါရးတခီစံးဘၣ်ဒဘိရၤလၢ ‘နမ့ၢ်လဲၤဒီးယၤသၢပျၢၤ ယကလဲၤယဲဒၣ်လီၤ.’ တုၤနုၤတစု ဒဘိရၤလဲၤဃုာ်ဝဲဒၣ်န့ၣ်လီၤ. ဘၣ်ဆၣ် စံးဘၣ်ဝဲဒၣ်ဘါရးဒ်အံၤလီၤ. ‘လၢတၢ်မၤနၢၤအဂီၢ် နမံၤတန့ၢ်ဘၣ်. ဘၣ်မနုၤအဃိလဲၣ်န့ၣ် မ့ၢ်လၢယဟိဝၤ ကဟ့ၣ်လီၤကွံာ်စံစရၤဆူ ပိာ်မုၣ်တဂၤအစုပူၤ အဃိန့ၣ်လီၤ.’ တၢ်မၤအသးဒ်န့ၣ်အသိးလီၤ.
ဘါရးဟဲလီၤဝဲလၢ တၤဘိၢ်ကစၢၢ်ခိၣ်ဝံၤ ကွၢ်ဆၢၣ်မဲာ်စံစရၤအသုးမုၢ်န့ၣ်လီၤ. ယဟိဝၤတခီ ဒုးလုာ်ဘၢတၢ်လီၢ်အဝဲန့ၣ်လၢထံ တဘျီဃီန့ၣ်လီၤ. လၢတၢ်န့ၣ်အဃိ ဒုၣ်ဒါအသုးမုၢ် လီၤအုးသံအါမးန့ၣ်လီၤ. ဘၣ်ဆၣ်သနာ်က့ စံစရၤတခီ စံၣ်လီၤလၢလ့ၢ်ကဟၣ်အပူၤဒီး ဃ့ၣ်ပူၤဖျဲးအသးန့ၣ်လီၤ.
ဘၣ်တယံာ်တမီၢ်ဒီး စံစရၤဟဲတုၤလၢ ယဧ့လးအဒဲန့ၣ်လီၤ. အဝဲဒၣ်ကိးစံစရၤဆူအဒဲပူၤ ဒီးဒုးအီအီၤတၢ်နုၢ်ထံလီၤ. ထဲန့ၣ်ဒီး မ့ၢ်လၢစံစရၤတၢ်မိၢ်မံအသးအဃိ မံသပ့ၤဘၣ်အသးလီၤ. ဖဲအခါန့ၣ် ယဧ့လးဟံးန့ၢ်ဝဲ ဒဲအနီၢ်ပျၤဝံၤ တီၢ်နုာ်ဝဲဆူ ပှၤအၢဖးဒိၣ်စံစရၤ အခိၣ်ပူန့ၣ်လီၤ. လၢခံ ဖဲဘါရးဟဲအခါန့ၣ် ဒုးနဲၣ်အီၤလၢ စံစရၤလၢအသံန့ၣ်လီၤ. တုၤနုၤတစု ဒဘိရၤစံးတၢ်န့ၣ် တဘၣ်ဝဲဘၣ်ဧါ.
လၢခံကတၢၢ်န့ၣ် ယၤဘံၣ်စ့ၢ်ကီး ဘၣ်တၢ်မၤသံအီၤန့ၣ်လီၤ. ထဲန့ၢ်ဒီး ပှၤအံၣ်စရ့လးဖိတဖၣ် အိၣ်မုာ်အိၣ်ခုၣ်ဘၣ်ဝဲသ့ၣ် တစိၢ်တလီၢ်ဖိန့ၣ်လီၤ.