ပူ ၄၈
ပှၤကံးဘိၣ်ဖိတဖၣ် လၢအအိၣ်ဒီးတၢ်ကူၣ်သ့ အဂ့ၢ်
ဝ့ၢ်တဖၣ်လၢအအိၣ်လၢ ကီၢ်ကနၤဧၣ်အါဝ့ၢ်န့ၣ် အိၣ်ကတဲာ်ကတီၤအသးလၢ ကဒုးဆၢက့ၤ ပှၤအံၣ်စရ့လးဖိတဖၣ်န့ၣ်လီၤ. ဆိကမိၣ်ဝဲသ့ၣ်လၢ ကနၢၤဝဲန့ၣ်လီၤ. ဘၣ်ဆၣ်သနာ်က့ ပှၤကံးဘိၣ်ဖိလၢအအိၣ်ဘူးအိၣ်တံၢ်တဖၣ်တခီန့ၣ် တဆိကမိၣ်ဝဲသ့ၣ်ဒ်န့ၣ်ဘၣ်. အဝဲသ့ၣ်နာ်ဝဲလၢ ယွၤမၤစၢၤ ပှၤအံၣ်စရ့လးဖိတဖၣ်န့ၣ်လီၤ. အဝဲသ့ၣ် တအဲၣ်ဒိးဒုးတၢ်လၢကစၢ်ယွၤန့ၣ်ဘၣ်. လၢတၢ်န့ၣ်အဃိ ပှၤဝ့ၢ်ကံးဘိၣ်ဖိတဖၣ် မၤမနုၤလဲၣ်န့ၣ် သုသ့ၣ်ညါဧါ.
မၤလီၤနာ်အသးဒ်သိး အမ့ၢ်ပှၤလၢအအိၣ်အဆိးလၢ တၢ်လီၤယံၤယံၤကလဲာ် အသိးန့ၣ်လီၤ. တနီၤန့ၣ် ဒိးဝဲခီၣ်ဖံးဒီးတၢ်ကူတၢ်ကၤ အလီၢ်လံၤ, အယာ်ဘုၣ်ယာ်ဖျ့ တဖၣ်န့ၣ်လီၤ. လၢကသ့ၣ်ယီၤတဖၣ်အဖီခိၣ်တခီ အိၣ်ဒီးထၢၣ်အယာ်ပြဲးတဖၣ် ဒီး စိာ်ဃုာ်ဝဲ ကိၣ်အလီၢ်လံၤ, ကိၣ်အဃ့ထီတဖၣ်လီၤ. အဝဲသ့ၣ်လဲၤဆူယိၤၡူအအိၣ်ဒီး စံးဝဲသ့ၣ်လၢ ‘ပဝဲသ့ၣ်တဖၣ်အံၤ ပနၢ်ဟူဘၣ် တၢ်ဒိၣ်ယွၤသုကစၢ် ယဟိဝၤအဂ့ၢ်အဃိ ပဟဲလၢတၢ်လီၢ်ယံၤယံၤကလဲာ်န့ၣ်လီၤ. ပနၢ်ဟူတၢ်ခဲလၢာ်လၢ ယွၤမၤတၢ်လၢသုဂီၢ် လၢကီၢ်အဲၤကူပတူးအပူၤန့ၣ်လီၤ. လၢတၢ်န့ၣ်အဃိ ပခိၣ်ပနၢ်တဖၣ်စံးဘၣ်ပှၤလၢ ပကစိာ်ထီၣ်တၢ်အီၣ်တနီၤလၢကျဲအဂီၢ် ဒီးပကလဲၤဆူသုအိၣ် ဒီးစံးဘၣ်သုလၢ “ပမ့ၢ်နကုၢ်နပှၤတဖၣ်လီၤ. မၤတၢ်အၢၣ်လီၤအီလီၤဒီးပှၤ လၢသုတဒုးတၢ်ဒီးပှၤန့ၣ်တက့ၢ်” န့ၣ်လီၤ. ကွၢ်ပကူပကၤ, ပတၢ်အီၣ်တၢ်အီတဖၣ်အံၤတက့ၢ်. တၢ်ဒ့ၣ်စၢၤလၢပဟဲန့ၣ် ယံၤမးအဃိ ယာ်လၢာ်လံ. ကွၢ်ပကိၣ်တဖၣ်အံၤစ့ၢ်ကီးတက့ၢ်. ပကိၣ်တဖၣ် လီၢ်လံၤဒီးဃ့ထီလၢာ်လံ’ န့ၣ်လီၤ.
ယိၤၡူဒီးအခိၣ်အနၢ်အဂၤတဖၣ် နာ်ဝဲသ့ၣ်ပှၤကံးဘိၣ်ဖိတဖၣ် အတၢ်ကတိၤန့ၣ်လီၤ. အဃိ မၤတၢ်အၢၣ်လီၤအီလီၤလၢ တဒုးတၢ်ဒီးအဝဲသ့ၣ်ဘၣ်န့ၣ်လီၤ သနာ်က့ ပူၤကွံာ်သၢသီဝံၤအလီၢ်ခံ သ့ၣ်ညါဝဲသ့ၣ်လၢ ပှၤကံးဘိၣ်ဖိတဖၣ်မ့ၢ် ပှၤအိၣ်ဘူးအိၣ်တံၢ်သ့ၣ်တဖၣ်န့ၣ်လီၤ.
ယိၤၡူသံကွၢ်အဝဲသ့ၣ်, ‘ဘၣ်မနုၤသုစံးဘၣ်ပှၤလၢ သုဟဲလၢထံယံၤကီၢ်ယံၤန့ၣ်လဲၣ်.’
ပှၤဝ့ၢ်ကံးဘိၣ်ဖိတဖၣ်တခီ စံးဝဲသ့ၣ်လၢ ‘ပနၢ်ဟူလၢ သုကစၢ်ယွၤယဟိဝၤ အၢၣ်လီၤအီလီၤသုလၢ ကဟ့ၣ်လီၤသုကီၢ်ကနၤဧၣ်ဒီကီၢ်ဒီး ပပျံၤဘၣ်လၢ သုကမၤသံပှၤအဃိ ပတဲဘၣ်သုဒ်န့ၣ်တခီလီၤ’ န့ၣ်လီၤ. ဘၣ်ဆၣ်သနာ်က့ ပှၤအံၣ်စရ့လးဖိတဖၣ် ဒ်အတၢ်အၢၣ်လီၤအီလီၤအိၣ်ဝဲအသိး တမၤသံဝဲသ့ၣ် ပှၤကံးဘိၣ်ဖိတဖၣ်န့ၣ်ဘၣ်. လၢကမၤသံဝဲအလီၢ်န့ၣ် ဒုးကဲဝဲသ့ၣ်အကုၢ်န့ၣ်လီၤ.
ယရူၤၡလ့ၣ်အစီၤပၤ သးထီၣ်ဝဲဒၣ်လၢ ပှၤကံးဘိၣ်ဖိမၤ တၢ်ဃူတၢ်ဖိးဒီး ပှၤအံၣ်စရ့လးဖိအဃိန့ၣ်လီၤ. လၢတၢ်န့ၣ်အဃိ အဝဲဒၣ်တဲဘၣ် စီၤပၤအဂၤလွံၢ်ဂၤ ဒ်အံၤ, ‘ဟဲဒီးမၤစၢၤယၤလၢ ယကဒုးတၢ်ဒီး ပှၤကံးဘိၣ်ဖိတဖၣ်န့ၣ်တက့ၢ်.’ ထဲန့ၣ်ဒီး စီၤပၤယဲၢ်ဂၤ လဲၤဒုးစၢၤအီၤလီၤသၢၣ်. ဂ့ၤလံ. ပှၤဝ့ၢ်ကံးဘိၣ်ဖိတဖၣ် မၤတၢ်အၢၣ်လီၤအီလီၤဒီး ပှၤအံၤစရ့လးဖိန့ၣ် ပကစံးလၢ အအိၣ်ဒီးတၢ်ကူၣ်ဘၣ်ကူၣ်သ့န့ၣ်ဧါ. ခဲအံၤစီၤပၤတဖၣ် ဒုးအဝဲသ့ၣ်လံလီၤ. ပကကွၢ်သကိးတက့ၢ်.