ပူ ၄၃
ယိၤၡူကဲထီၣ်ပှၤအခိၣ်အနၢ် အဂ့ၢ်
မိၤၡ့န့ၣ် အဲၣ်ဒိးလဲၤနုာ်ဝဲဒၣ်ဆူကီၢ်ကနၤဧၣ်ဒီး ပှၤအံၣ်စရ့လးဖိတဖၣ် ဒ်သိးသိးန့ၣ်လီၤ. လၢတၢ်န့ၣ်အဃိ, ဃ့ဝဲအခွဲးလၢယဟိဝၤအအိၣ်, စံးဝဲဒၣ် ‘ယဟိဝၤကစၢ်ဧၢ, ပျဲယၤလၢ ယကခီထံကျိယၢ်ဒ့ၣ်ဒီး ကွၢ်ယဲကီၢ်အမုာ်န့ၣ်တက့ၢ်.’ န့ၣ်လီၤ. ဘၣ်ဆၣ်သနာ်က့ယဟိဝၤစံး, ‘ဘၣ်လံ, ကတိၤလၢၤတၢ်ကတိၤအံၤလၢခံတဂ့ၤ.’ ဘၣ်မနုၤအဃိ ယဟိဝၤစံးဝဲဒ်အံၤလဲၣ်န့ၣ် သုသ့ၣ်ညါဧါ.
မ့ၢ်လၢ မိၤၡ့တီၢ်တ့ၢ်လၢၢ်အဃိန့ၣ်လီၤသၢၣ်. သုသ့ၣ်နီၣ်ထီၣ်ဧါ. အဝဲဒၣ်ဒီးအၤဟရိၣ်န့ၣ် တမၤလၤကပီၤယဟိဝၤအဃိန့ၣ်လီၤ. တစံးဝဲသ့ၣ်လၢ ပှၤကဒုးဟးထီၣ်ထံလၢလၢၢ်ပူၤန့ၣ် မ့ၢ်ယဟိဝၤလီၤန့ၣ်ဘၣ်. လၢတၢ်အံၤအဃိ ယဟိဝၤတဒုးနုာ်အဝဲသ့ၣ်ဆူ ကီၢ်ကနၤဧၣ်အပူၤန့ၣ်လီၤသၢၣ်.
အၤဟရိၣ်သံဝံၤ လါတဖၣ်ပူၤကွံာ်အလီၤခံန့ၣ် ယဟိဝၤစံးဘၣ်မိၤၡ့လၢ ‘ကိးယိၤၡူဒီး ဒုးဆၢထၢၣ်အီၤလၢ ပှၤလုၢ်တၢ်အဒိၣ်အလၤဧစၢ်ဒီး ပှၤဂီၢ်မုၢ်အမဲာ်ညါ, ဒီးတဲဘၣ်အဝဲသ့ၣ်လၢ ယိၤၡူကဲထီၣ် ပှၤအခိၣ်အနၢ်အသီလံ န့ၣ်တက့ၢ်. မိၤၡ့မၤဝဲ ဒ်ယဟိဝၤတဲအီၤအသိး, ဒ်သုထံၣ်အီၤလၢ တၢ်ဂီၤပူၤအံၤန့ၣ်လီၤ.
လၢတၢ်န့ၣ်အလီၢ်ခံ ယဟိဝၤစံးယိၤၡူလၢ, ‘ပာ်ဆူၣ်နသးတက့ၢ်. ပျံၤတၢ်တဂ့ၤ. ဒ်ယမၤတၢ်အၢၣ်လီၤအီလီၤဒီး ပှၤအံၣ်စရ့လးဖိအသိးန့ၣ် နကဘၣ်ကဲခိၣ်ကဲနၢ်ဒီး ဆှၢနုာ်အဝဲသ့ၣ်ဆူ ကီၢ်ကနၤဧၣ်အပူၤန့ၣ်လီၤ. ယကအိၣ်ဒီးနၤလီၤ.’
လၢတၢ်န့ၣ်အလီၢ်ခံ ယဟိဝၤမၢမိၤၡ့ထီၣ်ဆူ ကစၢၢ်နဘိအဒီခိၣ်, လၢအအိၣ်လၢကီၢ်မိၤအးန့ၣ်လီၤ. မိၤၡ့အိၣ်ကွၢ်လီၤလၢ ကစၢၢ်အံၤအဖီခိၣ်ဒီး ထံၣ်စိၤဃီၤဝဲကီၢ်ဃံလၤကနၤဧၣ် လၢအအိၣ်လၢ ထံကျိယၣ်ဒ့ၣ်ဝၢ်ဘးခီန့ၣ်လီၤ. ယဟိဝၤစံးဝဲ ‘ကီၢ်တဘ့ၣ်လၢ ယမၤတၢ်အၢၣ်လီၤအီလီၤဒီး အၤဘြၤဟၣ်, အံၤစဲး, ယၤကိာ် အဖိအလံၤတဖၣ်န့ၣ် မ့ၢ်ကီၢ်အဝဲအံၤလီၤ. ယဒုးထံၣ်နၤလံ, ဘၣ်ဆၣ် ယတဟ့ၣ်နၤအခွဲးလၢ နကနုာ်လီၤန့ၣ်ဘၣ်.’
မိၤၡ့သံလၢကစၢၢ်နဘိအံၤအဖီခိၣ်လီၤ. မိၤၡ့အသးအိၣ် ၁၂၀ လံ. အိၣ်ဒီးဂံၢ်အိၣ်ဒီးဘါဒံးန့ၣ်လီၤ. အမဲာ်စ့ၢ်ကီး ထံၣ်တၢ်ဂ့ၤဂ့ၤဘၣ်ဘၣ်ဒံးန့ၣ်လီၤ. မ့ၢ်လၢမိၤၡ့သံအဃိ ပှၤတဖၣ်သးအုးဝဲဒိၣ်မးဒီး ဟီၣ်ဝဲသ့ၣ်လီၤ. ဘၣ်ဆၣ်သးခုဝဲသ့ၣ်လၢ မၤန့ၢ်ယိၤၡူဒ် အခိၣ်အနၢ်အသီအသိး အဃိန့ၣ်လီၤ.