ပူ ၅၃
ယံးဖသၤအတၢ်အၢၣ်လီၤအီလီၤ အဂ့ၢ်
တၢ်မၤတ့ၢ်အသးဒီးနၤလၢ နမၤတၢ်အၢၣ်လီၤအီလီၤဝံၤမး လၢနကမၤလၢပှဲၤက့ၤအီၤတခီ ကီဝဲန့ၣ်ဧါ. ပှၤလၢအဖျါလၢ တၢ်ဂီၤပူၤအံၤ တၢ်မၤအသး ဒီးအီၤဒ်န့ၣ်လီၤ. လၢတၢ်န့ၣ်အဃိ ကဲထီၣ်သူၣ်ဘၣ်ဒိ သးဘၣ်ထံးန့ၣ်လီၤ. အဝဲဒၣ်မ့ၢ်ဝဲ ကီၢ်အံၣ်စရ့လး အပှၤစံၣ်ညီၣ်ကွီၢ် ပှၤဒူပှၤဃိၤတဂၤ, လၢအမံၤမ့ၢ် ယံးဖသၤန့ၣ်လီၤ.
ယံးဖသၤန့ၣ် အိၣ်မူတ့ၢ်ဝဲလၢ ပှၤအံၣ်စရ့လးဖိတဖၣ် တဘူၣ်တဘါလၢၤယဟိဝၤ အကတီၢ်န့ၣ်လီၤ. အံၣ်စရ့လးဖိတဖၣ် မၤက့ၤကဒီးဝဲ တၢ်မၤအအၢအသီတဖၣ်န့ၣ်လီၤ. လၢတၢ်န့ၣ်အဃိ, ယဟိဝၤန့ၣ်ဟ့ၣ်လီၤကွံာ်အီၤဆူ ပှၤဧၣ်မိၣ်ဖိတဖၣ်အစုပူၤ လၢကမၤနးမၤဖှီၣ်အီၤန့ၣ်လီၤ. လၢတၢ်န့ၣ်အဃိ ပှၤအံၣ်စရ့လးဖိတဖၣ် ကိးသသြီထီၣ်ကဒီးဆူယဟိဝၤအအိၣ်လၢ ‘ပမၤကမၣ်နၤလံ. ဝံသးစူၤအုၣ်က့ၤခိၣ်က့ၤပှၤတက့ၢ်’ န့ၣ်လီၤ
ပှၤသ့ၣ်တဖၣ် သးအုးဝဲသ့ၣ်ဒိၣ်မးလၢ တၢ်မၤအၢလၢ အမၤဘၣ်တ့ၢ်ဝဲအဃိန့ၣ်လီၤ. ပာ်ဖျါဝဲသ့ၣ် အတၢ်သးအုးတၢ်ပနီၣ်လၢ ဘူၣ်က့ၤဘါက့ၤဝဲ ယဟိဝၤန့ၣ်လီၤ. လၢတၢ်န့ၣ်အဃိ ယဟိဝၤစ့ၢ်ကီး မၤစၢၤက့ၤအဝဲသ့ၣ်လီၤသၢၣ်.
ပှၤတဖၣ်ဃုထၢထီၣ်ဝဲ ယံးဖသၤ လၢကဒုးပှၤဧၣ်မိၣ်ဖိန့ၣ်လီၤ. ယံးဖသၤစ့ၢ်ကီး သးအိၣ်မၤန့ၢ်ဝဲ ယဟိဝၤအတၢ်မၤစၢၤဒိၣ်မး လၢတၢ်ဒုးတၢ်ယၤအံၤအဂီၢ်န့ၣ်လီၤ.
တၢ်န့ၣ်အဃိ အဝဲအၢၣ်လီၤအီလီၤ ယဟိဝၤဒ်အံၤလီၤ. ‘နမ့ၢ်ဟ့ၣ်နၢၤယၤလၢ ယဒုးတၢ်ဒီးပှၤဧၣ်မိၣ်ဖိသၢပျၢၤ ဖဲယဟဲက့ၤလၢတၢ်မၤနၢၤအခါ ပှၤလၢဟးထီၣ်လၢဟံၣ်ဒီး အဟဲသဂၢၢ်ယၤအဆိကတၢၢ်တဂၤန့ၣ် ယကလုၢ်ထီၣ်အီၤလၢနၤန့ၣ်လီၤ.’
ယဟိဝၤစ့ၢ်ကီး ဒိကနၣ်ယံးဖသၤ အတၢ်အၢၣ်လီၤအီလီၤဝံၤ မၤစၢၤအီၤလၢအကနၢၤတၢ်ဒုးန့ၣ်လီၤ. ဖဲယံးဖသၤဟဲက့ၤဆူဟံၣ်အခါ အဆိကတၢၢ်မတၤဟဲထီၣ်လၢ ကသဂၢၢ်အီၤအဂီၢ်လဲၣ် နသ့ၣ်ညါဧါ. အဖိမုၣ်လၢအိၣ်ထဲတဂၤဧိၤန့ၣ်လီၤ. ယံးဖသၤကိးပသူထီၣ်, ‘နးမးလဲၣ်ဖိမုၣ်ဧၢ. မ့ၢ်နမၤသးအုးပါပၢ်ဒ်လဲၣ်. ပါပၢ်အၢၣ်လီၤအီလီၤတ့ၢ်ယဟိဝၤလံ. ပါပၢ်ထုးက့ၤအီၤတသ့လၢၤဘၣ်’ န့ၣ်လီၤ.
ဖဲအဖိမုၣ်သ့ၣ်ညါက့ၤဝဲ ယံးဖသၤအတၢ်အၢၣ်လီၤအီလီၤအခါ အခီၣ်ထံးန့ၣ် အဝဲစ့ၢ်ကီး သးအုးဝဲဒၣ်လီၤ. ဘၣ်မနုၤအဃိလဲၣ်န့ၣ် လၢအဝဲဒၣ်အဂီၢ်တခီ မ့ၢ်လၢ ကဘၣ်ဟးဖးလၢအပါပၢ် ဒီးအတံၤသကိးသ့ၣ်တဖၣ် အဃိန့ၣ်လီၤသၢၣ်. ကဘၣ်လဲၤမၤယဟိဝၤအတၢ်မၤလၢ ဒဲစီဆှံလၢအအိၣ်လၢၡံလိၤ တစိၤအသးသမူန့ၣ်လီၤ. လၢတၢ်န့ၣ်အဃိ စံးဝဲဒၣ်အပါပၢ်လၢ ‘ပါပၢ်ဧၢ, မ့ၢ်လၢ နအၢၣ်လီၤအီလီၤတ့ၢ်ယဟိဝၤလံအဃိ နကဘၣ်တီနဲဒၣ်န့ၣ်လီၤ.’
လၢတၢ်န့ၣ်အဃိ, ယံးဖသၤအဖိမုၣ်န့ၣ် လဲၤဝဲဆူဝ့ၢ်ၡံလိၤဝံၤ အိၣ်ဝဲဒၣ်လၢ ယဟိဝၤအဒဲစီဆှံန့ၣ် တစိၤအသး ဒီးမၤယဟိဝၤအတၢ်န့ၣ်လီၤ. အံၣ်စရ့လးပိာ်မုၣ်သ့ၣ်တဖၣ် လဲၤအိၣ်သကိးအီၤ တနံၣ်န့ၣ်လွံၢ်သီ လၢအိၣ်ဒီးတၢ်သူၣ်ဖှံသးညီန့ၣ်လီၤ. ပှၤတဖၣ်အဲၣ် ယံးဖသၤအဖိမုၣ်န့ၣ်လီၤ. မ့ၢ်လၢ အဝဲမ့ၢ် ယဟိဝၤအခ့အပှၤလၢအဂ့ၤတဂၤ အဃိလီၤသၢၣ်.