ပူ ၄၇
လၢပှၤအံၣ်စရ့လးဖိအကျါ တၢ်ဘျၣ်တဂၤ အဂ့ၢ်
သုသါကွၢ်တဘီ ပှၤတဂၤအံၤဘျၢလီၤတၢ်မနုၤလၢ အဒဲပူၤန့ၣ်လဲၣ်. ဆ့ကၤဖးထီအဃံအလၤတဘ့ၣ်, ထူတဘိ, တီကါစ့တနီၤသၢၣ်. တၢ်တဖၣ်အံၤ ဟဲက့ၤမၤန့ၢ်လၢ ဝ့ၢ်ယရံၤဃိန့ၣ်လီၤသၢၣ်. နီၢ်နီၢ်တခီ ဝ့ၢ်ယရံၤဃိအတၢ်ဖိတၢ်လံၤတဖၣ်န့ၣ် ကဘၣ်မၤအီၤဒ်လဲၣ်, သုသ့ၣ်နီၣ်ဧါ.
ဘၣ်မၤဟးဂီၤကွံအီၤလီၤ. မ့မ့ၢ်စ့တဖၣ်, ထူတဖၣ်တခီ ကဘၣ်တၢ်တ့ၢ်နုာ်အီၤဆူ ယွၤအဒဲအတၢ်ပာ်ဖှိၣ်ကျိၣ်စ့အလီၢ် န့ၣ်လီၤ. အဃိသတးဒီး ပှၤတဖၣ်အံၤ တဒိကနၢ်ဝဲသ့ၣ် ယွၤအတၢ်ကတိၢ်န့ၣ်ဘၣ်. ဟုၣ်ဝဲသ့ၣ် တၢ်လၢယွၤပၢန့ၣ်လီၤ. ပှၤအံၤ အမံၤမ့ၢ်ဝဲ ဧၤကၣ်န့ၣ်လီၤ. ပှၤလၢအကပၤတဖၣ်မ့ၢ်ဝဲ အပှၤဟံၣ်ဖိဃီဖိန့ၣ်လီၤသၢၣ်. ပကွၢ်သကိးလၢခံ တၢ်မၤအသးဒ်လဲၣ်ဘီၣ်.
ဧၤကၣ်ဟုၣ်တၢ်တဖၣ်အံၤဝံၤအလီၢ်ခံ ယိၤၡူပျဲလီၤပှၤတနီၤလၢ ကလဲၤဒုးဝ့ၢ်ဂဲန့ၣ်လီၤ. ဘၣ်ဆၣ်သနာ်က့ ဘၣ်ဃ့ၢ်ဝဲသ့ၣ်လၢတၢ်ဒုးန့ၣ်လီၤ. တနီၤသံတ့ၢ်လၢတၢ်ဒုးပူၤဒီး ပှၤလၢအအိၣ်တ့ၢ်တဖၣ်န့ၣ် ဘၣ်ဟဲက့ၤဃ့ၢ်ဝဲသ့ၣ်လီၤ. ယိၤၡူသးအုးဝဲ ဒိၣ်ဒိၣ်ကလဲာ်လီၤ. ကျးလီၤအမဲာ်ဆူဟီၣ်ခိၣ်ဒီး ဃ့ထုကဖၣ်တၢ်လၢ ယဟိဝၤအအိၣ်, စံးဝဲဒၣ် ‘ကစၢ်ဧၢ, ဘၣ်မနုၤအဃိ နဘၣ်ဒုးကဲထီၣ်ပှၤဒ်အံၤန့ၣ်လဲၣ်’ န့ၣ်လီၤ.
ယဟိဝၤစံးဆၢအီၤ, ‘ဆၢထၢၣ်တက့ၢ်. ပှၤအံၣ်စရ့လးဖိတဖၣ် မၤကမၣ်ယၤလံ. တၢ်လၢကဘၣ်မၤဟးဂီၤဝဲ မ့တမ့ၢ် တၢ်လၢကဘၣ်ဟ့ၣ်ဝဲလၢယဟိဝၤ အဒဲစီဆှံအဂီၢ်တနီၤန့ၣ် ဟံးန့ၢ်ဃာ်ဝဲသ့ၣ်လံ. ဟုၣ်ဝဲဒၣ်ဆ့ဖးထီအဃံလၤတဘ့ၣ် ဒီးပာ်ခူသူၣ်ဝဲသ့ၣ်လီၤ. နမ့ၢ်တမၤဟးဂီၤကွံာ် တၢ်တဖၣ်အံၤဒီး ပှၤလၢအဟံးန့ၢ်တၢ်တဖၣ်အံၤသၢပျၢၤ ယဟ့ၣ်သုတၢ်ဆိၣ်ဂ့ၤတသ့ဘၣ်’ န့ၣ်လီၤ. ဝံၤဒီး စံးဘၣ်ဝဲယိၤၡူလၢ ပှၤလၢအတဂ့ၤ မ့ၢ်မတၢ်လဲၣ်န့ၣ် ကဒုးနဲၣ်အီၤလီၤ.
တုၤနုၤတစု ယိၤၡူစူးရိအိၣ်ဖှိၣ် ပှၤခဲလၢာ်ဒီး ယဟိဝၤပာ်ဖျါထီၣ် ပှၤအၢပှၤသီ ဧၤကၣ်န့ၣ်လီၤ. ဧၤကၣ်စံးဝဲ ‘ယမၤကမၣ်ဘၣ်တၢ်လံလီၤ. ယထံၣ်န့ၢ်ဆ့အဃံအလၤတဘ့ၣ်, ထူတဘိ, ဒီးစ့တနီၤန့ၣ်လီၤ. မ့ၢ်လၢယသးကွံ တၢ်တဖၣ်အံၤဒိၣ်မးအဃိ ယဟံးန့ၢ်ဘၣ်ယဲလီၤ. ယဘျၢလီၤဃာ်အီၤလၢ ယဒဲအဖီလာ်ဟီၣ်ခိၣ်လာ်န့ၣ်လီၤ.’
တၢ်ဃုထံၣ်န့ၢ်တၢ်တဖၣ်အံၤဝံၤဒီး ဘၣ်တၢ်ဟဲစိာ်အီၤဆူ ယိၤၡူအအိၣ်အခါ ယိၤၡူစံးဘၣ်ဧၤကၣ်, ‘ဘၣ်မနုၤနမၤအိၣ်ထီၣ် တၢ်နးတၢ်ဖှီၣ်အံၤလၢ ပဖီခိၣ်န့ၣ်လဲၣ်. ခဲအံၤယဟိဝၤ ကဒုးတုၤတၢ်နးတၢ်ဖှီၣ်လၢနဖီခိၣ်လီၤသၢၣ်.’ တုၤနုၤတစု ပှၤခဲလၢာ်န့ၣ် ကွံာ်ဧၤကၣ်, ဒီးအပှၤဟံၣ်ဖိတဖၣ်လၢလၢၢ် တုၤအသံဝဲသ့ၣ်န့ၣ်လီၤ. တၢ်အံၤ ပာ်ဖျါထီၣ်တၢ်လၢ ပတဘၣ်ဟံးန့ၢ် တၢ်ဖိတၢ်လံၤလၢအတမ့ၢ်ပတၢ် နီတဘျီဘၣ်လီၤ, တမ့ၢ်ဘၣ်ဧါ.
လၢတၢ်န့ၣ်အလီၢ်ခံ ဖဲပှၤအံၣ်စရ့လးဖိတဖၣ် လဲၤထီၣ်ဒုးဝ့ၢ်ဂဲလၢခံတဘျီဒီး ယဟိဝၤန့ၣ်မၤစၢၤ အပှၤဂီၣ်မုၢ်တဖၣ်န့ၣ်လီၤ. လၢတၢ်န့ၣ်အဃိ မၤနၢၤဝဲသ့ၣ်တၢ်ဒုးလီၤ.
