ပူ ၇၈
စုအတၢ်ကွဲးလၢဂီၤပၤလိၤ အဂ့ၢ်
ဖဲအံၤန့ၣ် တၢ်မၤအသးဒ်လဲၣ်. ပှၤမၤ တၢ်အီၣ်တၢ်အီအဘူၣ်ဖးဒိၣ်တခါ န့ၣ်လီၤ. ဘၤဘူၤလိၣ်အစီၤပၤန့ၣ် ကွဲဝဲ ပှၤတမှံၤလၢအကါဒိၣ် အဂၤတကထိန့ၣ်လီၤ. အဝဲသ့ၣ်တဖၣ် သူဝဲ လီခီထူ, လီခီစ့လၢ ဘၣ်တၢ်ဟဲက့ၤစိာ်အီၤလၢ ဝ့ၢ်ယရူၤၡလ့ၣ်ယွၤအတၢ်လုၢ်ဟံၣ်န့ၣ်လီၤ. ဘၣ်ဆၣ်သနာ်က့ ပှၤကညီအစုတခီအစုမုၢ်စုဘိ ဟဲဖျါထီၣ်ဝဲဒၣ်သတူၢ်ကလာ် လၢကလံၤကျါဒီး ကွဲးတၢ်လၢဂီၤပၤအလိၤန့ၣ်လီၤ. ပှၤခဲလၢာ်ဖုးဒီး ကနိးဝဲသ့ၣ်န့ၣ်လီၤ.
အကတီၢ်အံၤန့ၣ် နဘူၤကးန့စၢ်အလံၤ ဘ့ၤလၡါစၢ် ကဲစီၤပၤန့ၣ်လီၤ. အဝဲကိးပသူထီၣ်လၢ ပှၤကဆှၢနုာ်အပှၤကူၣ်ဘၣ်ကူၣ်သ့တဖၣ် ဆူအအိၣ် တဘျီဃီန့ၣ်လီၤ. ဒီးစံးဝဲဒၣ် ‘ပှၤတဂၤလၢ်လၢ်လၢ အဖးစုအတၢ်ကွဲးအံၤဒီး တဲဖျါထီၣ်န့ၢ်ယၤအခီပညီသ့န့ၣ် ယကမၤလၤကပီၤအီၤလၢ ခိၣ်ဖးအါမး ဒီးလၢထံကီၢ်အပူၤ ကကဲထီၣ်ပှၤအကါဒိၣ်ကတၢၢ် သၢဂၤတဂၤန့ၣ်လီၤ.’ ဘၣ်ဆၣ်သနာ်က့ ပှၤကူၣ်ဘၣ်ကူၣ်သ့လၢ ဖးဖျါထီၣ် တၢ်ကွဲးအသးဒီးအခီပညီသ့န့ၣ် တအိၣ်နီတဂၤဘၣ်.
စီၤပၤအမိၢ်နၢ်ဟူ တၢ်သီၣ်တၢ်သဲဒိၣ်မး လၢတၢ်အီၣ်သကိးအဘူၣ်အဒၢးဖးဒိၣ်ပူၤဒီး ဟဲနုာ်လီၤဝဲ ဒီးစံးဝဲစီၤပၤဒ်အံၤလီၤ. ‘ပျံၤတၢ်ထဲအံၤတဂ့ၤ. ပှၤလၢအသ့ၣ်ညါ ယွၤလၢအစီဆှံတဖၣ်တဂၤ အိၣ်လၢနဘီနမုၢ်အပူၤလီၤ. ဖဲနဖု, နဘူၤကးန့စၢ် ပၢတၢ်အကတီၢ်န့ၣ် ပာ်တ့ၢ်ပှၤဝဲန့ၣ်လၢ ပှၤကူၣ်ဘၣ်ကူၣ်သ့အခိၣ်ကျၢၢ်န့ၣ်လီၤ. အမံၤမ့ၤဒၤနံးယ့လး ဒီးမၢပှၤလဲၤကိးန့ၢ်နၤဒီး ဆှၢနုာ်အီၤလၢနမဲာ်ညါတက့ၢ်. ကဖးန့ၢ်နၤ တၢ်အခီပညီခဲလၢာ်န့ၣ်လီၤ.’
ဒ်န့ၣ်ဒီး ဒၤနံးယ့လး ဘၣ်တၢ်ဆှၢနုာ်အီၤဆူ အမဲာ်ညါတဘျီဃီလီၤ. ဒၤနံးယ့လးဂ့ၢ်လိာ်ဝဲလၢ ကတူၢ်လိာ်ခိၣ်ဖးတဖၣ်န့ၣ်ဝံၤ စးထီၣ်စံးဝဲဒၣ် ဘၣ်မနုၤအဃိ ယွၤသုးကွံာ်ဘ့ၤလၡါစၢ်အဖု နဘူၤကးန့စၢ်လၢ စီၤပၤအလီၢ်န့ၣ်လီၤ. ဒီးစံးကဒီးဝဲလၢ, ‘အဝဲဒၣ်န့ၣ် ပာ်ထီၣ်ထီအသးဒိၣ်မးအဃိ တူၢ်ဘၣ်ယဟိဝၤအတၢ်စံၣ်ညီၣ်အီၤန့ၣ်လီၤ.’
‘နဲဒၣ်စ့ၢ်ကီး နသ့ၣ်ညါတၢ်ခဲလၢာ်လၢ တၢ်မၤအသးတဖၣ်ဒီးနဖု ဘၣ်ဆၣ် နပာ်ထီၣ်ထီနသးန့ၣ်လီၤ. နထုးထီၣ် လီခီတဖၣ်လၢ ယဟိဝၤအတၢ်လုၢ်ဟံၣ်ဒီး နအီၣ်နအီလၢတၢ်န့ၣ်တဖၣ်လီၤ. ဒီးနဘူၣ်ထီၣ်ဘါထီၣ် ယွၤလၢတၢ်မၤအီၤလၢသ့ၣ်တဖၣ်, ဒီးလၢၢ်တဖၣ် ဒီးနတမၤလၤကပီၤ ယွၤအဒိၣ်အထီကတၢၢ်လၢအတ့လီၤတၢ်န့ၣ်ဘၣ်. လၢတၢ်န့ၣ်အဃိ ယွၤပျဲလီၤစုတဘိအံၤလၢ ကကွဲးလံာ်မဲာ်ဖျၢၣ်တဖၣ်အံၤန့ၣ်လီၤ.’
ဒၤနံးယ့လးစံးဝဲဒၣ်, ‘လံာ်လၢတၢ်ကွဲးအီၤတဖၣ်န့ၣ် မ့ၢ်ဝဲ– မန့ၤ, မန့ၤ, တက့လး, အူပၢ်စံၣ်န့ၣ်လီၤ.’
‘မန့ၤအခီပညီန့ၣ်, ကစၢ်ယွၤဂံၢ်တ့ၢ်နဘီနမုၢ် အမုၢ်နံၤမုၢ်သီတဖၣ် ဒီးမၤကတၢၢ်ကွံာ်အီၤလံလီၤ. တက့လးတခီ, တၢ်စီၤနၤလၢစီၤပီၢ်ပူၤ ဒီးနတဃၢဘၣ်လီၤ. အူပၢ်စံၣ် စံးတၢ်န့ၣ် နဘီနမုၢ်ဘၣ်တၢ်ဟ့ၣ်လီၤအီၤ ဆူပှၤမၤဒဲဖိဒီး ပှၤပၤရၣ်ဖိလံန့ၣ်လီၤ.’
ဖဲဒၤနံးယ့လးကတိၤတၢ်ကတိၤအံၤအခါ ပှၤမၤဒဲဒီး ပှၤပၤရၣ်ဖိတဖၣ် စးထီၣ်ဒုးဘၤဘူၤလိၣ်န့ၣ်လံလီၤ. မၤန့ၢ်ဝ့ၢ်ဝံၤဒီး မၤသံဘ့ၤလၡါစၢ်န့ၣ်လီၤ. ဒ်တၢ်ကွဲးအသးလၢ ဂီၤပၤအလိၤစံးဝဲအသိး တၢ်မၤအသးတဟါဃီန့ၣ်လီၤ. ဘၣ်ဆၣ်, တၢ်ကမၤအသးဒီး ပှၤအံၣ်စရ့လးဖိသ့ၣ်တဖၣ်ဒ်လဲၣ်. တယံာ်ဘၣ်ဒီး ကသ့ၣ်ညါဘၣ်လီၤ. ဘၣ်ဆၣ် ပကကွၢ်သကိးလၢအဆိ တၢ်လၢ ဒၤနံးယ့လးဘၣ်ကွၢ်ဆၢၣ်မဲာ်ဝဲန့ၣ်တက့ၢ်.