ပူ ၈၂
မၢ်ဒကဲၤ ဒီးအ့ၤစတၢ် အဂ့ၢ်
မ်ပကကွၢ်ကဒါက့ၤအကတီၢ်လၢ တချုးဧ့စြၤက့ၤဆူယရူၤၡလ့ၣ် စှၤနံၣ်န့ၣ်တက့ၢ်. မၢ်ဒကဲၤဒီးအ့ၤစတၢ်န့ၣ် မ့ၢ်ပှၤအံၣ်စရ့လးဖိလၢ အကါဒိၣ်ကတၢၢ် လၢပၤရၣ်အဘီအမုၢ်န့ၣ်လီၤ. အ့ၤစတၢ်မ့ၢ်နီၢ်ပၤမုၣ်ဒီး အတခွါမၢ်ဒကဲၤန့ၣ်တခီ စီၤပၤမ့ၢ်ဝံၤန့ၣ် အလီၢ်အထီကတၢၢ်န့ၣ်လီၤ. တၢ်အံၤ ဟဲကဲထီၣ်ဝဲဒၣ်ဒ်လဲၣ်န့ၣ် ပကကွၢ်သကိးတက့ၢ်.
အ့ၤစတၢ်န့ၣ် အမိၢ်ဒီးအပၢ်သံသဒၣ်တ့ၢ်အီၤလၢ အနီၢ်ဆံးဆံးအခါလီၤ. လၢတၢ်န့ၣ်အဃိ မၢ်ဒကဲၤဘၣ်ကွၢ်ဒိၣ်ထီၣ်အီၤန့ၣ်လီၤ. လၢဝ့ၢ်ခိၣ်ၡူၡၣ်န့ၣ် ပၤရၣ်အစီၤပၤ အဃၤၡဝ့ရိၣ်အနီအိၣ်တဖျၢၣ်န့ၣ်လီၤ. မၢ်ဒကဲၤမ့ၢ်အခ့အပှၤတဂၤလၢ မၤအတၢ်န့ၣ်လီၤ. ဘၣ်မုၢ်တနံၤ နီၢ်ပၤမုၣ်ဝးၡတံၤန့ၣ် တဒိကနၢ်စီၤပၤအကလုၢ်အဃိ စီၤပၤတီၣ်ထီၣ်နီၢ်ပၤမုၣ်အသီတဂၤန့ၣ်လီၤ. တီၣ်ထီၣ်ဝဲမတၤလဲၣ် သုသ့ၣ်ညါဧါ. အၢၣ်, မ့ၢ်ပိာ်မုၣ်ဃံလၤဖိ အ့ၤစတၢ်န့ၣ်လီၤ.
ပှၤလၢအပာ်ထီၣ်ထီအသး လၢပှၤဘၣ်တီၤလီၤအီၤန့ၣ်သု ထံၣ်အီၤဧါ. အဝဲဒၣ်မ့ၢ်ဟၤမၣ်န့ၣ်လီၤ. အဝဲမ့ၢ် ပှၤလၢအကါဒိၣ်မးတဂၤ လၢပၤရၣ်အဘီအမုၢ်ပူၤလီၤ. ဟၤမၣ်အဲၣ်ဒိးဝဲလၢ မၢ်ဒကဲၤ, လၢအဆ့ၣ်နီၤဖဲအံၤဒ်သုထံၣ်ဘၣ်အသိးန့ၣ် ကတီၤလီၤယူးယီၣ်အီၤန့ၣ်လီၤ. ဘၣ်ဆၣ် မၢ်ဒကဲၤတခီ တတီၤလီၤယူးယီၣ်အီၤဘၣ်. မၢ်ဒကဲၤဆိကမိၣ်ဝဲလၢ တကြၢးတီၤလီၤယူးယီၣ် ပှၤအၢဒ်အံၤတဂၤန့ၣ်ဘၣ်. လၢတၢ်န့ၣ်အဃိ ဟၤမၣ်အသးထီၣ်ဝဲဒိၣ်မးန့ၣ်လီၤ. မၤအသးဒ်န့ၣ်ဒီး ဘၣ်မုၢ်တနံၤန့ၣ် မၤဝဲဒ်အံၤလီၤ.
ဟၤမၣ်လဲၤဆူ စီၤပၤအအိၣ်ဒီး ကတိၤခဲၣ်အၢခဲၣ်သီ ပှၤအံၣ်စရ့လးဖိတဖၣ်အဂ့ၢ်န့ၣ်လီၤ. အဝဲစံးစီၤပၤလၢ ‘ပှၤအံၣ်စရ့လးဖိတဖၣ်န့ၣ် တမ့ၢ်ပှၤလၢ အတိၢ်န့ၣ်တၢ်သိၣ်တၢ်သီဘၣ်, မ့ၢ်ပှၤအၢတဖၣ်န့ၣ်လီၤ. ကြၢးတၢ်မၤသံကွံာ်အီၤန့ၣ်လီၤ.’ အဃၤၡဝ့ရိၣ်အကစၢ်ဒၣ်ဝဲ တသ့ၣ်ညါလၢ အနီၢ်ပၤမုၣ်မ့ၢ် ပှၤအံၣ်စရ့လးမုၣ်တဂၤန့ၣ်ဘၣ်. လၢတၢ်န့ၣ်အဃိ ကနၢ်ဝဲဟၤမၣ်အတၢ်ကတိၤဝံၤ ထုးထီၣ်ဝဲတၢ်သိၣ်တၢ်သီလၢ မုၢ်နံၤမတၤဒီးတုၤလီၤလၢမုၢ်နံၤမတၤန့ၣ် လၢတၢ်ကမၤသံကွံာ် ပှၤအံၣ်စရ့လးဖိ တုၤအလၢာ်ကွံာ်န့ၣ်လီၤ.
ဖဲမၢ်ဒကဲၤနၢ်ဟူဝဲ တၢ်သိၣ်တၢ်သီအံၤအခါ အသူၣ်ကီၢ်သးဂီၤဒိၣ်မးန့ၣ်လီၤသၢၣ်. အဝဲဆှၢလီၤတၢ်ကစီၣ်န့ၣ်ဆူ အ့ၤစတၢ်အအိၣ်ဒ်အံၤလီၤ. ‘ပတံဃ့ကညးတၢ်သးကညီၤ လၢစီၤပၤအအိၣ် ဒ်သိးပကပူၤဖျဲးအဂီၢ်န့ၣ်တက့ၢ်.’ လၢပၤရၣ်အဘီအမုၢ်န့ၣ် မ့တမ့ၢ်ဘၣ်လၢစီၤပၤကိးန့ၣ် ပှၤနုာ်လီၤထံၣ်စီၤပၤ တန့ၢ်နီတဂၤဘၣ်. အ့ၤစတၢ်န့ၣ် တမၤန့ၢ်အခွဲးဘၣ်ဆၣ် နုာ်လီၤထံၣ်ဝဲစီၤပၤန့ၣ်လီၤ. စီၤပၤယူာ်ထီၣ် အနီၢ်ထိးထူဆူ အ့ၤစတၢ်အိၣ်, အခီပညီမ့ၢ် အ့ၤစတၢ်တဘၣ်တၢ်မၤသံအီၤဘၣ် န့ၣ်လီၤ. အ့ၤစတၢ်ကွဲစီၤပၤဒီးဟၤမၣ်ခံဂၤ လၢအကဟဲအီၣ်သကိးမ့ၤန့ၣ်လီၤ. လၢတၢ်အီၣ်မ့ၤအလီၢ်န့ၣ် စီၤပၤဒိၣ် သံကွၢ်အ့ၤစတၢ်လၢ သးလီဝဲမနုၤလဲၣ်န့ၣ်လီၤ. အ့ၤစတၢ်စံးဆၢဝဲလၢ ဖဲစီၤဖၤဒိၣ်ဒီးဟၤမၣ် မ့ၢ်ဟဲအီၣ်ကဒီးမ့ၤ လၢခံတသီအခါ ကစံးဝဲအီၤန့ၣ်လီၤ.
တုၤတၢ်အီၣ်မ့ၤလၢခံတဘျီအကတီၢ်တုၤဒီး အ့ၤစတၢ်စံးဝဲစီၤပၤလၢ ‘ယၤဒီးယပှၤကလုာ် ကဘၣ်တၢ်မၤသံကွံာ်လီၤ’ န့ၣ်လီၤ. ဒီးစီၤပၤဒိၣ်န့ၣ် အသးထီၣ်ဒီး သံကွၢ်ဝဲဒ်အံၤ, ‘မ့ၢ်မတၤတဂၤလၢ မၤတၢ်ထဲအံၤဘူၣ်န့ၣ်လဲၣ်.’ န့ၣ်လီၤ.
အ့ၤစတၢ် စံးဆၢက့ၤဝဲဒၣ်, ‘ပှၤအဝဲန့ၣ်, ဒုၣ်ဒါအဝဲန့ၣ်မ့ၢ် ပှၤအၢပှၤသီ ဟၤမၣ်အံၤန့ၣ်လီၤကစၢ်ဧၢ’ န့ၣ်လီၤ.
မ့မ့ၢ်တဘျီအံၤ စီၤပၤဒိၣ်အသးထီၣ်ဝဲ နီၢ်နီၢ်လံန့ၣ်လီၤ. ခါလီၤအကလုၢ်လၢ ဟၤမၣ်ကဘၣ်တၢ်မၤသံအီၤန့ၣ်လီၤ. လၢတၢ်န့ၣ်အလီၢ်ခံ ဟ့ၣ်လီၤဝဲမၢ်ဒကဲၤလၢ, စီၤပၤမ့ၢ်ဝံၤန့ၣ် တၢ်အလီၢ်အလၤအဒိၣ်ကတၢၢ်န့ၣ်လီၤ. တုၤနုၤတစု မၢ်ဒကဲၤစ့ၢ်ကီး ထုးထီၣ်ကဒါဝဲတၢ်သိၣ်တၢ်သီလၢ နံၤတနံၤလၢပှၤအံၣ်စရ့လးဖိ ကဘၣ်တၢ်မၤသံအီၤအမုၢ်နံၤန့ၣ် ကဒုးကဒါက့ၤအဒုၣ်အဒါဒီး ဒီဒၣ်အသးကသ့အဂီၢ်န့ၣ်လီၤ. မ့ၢ်လၢမၢ်ဒကဲၤ ဟဲကဲထီၣ် ပှၤလၢအကါဒိၣ်မးထဲအံၤတဂၤအဃိ ပှၤအါဒ်အါဂၤ မၤစၢၤပှၤအံၣ်စရ့လးဖိတဖၣ်န့ၣ်လီၤ. မၤသးဒ်န့ၣ်ဒီး ပှၤအံၣ်စရ့လးဖိတဖၣ် ပူၤဖျဲးဝဲသ့ၣ်လၢ ဒုၣ်ဒါအစုပူၤန့ၣ်လီၤ.
လံာ် အ့ၤစတၢ်.