ပူ ၈၀
ယွၤအပှၤဂီၢ်မုၢ် ဟဲက့ၤထွးထီၣ်လၢဘၤဘူၤဘိၣ် အဂ့ၢ်
မၤဒဲ, ဒီးပၤရၣ် မၤနၢၤ ဘၤဘူၤလိၣ် အိၣ်လံခံနံၣ်ဃၣ်ဃၣ်လံ. ကွၢ်ခဲအံၤ, မနုၤမၤအသးန့ၣ်လဲၣ်. မ့ၢ်သၢၣ်, ပှၤအံၣ်စရံလးဖိတဖၣ် ဟဲက့ၤထွးထီၣ်လၢ ဝ့ၢ်ဘၤဘူၤလိၣ်န့ၣ်လံ. ဟဲက့ၤထူၣ်ဖျဲးဝဲဒ်လဲၣ်, ဒီးမ့ၢ်မတၤပျဲလဲၤအဝဲသ့ၣ်န့ၣ်လဲၣ်.
ပၤရၣ်အစီၤပၤကိရ့ၣ်သၢၣ်. တချုးကိရ့ၣ်အိၣ်ဖျဲၣ် လၢအပူၤကွံာ်အါနံၣ်လံၤလံၤန့ၣ် ယဟိဝၤမၢဝံယၡါယၤကွဲး ဘၣ်ဃးအဝဲအဂ့ၢ်န့ၣ်လီၤ. ‘နၤအံၤ နကမၤ တၢ်လၢအဘၣ်ယသး, လၢနကမၤန့ၢ်ဝ့ၢ်အဂီၢ် ဝ့ၢ်အပဲတြီကအိးထီၣ်ဃာ်အသးန့ၣ်လီၤ.’ ဒ်အစံးဝဲအသိး ကိရ့ၣ်ကဲခိၣ်ကဲနၢ် လၢအကဒုးန့ၢ် ဘၤဘူၤလိၣ်အဂီၢ်လီၤ. ပှၤမၤဒဲ, ဒီးပှၤပၤရၣ်ဖိသ့ၣ်တဖၣ် ဟဲနုာ်ဆူဝ့ၢ်ပူၤလၢပဲတြီ လၢအအိးထီၣ်အသး လၢမုၢ်နၤခီန့ၣ်လီၤ.
ယဟိဝၤအဝံ ယၡါယၤစံးဆိပာ်ဒံးဝဲလၢ ကိရ့ၣ်န့ၣ်ကဟ့ၣ်လီၤအကလုၢ်လၢ တၢ်ကသူၣ်ထီၣ်က့ၤ ယရူၤၡလ့ၣ် ဒီးအတၢ်လုၢ်ဟံၣ်န့ၣ်လီၤ. ကိရ့ၣ်န့ၣ်ဟ့ၣ်လီၤဝဲအကလုၢ် ဒ်အံၤစ့ၢ်ကီးန့ၣ်ဧါ. ဟ့ၣ်လီၤဝဲဒၣ်သၢၣ်. ကိရ့ၣ်တဲပှၤအံၣ်စရ့လးဖိဒ်အံၤလီၤ. ‘က့ၤဆူယရူၤၡလ့ၣ်တက့ၢ်. က့ၤသူၣ်ထီၣ်က့ၤ ယွၤသုကစၢ် အတၢ်လုၢ်ဟံၣ်တက့ၢ်.’ ပှၤအံၣ်စရ့လးဖိတဖၣ် က့ၤဝဲသ့ၣ်လၢ တၢ်ဂ့ၢ်ဝဲန့ၣ်အဃိလီၤ.
ဘၣ်ဆၣ်သနာ်က့ ပှၤအံၣ်စရ့လးဖိလၢ အအိၣ်လၢဘၤဘူၤလိၣ်တဖၣ်န့ၣ် က့ၤဆူဝ့ၢ်ယရူၤၡလ့ၣ်, လၢအမ့ၢ်တၢ်ဒ့ၣ်စၢၤအယံၤအထီ, ကိးဂၤဒဲးတသ့ဘၣ်. မ့ၢ်တၢ်ဒ့ၣ်စၢၤလၢအယံၤဒိၣ်မး, အိၣ်အမံးလး ၅၀၀ (ကံၣ်လိၣ်မံၣ်တၣ် ၈၀၀) န့ၣ်လီၤ. ပှၤသးပှၢ်တဖၣ်ဒီး ပှၤအိၣ်ဆူးအိၣ်ဆါတဖၣ် တစှၤဝဲဘၣ်န့ၣ်လီၤ. လၢတၢ်ဂ့ၢ်အဂၤ အါမံၤအါမၠိအဃိ ပှၤလၢတက့ၤတဖၣ် အိၣ်ဝဲစ့ၢ်ကီးန့ၣ်လီၤ. ဘၣ်ဆၣ်သနာ်က့ ကိရ့ၣ်စံးဘၣ် ပှၤလၢအတက့ၤတဖၣ် ‘ဟ့ၣ်လီၤသုထူ, သုစ့, ဒီးတၢ်ဖိတၢ်လံၤတဖၣ်ဆူ ပှၤလၢကက့ၤဘှီထီၣ်က့ၤ ဝ့ၢ်ယရူၤၡလ့ၣ်ဒီး အတၢ်လုၢ်ဟံၣ်န့ၣ်တက့ၢ်.’
လၢတၢ်န့ၣ်ဃိ ဟ့ၣ်လီၤဝဲသ့ၣ်အတၢ်သးအ့ၣ်တဲာ်တၢ်ဟ့ၣ် တၢ်ဖိတၢ်လံၤအါမးန့ၣ်ဆူ ပှၤလၢအကက့ၤဆူ ယရူၤၡလ့ၣ်န့ၣ်လီၤ. ဝံၤဒီး ကိရ့ၣ်ဟ့ၣ်ကဒါက့ၤ တၢၢ်, သပၢၤ ဒီးတၢ်ဖိတၢ်လံၤလၢ တၢ်လုၢ်ဟံၣ်အပူၤတဖၣ် လၢနဘူၤကးန့စၢ်ဟဲက့ၤစိာ်ဝဲ ဖဲအမၤဟးဂီၤယရူၤၡလ့ၣ်အခါန့ၣ်လီၤ. လၢတၢ်န့ၣ်အဃိ ကီၢ်အပှၤက့ၤကဒါက့ၤတဖၣ် ကဘၣ်က့ၤယိးဝဲသ့ၣ် တၢ်ဖိတၢ်လံၤတဖၣ် တစှၤဘၣ်.
ပှၤအံၣ်စရ့လးဖိလဲၤတၢ်ယံာ် လွံၢ်လါဝံၤဒီး က့ၤတုၤဝဲဆူဝ့ၢ်ယရူၤၡလ့ၣ် ဘၣ်ဆၢဘၣ်ကတီၢ်န့ၣ်လီၤ. ပမ့ၢ်ဒွးအီၤစးထီၣ်လၢ ဝ့ၢ်ယရူၤၡလ့ၣ်ဘၣ်တၢ်မၤဟးဂီၤအီၤဒီး ပှၤတအိၣ်ဘၣ် လၢကီၢ်ပူၤနီတဂၤအခါန့ၣ် အိၣ်အနံၣ် ၇၀ အပှဲၤန့ၣ်လီၤ. ပှၤအံၣ်စရ့လးဖိတဖၣ် ဟဲက့ၤတုၤကဒါက့ၤဆူ အကီၢ်ဒၣ်ဝဲဘၣ်ဆၣ် ကဘၣ်ကွၢ်ဆၢၣ်မဲာ်တၢ်ကီတၢ်ခဲ အါမံၤအါမၠိဒံးန့ၣ်လီၤ. တၢ်ဂ့ၢ်အဝဲအံၤ ပကသ့ၣ်ညါဘၣ်အီၤလၢ ဆူညါတဆၢန့ၣ်လီၤ.