မူခိၣ်ကလူး​ကၤဘြံၤအ့လးန့ၣ် ဘၣ်တၢ်​မၢလီၤ​အီၤ​ဆူ မၤရံ, လၢအမ့ၢ်​ပိာ်မုၣ်ဖိ​လၢ​အဂ့ၤ​တဂၤ အအိၣ်​န့ၣ်လီၤ. အဝဲဒၣ်​စံး​မၤရံ​လၢ က​ဆံးစၢ်ထီၣ်ဖိ​တဂၤ လၢ​က​မ့ၢ်​စီၤပၤ​ဒီး က​ပၢတၢ်​လီၤထူလီၤယိာ်​န့ၣ်လီၤ. ဖိသၣ်​ယ့ၣ်ၡူးန့ၣ် အိၣ်ဖျဲၣ်ထီၤဝဲဒၣ်​လၢ ဂီၤဖံး​အီၣ်ဆၣ်​အလီၢ်​ပူၤန့ၣ်​ဒီး ပှၤကွၢ်သိတဖၣ် ဟဲ​ကွၢ်​အီၤန့ၣ်​လီၤ. လၢခံန့ၣ် ဆၣ်​တဖျၢၣ် နဲၣ်​ပှၤမုၢ်ထီၣ်တဖၣ်​အကျဲ​ဆူ ဖိသၣ်​အအိၣ်​န့ၣ်လီၤ. မတၤ​မၤ​လၢ အဝဲသ့ၣ်​က​ထံၣ်​ဆၣ်အံၤ​အဂီၢ်လဲၣ်, ဒီး​ယ့ၣ်ၡူး​ပူၤဖျဲးဝဲဒၣ်​လၢ တၢ်​က​မၤသံ​အီၤ​ဒ်လဲၣ် အဂ့ၢ်တဖၣ်န့ၣ် ပ​က​သ့ၣ်ညါဘၣ်​လီၤ.

လၢတၢ်န့ၣ်အလီၢ်ခံ ပထံၣ်ဘၣ်လၢ ဖဲ​ယ့ၣ်ၡူး​အိၣ် ၁၂ နံၣ်​အခါ စံး​ဃဲၤ​ကတိၤ​သကိး​တၢ်​ဒီး သရၣ်တဖၣ်​လၢ တၢ်လုၢ်ဟံၣ်​အပူၤ​န့ၣ်လီၤ. တၢ်န့ၣ်အလီၢ်ခံ ယံာ်​တဆံဃိးနံၣ်​ဝံၤဒီး ယ့ၣ်ၡူး​ဒိးဘျၢ​အသး​လၢ​ထံ​လီၤ. တုၤအံၤ​ဒီး စးထီၣ်​မၤဝဲ​တၢ်မၤ​လၢ ဘၣ်ဃး​တၢ်စံၣ်တဲၤတဲလီၤ ဒီး​တၢ်သိၣ်လိမၤယုၤ ဘီမုၢ်​အတၢ်သးခုကစီၣ် လၢ​ယွၤ​မၢလီၤ​အီၤ​ဆူ​ဟီၣ်ခိၣ်ချၢ​န့ၣ်လီၤ. ဒီး​ဃုထၢထီၣ်ဝဲ​ပှၤ ၁၂ ဂၤ​ဒီး ဒုး​ကဲထီၣ်ဝဲ ပှၤ​တၢ်မၢဖိတဖၣ် လၢ​က​မၤစၢၤအီၤ​လၢ တၢ်မၤအံၤ​အပူၤ​န့ၣ်လီၤ.

ယ့ၣ်ၡူးန့ၣ် မၤဝဲ​တၢ်လီၤလး​အါမံၤ​စ့ၢ်ကီး​န့ၣ်လီၤ. ဒုးအီၣ်​ပှၤလၢအကထိန့ၣ် လၢ​ညၣ်ဖိ​စှၤကိာ်​ဒီး ကိၣ်ဖိ​စှၤကိာ်​န့ၣ်လီၤ. မၤဘျါ​ပှၤဆူးပှၤဆါတဖၣ် အမဲာ်ညါ, မၤမူထီၣ်က့ၤ​ပှၤသံတဖၣ်​ဒၣ်လဲာ်​န့ၣ်လီၤ. အကတၢၢ်န့ၣ် ပ​က​သ့ၣ်ညါဘၣ် ယ့ၣ်ၡူး​ဘၣ်​ကွၢ်ဆၢၣ်မဲာ်​တၢ်ဂ့ၢ်​အါမံၤ ဖဲ​အမုၢ်နံၤ​လၢခံ​ကတၢၢ်တဖၣ်​အကတီၢ်, ဒီး​ဘၣ်​တၢ်မၤသံအီၤ​ဒ်လဲၣ်​အဂ့ၢ်န့ၣ်လီၤ. ယ့ၣ်ၡူး​စံၣ်တဲၤတဲလီၤတ့ၢ်​တၢ် သၢနံၣ်​ဃုလါ​လီၤ. ဒ်န့ၣ်​ဒီး တၢ်နီၤဖး ၆ န့ၣ် ပၣ်ဃုာ်​တၢ်ဂ့ၢ်တၢ်ကျိၤတဖၣ်​လၢ ၃၄ နံၣ်​အကတီၢ်​ပူၤန့ၣ်​လီၤ.