ပူ ၈၇
ဖိသၣ်ယ့ၣ်ၡူးလဲၤတုၤလၢ တၢ်လုၢ်ဟံၣ်ပူၤ အဂ့ၢ်
ကွၢ်ဖိသၣ်ဖိတဂၤ လၢကတိၤတၢ်ဒီး ပှၤသးပှၢ်တဖၣ်န့ၣ်တဘီ. ပှၤသးပှၢ်တဖၣ်န့ၣ် မ့ၢ်သရၣ်တဖၣ်လၢ အသိၣ်လိပှၤလၢ ယွၤအတၢ်လုၢ်ဟံၣ်အပူၤန့ၣ်လီၤ. ဖိသၣ်တခီ မ့ၢ်ယ့ၣ်ၡူးန့ၣ်လီၤ. အဝဲဒိၣ်ထီၣ်ဒိၣ်မးလံ. အသးအိၣ် ၁၂ နံၣ်န့ၣ်လီၤ.
သရၣ်တဖၣ်န့ၣ် ကမၢကမၣ်ဝဲသ့ၣ်ဒိၣ်မးလၢ ယ့ၣ်ၡူးသ့ၣ်ညါ ကစၢ်ယွၤအဂ့ၢ် ဒီးတၢ်လၢလံာ်စီဆှံပူၤတဖၣ်အဂ့ၢ် ဂ့ၤဂ့ၤအဃိန့ၣ်လီၤ. ဘၣ်ဆၣ် ဘၣ်မနုၤအဃိ ယိၤသးဒီးမၤရံတအိၣ်ဖဲအံၤလဲၣ်. အဝဲသ့ၣ်လဲၤတုၢ်ဖဲလဲၣ်. ပကွၢ်သကိးတက့ၢ်.
ယိၤသးန့ၣ် လဲၤကိးဝဲဒၣ်အပှၤဟံၣ်ဖိတဖၣ်ဆူ ယရုၤၡလ့ၣ်ကိးနံၣ်ဒဲး လၢကထီၣ်ဘူၣ်ဖးဒိၣ်တခါ, လၢဘၣ်တၢ်ကိးအီၤ ဘူၣ်လဲၤကပာ် အဂီၢ်န့ၣ်လီၤ. ဝ့ၢ်နစၤရ့းဒီး ဝ့ၢ်ယရူၤၡလ့ၣ်န့ၣ် တၢ်ဒ့ၣ်စၢၤယံၤဒိၣ်မးလီၤ. ဖဲန့ၣ်အခါ သိလ့ၢ်မ့ၢ်ဂ့ၤ, လ့ၢ်မ့ၣ်အူမ့ၢ်ဂ့ၤ တအိၣ်ဒံးဘၣ်. အါတက့ၢ်န့ၣ် ပှၤတဖၣ်လဲၤတၢ်လၢအခီၣ်ဒီး လၢကတုၤဆူယရူၤၡလ့ၣ်အဂီၢ် ယံာ်သၢသီဃၣ်ဃၣ်န့ၣ်လီၤ.
ယိၤသးန့ၣ်အိၣ်ထီၣ်ဒီး အဖိအလံၤအါဂၤလံန့ၣ်လီၤ. လၢတၢ်န့ၣ်အဃိ ယ့ၣ်ၡူးအိၣ်ဒီးအပုၢ်ဒ့ခွါ, ပုၢ်ဒ့မုၣ်တဖၣ် လၢယိၤသးဒီးမၤရံဘၣ်ကွၢ်ထွဲအခံန့ၣ်လီၤ. တနံၣ်အံၤ ယိၤသးဒီးမၤရံ က့ၤကဒါက့ၤဆူအဟံၣ် လၢအဖိတဖၣ်န့ၣ်လီၤ. ဆိကမိၣ်ဝဲသ့ၣ်လၢ ယ့ၣ်ၡူးစ့ၢ်ကီးဟဲက့ၤပိာ်ထွဲလၢ ပှၤလဲၤတၢ်ဖိသ့ၣ်တဖၣ်အကျါန့ၣ်လီၤ. ဘၣ်ဆၣ်သနာ်က့ မုၢ်နံၤတနံၤအကတၢၢ် တုၤတၢ်အိၣ်ဘှံးအလီၢ်အခါ ဃုယ့ၣ်ၡူး ဒီးတထံၣ်ဝဲသ့ၣ်ဘၣ်. လၢဘူးတံၢ်တဖၣ်အကျါမ့ၢ်ဂ့ၤ, တံၤသကိးသ့ၣ်ညါသ့ၣ်ခိးတဖၣ်အကျါမ့ၢ်ဂ့ၤ ဃုဝဲသ့ၣ်ဘၣ်ဆၣ် တထံၣ်ဝဲဒၣ်ဘၣ်. လၢတၢ်န့ၣ်အဃိ အဝဲသ့ၣ် က့ၤကဒါက့ၤဆူယရူၤၡလ့ၣ်ဒီး ဃုအီၤလီၤ.
အကတၢၢ်န့ၣ် ထံၣ်ယ့ၣ်ၡူးလၢ သရၣ်သ့လံာ်တၢ်သိၣ်တၢ်သီတဖၣ်အကျါန့ၣ်လီၤ. ယ့ၣ်ၡူးကနၣ်သရၣ်သ့ၣ်တဖၣ် အတၢ်စံးတၢ်ကတိၤဒီး သံကွၢ်စ့ၢ်ကီးတၢ်သံကွၢ်န့ၣ်လီၤ. ပှၤခဲလၢာ်န့ၣ် ကမၢကမၣ်ဝဲသ့ၣ်လၢ အထံၣ်ဘၣ် ယ့ၣ်ၡူးအိၣ်ဒီးတၢ်ကူၢ်ဘၣ်ကူၣ်သ့ ထဲအံၤညါအဃိန့ၣ်လီၤ. ဘၣ်ဆၣ်သနာ်က့ မၤရံတခီစံးဝဲဒၣ် ‘ဖိခွါဧၢ, ဘၣ်မနုၤနဘၣ်မၤပှၤ ဒ်အံၤန့ၣ်လဲၣ် ဖိဧၢ. နပါပၢ်ဒီးမိမိၢ်တခီ လၢတၢ်သးကိၢ်အပူၤဃုနၤ ဘှံးသးမးလီၤ.’
ယ့ၣ်ၡူးစံးဆၢက့ၤဝဲ ‘ဘၣ်မနုၤအဃိ သုဘၣ်လူၤဃုယၤန့ၣ်လဲၣ်. ယဘၣ်အိၣ်လၢ ယပၢ်အဟံၣ်ပူၤန့ၣ် သုတသ့ၣ်ညါဘၣ်ဧါ.’
မ့ၢ်မးလီၤ, ယ့ၣ်ၡူးအဲၣ်ဒိးအိၣ်ဝဲဒၣ်လၢ တၢ်ဃုသ့ၣ်ညါနၢ်ပၢၢ် ယွၤအဂ့ၢ်သ့အလီၢ်န့ၣ်လီၤ. ပဝဲစ့ၢ်ကီး ပသးအတၢ်ဆၢန့ၢ် ကြၢးအိၣ်ဒၣ်ဒ်အံၤလီၤ တမ့ၢ်ဘၣ်ဧါ. လၢဝ့ၢ်နစၤရ့းန့ၣ်စ့ၢ်ကီး ယ့ၣ်ၡူးလဲၤထီၣ် တၢ်ဘူၣ်တၢ်ဘါတၢ်အိၣ်ဖှိၣ် ကိးနွံဒဲးန့ၣ်လီၤ. ထီဘိန့ၣ် ဒိကနၣ်ဝဲဂ့ၤဂ့ၤဘၣ်ဘၣ်အဃိ နၢ်ပၢၢ်လံာ်စီဆှံအါမးန့ၣ်လီၤ. ပဝဲတဖၣ်စ့ၢ်ကီး ဒ်သိးပကလီၤဂာ်ဒီးအီၤအဂီၢ် မ်ပကကွၢ်လိအီၤတက့ၢ်.
