ပူ ၉၁
ယ့ၣ်ၡူးသိၣ်လိသီလိတၢ် လၢကစၢၢ်တဖျၢၣ်အဒီခိၣ် အဂ့ၢ်
ကွၢ်ယ့ၣ်ၡူးဆ့ၣ်နီၤဖဲအံၤန့ၣ်တက့ၢ်. သိၣ်လိသီလိဝဲဒၣ် ပှၤတဖၣ် လၢကၤလံၤလါကစၢၢ်တဖျၢၣ်အဒီခိၣ်န့ၣ်လီၤ. ပှၤလၢအဆ့ၣ်နီၤလၢအကပၤန့ၣ် မ့ၢ်အပျဲၢ်တဖၣ်လီၤ. လၢအဝဲသ့ၣ်အကျါန့ၣ် ဃုထၢထီၣ်ဝဲဒၣ် တၢ်မၢဖိ ၁၂ ဂၤန့ၣ်လီၤ. တၢ်မၢဖိစံးတၢ်န့ၣ် မ့ၢ်ယ့ၣ်ၡူးအပျဲၢ်လီၤဆီတဖၣ်လီၤ. သုသ့ၣ်ညါအမံၤတဖၣ်န့ၣ်ဧါ.
ၡံမိၣ်ပ့းတရူး, ဒီးအပုၢ်အၣ်ဒရ့း, ကျဲၣ်ဃုာ် ယၤကိာ် ဒီးယိၤဟၣ်စ့ၢ်ကီးန့ၣ်လီၤ. အဝဲသ့ၣ်တဖၣ်စ့ၢ်ကီး မ့ၢ်ဒီပုၢ်ဝဲၢ်န့ၣ်လီၤ. တၢ်မၢဖိလၢခံတဂၤ အမံၤမ့ၢ်စ့ၢ်ကီးယၤကိာ်န့ၣ်လီၤ. ကျဲၣ်ဃုာ်ဒီးတၢ်မၢဖိလၢခံတဂၤ လၢတၢ်ကိးအီၤလၢ ၡံမိၣ်စ့ၢ်ကီးန့ၣ်လီၤ. တၢ်မၢဖိလၢတၢ်ကိးအီၤယူဒၤန့ၣ် အိၣ်ခံဂၤန့ၣ်လီၤ. တဂၤန့ၣ်မ့ၢ် ယူဒၤအံၣ်စကၤရံၤအိာ်, လၢခံတဂၤတခီ ဘၣ်တၢ်ကိးအီၤလၢသးဒဲစ့ၢ်ကီးန့ၣ်လီၤ. ဝံၤဒီး, ဖံလံးပူး, ဘၤသလီးမဲ လၢတၢ်ကိးအီၤလၢ နၤသန့လးစ့ၢ်ကီးကျဲၣ်ဃုာ်ဝဲန့ၣ်လီၤ. မးသဲဒီး သိၤမါစ့ၢ်ကီး ကျဲၣ်ဃုာ်ဝဲလီၤ.
ဟဲက့ၤလၢကီၢ်ၡၤမရံဝံၤအလီၢ်ခံ ယ့ၣ်ၡူးန့ၣ် စးထီၣ်စံၣ်တဲၤတဲလီၤဝဲဒၣ် ‘မူခိၣ်အဘီအမုၢ်ဘူးထီၣ်လံ’ န့ၣ်လီၤ. ဘီမုၢ်န့ၣ် မ့ၢ်မနုၤလဲၣ် သုသ့ၣ်ညါဧါ. ယွၤအဘီအမုၢ်န့ၣ် မ့ၢ်ယွၤအတၢ်ပၢတၢ်ပြးလၢ အအိၣ်နီၢ်နီၢ်န့ၣ်လီၤ. ယ့ၣ်ၡူးန့ၣ်မ့ၢ် ဘီမုၢ်အစီၤပၤဒီး ကအိၣ်ပၢတၢ်လၢမူခိၣ်န့ၣ်လီၤ. လၢဟီၣ်ခိၣ်ချၢအံၤ ကမၤအိၣ်ထီၣ်ဝဲ တၢ်မုာ်တၢ်ခုၣ်န့ၣ်လီၤ. ယွၤအဘီအမုၢ်ကမၤကဲထီၣ် ပၤရဒံစူးလၢအဃံအလၤဒိၣ်မး လၢဟီၣ်ခိၣ်ဒီဘ့ၣ်န့ၣ်လီၤ.
ဖဲအံၤ ယ့ၣ်ၡူးသိၣ်လိန့ၢ်ကမျၢၢ် ယွၤအဘီအမုၢ်အဂ့ၢ်န့ၣ်လီၤ. စံးဝဲဒၣ် ‘သုဘၣ်ဃ့ဘါထုကဖၣ်တၢ်ဒ်အံၤ, အိၣ်လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံအီၤတက့ၢ်. နဘီနမုၢ်န့ၣ်မ်အဟဲတက့ၢ်. ဒ်နတၢ်ဘၣ်သးလၢထီၣ်ပှဲၤထီၣ် လၢမူခိၣ်အသိးန့ၣ် မ်အလၢပှဲၤဝဲ လၢဟီၣ်ခိၣ်ချၢစ့ၢ်ကီးတက့ၢ်’ န့ၣ်လီၤ. တၢ်န့ၣ်ပှၤအါဂၤကိးဝဲဒၣ်လၢ ‘ကစၢ်အတၢ်ထုကဖၣ်’ န့ၣ်လီၤ. ပှၤတနီၤနီၤကိးဝဲဒၣ်လၢ ‘အိၣ်လၢမူခိၣ်ပပၢ်ဧၢ’ န့ၣ်လီၤ. သုဃ့ထုကဖၣ်တၢ်ထုကဖၣ်အံၤ ဒီယုၢ်ညါသ့ဧါ.
ယ့ၣ်ၡူးသိၣ်လိန့ၢ် ပကဘၣ်ဒီသူၣ်ပာ်သး တဂၤဒီးတဂၤဒ်လဲၣ် စ့ၢ်ကီးန့ၣ်လီၤ. ဒီးစံးဝဲ, ‘မၤပှၤဂၤ ဒ်နဆၢပှၤဂၤမၤနၤအသိးန့ၣ်တက့ၢ်.’ ပှၤမ့ၢ်ပာ်သူၣ်ပာ်သးလၢသုဖီခိၣ် အိၣ်ဒီးတၢ်သူၣ်အိၣ်သးအိၣ်သၢပျၢၤ တဘၣ်သုသးဘၣ်ဧါ. လၢတၢ်န့ၣ်အဃိ ယ့ၣ်ၡူးစံးဝဲဒၣ် ပကဘၣ်အိၣ်ဒီးတၢ်သူၣ်အိၣ်သးအိၣ် လၢပှၤဂၤအဖီခိၣ်စ့ၢ်ကီးန့ၣ်လီၤ. ပၤရဒံစူးလၢ ပှၤကိးဂၤဒဲးကမၤဝဲဒ်န့ၣ်အသိး အပူၤန့ၣ် ကမ့ၢ်တၢ်သးခုဒိၣ်မးန့ၣ်လီၤ, တမ့ၢ်ဘၣ်ဧါ.
