ပူ ၈၉
ယ့ၣ်ၡူးမၤကဆှီကွံာ်တၢ်လုၢ်ဟံၣ် အဂ့ၢ်
တၢ်ဂီၤအံၤဖျါလၢ ယ့ၣ်ၡူးအသးထီၣ်ဝဲနီၢ်နီၢ်န့ၣ်လီၤ တမ့ၢ်ဘၣ်ဧါ. ဘၣ်မနုၤအဃိ အသးဘၣ်ထီၣ်ဝဲထဲအံၤညါလဲၣ်န့ၣ် သုသ့ၣ်ညါဧါ. ပှၤတဖၣ်အံၤလၢယရူၤၡလ့ၣ်အတၢ်လုၢ်ဟံၣ်န့ၣ် အတၢ်သးလီသးကွံ အါဒိၣ်မးအဃိန့ၣ်လီၤ. အဝဲသ့ၣ် ဘျုးဟံးန့ၢ်ဝဲစ့အါဒိၣ်မးလၢ ပှၤလၢအဟဲဘူၣ်ထူဘါယွၤဖဲအံၤတဖၣ်အအိၣ်န့ၣ်လီၤ.
သုထံၣ်ဂီၤဖံးပျိၣ်တဖၣ်, သိတဖၣ်ဒီးထိၣ်လွံၢ်တဖၣ်ဧါ. ပှၤတဖၣ်အံၤ ဟဲနုာ်ဆူတၢ်လုၢ်ဟံၣ်ပူၤဒီး ဆါဝဲတၢ်တဖၣ်အံၤလီၤ. ဘၣ်မနုၤအဃိဟဲဆါဝဲသ့ၣ်လဲၣ်န့ၣ် သုသ့ၣ်ညါဧါ. ပှၤအံၣ်စရ့လးဖိတဖၣ်န့ၣ် လိၣ်ဘၣ်ဝဲဆၣ်ဖိကီၢ်ဖိတဖၣ် လၢကလုၢ်ထီၣ်ယွၤအဂီၢ်အဃိန့ၣ်လီၤ.
ယွၤအတၢ်သိၣ်တၢ်သီအိၣ်လၢ ပှၤအံၣ်စရ့လးဖိတဂၤ မ့ၢ်မၤကမၣ်ဘၣ်တၢ်န့ၣ် ကဘၣ်လုၢ်ထီၣ်တၢ်ဆူယွၤအအိၣ်န့ၣ်လီၤ. လၢတၢ်ဆၢကတီၢ်အဂၤန့ၣ်စ့ၢ်ကီး ပှၤအံၣ်စရ့လးဖိ ဘၣ်လုၢ်တၢ်ပာ်တၢ်န့ၣ်လီၤ. ဘၣ်ဆၣ်သနာ်က့ လၢကလုၢ်ထီၣ်ယွၤအဂီၢ် ကလဲၤမၤန့ၢ်ထိၣ်, ဒီးဆၣ်ဖိကီၢ်ဖိတဖၣ်ဖဲလဲၣ်န့ၣ်လဲၣ်.
ပှၤအံၣ်စရ့လးဖိတနီၤ အိၣ်ဒီးထိၣ်တဖၣ်, ဆၣ်ဖိကီၢ်ဖိတဖၣ်န့ၣ်လီၤ. လၢတၢ်န့ၣ်အဃိ လုၢ်ထီၣ်ဝဲတၢ်တဖၣ်န့ၣ်သ့လီၤ. ဘၣ်ဆၣ် ပှၤလၢတအိၣ်ဒီးဆၣ်ဖိကီၢ်ဖိတဖၣ်, ဒီးထိၣ်တဖၣ် အိၣ်အါမးန့ၣ်လီၤ. ပှၤတနီၤန့ၣ် အိၣ်ဝဲသ့ၣ်စီၤစုၤယံၤဒီးဝ့ၢ်ယရူၤၡလ့ၣ်ဒိၣ်မးအဃိ, ထိၣ်ဒီးဆၣ်ဖိကီၢ်ဖိတဖၣ်လၢ အဝဲသ့ၣ်လိၣ်ဘၣ်ဝဲန့ၣ် ဟဲစိာ်ဝဲသ့ၣ်တသ့ဘၣ်. လၢတၢ်န့ၣ်အဃိ ထိၣ်ဒီးဆၣ်ဖိကီၢ်ဖိတဖၣ်လၢ အလိၣ်ဘၣ်ဝဲသ့ၣ်န့ၣ် ဘၣ်ဟဲပှ့ၤဝဲဖဲအံၤန့ၣ်လီၤ. ဘၣ်ဆၣ် ပှၤလၢအဆါတၢ်တဖၣ်န့ၣ် ပာ်တၢ်အပှ့ၤအကလံၤ အါတလၢဒိၣ်မးန့ၣ်လီၤ. လီန့ၢ်ဝဲသ့ၣ်ကမျၢၢ်န့ၣ်လီၤ. အါန့ၢ်အန့ၣ် အဝဲသ့ၣ်တကြၢးဟဲဆါတၢ်လၢ ယွၤအတၢ်လုၢ်ဟံၣ်ပူၤဘၣ်.
ယ့ၣ်ၡူးအသးထီၣ်န့ၣ် လၢတၢ်အံၤအဃိလီၤသၢၣ်. လၢတၢ်န့ၣ်အဃိ မၤလီၤတကျၢၢ်ကွံာ်စီၢ်နီၤခိၣ်လၢ တၢ်ပာ်လီၤစ့ ဒီးဖှံကွံာ်ဝဲစ့တဖၣ်န့ၣ်လီၤ. ဒီးပိၤဝဲပျံၤတဘိဝံၤ နီၣ်ဟးထီၣ် ဆၣ်ဖိကီၢ်ဖိတဖၣ် လၢတၢ်လုၢ်ဟံၣ်အပူၤန့ၣ်လီၤ. ခါလီၤအကလုၢ်ဆူ ပှၤလၢအဆါထိၣ်လွံၢ်တဖၣ်စ့ၢ်ကီး, စံးဝဲဒၣ်, ‘ထုးထီၣ်ကွံာ်တၢ်တဖၣ်အံၤဆူ တၢ်ချၢတက့ၢ်. သုတမၤကဲထီၣ်ယပၢ်အဟံလၢ တၢ်အီၣ်တၢ်အထိးနါအါတလၢအခၢးအလီၢ်န့ၣ်တဂ့ၤ.’
ဖဲဆၢကတီၢ်အဝဲန့ၣ် ယ့ၣ်ၡူးအပျဲၢ်တနီၤ အိၣ်ဒီးယ့ၣ်ၡူးလၢတၢ်လုၢ်ဟံၣ်ပူၤန့ၣ်လီၤ. ဖဲအထံၣ်ဘၣ်ယ့ၣ်ၡူးမၤဝဲဒ်အံၤအခါ ကမၢကမၢ်ဝဲသ့ၣ်လီၤ. ဒီးသ့ၣ်နီၣ်ထီၣ်က့ၤဝဲသ့ၣ် လံာ်စီဆှံတတီၤလၢ ဘၣ်ဃးဒီးယွၤအဖိခွါ, လၢအစံး ‘တၢ်အဲၣ်ယွၤအဟံၣ်န့ၣ် အီၣ်ဂီၤကွံာ်အီၤဒ်မ့ၣ်အူလံ’ န့ၣ်လီၤ.
ယ့ၣ်ၡူးန့ၣ် ဖဲဟဲထီၣ်ဘူၣ်လဲၤကပာ်လၢ ယရူၤၡလ့ၣ်အခါ မၤတၢ်လီၤလး အကလုာ်ကလုာ်န့ၣ်လီၤ. လၢတၢ်န့ၣ်အလီၢ်ခံ ဟးထီၣ်လၢကီၢ်ယူဒၤဒီး က့ၤဆူကီၢ်ကၤလံၤလါန့ၣ်လီၤ. ဘၣ်ဆၣ်သနာ်က့ ဖဲက့ၤအကျဲန့ၣ် လဲၤခီဂာ်ဝဲ ကီၢ်ၡၤမရံန့ၣ်လီၤ. ဖဲန့ၣ် တၢ်မၤအသးဒ်လဲၣ်. ပကွၢ်သကိးတက့ၢ်.