ပူ ၉၉
ဖဲအိၣ်လၢ ဒၢးအဖီခိၣ်တကထၢ
ခဲအံၤန့ၣ် မ့ၢ်လၢခံခံသီ, လၢအမ့ၢ်မုၢ်လွံၢ်နံၤလီၤသၢၣ်. ယ့ၣ်ၡူးဒီးအတၢ်မၢဖိ ၁၂ ဂၤန့ၣ် ဟဲတုၤဝဲလၢ ဒၢးဖးဒိၣ်လၢတၢ်ဖီခိၣ်အံၤ လၢကအီၣ်ဝဲသ့ၣ် ဘူၣ်လဲၤကပာ်အဂီၢ်န့ၣ်လီၤ. ဒ်သုထံၣ်ဘၣ်အသိး ပှၤလၢအဟးထီၣ်ဆူခိန့ၣ်မ့ၢ်ဝဲ ယူဒၤအံၣ်စကၤရံၤအိာ်န့ၣ်လီၤ. အဝဲကလဲၤတဲဘၣ်ပှၤလုၢ်တၢ်အခိၣ်တဖၣ်လၢ အဝဲသ့ၣ်ဖီၣ်န့ၢ်ယ့ၣ်ၡူးကသ့ဒ်လဲၣ်န့ၣ်လီၤ.
တချုးမုၢ်နံၤဝဲအံၤ, ဖဲမဟါတသီန့ၣ် ယူဒၤလဲၤဆူအဝဲသ့ၣ်အအိၣ်ဒီး သံကွၢ်ဝဲဒၣ် ‘ယမ့ၢ်ဖီၣ်စၢၤသုယ့ၣ်ၡူးန့ၣ် သုကဟ့ၣ်ယၤမနုၤလဲၣ်’ န့ၣ်လီၤ. အဝဲသ့ၣ်စံးဆၢလၢ ‘ကဟ့ၣ်စ့သၢဆံ’ န့ၣ်လီၤ. လၢတၢ်န့ၣ်အဃိ ခဲအံၤ ယူဒၤလဲၤဆူပှၤတဖၣ်န့ၣ်အအိၣ်ဒီး ကဟဲကိးအဝဲသ့ၣ်ဆူ ယ့ၣ်ၡူးအအိၣ်န့ၣ်လီၤသၢၣ်. တမ့ၢ်တၢ်မၤအၢသံဒိၣ်မးန့ၣ်ဘၣ်ဧါ.
တၢ်အီၣ်ဘူၣ်လဲၤကပာ်တခီဝံၤလံ. ဘၣ်ဆၣ် ယ့ၣ်ၡူးစးထီၣ်မၤ ဘူၣ်အဂၤတခါလၢအလီၤဆီန့ၣ်လီၤ. ဟ့ၣ်ဝဲအတၢ်မၢဖိတဖၣ် ကိၣ်တဖျၢၣ်ဒီးစံးဝဲ ‘အီၣ်သုဝဲတက့ၢ်. တၢ်အံၤမ့ၢ်တၢ်အဒိလၢ ယနီၣ်ခိ လၢယကဟ့ၣ်လီၤကွံာ်လၢသုဂီၢ်န့ၣ်လီၤ. ဝံၤဒီး ဟ့ၣ်ဝဲစပံးထံတခွးဒီး စံးဝဲဒၣ် ‘အီတက့ၢ်. အဝဲအံၤမ့ၢ်တၢ်အဒိလၢ ယသွံၣ် လၢယကဘၣ်လူလီၤလၢသုဂီၢ်န့ၣ်လီၤ.’ လံာ်စီဆှံကိးဘူၣ်အဝဲန့ၣ်လၢ ‘ကစၢ်အတၢ်အီၣ်လၢဟါအီၣ်’ န့ၣ်လီၤ.
ပှၤအံၣ်စရ့လးဖိအီၣ်ဘူၣ်လဲၤကပာ် ဒ်သိးကသ့ၣ်နီၣ်ထီၣ်က့ၤ လၢကီၢ်အဲၤကူပတူးန့ၣ် ယွၤအကလူး ‘လဲၤကပာ်’ အဝဲသ့ၣ်အဟံၣ်ဒီး မၤသံဖိဝဲၢ်ကိတဖၣ်လၢ ပှၤအဲၤကူပတူးအဟံၣ်ပူၤန့ၣ်လီၤ. မ့မ့ၢ်ယ့ၣ်ၡူးတခီ အဲၣ်ဒိးဝဲအပျဲၣ်တဖၣ်ကသ့ၣ်နီၣ်အီၤဒီး အတၢ်ဟ့ၣ်လီၤအသးလၢ အဝဲသ့ၣ်အဂီၢ်န့ၣ်လီၤ. လၢတၢ်န့ၣ်အဃိ မၤလိာ်အဝဲသ့ၣ်လၢ ကမၤဘူၣ်လီၤဆီအံၤ ကိးနံၣ်ဒဲးန့ၣ်လီၤ.
ကစၢ်အတၢ်အီၣ်လၢဟါတၢ်အီၣ်ဝံၤဒီး ယ့ၣ်ၡူးစံးဝဲအတၢ်မၢဖိတဖၣ်လၢ ကအိၣ်ဒူသးဒီး ကအိၣ်ဒီးတၢ်စူၢ်ဂၢၢ်နာ်ကျၢၤန့ၣ်လီၤ. လၢခံန့ၣ် သးဝံၣ်စံးထီၣ်ပတြၢၤယွၤဝံၤ ဟးထီၣ်ဝဲသ့ၣ်လီၤ. တုၢ်ခဲအံၤ မုၢ်ဟါယိာ်မးလံန့ၣ်လီၤ. ဖးဖီမုၢ်ကဘျဲၣ်သ့ၣ်သ့ၣ်လီၤ. မ်ပကွၢ်သကိး လဲၤဝဲသ့ၣ်ဆူလဲၣ်န့ၣ်တက့ၢ်.