ပူ ၉၈
လၢကစၢၢ်သ့ၣ်စၤယံးအလိၤ
အဝဲအံၤမ့ၢ် ယ့ၣ်ၡူးအိၣ်လၢကစၢၢ်သ့ၣ်စၤယံးအလိၤန့ၣ်လီၤ. ပှၤလွံၢ်ဂၤလၢအကပၤတခီ မ့ၢ်အတၢ်မၢဖိတဖၣ်လီၤ. အၣ်ဒရ့း, ဒီးအဒီပုၢ်ဝဲၢ်ပ့းတရူး, ယၤကိာ်, ဒီးအဒီပုၢ်ဝဲၢ်ယိၤဟၣ်န့ၣ်လီၤ. တၢ်လၢပထံၣ်အီၤအိၣ်စီၤစုၤန့ၣ် ယွၤအတၢ်လုၢ်ဟံၣ်လၢအအိၣ်လၢ ဝ့ၢ်ယရူၤၡလ့ၣ်န့ၣ်လီၤ.
ယ့ၣ်ၡူးဒိးထီၣ်ကသ့ၣ်ယီၤဖိဝံၤ နုာ်လီၤဝဲဆူယရူၤၡလ့ၣ်န့ၣ် ယံာ်တ့ၢ်ခံသီလံ. ခဲအံၤမ့ၢ်မုၢ်ခံနံၤလီၤ. လၢဂီၤခီန့ၣ်ယ့ၣ်ၡူး အိၣ်လၢတၢ်လုၢ်ဟံၣ်ပူၤန့ၣ်လီၤ. ဖဲန့ၣ် ပှၤလုၢ်တၢ်အခိၣ်တဖၣ် ဂုာ်ကျဲးစၢးဝဲသ့ၣ်လၢ ကဖီၣ်ယ့ၣ်ၡူး ဒီးမၤသံအီၤလီၤ. ဘၣ်ဆၣ်သနာ်က့ ကမျၢၢ်တဖၣ်ဘၣ်အသးလၢယ့ၣ်ၡူးအဃိ မၤဝဲသ့ၣ်တဘူၣ်ဘၣ်.
ယ့ၣ်ၡူးကိး တၢ်ဘူၣ်တၢ်ဘါအခိၣ်တဖၣ်လၢ ‘ဂုၤအၢတဖၣ်, ဂုၢ်အၢအစၢၤအသွဲၣ်တဖၣ်’ န့ၣ်လီၤ. ဒီးစံးဝဲဒၣ်, လၢအမၤတၢ်အၢတၢ်သီ ဒီးတၢ်ဒဲးဘးတဖၣ်အဃိ ကစၢ်ယွၤကစံၣ်ညီၣ်အဝဲသ့ၣ်န့ၣ်လီၤ. လၢတၢ်န့ၣ်အလီၢ်ခံ ယ့ၣ်ၡူးလဲၤထီၣ်ဝဲဆူ ကစၢၢ်သ့ၣ်စၤယံးအဖီခိၣ်န့ၣ်လီၤ. တုၤဖဲန့ၣ်ဒီး တၢ်မၢဖိလွံၢ်ဂၤန့ၣ် စးထီၣ်သံကွၢ်ယ့ၣ်ၡူး တၢ်သံကွၢ်တဖၣ်န့ၣ်လီၤ. သံကွၢ်ဝဲသ့မနုၤလဲၣ်န့ၣ် သုသ့ၣ်ညါဧါ.
တၢ်မၢဖိတဖၣ် သံကွၢ်ဝဲသ့ၣ် တၢ်ကမၤအသးဆူညါဒ်လဲၣ်အဂ့ၢ်န့ၣ်လီၤ. အဝဲသ့ၣ် သ့ၣ်ညါဝဲလၢ ယ့ၣ်ၡူးကတြူာ်ကွံာ်ကယဲၢ်တၢ်အၢတၢ်သီခဲလၢာ် လၢဟီၣ်ခိၣ်ချၢအံၤန့ၣ်လီၤ. ဘၣ်ဆၣ်သနာ်က့ အဲၣ်ဒိးသ့ၣ်ညါဝဲသ့ၣ်လၢ မ့ၢ်ကကဲထီၣ်အခါဖဲလဲၣ်, ဒီးယ့ၣ်ၡူးကဟဲကဒီးတဘျီဒ် စီၤပၤအသိးခဲလဲၣ်န့ၣ်လီၤ.
ယ့ၣ်ၡူးသ့ၣ်ညါဝဲဒၣ်လၢ အဝဲမ့ၢ်ဟဲလၢခံတဘျီအခါန့ၣ် အပျဲၢ်အဘီၣ်တဖၣ်ထံၣ်အီၤ တသ့လၢၤဘၣ်န့ၣ်လီၤ. ယ့ၣ်ၡူးန့ၣ် ကအိၣ်ဝဲလၢမူခိၣ်အဃိ အပျဲၢ်အဘီၣ်သ့ၣ်တဖၣ် ထံၣ်အီၤတသ့ဘၣ်န့ၣ်လီၤ. လၢတၢ်န့ၣ်အဃိ ယ့ၣ်ၡူးတဲဘၣ်အပျဲၢ်အဘီၣ်တဖၣ် တၢ်ဂ့ၢ်တၢ်ကျိၤတနီၤ လၢကမၤအသးလၢဟီၣ်ခိၣ်အံၤ ဖဲအဝဲပၢတၢ်လၢမူခိၣ် ဒ်စီၤပၤအသိးအခါ န့ၣ်လီၤ. တၢ်လၢကမၤအသးတဖၣ်န့ၣ် မ့ၢ်မနုၤလဲၣ်.
ယ့ၣ်ၡူးစံးဘၣ်အဝဲသ့ၣ်လၢ တၢ်ဒုးဖးဒိၣ်တဖၣ်ကကဲထီၣ်, တၢ်ဆူးတၢ်ဆါဒီး တၢ်သၣ်ဝံၤလီၤဒိတဖၣ် ကအိၣ်ထီၣ်, တၢ်လုၢ်သ့ၣ်ခါပတာ်တၢ်သိၣ်တၢ်သီတဖၣ် ကနုးထီၣ်ကျံၤထီၣ်ဝဲ, ဒီးဟီၣ်ခိၣ်ကဟူးဒိၣ်ဒိၣ်မုၢ်မုၢ်စ့ၢ်ကီးန့ၣ်လီၤ. စံးဝဲဒၣ်ဒံးလၢ ယွၤအဘီမုၢ်တၢ်သးခုကစီၣ် ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါစ့ၢ်ကီးန့ၣ်လီၤ. လၢပစိၤအံၤ ပထံၣ်ဘၣ်တၢ်သ့ၣ်တဖၣ်မၤအသးလံဧါ. ထံၣ်ဘၣ်လံလီၤသၢၣ်. ဒ်န့ၣ်အဃိ ပသ့ၣ်ညါလၢ ယ့ၣ်ၡူးန့ၣ် ခဲအံၤ ပၢတၢ်လၢမူခိၣ်သပှၢ်ကတၢၢ်လံန့ၣ်လီၤ. တယံာ်လၢၤဘၣ်န့ၣ် ကစၢ်ကတြူာ်ကွံာ်တၢ်အၢတၢ်သီခဲလၢာ် လၢဟီၣ်ခိၣ်ချၢန့ၣ်လီၤ.