တၢ်နီၤဖး ၇
စးထီၣ်လၢ ယ့ၣ်ၡူး ဂဲၤဆၢထၢၣ်သမူထီၣ်က့ၤအကတီၢ် တုၤလၢ ပီလူးလီၤဃိာ်ပူၤအကတီၢ်
ယ့ၣ်ၡူးသံဝံၤ တုၤသၢသီဒီး ဂဲၤဆၢထၢၣ်သမူထီၣ်က့ၤဝဲန့ၣ်လီၤ. ဖဲနံၤအဝဲန့ၣ်လီၤ လီၣ်ဖျါထီၣ်အသးလၢ အပျဲၢ်အဘီၣ်သ့ၣ်တဖၣ်အမဲာ်ညါ ယဲၢ်ဘျီန့ၣ်လီၤ. အသီ ၄၀ အတီၢ်ပူၤန့ၣ် လီၣ်ဖျါထီၣ်ကဒီးအသး အဘျီဘျီန့ၣ်လီၤ. ဝံၤဒီး ဖဲအပျဲၢ်အဘီၣ်တနီၤ ကွၢ်အီၤအခါန့ၣ် က့ၤထီၣ်ဝဲဆူမူခိၣ်န့ၣ်လီၤ. အသီတဆံဝံၤအလီၢ်ခံန့ၣ် ယွၤလူလီၤသးစီဆှံလၢ ယ့ၣ်ၡူးအပျဲၢ်တဖၣ်လၢအပိာ်အခံ, လၢအအိၣ်ခိးလၢယရူၤၡလ့ၣ်အပူၤ, အဖီခိၣ်န့ၣ်လီၤ.
လၢခံန့ၣ် ယွၤအဒုၣ်အဒါတဖၣ် တ့ၢ်လီၤတၢ်မၢဖိတဖၣ် ဆူဃိာ်ပူၤလီၤ. ဘၣ်ဆၣ်သနာ်က့ မူခိၣ်ကလူး အုၣ်က့ၤခီၣ်က့ၤအဝဲသ့ၣ်လီၤ. ပှၤထီဒါတၢ်တဖၣ် ကွံာ်သံစတ့းဖၣ်လၢလၢၢ်လီၤ. ဘၣ်ဆၣ်သနာ်က့ ပသ့ၣ်ညါဘၣ် လၢပှၤထီဒါတၢ်တဖၣ်အံၤအကျါ ယ့ၣ်ၡူးဃုထၢ အပှၤမၤတၢ်ဖိအလီၤဆီတဂၤ, လၢဟဲကဲထီၣ် တၢ်မၢဖိပီလူး န့ၣ်လီၤ. ဒီး ကစၢ်ယ့ၣ်ၡူးသံဝံၤ တုၤသၢနံၣ်တခီအခါန့ၣ် ကစၢ်ယွၤမၢလီၤပ့းတရူး လၢကလဲၤစံၣ်တဲၤတဲလီၤ ပှၤလၢအတမ့ၢ်ပှၤယူဒၤဖိ ကန့လံး ဒီးအပှၤဟံၣ်ဖိဃီဖိတဖၣ် န့ၣ်လီၤ.
တဆံသၢနံၣ်ဝံၤအလီၤခံန့ၣ် ပီလူးစးထီၣ်ဝဲ အတၢ်စံၣ်တဲၤတဲလီၤတၢ်လဲၤန့ၣ်လီၤ. တုၤလၢတၢ်လဲၤခံဘျီတဘျီန့ၣ် တံၤမသ့းလဲၤဃုာ်ဒီးအီၤလီၤ. ပသ့ၣ်ညါဘၣ်လၢ ပီလူးဒီးအပှၤလဲၤသကိးတၢ်တဖၣ် ဖဲအဝဲသ့ၣ်မၤယွၤအတၢ်မၤအခါ ထံၣ်ဘၣ်ဝဲသ့ၣ် တၢ်သူၣ်ပိၢ်သးဝးအကလုာ်ကလုာ် န့ၣ်လီၤ. လၢခံကတၢၢ်န့ၣ် ပီလူးဘၣ်လီၤဆူဃိာ်ပူၤလီၤ. ယံာ်ခံနံၣ်အလီၢ်ခံ ထူၣ်ဖျဲဝဲလီၤ. ဘၣ်ဆၣ် ဘၣ်တၢ်တ့ၢ်လီၤအီၤဆူဃိာ်ပူၤ လၢခံတဘျီဝံၤ ဘၣ်တၢ်မၤသံအီၤစ့ၢ်ကီးန့ၣ်လီၤ. တၢ်ဂ့ၢ်လၢ အကျဲၣ်ဃုာ်လၢ တၢ်နီၤဖး ၇ တဖၣ်န့ၣ် မ့ၢ် တၢ်မၤအသးလၢ ၃၂ နံၣ် အကတီၢ်ပူၤန့ၣ်လီၤ.
တၢ်ဂ့ၢ်လၢလာ်တဖၣ်
ပူ ၁၀၂
ယ့ၣ်ၡူးမူထီၣ်က့ၤလံ
ဖဲသုးဖိလၢအခိးတၢ်တဖၣ် ထံၣ်ဘၣ်ဝဲ မူခိၣ်ကလူးတဂၤ သုးကွံာ်ဝဲ လၢၢ်တဖျၢၣ်လၢ ယ့ၣ်ၡူးအသွၣ်ခိၣ်ဝံၤအခါ အဝဲသ့ၣ်တထံၣ်ဝဲယ့ၣ်ၡူးအစိၣ်လၢၤဘၣ်အဃိ ကမၢကမၣ်ဝဲဒိၣ်မး.
ပူ ၁၀၃
လဲၤနုာ်ဝဲဆူဒၢးလၢ အိၣ်ကးတံာ်ကျၢၤဃာ်အသး အဂ့ၢ်
ဖဲယ့ၣ်ၡူးဂဲၤဆၢထၢၣ်သမူထီၣ်က့ၤ ဝံၤအလီၢ်ခံ ဘၣ်မနုၤအဃိ အပျဲၢ်အဘီၣ်တဖၣ် ကွၢ်နီၣ်အီၤတဘၣ်ဘၣ်လဲၣ်.
ပူ ၁၀၄
ယ့ၣ်ၡူးက့ၤထီၣ်ဆူမူခိၣ် အဂ့ၢ်
တချုးလၢ ယ့ၣ်ၡူးက့ၤထီၣ်ဆူမူခိၣ်န့ၣ် အဟ့ၣ်လီၤဝဲ အပျဲၢ်အဘီၣ်တဖၣ် တၢ်မၤလိာ်အလီၢ်ခံ ကတၢၢ်တခါ.
ပူ ၁၀၅
အိၣ်ခိးဝဲသ့ၣ်လၢဝ့ၢ်ယရူၤၡလ့ၣ် အဂ့ၢ်
ဘၣ်မနုၤအဃိ ယ့ၣ်ၡူးလူလီၤဝဲ သးစီဆှံလၢ အပျဲၢ်အဘီၣ်တဖၣ်အအိၣ် လၢဘူၣ်ယဲၢ်ဆံအနံၤန့ၣ်လဲၣ်.
ပူ ၁၀၆
ဟးထီၣ်ဘၣ်ဝဲသ့ၣ်လၢဃိာ်ပူၤ အဂ့ၢ်
တၢ်မၢဖိတဖၣ် စံၣ်တဲၤတဲလီၤတၢ်အဃိ ယူဒၤတၢ်ဘူၣ်တၢ်ဘါခိၣ်နၢ်တဖၣ် ဖၢနုာ်အဝဲသ့ၣ်လၢဃိာ်ပူၤ ဒ်သိးတစံၣ်တဲၤတဲလီၤတၢ်လၢၤတဂ့ၤအဂီၢ် ဘၣ်ဆၣ် ကစၢ်ယွၤရဲၣ်ကျဲၤပာ်စၢၤ တၢ်လၢအဂၤတခါ.
ပူ ၁၀၈
ဖဲကျဲၤလၢအလဲၤဆူ ဝ့ၢ်ဒၤမ့ၤစ့း
တၢ်ကပီၤလၢ မၤဘျီၣ်စီလူးမဲာ်ချံ ဒီးတၢ်ကလုၢ်သီၣ်ထီၣ်လၢ မူခိၣ်န့ၣ် ဆီတလဲဝဲစီလူးအတၢ်အိၣ်မူ.
ပူ ၁၀၉
ပ့းတရူးလဲၤဆူ ကန့လံးအအိၣ် အဂ့ၢ်
မ့ၢ်ကစၢ်ယွၤထံၣ်ဝဲလၢ ပှၤကလုာ်တဒူၣ်ဒူၣ်န့ၣ် ဂ့ၤဒိၣ်န့ၢ်ဒံးအဂၤတဒူၣ်ဒူၣ်ဧါ.
ပူ ၁၁၀
ပီလူးအပှၤမၤသကိးတၢ်အသီ တံၤမသ့း အဂ့ၢ်
တံၤမသ့းပာ်တ့ၢ်ကွံာ် အဟံၣ်ဃီ ဒ်သိးကဟးစံၣ်တဲၤတဲလီၤဘၣ်တၢ် ဃုာ်ဒီးပီလူးအဂီၢ်.
ပူ ၁၁၁
ပိာ်ခွါဖိသၣ်တဂၤလၢ အမံဘၣ်အသး အဂ့ၢ်
အူတူၤဃူးမံဘၣ်အသးဖဲ ပီလူးစံၣ်တဲၤတဲၤလီၤတၢ်အဆိကတၢၢ်တခါ တမံဘၣ်အသးလၢခံခါတခါဘၣ်. တၢ်ကဲထီၣ်အသးလၢ တၢ်စံၣ်တဲၤတဲလီၤတၢ်ခံခါအဘၢၣ်စၢၤန့ၣ် ကဲထီၣ်ဝဲတၢ်လီၤလး.
ပူ ၁၁၂
ကဘီဟးဂီၤလၢကီးတဖျၢၣ် အဂ့ၢ်
ဖဲတၢ်မုၢ်လၢ်ကတၢၢ်ဝဲအဆၢကတီၢ် ပီလူးဒိးန့ၢ်ဘၣ်ဝဲ တၢ်ကစီၣ်ဟဲလၢယွၤအအိၣ် လၢဒုးအိၣ်ထီၣ်က့ၤဝဲတၢ်မုၢ်လၢ်.