ပူ ၁၀၉
ပ့းတရူးလဲၤဆူ ကန့လံးအအိၣ် အဂ့ၢ်
ပှၤဆၢထၢၣ်ဖဲအံၤမ့ၢ်ပ့းတရူး, ဒီးလၢအလီၢ်ခံန့ၣ် မ့ၢ်အတံၤသကိးတဖၣ်လီၤ. ဘၣ်ဆၣ်, ပှၤတဂၤန့ၣ် ဘၣ်မနုၤတီၤလီၤဘါထီၣ် ပ့းတရူးန့ၣ်လဲၣ်. ကြၢးမၤဝဲဒ်အံၤဧါ. အဝဲမ့ၢ်မတၤလဲၣ်န့ၣ် သုသ့ၣ်ညါဧါ.
အဝဲမ့ၢ်ကန့လံးလီၤ. မ့ၢ်ရိမ့ၤအသုးခိၣ်တဂၤလီၤ. ကန့လံးန့ၣ် တသ့ၣ်ညါဝဲ ပ့းတရူးဘၣ်. ဘၣ်ဆၣ် ပှၤတဂၤဂၤမၤလိာ်တ့ၢ်အီၤလၢ ကကိးနုာ်ပ့းတရူးဆူအဟံၣ်ပူၤန့ၣ်လီၤ. မ်ပကွၢ်သကိးလၢ တၢ်အံၤဟဲကဲထီၣ်အသးဒ်လဲၣ်န့ၣ်တက့ၢ်.
ပှၤပိာ်ယ့ၣ်ၡူးအခံလၢအဆိတဖၣ် မ့ၢ်ပှၤယူဒၤဖိလီၤ. ကန့လံးတခီ တမ့ၢ်ပှၤယူဒၤဖိဘၣ်. ဘၣ်ဆၣ် အဝဲအဲၣ်ကစၢ်ယွၤလီၤ. ဃ့ထုကဖၣ်တၢ်လၢကစၢ်ယွၤအအိၣ် ဒီးမၤဘျုးပှၤအါဂၤလၢတၢ်အါမံၤလီၤ. ဘၣ်မုၢ်တနံၤ ဖဲမုၢ်ထူၣ်အခါန့ၣ် မူခိၣ်ကလူးတဂၤ ဖျါထီၣ်လၢအမဲာ်ညါဒီး စံးဝဲဒၣ် ‘ယွၤသးအိၣ်ဆိၣ်ဂ့ၤနၤလီၤ. ကမၤလၢပှဲၤဝဲနတၢ်ထုကဖၣ်န့ၣ်လီၤ. မၢလီၤပှၤကလဲၤကိး ပှၤလၢအမံၤမ့ၢ် ပ့းတရူးတက့ၢ်. အဝဲအိၣ်တမှံၤလၢ ဝ့ၢ်ယၤဖိၤ, လၢပှၤအမံၤၡံမိၣ်အဟံၣ်, အိၣ်ဖဲပီၣ်လဲၣ်နံၤန့ၣ်လီၤ.’
တဘျီဃီန့ၣ် ကန့လံးမၢလီၤပှၤတနီၤလၢ ကလဲၤကိးပ့းတရူးန့ၣ်လီၤ. လၢခံတနံၤန့ၣ် ပှၤလၢအလဲၤကိးတၢ်တဖၣ် တုၤဝဲသ့ၣ်လၢ ဝ့ၢ်ယၤဖိၤအခါ ပ့းတရူးတခီ အိၣ်ဝဲဒၣ်လၢ ၡံမိၣ်အဟံၣ်ခိၣ်ကဘျၣ်လၣ်ဖီခိၣ်န့ၣ်လီၤ. ဖဲန့ၣ်ကစၢ်ယွၤမၤဝဲဒ်သိး ပ့းတရူးကဆိကမိၣ်လၢ ထံၣ်ဘၣ်ဝဲတၢ်ကံးညာ်ဖးဒိၣ်တခါ စဲၤလီၤအသးန့ၣ်လီၤ. လၢတၢ်ကံးညာ်ဖးဒိၣ်အပူၤန့ၣ် အိၣ်ဒီးဆၣ်ဖိကီၢ်ဖိအကလုာ်ကလုာ်န့ၣ်လီၤ. ဒ်ယွၤအတၢ်သိၣ်တၢ်သီအသိးန့ၣ် ဆၣ်ဖိကီၢ်ဖိတဖၣ်အံၤ တကဆှီဘၣ်. တကြၢးအီၣ်ဘၣ်. သနာ်က့, တၢ်ကလုၢ်တခါစံးဘၣ်ပ့းတရူးလၢ ‘ဂဲၤဆၢထၢၣ်, မၤသံဒီးအီၣ်အီၤတက့ၢ်’ န့ၣ်လီၤ.
ပ့းတရူးစံးက့ၤ ‘တၢ်လၢတကဆှီန့ၣ် ယတအီၣ်ဘၣ်တ့ၢ်နီတဘျီဘၣ်.’ ဘၣ်ဆၣ် တၢ်ကလုၢ်စံးဆၢက့ၤပ့းတရူးလၢ ‘တၢ်လၢယွၤစံး ကဆှီဝဲန့ၣ် တဘၣ်စံးလၢ တကဆှီဘၣ်န့ၣ်တဂ့ၤ.’ မၤသးဒ်န့ၣ်သၢဘျီလီၤ. ပ့းတရူးဆိကမိၣ်ဝဲ တၢ်အံၤမ့ၢ်တၢ်ဒ်လဲၣ်အခါ ပှၤလၢကန့လံးပျဲလီၤအီၤတဖၣ် ဟဲတုၤလၢဟံၣ်အံၤဒီး သံကွၢ်ဝဲသ့ၣ်ပ့းတရူးန့ၣ်လီၤ.
ပ့းတရူးဟဲက့ၤလီၤဝဲဆူ ဟံၣ်ဖီလာ်ဝံၤဒီး စံးဝဲ ‘ပှၤလၢသုဃုအီၤန့ၣ် မ့ၢ်ယၤလီၤ. သုဟဲလၢမနုၤအဃိလဲၣ်.’ ပှၤတဖၣ်န့ၣ်စံးဝဲဒၣ်, မူခိၣ်ကလူးတဂၤ ဟဲဆူကန့လံးအအိၣ်ဒီး မၢအလဲၤကိးပ့းတရူးလၢ အကဟဲဆူအဟံၣ်န့ၣ်လီၤ. ပ့းတရူးဘၣ်အသးလၢ အကလဲၤပိာ်ဃုာ်ဝဲန့ၣ်လီၤ. လၢခံတနံၤန့ၣ် ပ့းတရူးဒီး အသကိးတဖၣ် လဲၤဝဲသ့ၣ်ဆူ ကန့လံးအဟံၣ် လၢအအိၣ်လၢ ဝ့ၢ်ကဲၤစါရံၤန့ၣ်လီၤ.
ကန့လံးန့ၣ် ကွဲဖိၣ်ဃာ်ဝဲ အဘူးအတံၢ်တဖၣ်ဒီး အတံၤသကိးတဖၣ်န့ၣ်လီၤ. ဖဲပ့းတရူးဟဲတုၤအခါ အဝဲသဂၢၢ်အီၤလီၤ. တီၤလီၤကဒွံကျိာ်ဒီး ဘါထီၣ်ပ့းတရူး ဒ်ပထံၣ်ဘၣ်လၢတၢ်ဂီၤပူၤအသိးလီၤ. ဘၣ်ဆၣ်, ပ့းတရူးစံးဘၣ်အီၤ ‘ဂဲၤဆၢထၢၣ်တက့ၢ်. ယမ့ၢ်ဒၣ်ပှၤကညီလီၤ.’ မ့ၢ်လီၤ, လံာ်စီဆှံစံးဝဲလၢ ပတဘၣ်တီၤလီၤ ဘါထီၣ်ပှၤကညီတဂၤဘၣ်. ပဘၣ်ဘူၣ်ထီၣ်ဘါထီၣ်ထဲဒၣ် ယဟိဝၤန့ၣ်လီၤ.
ထဲန့ၣ်ဒီး ပ့းတရူး စံၣ်တဲၤတဲလီၤ ပှၤလၢဟဲအိၣ်ရိဖှိၣ်တဖၣ်န့ၣ်လီၤ. စံးဝဲဒၣ် ‘တၢ်လၢကစၢ်ယွၤန့ၣ် တူၢ်လိာ်ကယဲၢ်ပှၤလၢ အသးအိၣ် ဘူၣ်ထီၣ်ဘါထီၣ်အီၤ ခဲလၢာ်န့ၣ်လီၤ.’ ဖဲအဝဲဒၣ်စံၣ်တဲၤတဲလီၤတၢ်ဒ်န့ၣ်အခါ ကစၢ်ယွၤဆှၢလီၤ အသးစီဆှံအဃိဒီး ပှၤတဖၣ်န့ၣ် ကတိၤထီၣ်တၢ်လၢ တၢ်ကတိၤကျိာ်အကလုာ်ကလုာ်န့ၣ်လီၤ. ပှၤယူဒၤဖိလၢ ဟဲသကိးဒီးပ့းတရူးတဖၣ် ထံၣ်ဘၣ်တၢ်အံၤဒီး ကမၢကမၣ်ဝဲသ့ၣ်ဒိၣ်မးလီၤ. နာ်တ့ၢ်ဝဲသ့ၣ်လၢ ယွၤဘၣ်အသးထဲ ပှၤယူဒၤဖိတဖၣ်အဃိန့ၣ်လီၤ. လၢတၢ်အံၤအဃိ အဝဲသ့ၣ်ဒိးန့ၢ်ဘၣ်တၢ်မၤလိလၢ ကစၢ်ယွၤန့ၣ် တပာ်ဝဲပှၤတကလုာ်ဂ့ၤန့ၢ် အဂၤတကလုာ်ဘၣ်. ပဝဲသ့ၣ်တဖၣ်အံၤ တကြၢးပတိၢ်န့ၢ် တၢ်ဂ့ၢ်အံၤဘၣ်ဧါ.