လံာ်စီဆှံန့ၣ် တမ့ၢ်​အကွဲးဝဲ​ဒၣ်​ထဲ တၢ်​စံၣ်​စီၤ​တဲ​စိၤ​အဂ့ၢ်​လၢ အမၤတ့ၢ်​အသးတဖၣ်န့ၣ်​ဘၣ်. ကွဲးဖျါထီၣ်​စ့ၢ်ကီး တၢ်ကမၤအသးတဖၣ်​လၢ ခါဆူညါ​န့ၣ်လီၤ. တၢ်ကမၤအသး​လၢ​ဆူညါ​ဒ်လဲၣ်န့ၣ် ပှၤကညီ​တဲ​တဘၣ်ဘၣ်. လၢ​တၢ်အံၤ​အဃိ ပ​စံး​သ့​လၢ လံာ်စီဆှံန့ၣ် ဟဲ​လၢ​ယွၤ​အအိၣ်​လီၤ. ဘၣ်ဃး​ခါဆူညါန့ၣ် လံာ်စီဆှံ​တဲပာ်ဝဲ​ဒ်လဲၣ်.

တဲပာ်ဝဲ​တၢ်ဒုး​ဖးဒိၣ် လၢ​အလီၤဘီလီၤမုၢ်​အဂ့ၢ်​စ့ၢ်ကီး​န့ၣ်လီၤ. ဖဲ​တၢ်ဒုး​လီၤဘီလီၤမုၢ်​ဖးဒိၣ်​အံၤန့ၣ် ကစၢ်ယွၤ​ကမၤဟးဂီၤ ကယဲၢ်​ပှၤလၢ​တဂ့ၤတဖၣ်​ဒီး တၢ်အၢတၢ်သီ​ခဲလၢာ်​န့ၣ်လီၤ. သနာ်က့ ကစၢ်​ကဒီဒၣ်အိၣ်ပှိၤ ပှၤလၢ​အဘူၣ်ထီၣ်ဘါထီၣ်အီၤတဖၣ်​န့ၣ်လီၤ. စီၤပၤ​ယ့ၣ်ၡူး​ခရံာ် လၢ​ယွၤ​ဖှူ​အီၤန့ၣ် က​ကျဲၤ​န့ၢ်ဝဲ​ကစၢ်ယွၤ​အခ့အပှၤတဖၣ် ဒ်သိး​က​အိၣ်ဘၣ်ဝဲသ့ၣ်​လၢ တၢ်သူၣ်ဖှံသးညီ ဒီး​တၢ်မုာ်တၢ်ခုၣ်​အပူၤ​န့ၣ်လီၤ. က​မၤန့ၢ်ဝဲ​တုၤလၢ တၢ်ဆူးတၢ်ဆါ, တၢ်သံတၢ်ပှၢ် တအိၣ်လၢၤဘၣ်​န့ၣ်လီၤ.

ပ​သးခု​သ့​လၢ ကစၢ်ယွၤ​က​မၤ​အိၣ်ထီၣ်​န့ၢ်​ပှၤ ပၤရဒံစူး​အသီ​လၢ ဟီၣ်ခိၣ်ချၢ​န့ၣ်လီၤ, တမ့ၢ်ဘၣ်ဧါ. ဘၣ်ဆၣ် ပ​မ့ၢ်​အဲၣ်ဒိး​အိၣ်လၢ ပၤရဒံစူး​အဝဲန့ၣ်​အပူၤန့ၣ် ပ​ကဘၣ်​မၤတၢ်​တခါ​ခါလီၤ. ပူ​လၢခံကတၢၢ်​လၢ လံာ်အံၤ​အပူၤန့ၣ် ပ​က​မၤလိဘၣ် တၢ်လၢ​ပ​ကဘၣ်မၤတဖၣ်, ဒ်သိး​ပ​က​ဒိးန့ၢ်ဘၣ် တၢ်လၢ​ယွၤ​မၤ​ပာ်ဝဲ​လၢ ပှၤလၢ​အဘူၣ်ထီၣ်ဘါထီၣ်အီၤတဖၣ်​အဂီၢ် န့ၣ်လီၤ. ဒ်န့ၣ်​အဃိ ဖး တၢ်နီၤဖး ၈ ဒီး ဃုသ့ၣ်ညါ​တၢ်လၢ လံာ်စီဆှံ​ကတိၤ​ဆိပာ်ဝဲ ဘၣ်ဃးဒီး​ခါဆူညါ​န့ၣ်တက့ၢ်.