ပူ ၁၁၄
တၢ်အၢတၢ်သီခဲလၢာ် အကတၢၢ် အဂ့ၢ်
လၢတၢ်ဂီၤပူၤအံၤ သုထံၣ်ဘၣ်မနုၤလဲၣ်. အၢၣ်, မ့ၢ်လီၤ. သုးမုၢ်သံၣ်ဘိလၢဒိးကသ့ၣ်ဝါတဖုလီၤ. ပာ်သူၣ်ပာ်သးလၢ အဝဲသ့ၣ်အိၣ်ဟဲလၢလဲၣ်တခီလဲၣ်န့ၣ်တက့ၢ်. ကသ့ၣ်ဝါတဖၣ်န့ၣ် ဟဲဃ့ၢ်စံၣ်လီၤလၢမူခိၣ် လၢတၢ်အၢၣ်အကျါန့ၣ်လီၤ. လၢမူခိၣ်န့ၣ် ကသ့ၣ်အိၣ်ဝဲသပှၢ်ကတၢၢ်ဧါ.
တအိၣ်ဝဲဘၣ်. ကသ့ၣ်တဖၣ်န့ၣ် တမ့ၢ်ကသ့ၣ်နီၢ်ကီၢ်ဘၣ်. ဘၣ်မနုၤအဃိလဲၣ်န့ၣ် ကသ့ၣ်တဖၣ် ဃ့ၢ်လၢတၢ်အၢၣ်လိၤတသ့ဘၣ်, တမ့ၢ်ဘၣ်ဧါ. သနာ်က့, လံာ်စီဆှံပာ်ဖျါ ကသ့ၣ်တဖၣ်လၢမူခိၣ်အဂ့ၢ် သပှၢ်ကတၢၢ်လီၤ. ဘၣ်မနုၤအဃိလဲၣ် သုသ့ၣ်ညါဧါ.
တၢ်လၢကသ့ၣ်န့ၣ် လၢညါန့ၣ် ဘၣ်တၢ်သူအီၤလၢ တၢ်ဒုးတၢ်ယၤအလီၢ် အါမးလီၤ. လၢတၢ်န့ၣ်အဃိ, ဖဲလံာ်စီဆှံတဲဝဲဒၣ် ပှၤဒိးကသ့ၣ်တဖၣ် ဟဲထွးထီၣ်လၢမူခိၣ်အခါ အဲၣ်ဒိးစံးဝဲလၢ ကစၢ်ယွၤကဒုးတၢ်ဒီး ပှၤဟီၣ်ခိၣ်ဖိတဖၣ် လၢဟီၣ်ခိၣ်ချၢန့ၣ်လီၤသၢၣ်. တၢ်ဒုးအံၤအမံၤန့ၣ် သုသ့ၣ်ညါဧါ. မ့ၢ်အၢ်မက့းဒိၣ်လီၤ. တၢ်ဒုးအံၤ ကတြူာ်ကွံာ်ဝဲ ကယဲၢ်တၢ်အၢလၢဟီၣ်ခိၣ်ချၢ ခဲလၢာ်န့ၣ်လီၤ.
လၢအၢ်မက့းဒိၣ်တၢ်ဒုးအံၤ ပှၤလၢကကဲခိၣ်ကဲနၢ်ဒုးတၢ်န့ၣ် မ့ၢ်ဝဲယ့ၣ်ၡူးလီၤ. သ့ၣ်နီၣ်ထီၣ်က့ၤလၢ ယ့ၣ်ၡူးန့ၣ် မ့ၢ်စီၤပၤလၢယဟိဝၤဃုထၢ ဒီးပာ်ထီၣ်ဝဲ လၢအဘီမုၢ်အဂီၢ်န့ၣ်လီၤ. လၢတၢ်န့ၣ်အဃိ ယ့ၣ်ၡူးန့ၣ် ကၢၢ်ဃာ်ဝဲစီၤပၤအခိၣ်သလုာ်န့ၣ်လီၤသၢၣ်. နးဖးဒိၣ်လၢအဟံးဃာ်ဝဲန့ၣ် မ့ၢ်တၢ်ပနီၣ်လၢ အကမၤဟးဂီၤကွံာ် ယွၤအဒုၣ်အဒါ ခဲလၢာ်ခဲဆ့န့ၣ်လီၤသၢၣ်. ပကြၢးကမၢကမၣ်လၢ ယွၤကမၤဟးဂီၤကွံာ် ပှၤအၢပှၤသီခဲလၢာ်န့ၣ်ဒံးဧါ.
ကွၢ်ကဒါက့ၤ ပူနီၢ်ဂံၢ် ၁၀ န့ၣ်တက့ၢ်. ဖဲန့ၣ် သုထံၣ်ဘၣ်တ့ၢ်မနုၤလဲၣ်. အၢၣ်, မ့ၢ်လီၤ. ထံအတၢ်လုာ်ဘၢတၢ်ဖးဒိၣ် လၢအမၤဟးဂီၤပှၤအၢပှၤသီတဖၣ်န့ၣ်လီၤ. မတၤမၤကဲထီၣ် ထံလုာ်ဘၢတၢ်န့ၣ်လဲၣ်. မ့ၢ်ယဟိဝၤယွၤန့ၣ်လီၤ. ခဲအံၤ ကွၢ်ကဒါက့ၤ ပူနီၢ်ဂံၢ် ၁၅ တက့ၢ်. ဖဲန့ၣ်မနုၤတဖၣ်မၤအသးလဲၣ်. ဝ့ၢ်စဒိၣ်ဒီး ဝ့ၢ်ဂမိရၤ ဘၣ်တၢ်မၤဟးဂီၤလၢ မ့ၣ်အူလၢကစၢ်ယွၤဒုးဟဲလီၤအီၤန့ၣ်လီၤ.
ကွၢ်ကဒီးပူနီၢ်ဂံၢ် ၃၃ တက့ၢ်. ကွၢ်တၢ်မၤအသးဒီး ပှၤအဲၤကူပတူးဖိတဖၣ် အကသ့ၣ်တဖၣ်, တၢ်ဒုးသုးလ့ၢ်ကဟၣ်တဖၣ်ဒ်လဲၣ်န့ၣ်တက့ၢ်. မတၤမၤကဲထီၣ် ထံဟဲက့ၤကဒါဒီး လုာ်ဘၢအီၤခဲလၢာ်န့ၣ်လဲၣ်. မ့ၢ်ယဟိဝၤလီၤသၢၣ်. မၤဝဲဒၣ်ဒ်န့ၣ်လၢ ကကဟုဘံၣ်ကယာ်ဘၢ အပှၤဂီၢ်မုၢ်အဂီၢ်န့ၣ်လီၤ. ကွၢ်စ့ၢ်ကီးပူနီၢ်ဂံၢ် ၇၆ တက့ၢ်. ယဟိဝၤန့ၣ် မ့ၢ်လၢအပှၤဂီၢ်မုၢ် ပှၤအံၣ်စရ့လးဖိတဖၣ် အၢဒိၣ်မးအဃိ ဟ့ၣ်အခွဲးလၢ အဝဲသ့ၣ်ကဘၣ်တၢ်မၤဟးဂီၤဒၣ်လဲာ်န့ၣ်လီၤ.
လၢတၢ်န့ၣ်အဃိ ပတကြၢးကမၢကမၣ်ပဝဲသ့ၣ်လၢ ယွၤကမၢလီၤအသုးမုၢ်ဂီၢ်မုၢ် လၢအကမၤဟးဂီၤ ကယဲၢ်တၢ်အၢတၢ်သီ လၢဟီၣ်ခိၣ်ချၢခဲလၢာ်ဒီး မၤကတၢၢ်အီၤန့ၣ်ဘၣ်. ဘၣ်ဆၣ်သနာ်က့ ဆိကမိၣ်ကွၢ် မနုၤတဖၣ်ကဟဲကဲထီၣ်လဲၣ် န့ၣ်တက့ၢ်. မ်ပကအိးထီၣ်ကွၢ် လံာ်ကဘျံးပၤဆူညါတဘ့ၣ်န့ၣ်တက့ၢ်.