ပူ ၅၉
ဘၣ်မနုၤအဃိ ဒၤဝံးဘၣ်ဃ့ၢ်ထီၣ်ကွံာ်ဝဲ အဂ့ၢ်
ဒၤဝံးမၤသံကၤလယးဝံၤအလီၢ်ခံ အံၣ်စရ့လးအသုးမုၢ်ခိၣ်ကျၢၢ် အဘံန့ၢ် ဆှၢအီၤဆူစီလူးအအိၣ်လီၤ. စီလူးဘၣ်အသးလၢဒၤဝံး ဒိၣ်မးန့ၣ်လီၤ. ဒုးကဲထီၣ်အီၤလၢ သုးခိၣ်ဒိၣ်တဂၤလၢအသုးမုၢ် ဒီးဒုးအိၣ်အီၤလၢ နူၢ်ပူၤန့ၣ်လီၤ.
လၢခံန့ၣ် သုးမုၢ်ဒုးတၢ်ဒီး ပှၤဖလ့ၡသးဖိဝံၤ ဟဲက့ၤအခါ ပှၤပိာ်မုၣ်တဖၣ်သးဝံၣ်တၢ်ဒ်အံၤ, ‘စီလူးမၤသံပှၤအကထိတဖၣ်, ဒၤဝံးမၤသံပှၤအကလးတဖၣ်’ န့ၣ်လီၤ. လၢတၢ်န့ၣ်အဃိ စီလူးအသးကါထီၣ်အီၤလီၤ. ဒၤဝံးဘၣ်တၢ်မၤလၤကပီၤ အါန့ၢ်အီၤအဃိလီၤ. ဘၣ်ဆၣ် စီလူးအဖိခွါယိၤနၤသၣ်တခီ အသးတကါဝဲဘၣ်. အဲၣ်ဝဲဒၤဝံးဒိၣ်မးလီၤ. ဒၤဝံးစ့ၢ်ကီးအဲၣ်ဝဲယိၤနၤသၣ်ဒိၣ်မးလီၤ. လၢတၢ်န့ၣ်အဃိ အဝဲသ့ၣ်ခံဂၤမၤဝဲ တံၤသကိးအထူအယိာ်အတၢ်အၢၣ်လီၤအီလီၤန့ၣ်လီၤ.
ဒၤဝံးဒ့တနၢ် သ့ဒိၣ်မးန့ၣ်လီၤ. စီလူးစ့ၢ်ကီး ဘၣ်အသးဒိၣ်မးလၢ အတၢ်ဒ့န့ၣ်လီၤ. ဘၣ်ဆၣ်သနာ်က့ ဘၣ်မုၢ်တနံၤန့ၣ် စီလူးအသးက့ၣ်ထီၣ်ဝံၤ မၤဘၣ်ဝဲတၢ်မၤလၢ အလီၤပျံၤဝဲဒိၣ်မးန့ၣ်လီၤ. ဖဲဒၤဝံးဒ့တနၢ်အခါ စီလူးထုးဝဲဘီဝံၤ စံးဝဲလၢ ‘ယကဆဲးဒၤဝံး တုၤအချၢစဲဘူးဒီးဂီၤပၤ’ ဒီးကွံာ်ဒၤဝံးလၢဘီန့ၣ်လီၤ. ဘၣ်ဆၣ် ဒၤဝံးပဒ့ၣ်ဝဲဒီး ဘီလဲၤကပာ်အီၤန့ၣ်လီၤ. ဒီးလၢခံတဘျီ စီလူးကွံာ်ကဒီးဝဲဒၤဝံးလၢအဘီ ဒီးအတၢ်လဲၤကပာ်ဝဲန့ၣ်လီၤ. လၢတၢ်န့ၣ်အဃိ ဒၤဝံးသ့ၣ်ညါဝဲလၢ ခဲအံၤ ကဘၣ်ပလီၢ်အသးဒိၣ်မးန့ၣ်လီၤ.
သုသ့ၣ်နီၣ်ထီၣ်က့ၤ စီလူးအတၢ်အၢၣ်လီၤအီလီၤန့ၣ်ဧါ. ပှၤလၢအမၤသံကၤလယးန့ၣ် သါကဒုးအိၣ်ဃုာ်ဝဲဒီးအဖိမုၣ်န့ၣ်ဘီၣ်. လၢခံကတၢၢ်န့ၣ် စီလူးကဟ့ၣ်ဝဲအဖိမုၣ်မံကၤလးန့ၣ်လီၤ. ဘၣ်ဆၣ် စံးဘၣ်ဒၤဝံးလၢ မၤသံဒုၣ်ဒါဖလ့ၡသးအဂၤ ၁၀၀ မ့ၢ်ဝံၤမး ဟံးန့ၢ်ဝဲကသ့လီၤ. ကွၢ်ဆိကမိၣ်တဘီ; နီၢ်နီၢ်တခီ စီလူးမုၢ်လၢ်လၢ ပှၤဖလ့ၡသးဖိ ကမၤသံကွံာ်ဒၤဝံးန့ၣ်လီၤ. ဘၣ်ဆၣ် ဒၤဝံးတသံဝဲလၢ ပှၤဖလ့ၡသးဖိတဖၣ်အစုဘၣ်. လၢတၢ်န့ၣ်အဃိ စီလူးဘၣ်ဒုးအိၣ်ဃုာ်ဝဲ အဖိမုၣ်လၢ ဒၤဝံးန့ၣ်လီၤ.
ဘၣ်မုၢ်တနံၤ စီလူးတဲဘၣ်အဖိခွါယိၤနၤသၣ် ဒီးအခ့အပှၤတဖၣ်လၢ အအဲၣ်ဒိးမၤသံဝဲ ဒၤဝံးန့ၣ်လီၤ. ဘၣ်ဆၣ် ယိၤနၤသၣ်စံးဆၢက့ၤအီၤ ‘တဘၣ်မၤသံဒၤဝံးတဂ့ၤ. ဒၤဝံးတမၤကမၣ်ဘၣ်ပၢ် လၢတၢ်နီတမံၤဘၣ်. ကယဲၢ်တၢ်လၢဒၤဝံးမၤဝဲန့ၣ် မ့ၢ်မးတၢ်ဘျုးလၢပၢ်အဂီၢ်ခဲလၢာ်လီၤ. ဖဲအမၤသံကၤလယးအခါ ဘၣ်ညိကွံာ်ဃာ်အသးသမူန့ၣ်လီၤ. နထံၣ်ဘၣ်တၢ်အံၤဒီး နသးခုနဲဒၣ်တမ့ၢ်ဘၣ်ဧါ.’
စီလူးဒိကနၣ်အဖိခွါအတၢ်ကတိၤဝံၤ အၢၣ်လီၤဝဲဒၣ်လၢတမၤဘၣ်ဒိလၢၤ ဒၤဝံးဘၣ်န့ၣ်လီၤ. ထဲန့ၢ်ဒီး ကိးက့ၤဒၤဝံးန့ၣ်လီၤ. ဒၤဝံၤစ့ၢ်ကီး က့ၤအိၣ်ဝဲလၢ စီလူးအနီပူၤ ဒ်လၢညါအသိးန့ၣ်လီၤ. ဘၣ်ဆၣ်သနာ်က့ ဘၣ်မုၢ်တနံၤန့ၣ် ဖဲဒၤဝံးဒ့တနၢ်အခါ စီလူးကွံာ်ကဒီးဒၤဝံးလၢဘီန့ၣ်လီၤ. ဒၤဝံးတခီပဒ့ၣ်အသးဒီး ဘီလဲၤဆဲးနုာ်လီၤလၢဂီၤပၤအလိၤန့ၣ်လီၤ. အဝဲအံၤသၢဘျီတဘျီလီၤ. ဒၤဝံးသ့ၣ်ညါဝဲဒၣ်လၢ ကြၢးဃ့ၢ်ဟးထီၣ်ဝဲလံန့ၣ်လီၤ.
ဟါအဝဲန့ၣ် ဒၤဝံးက့ၤကဒါက့ၤဆူအဟံၣ်န့ၣ်လီၤ. ဘၣ်ဆၣ်သနာ်က့ စီလူးမၢလီၤအပှၤတဖၣ် လၢကမၤသံဒၤဝံးန့ၣ်လီၤ. မံကၤလးသ့ၣ်ညါဝဲလၢ အပၢ်ကမၤမနုၤလဲၣ်န့ၣ်အဃိ စံးဘၣ်အဝၤ ‘တနၤအံၤနမ့ၢ်တဃ့ၢ်ကွံာ်သၢပျၢၤ ခဲမုၢ်ဆ့ၣ်နကဘၣ်သံလီၤ.’ ဖဲအနၤဝဲန့ၣ် မံကၤလးစဲၤလီၤအဝၤလၢ ပဲတြီဖိဒီး အဝၤဃ့ၢ်ပူၤဖျဲးကွံာ်ဝဲန့ၣ်လီၤ. ဒၤဝံးန့ၣ် ဘၣ်ဃ့ၢ်အိၣ်ခူသူၣ်ပူၤဖျဲးအသးလၢစီလူး တၢ်လီၢ်တတီၤဘၣ်တတီၤ ယံာ်နွံနံၣ်ဃၣ်ဃၣ်န့ၣ်လီၤ.