ပူ ၆၇
ယဟိၡၤဖး သန့ၤအသးလၢယဟိဝၤ အဂ့ၢ်
ပှၤသ့ၣ်အံၤမ့ၢ်မတၤတဖၣ် ဒီးမၤဝဲသ့ၣ်မနုၤလဲၣ်န့ၣ် နသ့ၣ်ညါဧါ. လဲၤဝဲသ့ၣ်လၢကဒုးသုးအဂီၢ်န့ၣ်လီၤ. ပှၤလၢအမဲာ်ညါတဖၣ်တခီ သးဝံၣ်ဝဲသ့ၣ်တၢ်န့ၣ်လီၤ. သုကသံကွၢ် ‘ဘၣ်မနုၤအဃိ ပှၤလၢအသးဝံၣ်တၢ်သ့ၣ်တဖၣ် အဘီဒီးနးတအိၣ်လၢ ကဒုးတၢ်ယၤတၢ်အဂီၢ်န့ၣ်လဲၣ်.’ ပကကွၢ်သကိးတက့ၢ်.
ယဟိၡၤဖးန့ၣ်မ့ၢ် ကီၢ်အံၣ်စရ့လးခံဒူၣ် အစီၤပၤန့ၣ်လီၤ. အဝဲအိၣ်မူတ့ၢ်တကတီၢ်ဃီဒီး အၤဃာ်ဒီးအံၤစ့ဘ့ၤလး လၢကီၢ်ကလံၤစိးအဒူၣ် ၁၀ န့ၣ်လီၤ. ဘၣ်ဆၣ်သနာ်က့ ယဟိၡၤဖးမ့ၢ်စီၤပၤလၢအဂ့ၤဒီး အပၢ်အၤစါစ့ၢ်ကီး မ့ၢ်စီၤပၤလၢအဂ့ၤတဂၤန့ၣ်လီၤ. လၢတၢ်န့ၣ်အဃိ ပှၤကီၢ်ကလံၤထံးခံဒူၣ်န့ၣ် အိၣ်မုာ်အိၣ်ခုၣ်ဘၣ်ဝဲသ့ၣ် အနံၣ်အါအါကလဲာ်န့ၣ်လီၤသၢၣ်.
ဘၣ်ဆၣ်သနာ်က့ တၢ်သးပျံၤလၢပှၤတဖၣ် ကအိၣ်ထီၣ်ဝဲအဂီၢ် တၢ်ဂ့ၢ်ဟဲကဲထီၣ်ဝဲန့ၣ်လီၤ. ပှၤဆှၢတၢ်ကစီၣ်တဖၣ် ဟဲဆူယဟိၡၤဖးအအိၣ်ဒီးစံးဝဲသ့ၣ် ‘ပှၤဧၤမိၣ်ဖိ, ပှၤမိၤအးဖိဒီး ပှၤကစၢၢ်စ့ဧၢ်ဖိသ့ၣ်တဖၣ် ဟဲထီၣ်ဒီးသုးမုၢ်အါအါကလဲာ် ဒ်သိးကဒုးနၤလံ’ န့ၣ်လီၤ. ပှၤအံၣ်စရ့လးဖိဂီၢ်မုၢ်ဂီၢ်ပၤ ဟဲစူးရိအိၣ်ဖှီၣ်လၢဝ့ၢ်ယရူၤၡလ့ၣ် ဒ်သိးကဃ့ထီၣ်သကိး ယဟိဝၤအတၢ်မၤစၢၤအဂီၢ် န့ၣ်လီၤ. လဲၤဝဲသ့ၣ်ဆူတၢ်လုၢ်ဟံၣ်ဒီး ဖဲန့ၣ် ယဟိၡၤဖးဃ့ဘါထုကဖၣ်တၢ်ဒ်အံၤလီၤ. ‘အိ, ယဟိဝၤ ယွၤပကစၢ်ဧၢ, ပကဘၣ်မၤမနုၤလဲၣ်န့ၣ် ပတသ့ၣ်ညါလၢၤဘၣ်. သုးမုၢ်အဖုအဂီၢ်အံၤ ပဒုးအီၤတနၢၤဘၣ်. ပပာ်ဂံၢ်ပာ်ဘါပသးလၢနၤလီၤ.’
ယဟိဝၤဒိကနၣ်ဝဲဒၣ်ဒီး ပျဲလီၤအကုၢ်အပှၤတဂၤလၢ အကစံးဘၣ်ပှၤသ့ၣ်တဖၣ်ဒ်အံၤလီၤ. ‘တၢ်ဒုးအံၤ တမ့ၢ်သုမူဒါဘၣ်. မ့ၢ်ယွၤအမူဒါအဃိ သုဒုးအလီၢ်တအိၣ်ဘၣ်. ယဟိဝၤကအုၣ်က့ၤခီၣ်က့ၤသုဒ်လဲၣ်န့ၣ် ခိးကွၢ်ဒၣ်တက့ၢ်.’
ထဲန့ၣ်ဒီး တုၤလၢခံတနံၤန့ၣ် ယဟိၡၤဖးတဲဘၣ်ပှၤတဖၣ် ‘သန့ၤသုသးလၢယဟိဝၤတက့ၢ်’ န့ၣ်လီၤ. ဝံၤဒီး ပာ်ပှၤသးဝံၣ်တၢ်တဖၣ်လၢ အပှၤသုးဖိတဖၣ်အမဲာ်ညါန့ၣ်လီၤ. ဖဲအဝဲသ့ၣ်လဲၤထီၣ်ဝဲအခါ သးဝံၣ်စံးထီၣ်ပတြၢၤယဟိဝၤဒီး လဲၤထီၣ်ဝဲသ့ၣ်လီၤ. တုၤမ့ၢ်အတုၤလၢ တၢ်ဒုးသုးအပျီကပၤန့ၣ် တၢ်မၤအသးဒ်လဲၣ်နသ့ၣ်ညါဧါ. ယဟိဝၤမၤဒုၣ်ဒါအသုးဖိတဖၣ်လၢ ကဒုးကဒါလိာ်က့ၤအသး တဂၤဒီးတဂၤန့ၣ်လီၤ. တုၤပှၤအံၣ်စရ့လးဖိတဖၣ် ဟဲတုၤအခါ ဒုၣ်ဒါအသုးဖိတဖၣ် သံခဲလၢာ်လံန့ၣ်လီၤ.
ယဟိၡၤဖးသန့ၤအသးလၢယဟိဝၤန့ၣ် တလီၤတဲာ်လၢ အအိၣ်ဒီးတၢ်ကူၣ်ဘၣ်ကူၣ်သ့န့ၣ်ဘၣ်ဧါ. ပဝဲစ့ၢ်ကီး ပမ့ၢ်သန့ၤပသးလၢယဟိဝၤန့ၣ် ကမ့ၢ်ဝဲပအိၣ်ဒီး တၢ်ကူၣ်ဘၣ်ကူၣ်သ့န့ၣ်လီၤ.
၁ စီၤပၤ ၂၂:၄၁-၅၃; ၂ ကွဲးနီၢ်တၢ် ၂၀:၁-၃၀.