ပူ ၇၃
အံၣ်စရ့လးအစီၤပၤအဂ့ၤလၢခံကတၢၢ်တဂၤ အဂ့ၢ်
ဖဲယိၤၡံယၤဟဲကဲထီၣ် ကလံၤထံးကီၢ်ခံဒူၣ်အစီၤပၤအခါ အသးအိၣ်ဒံးဒၣ် ဃိးနံၣ်လီၤ. အဝဲအံၤအသးစၢ်ဒိၣ်မး လၢကကဲစီၤပၤအဂီၢ်န့ၣ်လီၤ. လၢတၢ်န့ၣ်အဃိ လၢအခီၣ်ထံးန့ၣ် ပှၤသးပှၢ်တဖၣ်မၤစၢၤအီၤလၢ အတၢ်ပၢတၢ်ဆှၢအပူၤန့ၣ်လီၤ.
ယိၤၡံယၤပၢတၢ်ယံာ်နွံနံၣ်အခါ စးထီၣ်ဃုယဟိဝၤန့ၣ်လီၤ. ကွၢ်လိဝဲဒၣ် ဒၤဝံး, ယဟိၡဖး, ယဃံးစကံယၤ လၢအမ့ၢ်စီၤပၤအဂ့ၤတဖၣ် အဒိဂ့ၤတဲာ်ဘၣ်န့ၣ်လီၤ. ဖဲဖိၣ်သၣ်ခွါ ပျိၣ်ပျိထီၣ်ဝဲအခါ ယိၤၡံယၤအံၤမၤဝဲဒၣ် ပှၤဒူပှၤဃိၤ အတၢ်မၤတခါန့ၣ်လီၤ.
အါတက့ၢ် ပှၤအံၣ်စရ့လးဖိတဖၣ်န့ၣ် အၢသီဝဲယံာ်တ့ၢ်မးလံန့ၣ်လီၤ. ဘူၣ်ထီၣ်ဘါထီၣ်ဝဲသ့ၣ် ယွၤလၢအကမူၤကမၣ်န့ၣ်လီၤ. တီၤလီၤကဒွံကျိာ်ဝဲသ့ၣ်လၢ တၢ်ဂီၤတဖၣ်အမဲာ်ညါန့ၣ်လီၤ. လၢတၢ်န့ၣ်အဃိ ယိၤၡံယၤဟးထီၣ်ဝဲဒီးအပှၤတဖၣ် ဒီးမၤပျီ, မၤစီကွံာ်ဝဲသ့ၣ် တၢ်ဘူၣ်ကမၣ် ဘါကမၣ်တဖၣ် လၢထံကီၢ်အပူၤန့ၣ်လီၤ. ပှၤလၢအဘူၣ်ထီၣ်ဘါထီၣ်ဝဲဒၣ် ယွၤလၢအကမူၤကမၣ် အိၣ်ဂီၢ်မုၢ်ဂီၢ်ပၤအဃိ အတၢ်မၤအံၤ တမ့ၢ်တၢ်မၤလၢအညီဘၣ်. ယိၤၡံယၤဒီးအပှၤတဖၣ် တီၢ်လီၤကလဲတၢ်ဂီၤတဖၣ် ဒ်ပထံၣ်ဘၣ်အီၤလၢ တၢ်ဂီၤအံၤအပူၤအသိးန့ၣ်လီၤ.
လၢတၢ်န့ၣ်အလီၢ်ခံ ယိၤၡံယၤမၢအပှၤသၢဂၤ လၢကကဲခိၣ်ကဲနၢ်ဒီး ဘှီထီၣ်က့ၤ တၢ်လုၢ်ဟံၣ်န့ၣ်လီၤ. ထၢဖှိၣ်တၢ်မၤဘူၣ်လၢ ကမျၢၢ်တဖၣ်အအိၣ်ဒီး ဟ့ၣ်လီၤဝဲစ့လၢပှၤသၢဂၤအံၤ ဒ်သိးကဟ့ၣ် တၢ်လၢာ်ဘူၣ်လၢာ်စ့ၤအဂီၢ်န့ၣ်လီၤ. ဖဲအမၤဝဲတၢ်မၤလၢ တၢ်ဘှီထီၣ်က့ၤတၢ်လုၢ်ဟံၣ်အခါ ပှၤလုၢ်တၢ်အခိၣ် ဃံးလကံယၤ ထံၣ်န့ၢ်ဝဲတၢ်လၢ အကါဒိၣ်မးတခါန့ၣ်လီၤ. မ့ၢ်ဒၣ်လံာ်တၢ်သိၣ်တၢ်သီလၢပျၢၤ လၢယဟိဝၤမၢမိၤၡ့ကွဲးတ့ၢ်ဝဲန့ၣ်လီၤ. လံာ်အံၤ လီၤမၢ်တ့ၢ်ဝဲ အနံၣ်တဖၣ်အနံၣ်န့ၣ်လီၤ.
လံာ်အံၤန့ၣ် ဘၣ်တၢ်ဟဲစိာ်အီၤဆူ စီၤပၤယိၤၡံယၤအအိၣ်ဒီး အဝဲမၢပှၤဖးဖျါန့ၢ်အီၤန့ၣ်လီၤ. ဖဲယိၤၡံယၤဒိကနၣ်ဝဲအခါ သ့ၣ်ညါဝဲဒၣ်လၢ ပှၤတဖၣ် လုၢ်သ့ၣ်ခါပတာ် ယဟိဝၤအတၢ်သိၣ်တၢ်သီ ဆံးအါလဲၣ်န့ၣ်လီၤ. အဝဲဒၣ်သးအုးဝဲဒိၣ်မးအဃိ ဖှီယာ်ကွံာ်ဝဲဒၣ်အဆ့, ဒ်ပထံၣ်လၢတၢ်ဂီၤပူၤအံၤအသိးန့ၣ်လီၤ. ဒီးစံးဝဲဒၣ် ‘မ့ၢ်လၢပပၢ်တဖၣ် တတိၢ်န့ၢ်တၢ်သိၣ်တၢ်သီ လၢလံာ်အံၤအပူၤအဃိ ယဟိဝၤသးထီၣ်ပှၤဒိၣ်ဒိၣ်ကလဲာ်လံ’ န့ၣ်လီၤ.
လၢတၢ်န့ၣ်အဃိ, ယိၤၡံယၤမၢ ပှၤလုၢ်တၢ်အဒိၣ်အခိၣ် ဃံးလကံယၤ လၢကဃုသ့ၣ်ညါကွၢ်ဝဲ ယဟိဝၤကမၤအဝဲသ့ၣ်ဒ်လဲၣ် အဂ့ၢ်န့ၣ်လီၤ. ဃံးလကံယၤလဲၤဝဲဆူ ဝံပိာ်မုၣ်ဃုလဒါအအိၣ် ဒီးသံကွၢ်အီၤန့ၣ်လီၤ. ဃုလဒါဟ့ၣ်လီၤအီၤတၢ်ကစီၣ် လၢအဟဲလၢယဟိဝၤအအိၣ် လၢကစံးဘၣ်စီၤပၤယိၤၡံယၤန့ၣ် ဒ်အံၤလီၤ. ‘ပှၤတဖၣ်အံၤ ဘူၣ်ထီၣ်ဘါထီၣ် ယွၤလၢအကမူၤကမၣ်တဖၣ် ဒီးမၤပှဲၤထံကီၢ်လၢ တၢ်အၢတၢ်သီအဃိ ယကစံၣ်ညီၣ် ပှၤတဖၣ်အံၤဒီးဝ့ၢ်ယရူၤၡလ့ၣ်န့ၣ်လီၤ. ဘၣ်ဆၣ်ဒီး မ့မ့ၢ်နဲဒၣ် ယိၤၡံယၤန့ၣ် မ့ၢ်လၢနမၤတ့ၢ်တၢ်ဂ့ၤအဃိ တၢ်စံၣ်ညီၣ်အံၤ ကဟဲလၢနသံဝံၤအလီၢ်ခံန့ၣ်လီၤ.’