ပူ ၆၂
တၢ်ကီတၢ်ခဲအိၣ်ထီၣ်လၢ ဒၤဝံးအဟံၣ်ဖိဃီဖိ အဂ့ၢ်
စးထီၣ်ဒၤဝံးပၢတၢ်လၢ ဝ့ၢ်ယရူၤၡလ့ၣ်န့ၣ် ယဟိဝၤဟ့ၣ်ဒၤဝံးအသုးမုၢ် တၢ်မၤနၢၤဒုၣ်ဒါ အဘျီဘျီန့ၣ်လီၤ. ယဟိဝၤအတၢ်အၢၣ်လီၤအီလီၤအိၣ်တ့ၢ်ဝဲလၢ အကဟ့ၣ်ပှၤအံၣ်စရ့လးဖိ ကီၢ်ကနၤဧၣ်န့ၣ်လီၤ. ခဲအံၤန့ၣ် လၢယဟိဝၤအတၢ်မၤစၢၤအဃိ ပှၤအံၣ်စရ့လးဖိတဖၣ်မၤန့ၢ် ကီၢ်ကနၤဧၣ်ဒီဘ့ၣ်ညါ ဒ်အကီၢ်ဒၣ်ဝဲအသိးန့ၣ်လီၤ.
ဒၤဝံးမ့ၢ်စီၤပၤလၢအဂ့ၤတဂၤန့ၣ်လီၤ. အဝဲအဲၣ်ယဟိဝၤန့ၣ်လီၤ. လၢတၢ်န့ၣ်အဃိ မၤန့ၢ်ဝဲဝ့ၢ်ယရူၤၡလ့ၣ်ဝံၤ တၢ်လၢမၤဝဲအဆိကတၢၢ်တဖၣ်အကျါ တမံၤန့ၣ် ဟဲစိာ်ဝဲဒၣ် ယဟိဝၤယွၤအတလါစီဆှံ ဆူဝ့ၢ်ယရူၤၡလ့ၣ်အပူၤန့ၣ်လီၤ. အသးအိၣ်သူၣ်ထီၣ် တၢ်လုၢ်ဟံၣ်လၢ ကပာ်တၢ်အၢၣ်လီၤအီလီၤ အတလါစီဆှံအဂီၢ် စ့ၢ်ကီးန့ၣ်လီၤ.
ဒၤဝံးန့ၣ် ဖဲအသးပှၢ်ထီၣ်အခါ မၤဘၣ်တ့ၢ်ဝဲ တၢ်အၢအၢသီသီဖးဒိၣ်တခါန့ၣ်လီၤ. ဒၤဝံးသ့ၣ်ညါ တၢ်ဟံးန့ၢ်တၢ်ဖိတၢ်လံၤလၢ အဘၣ်ဃးဒီးပှၤဂၤန့ၣ် တဂ့ၤဘၣ်န့ၣ်လီၤ. ဘၣ်ဆၣ်သနာ်က့ ဘၣ်မုၢ်တဟါ ဖဲအအိၣ်ဝဲဒၣ်လၢ အနူၢ်အတၢ်ဒုးခိၣ်အခါန့ၣ်သၢၣ်, ကွၢ်လီၤဝဲဆူတၢ်ဖီလာ်အခါ ထံၣ်ဘၣ်ဝဲပိာ်မုၣ်လၢ အဃံလၤဒိၣ်မးတဂၤန့ၣ်လီၤ. ပိာ်မုၣ်အံၤ အမံၤမ့ၢ် ဘၤသၡ့ဘၤလီၤ. အဝၤန့ၣ် ဒၤဝံးအသုးဖိတဂၤ, လၢတၢ်ကိးအီၤလၢအူၤရံယၤန့ၣ်လီၤ.
ဒၤဝံးမိၣ်န့ၢ်ဘၣ်သးလီဝဲ ဘၤသၡ့ဘၤ ဒိၣ်မးအဃိ မၢပှၤဟဲကိးအီၤဆူနူၢ်ပူၤန့ၣ်လီၤ. အဝၤတခီ ဘၣ်လဲၤဒုးတၢ်လၢ တၢ်လီၢ်အယံၤန့ၣ်လီၤ. ဒၤဝံးမံဃုာ်ဝဲဒီးဘၤသၡ့ဘၤန့ၣ်လီၤ. လၢခံဘၤသၡ့ဘၤ အဟုးအသးအိၣ်ထီၣ်ဝဲလီၤ. ဒၤဝံးအသးကိၢ်ထီၣ်အဃိ မၢအသုးခိၣ်ဖးဒိၣ်ယိၤအာ် လၢကဆှၢထီၣ်အူၤရံယၤဆူ တၢ်ဒုးပျီအမဲာ်ညါကတၢၢ် ဒီးဒုးသံအီၤန့ၣ်လီၤ. ဖဲအူၤရံယၤသံဝဲအခါ ဒၤဝံးဟံးန့ၢ်ဘၤသၡ့ဘၤန့ၣ်လီၤ.
ယဟိဝၤန့ၣ် သးထီၣ်ဝဲဒၤဝံးဒိၣ်ဒိၣ်ကလဲာ်န့ၣ်လီၤ. ဒ်န့ၣ်အဃိ မၢလီၤဝဲအတၢ်ခ့တၢ်ပှၤနၤသၣ် ဟဲပာ်ဖျါထီၣ်အတၢ်ကမၣ်န့ၣ်လီၤ. နၤသၣ်သိၣ်ဃီၣ်ဒၤဝံး ဒ်ပထံၣ်လၢတၢ်ဂီၤအပူၤအသိးန့ၣ်လီၤ. ဒၤဝံးန့ၣ် အသးတမုာ်ဒိၣ်မးလၢ တၢ်ကမၣ်ဖးဒိၣ်လၢ အမၤတ့ၢ်ဝဲအဃိန့ၣ်လီၤ. လၢတၢ်န့ၣ်အဃိ ယဟိဝၤတမၤသံအီၤဘၣ်. ဘၣ်ဆၣ်သနာ်က့ ယဟိဝၤစံးဘၣ်ဒၤဝံး, ‘မ့ၢ်လၢနမၤတ့ၢ် တၢ်အၢဒ်အံၤသိးသ့ၣ်တဖၣ်အဃိ လၢနဟံၣ်ဖိဃီဖိအပူၤန့ၣ် တၢ်နးတၢ်ဖှီၣ်ကဟဲအိၣ်ထီၣ် အါမံၤန့ၣ်လီၤ.’ ဒ်ယွၤတဲဝဲအသိး ဒၤဝံးတူၢ်ဘၣ်တၢ်နးတၢ်ဖှီၣ် နးနးကျံၤကျံၤန့ၣ်လီၤ.
အဆိကတၢၢ်န့ၣ် ဘၤသၡ့ဘၤအဖိ ဘၣ်သံဝဲလီၤ. ဝံၤဒီး ဒၤဝံးအဖိဝဲၢ်ကိအၤမနိၣ် ကိးန့ၢ်အပုၢ်ပိာ်မုၣ်ထဲတဂၤဧိၤဝံၤ ဖိးဆူၣ်မံဃုာ်အီၤန့ၣ်လီၤ. လၢတၢ်ဂ့ၢ်အံၤအဃိ ဒၤဝံးအဖိခွါအးဘၡါလိၣ်န့ၣ် အသးထီၣ်ဒိၣ်ဒိၣ်ကလဲာ်ဒီး မၤသံအၤမနိၣ်န့ၣ်လီၤ. လၢခံန့ၣ် ပှၤအါဂၤဘၣ်အသးလၢ အးဘၡါလိၣ်ဒီး ပာ်ထီၣ်အီၤလၢစီၤပၤန့ၣ်လီၤ. လၢခံ ဒၤဝံးဒုးတၢ်ဒီးအးဘၡါလိၣ်ဒီးမၤနၢၤအီၤလီၤ. အးဘၡါလိၣ်စ့ၢ်ကီး ဘၣ်သံဝဲဒၣ်လီၤ. ဒၤဝံးထံၣ်ဘၣ်တၢ်နးတၢ်ဖှီၣ်အါမးန့ၣ်လီၤ.
လၢတၢ်မၤအသးဒ်အံၤသ့ၣ်တဖၣ်အခါန့ၣ် ဘၤသၡ့ဘၤအိၣ်ဖျဲၣ်ထီၣ် အဖိခွါလၢအမံၤမ့ၢ် ၡလိၤမိၤန့ၣ်လီၤ. ဖဲဒၤဝံးအသးပှၢ်ဒီး အိၣ်ဆူးအိၣ်ဆါဝဲအခါ အဖိခွါအဒိနံၤယၤန့ၣ် ပာ်ထီၣ်အသးဒၣ်ဝဲလၢစီၤပၤန့ၣ်လီၤ. ဖဲအကတီၢ်အဝဲန့ၣ် ဒၤဝံးတခီ မၢအပှၤလုၢ်တၢ်အခိၣ် စၤဒိး ဖှူၡလိၤမိၤအခိၣ်လၢသိဒီး ပာ်ဖျါထီၣ်ဝဲလၢၡလိၤမိၤကကဲထီၣ်စီၤပၤန့ၣ်လီၤ. တယံာ်ဘၣ်ဒီး ဒၤဝံးသံဖဲအသးအိၣ် ၇၀ န့ၣ်လီၤ. အဝဲပၢတ့ၢ်တၢ် အနံၣ် ၄၀ လီၤ. ခဲအံၤ ၡလိၤမိၤကဲထီၣ် အံၣ်စရ့လးအစီၤပၤလံလီၤ.
