ပူ ၆၅
ဘီမုၢ်လီၤဖးခံခီ အဂ့ၢ်
ပှၤအဝဲအံၤ ဘၣ်မနုၤအဃိ ဖှီကွံာ်ဝဲအဆ့ကၤအက့တဖၣ်အက့န့ၣ်လဲၣ် နသ့ၣ်ညါဧါ. ယဟိဝၤမၢအမၤဝဲဒၣ်န့ၣ်လီၤ. အဝဲဒၣ်မ့ၢ်ယွၤအဝံ အဃံယၤ န့ၣ်လီၤ. တၢ်လၢဝံန့ၣ် မနုၤလဲၣ်နသ့ၣ်ညါဧါ. အဝဲဒၣ်မ့ၢ်ပှၤတဂၤလၢ ယွၤတဲဆိပာ်အီၤ တၢ်လၢကမၤအသးလၢခါဆူညါန့ၣ်လီၤ.
လၢတၢ်ဂီၤပူၤအံၤန့ၣ် အဃံယၤကတိၤတၢ်ဒီး ယၤရၤဘၣ်န့ၣ်လီၤ. ယၤရၤဘၣ်မ့ၢ်ပှၤတဂၤလၢ ၡလိၤမိၤပာ်အီၤမူဒါခိၣ်လၢ ကဘှီထီၣ်အတၢ်သူၣ်ထီၣ်တနီၤအဂီၢ်န့ၣ်လီၤ. ဖဲအဃံယၤထံၣ် ယၤရၤဘၣ်လၢကျဲအခါ မၤဝဲတၢ်လီၤတိၢ်လီၤဆီန့ၣ်လီၤ. ဘ့ၣ်လီၤကွံာ်ဝဲ အဆ့ကၤဖးထီလၢအလိၤဒီး ဖှီယာ်ကွံာ်ဝဲ ၁၂ က့န့ၣ်လီၤ. ဝံၤဒီး စံးဝဲဒၣ်ယၤရၤဘၣ်လၢ ‘ဟံးန့ၢ်နဲအက့ ၁၀ တက့ၢ်’ န့ၣ်လီၤ. ဘၣ်မနုၤအဃိ အဃံယၤဟ့ၣ် ယၤရၤဘၣ်အက့ ၁၀ လဲၣ်န့ၣ် နသ့ၣ်ညါဧါ.
အဃံယၤတဲနၢ်ပၢၢ်အီၤလၢ ယဟိဝၤကဟံးထီၣ်ကွံာ်ဘီမုၢ်လၢ ၡလိၤမိၤအစုပူၤလီၤ. စံးဝဲဒၣ်လၢ ယဟိဝၤကဟ့ၣ်ယၤရၤဘၣ် ပှၤအဒူၣ် ၁၀ န့ၣ်လီၤ. အခီပညီန့ၣ် ၡလိၤမိၤအဖိခွါရဃၤဘၣ် ကပၢဝဲအဂီၢ် ကအိၣ်တ့ၢ်ထဲခံဒူၣ်န့ၣ်လီၤသၢၣ်.
တုၤၡလိၤမိၤနၢ်ဟူတၢ်ဂ့ၢ်လၢ အဃံယၤစံးဘၣ်ယၤရၤဘၣ်န့ၣ် သးထီၣ်ဝဲဒိၣ်ဒိၣ်ကလဲာ်န့ၣ်လီၤ. ကူၣ်ထီၣ်ဖးလီၤဝဲလၢ ကမၤသံယၤရၤဘၣ်န့ၣ်လီၤ. ဘၣ်ဆၣ်သနာ်က့ ယၤရၤဘၣ်ဃ့ၢ်ထွးထီၣ်ဆူ ကီၢ်အဲၤကူပတူးန့ၣ်လီၤ. တယံာ်ဘၣ်ဒီး ၡလိၤမိၤသံဝဲဒၣ်လီၤ. အဝဲကဲစီၤပၤယံာ် အနံၣ် ၄၀ လီၤ. ခဲအံၤ အဖိခွါရဃၤဘၣ်ကဲစီၤပၤလီၤ. ယၤရၤဘၣ်လၢအဲၤကူပတူး နၢ်ဟူဝဲၡလိၤမိၤသံလံဒီး ဟဲက့ၤဝဲဆူကီၢ်အံၣ်စရ့လးန့ၣ်လီၤ.
ရဃၤဘၣ်န့ၣ် တမ့ၢ်စီၤပၤလၢအဂ့ၤတဂၤဘၣ်. ပၢတၢ်ဆူၣ်ဆူၣ်ကိၤကိၤနးန့ၢ်ဒံး ၡလိၤမိၤန့ၣ်လီၤ. ယၤရၤဘၣ်ဒီးပှၤလၢအကါဒိၣ်တနီၤ လဲၤဝဲဆူရဃၤဘၣ်အအိၣ်ဒီး မၢအပၢတၢ်လၢ တၢ်သူၣ်အိၣ်သးအိၣ်လၢ ထံဖိကီၢ်ဖိအဖီခိၣ်ဘၣ်ဆၣ် ရဃၤဘၣ်တကနၣ်ဝဲဘၣ်. အၢထီၣ်သီထီၣ်န့ၢ်ဒံးလၢညါတခီလီၤ. လၢတၢ်န့ၣ်အဃိ ကမျၢၢ်တဖၣ် ပာ်ထီၣ်ယၤရၤဘၣ်လၢစီၤပၤ လၢပှၤအဒူၣ် ၁၀ အဖီခိၣ်န့ၣ်လီၤ. ဘံၣ်ယၤမံၣ်ဒီးယူဒၤခံဒူၣ်တခီ ပာ်ရဃၤဘၣ်လၢ အဝဲသ့ၣ်အစီၤပၤဒံးန့ၣ်လီၤ.
ယၤရၤဘၣ်တခီ တအဲၣ်ဒိးအပှၤတဖၣ်လဲၤဆူ ယရူၤၡလ့ၣ် ဒီးဘူၣ်ထီၣ်ဘါထီၣ်ယဟိဝၤ လၢတၢ်လုၢ်ဟံၣ်န့ၣ်ဘၣ်. လၢတၢ်န့ၣ်အဃိ မၤထီၣ်ဝဲဂီၤဖံးထူအဂီၤခံခါဒီး မၢပှၤအဒူၣ် ၁၀ ဘူၣ်ထီၣ်ဘါထီၣ်ဝဲန့ၣ်လီၤ. တယံာ်ဘၣ်ဒီး ထံကီၢ်န့ၣ်ပှဲၤမးဝဲလၢ တၢ်မၤဆူၣ်မၤစိး, တၢ်မၤတရီတပါတဖၣ်န့ၣ်လီၤ.
ပှၤခံဒူၣ်အကီၢ်စ့ၢ်ကီး တပူၤဒီးတၢ်နးတၢ်ဖှီၣ်ဘၣ်. ရဃၤဘၣ်ကဲစီၤပၤတပှဲၤထီၣ် ယဲၢ်နံၣ်ဒံးဘၣ်, အဲၤကူပတူးအစီၤပၤ ဟဲဒုးဝဲဒၣ် ယရူၤၡလ့ၣ်န့ၣ်လီၤ. စိာ်ထီၣ်ကွံာ်ဝဲ တၢ်လုၢ်ဒိၣ်ပှ့ၤဒိၣ်ဂီၢ်မုၢ်ဂီၢ်ပၤ လၢယဟိဝၤအတၢ်လုၢ်ဟံၣ်အပူၤန့ၣ်လီၤ. လၢတၢ်န့ၣ်အဃိ တၢ်လုၢ်ဟံၣ်အံၤ အိၣ်ဒ်တၢ်စးထီၣ်သူၣ်ထီၣ်အီၤအသိး ထဲဒၣ်တစိၢ်ဖိန့ၣ်လီၤ.
