တၢ်ပိာ်ထွဲ
ကစၢ်အတၢ်အီၣ်လၢဟါအီၣ်—မူးပွဲလၢအမၤလၤကပီၤယွၤ
ခရံာ်ဖိတဖၣ် ဘၣ်တၢ်မၤလိာ်အီၤလၢ ကမၤမူးပွဲလၢ တၢ်သ့ၣ်နီၣ်ထီၣ် ခရံာ်အတၢ်သံန့ၣ်လီၤ. မူးအံၤကိးစ့ၢ်ကီးဝဲလၢ “ကစၢ်အတၢ်အီၣ်လၢဟါအီၣ်” လီၤ. (၁ ကရံၣ်သူး ၁၁:၂၀) တၢ်လၢအဒုးလီၤဆီ မူးအံၤမ့ၢ်မနုၤလဲၣ်. မူးပွဲအံၤ ကြၢးပှၤမၤအီၤဒ်လဲၣ်ဒီး ဖဲလဲၣ်အဆၢကတီၢ်လဲၣ်.
မူးပွဲအံၤ ယ့ၣ်ၡူးစးထီၣ်မၤအီၤဖဲ ခ.န. ၃၃, ပှၤယူဒၤဖိ အဘူၣ်လဲၤကပာ်မူးပွဲအဟါန့ၣ်လီၤ. ဘူၣ်လဲၤကပာ်အံၤ ဘၣ်တၢ်မၤအီၤ ထဲဒၣ်တနံၣ်တဘျီဖဲ ယူဒၤအလါနံစၣ် ၁၄ သီအနံၤလီၤ. ပှၤယူဒၤဖိတဖၣ် ကဒွးဝဲနံၤသီအံၤအဂီၢ် လီၤဂာ်လၢ ခိးဝဲတၢ်ကိၢ်ထီၣ်သီ မုၢ်ဆါကတီၢ်ဒီး မုၢ်နၤကတီၢ် တုၤသိးလိာ်သးအကတီၢ်န့ၣ်လီၤ. နံၤအံၤမ့ၢ် နံၤတနံၤလၢ မုၢ်ဆါအိၣ် ၁၂ နၣ်ရံၣ်ဒီး မုၢ်နၤအိၣ် ၁၂ နၣ်ရံၣ်ဃၣ်ဃၣ်လီၤ. တၢ်ကိၢ်ထီၣ်သီ မုၢ်ဆါဒီးမုၢ်နၤ တုၤသိးလိာ်သးအဆၢကတီၢ် ဒီးအဘူးကတၢၢ် လါထီၣ်တသီနံၤန့ၣ် မၤနီၣ်ဝဲလၢ လါနံစၣ်တၢတသီန့ၣ်လီၤ. ဘူၣ်လဲၤကပာ်န့ၣ် မၤဝဲဖဲ နံစၣ် ၁၄ သီမုၢ်လီၤနုာ်ဝံၤ အလီၢ်ခံလီၤ.
ယ့ၣ်ၡူးမၤဝဲ ဘူၣ်လဲၤကပာ်ဒီး အတၢ်မၢဖိတဖၣ်, ဒီးဒုးဟးထီၣ်ဝဲ ယူဒၤအံၣ်စကၤရံၤအိာ် ဝံၤအလီၢ်ခံဒီး မၤဝဲကစၢ်အတၢ်အီၣ်လၢ ဟါအီၣ်န့ၣ်လီၤ. ပွဲအံၤန့ၣ် ဘၣ်တၢ်မၤခၢၣ်စးက့ၤအီၤလၢ ပှၤယူဒၤဖိ အဘူၣ်လဲၤကပာ် အလီၢ်အဃိ ကြၢးမၤထဲဒၣ် တနံၣ်တဘျီလီၤ.
လံာ်တၢ်သးခုကစီၣ် မးသဲ ပာ်ဖျါဝဲဒ်အံၤလီၤ– “ယ့ၣ်ၡူးဟံးန့ၢ်ကိၣ် ဒီးဆိၣ်ဂ့ၤဝဲ, ဒီးစိၢ်ဘျဲးဝဲ, ဒီးဟ့ၣ်လီၤလၢအပျဲၢ်အဘီၣ်, ဒီးစံးဝဲဒၣ်, ‘ဟံးန့ၢ်အီၣ်တက့ၢ်. အအံၤမ့ၢ်ယနီၢ်ခိလီၤ.’ ဒီးဟံးန့ၢ်လီခီ, ဒီးစံးထီၣ်ပတြၢၤ တၢ်အဘျုးအဖှိၣ်, ဒီးဟ့ၣ်ဝဲလၢအီၤဒီးစံးဝဲဒၣ်, ‘အီသုဝဲခဲလၢာ်လၢအီၤတက့ၢ်. အဂ့ၢ်ဒ်အံၤ, အအံၤမ့ၢ်ယ “သွံၣ်” ဘၣ်ဃးဒီး “တၢ်အၢၣ်လီၤအီလီၤအသီ”, လၢအဘၣ်လူလီၤအသးလၢ ပှၤအါဂၤအဂီၢ် လၢတၢ်ပျၢ်တၢ်ဒဲးဘး အဂ့ၢ်လီၤ.’ ”—မးသဲ ၂၆:၂၆-၂၈.
ပှၤတနီၤနာ်ဝဲလၢ ယ့ၣ်ၡူးမၤလဲလိာ်ဝဲ ကိၣ်ဒ်အညၣ်နီၢ်ကီၢ်ဒီး စပံးထံဒ်အသွံၣ်အသိးန့ၣ်လီၤ. ဘၣ်ဆၣ်ဖဲ ယ့ၣ်ၡူးနီၤလီၤကိၣ်အခါ ကစၢ်အနီၣ်ခိဖံးညၣ် အိၣ်ဒ်လီၢ်လီၢ်အဖၢန့ၣ်လီၤ. ကစၢ်အတၢ်မၢဖိတဖၣ် အီၣ်ဝဲကစၢ်အညၣ်နီၢ်ကီၢ်ဒီး အီဝဲအသွံၣ်ဧါ. တမ့ၢ်ဘၣ်, မ့မ့ၢ်ဒ်န့ၣ်ဒီး မ့ၢ်တၢ်အီၣ်ပှၤကညီအညၣ်ဒီး မ့ၢ်တၢ်လုၢ်သ့ၣ်ခါပတာ် ယွၤအတၢ်မၤလိာ်လီၤ. (၁ မိၤၡ့ ၉:၃, ၄; ၃ မိၤၡ့ ၁၇:၁၀) ဖဲလူၤကၣ် ၂၂:၂၀ န့ၣ်ယ့ၣ်ၡူးစံးဝဲဒ်အံၤလီၤ– “လီခီအံၤ မ့ၢ်တၢ်အၢၣ်လီၤအီလီၤအသီလၢ ယသွံၣ်လၢအဘၣ် တၢ်ဂၢ်လီၤအီၤလၢ သုဂီၢ်လီၤ.” လီခီအံၤ ဒ်တၢ်နီၢ်ကီၢ်အသိးကဲထီၣ် “တၢ်အၢၣ်လီၤအီလီၤအသီ” သ့ဧါ. ကဲထီၣ်ဒ်န့ၣ်တသ့ဘၣ်. တၢ်အၢၣ်လီၤအီလီၤ စံးတၢ်န့ၣ် မ့ၢ်တၢ်သးလီၤပလိာ်လိာ်သး တမံၤအဃိ တမ့ၢ်တၢ်လၢ ပထိးဘၣ်သ့ၣ်ညါအီၤသ့ဘၣ်.
လၢတၢ်န့ၣ်အဃိ ကိၣ်ဒီးစပံးထံ ခံမံၤလၢာ်န့ၣ် မ့ၢ်ဒၣ်တၢ်အဒိတဖၣ်လီၤ. ကိၣ်န့ၣ်ဒိလီၤဝဲ ခရံာ်အနီၢ်ခိလၢ အလၢအပှဲၤလီၤ. ယ့ၣ်ၡူးသူဝဲ ကိၣ်တဘ့ၣ်လၢ အိၣ်လီၤတဲာ်လၢ ဘူၣ်လဲၤကပာ်လီၤ. ကိၣ်အံၤမ့ၢ်ကိၣ်လၢ တအိၣ်ဘၣ်ဒီးကိၣ်မံၣ်လီၤ. (၂ မိၤၡ့ ၁၂:၈) လံာ်စီဆှံ သူညီနုၢ်ဝဲကိၣ်မံၣ်ဒ် တၢ်အဒိလၢ တၢ်ဒဲးဘး မ့တမ့ၢ် တၢ်တတီလၢၤန့ၣ်လီၤ. လၢတၢ်န့ၣ်အဃိ ကိၣ်န့ၣ်မ့ၢ်တၢ်အခၢၣ်စးလၢ နီၢ်ခိအလၢအပှဲၤ လၢယ့ၣ်ၡူးလုၢ်ထီၣ်ဝဲလီၤ. မ့ၢ်နီၢ်ခိလၢအပူၤဒီး တၢ်ဒဲးဘးလီၤ.—မးသဲ ၁၆:၁၁, ၁၂; ၁ ကရံၣ်သူး ၅:၆, ၇; ၁ ပ့းတရူး ၂:၂၂; ၁ ယိၤဟၣ် ၂:၁, ၂.
စပံးထံအဂီၤန့ၣ် မ့ၢ်တၢ်ခၢၣ်စးလၢ ယ့ၣ်ၡူးအသွံၣ်လီၤ. တၢ်သွံၣ်အံၤန့ၣ် မၤဂၢၢ်ကျၢၤ တၢ်အၢၣ်လီၤအီလီၤအသီလီၤ. ယ့ၣ်ၡူးစံးဝဲလၢ “တၢ်ဒဲးဘး ကပျၢ်ကွံာ်အဂီၢ်” အဝဲဂၢ်လီၤအသွံၣ်လီၤ. လၢတၢ်န့ၣ်အဃိ ပှၤကညီတဖၣ် ကဆှီထီၣ်လၢယွၤအမဲာ်ညါဒီး နုာ်လီၤဝဲဆူ တၢ်အၢၣ်လီၤအီလီၤအသီလၢ ဘၣ်တၢ်မၤအီၤဒီး ယဟိဝၤန့ၣ်လီၤ. (ဧ့ၤဘြံၤ ၉:၁၄; ၁၀:၁၆, ၁၇) တၢ်အၢၣ်လီၤအီလီၤ မ့တမ့ၢ် တၢ်သးလီၤပလိာ် လိာ်သးအံၤန့ၣ် ဒုးအိၣ်ထီၣ် တၢ်အခွဲးအယာ်လၢ ခရံာ်ဖိလၢအတီ ၁၄၄,၀၀၀ ကထီၣ်ဘၣ်ဆူမူခိၣ်လီၤ. ပှၤဟီၣ်ခိၣ်ဖိခဲလၢာ် ကဒိးန့ၢ်ဘၣ် တၢ်ဆိၣ်ဂ့ၤအဂီၢ် အဝဲသ့ၣ်ကမၤတၢ်ဒ် စီၤပၤတဖၣ်, ပှၤလုၢ်တၢ်အဒိၣ်တဖၣ် အသိးဖဲန့ၣ်လီၤ.—၁ မိၤၡ့ ၂၂:၁၈; ယံးရမံယၤ ၃၁:၃၁-၃၃; ၁ ပ့းတရူး ၂:၉; လီၣ်ဖျါ ၅:၉, ၁၀; ၁၄:၁-၃.
မတၤတဖၣ်ကြၢးအီၣ် တၢ်သ့ၣ်နီၣ်ထီၣ်အမူး အတၢ်ပနီၣ်အံၤလဲၣ်. ပမ့ၢ်ကွၢ်ထံဆိကမိၣ်ဒီး ထဲဒၣ် ပှၤလၢအပာ်ဃုာ်လၢ တၢ်အၢၣ်လီၤအီလီၤ အသီတဖၣ် —တၢ်မုၢ်လၢ်အိၣ်လၢမူခိၣ်တဖၣ် —န့ၣ်ကြၢးအီၣ်ကိၣ်ဒီး အီစပံးထံလီၤ. ယွၤအသးစီဆှံ ကပာ်ဖျါဝဲလၢ အဝဲသ့ၣ် ဘၣ်တၢ်ဃုထၢအီၤဒ် မူခိၣ်စီၤပၤတဖၣ် အသိးန့ၣ်လီၤ. (ရိမ့ၤ ၈:၁၆) အဝဲသ့ၣ်မ့ၢ်စ့ၢ်ကီး ပှၤပာ်ဃုာ်ဒီးယ့ၣ်ၡူးလၢ ဘီမုၢ်တၢ်အၢၣ်လီၤအီလီၤ အပူၤန့ၣ်လီၤ.—လူၤကၣ် ၂၂:၂၉.
ပှၤလၢတၢ်မုၢ်လၢ်အိၣ်လၢ ကအိၣ်မူလီၤထူလီၤယိာ်လၢ ဟီၣ်ခိၣ်ပၤရဒံစူးတဖၣ် တခီလဲၣ်. အဝဲသ့ၣ်စူၢ်ဝဲ ယ့ၣ်ၡူးအကလုၢ်ဒီး လဲၤထီၣ်ဝဲ ကစၢ်အတၢ်အီၣ်လၢ ဟါအီၣ်လီၤ, ဘၣ်ဆၣ် လဲၤထီၣ်ဝဲမူးအံၤ တမ့ၢ်ဒ်သိး ပှၤတဖၣ်လၢ ဟံးန့ၢ်အီၣ်သကိးတၢ်ဘၣ်ဒီး မ့ၢ်ဒ်ပှၤလဲၤကွၢ်ကီတၢ်ဖိလၢ တၢ်ယူးယီၣ်ပာ်ကဲန့ၣ်လီၤ. ယဟိဝၤ အပှၤအုၣ်အသးတဖၣ်မၤဝဲ ကစၢ်အတၢ်အီၣ်လၢဟါအီၣ် တနံၣ်တဘျီ ဖဲလါနံစၣ် ၁၄ သီ, မုၢ်လီၤနုာ်ဝံၤ အလီၢ်ခံန့ၣ်လီၤ. ဟီၣ်ခိၣ်ဒီဘ့ၣ် ပှၤလၢပာ်လီၤအသးလၢ တၢ်မုၢ်လၢ်အိၣ်လၢ မူခိၣ်န့ၣ် အိၣ်တ့ၢ်ဒၣ် စှၤဂၤသနာ်က့ မူးပွဲအံၤန့ၣ် အကါဒိၣ်ဒိၣ်မးလၢ ခရံာ်ဖိခဲလၢာ်အဂီၢ်လီၤ. မ့ၢ်တၢ်ဆၢဂ့ၤ ကတီၢ်ဘၣ်လၢ အဒုးနဲၣ်ဖျါထီၣ် ယဟိဝၤယွၤဒီး ယ့ၣ်ၡူးပာ်ဖျါထီၣ် အတၢ်အဲၣ်အဒိၣ်ကတၢၢ်န့ၣ်လီၤ.—ယိၤဟၣ် ၃:၁၆.
တၢ်ဂ့ၤအဂၤလၢ နကဘၣ်သး
တၢ်သ့ၣ်နီၣ်ထီၣ်က့ၤအမူး
သ့ၣ်နီၣ်ထီၣ်က့ၤ ယ့ၣ်ၡူးအတၢ်သံ
ပကွဲမုာ်ဘၣ်နၤလၢ နကဟဲထီၣ်မူးပွဲလၢအရ့ဒိၣ်အံၤန့ၣ်လီၤ. နကနၢ်ဟူဘၣ်လၢ ယ့ၣ်ၡူးအတၢ်အိၣ်မူ ဒီးအတၢ်သံန့ၣ် ကဲဘျုးလၢနဂီၢ်ဒ်လဲၣ်န့ၣ်လီၤ.
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသးတဖၣ် မၤဝဲကစၢ်အတၢ်အီၣ်လၢ ဟါအီၣ်န့ၣ် ဘၣ်မနုၤအဃိ လီၤဆီလိာ်အသးဒီး တၢ်ဘူၣ်တၢ်ဘါလၢ အဂၤတဖၣ်လဲၣ်.
ဘၣ်တၢ်ကိးစ့ၢ်ကီးအီၤလၢ တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံ, ဒီးမ့ၢ်မူးပွဲလၢ အရ့ဒိၣ်ကတၢၢ်လၢ ယဟိဝၤပှၤအုၣ်အသး တဖၣ်အဂီၢ်လီၤ. သမံသမိးကွၢ် ဘၣ်ဃးဒီး မူးပွဲအံၤအဂ့ၢ်န့ၣ် လံာ်စီဆှံစံးဝဲ ဒ်လဲၣ်န့ၣ်တက့ၢ်.
