တၢ်ပိာ်ထွဲ
ခရံာ်ဖိနီၢ်နီၢ်တဖၣ် တသူထူၣ်စုညါလၢ အတၢ်ဘူၣ်ထီၣ်ဘါထီၣ် အဂ့ၢ်
ပှၤအကကွဲၢ်တဖၣ် အဲၣ်ဝဲထူၣ်စုညါဒီး ယူးယီၣ်ပာ်ကဲဝဲလီၤ. ဘြံးတၢၣ်နံကၣ် လံာ်ထံးလံာ်ယ့ၤ ကိးဝဲထူၣ်စုညါလၢ “ခရံာ်ဖိတၢ်ဘူၣ်တၢ်ဘါ အတၢ်ပနီၣ်မိၢ်ပှၢ်” လီၤ. ဘၣ်ဆၣ်, ခရံာ်ဖိနီၢ်နီၢ်တဖၣ်န့ၣ် တသူဝဲထူၣ်စုညါလၢ အတၢ်ဘူၣ်ထီၣ်ဘါထီၣ် အပူၤဘၣ်. လၢမနုၤအဃိလဲၣ်.
တၢ်ဂ့ၢ်လၢအကါဒိၣ် တမံၤန့ၣ်မ့ၢ်လၢ ယ့ၣ်ၡူးတသံလၢ ထူၣ်စုညါအလိၤဘၣ်လီၤ. ပှၤကွဲးကျိးအါတက့ၢ်လၢ “ထူၣ်စုညါ” န့ၣ်လၢကရံးစ်ကျိာ်မ့ၢ် စတီရီးစ်လီၤ. အခီပညီ အခီၣ်ထံးခီၣ်ဘိန့ၣ် “နီၣ်က့စုခိၣ်လၢအဘျၢ မ့တမ့ၢ် တၢၣ်” န့ၣ်လီၤ. ခီၣ်မ်ဖဲနံယၢၣ်လံာ်စီဆှံန့ၣ် စံးဝဲဒ်အံၤလီၤ– “စတီရီးစ်န့ၣ် တမ့ၢ်သ့ၣ်အဒီၣ်တူာ် ခံကဒါဘၣ်. . . . လံာ်စီဆှံ [တၢ်အၢၣ်လီၤအီလီၤအသီ] ကရံးစ်အပူၤန့ၣ် အခီပညီတဖျါ လ့ၤတက့ၤလၢ သ့ၣ်ခံကဒါဘၣ်.
လံာ်စီဆှံတဘျုးဆၢအပူၤ, တၢ်အပီးအလီလၢယ့ၣ်ၡူးသံလၢအလိၤအဂီၢ်န့ၣ် ပှၤကွဲးလံာ်စီဆှံတဖၣ်သူဝဲ တၢ်ကတိၤအဂၤလီၤ. မ့ၢ်ဒၣ်သူဝဲ ဂရံးစ်တၢ်ကတိၤ ဇၣ်လိၣ်န့ၣ်လီၤ. (မၤတၢ် ၅:၃၀; ၁၀:၃၉; ၁၃:၂၉; ကလၤတံ ၃:၁၃; ၁ပ့းစရူး ၂:၂၄) တၢ်ကတိၤအံၤစ့ၢ်ကီးစံးဝဲ “သ့ၣ်” မ့တမ့ၢ် “နီၣ်က့, နီၣ်တီၢ်, မ့တမ့ၢ် သ့ၣ်ထူၣ်” န့ၣ်လီၤ. ဟၣ်မၣ်ဖုၣ်ဒၣ် အလံာ်လၢအမ့ၢ် ထူၣ်စုညါဒီး တၢ်ပျၤထီပှၤလၢ ထူၣ်စုညါလိၤန့ၣ် တဲနၢ်ပၢၢ်ဝဲလၢ တၢ်မၤသံတၢ်အခါ ဘၣ်မနုၤအဃိ ညီနုၢ်ပှၤသူ သ့ၣ်တၢၣ်ယိယိဖိ တတၢၣ်အဂ့ၢ်န့ၣ် ပာ်ဖျါဝဲဒ်အံၤလီၤ– “တၢ်ဃုထၢတၢ်လီၢ် ကိးတီၤဒဲးလၢ တၢ်ကမၤသံတၢ်လၢ ကမျဲၢ်အမဲာ်ညါန့ၣ် သ့ၣ်ထူၣ်တအိၣ်ဘၣ်. လၢတၢ်န့ၣ်အဃိ ပှၤဘျၢလီၤသ့ၣ်တၢၣ် ယိယိဖိတတၢၣ်လၢ ဟီၣ်ခိၣ်လာ်ဒီး ပာ်ထီၣ်ထူၣ်ဝဲလီၤ. ပှၤပာ်ထီၣ် ပှၤလုၢ်သ့ၣ်ခါပတာ်တၢ်သိၣ်တၢ်သီတဖၣ်လၢ တၢၣ်လိၤဒီး ပာ်ထီၣ်အစုလၢတၢ်ဖီခိၣ်ဒီး ဘၣ်တၢ်စဲအီၤလၢပျံၤ မ့တမ့ၢ် တီၢ်လၢထးန့ၣ်လီၤ. အခီၣ်တဖၣ်စ့ၢ်ကီး ညီနုၢ်တၢ်မၤဒ်န့ၣ်လီၤ.
ဘၣ်ဆၣ် တၢ်အုၣ်အသးလၢ ပနာ်သ့ကတၢၢ်န့ၣ် မ့ၢ်လၢယွၤကလုၢ်ကထါလီၤ. တၢ်မၢဖိပီလူးစံးဝဲဒ်အံၤလီၤ “ခရံာ်ဘၣ်ဆိၣ်အၢလၢပဂီၢ်သတးဒီး, ပှ့ၤက့ၤပှၤလၢတၢ်ဆိၣ်အၢဘၣ်ဃးဒီး တၢ်သိၣ်တၢ်သီအပူၤလီၤ. အဂံၢ်ဒ်အံၤ, တၢ်ကွဲးအသး, ပှၤလၢအဘၣ်စဲထီအသးလၢသ့ၣ်အလိၤ,မ့ၢ်အဘၣ်ဆိၣ်အၢကိးဂၤဒဲးလီၤ.” (ကလၤတံ ၃:၁၃) မ့ၢ်ဒၣ်ပီလူး ကတိၤဒိးက့ၤဝဲ ၅ မိၤၡ့ ၂၁:၂၂, ၂၃ န့ၣ်လီၤ. ဖဲန့ၣ်တပာ်ဖျါဝဲလၢ ထူၣ်စုညါဘၣ် ပာ်ဖျါဝဲတြၢၤကလာ်လၢထူၣ်တထူၣ်န့ၣ်လီၤ. ပှၤတဂၤမ့ၢ်ဘၣ်တၢ်မၤသံအီၤဒ်န့ၣ်ဒီး မ့ၢ်ပှၤလၢ “အဘၣ်ဆိၣ်အၢ” အဃိ ခရံာ်ဖိတဖၣ်အဂီၢ် တၢ်မၤကယဲကယၢဟံၣ်လၢ ခရံာ်ဘၣ်တၢ်ပျၤထီအီၤတၢ်ဂီၤတဖၣ်န့ၣ် တကြၢးဝဲဘၣ်.
ခရံာ်သံဝံၤအလီၢ်ခံ အနံၣ်သၢကယၤအတီၢ်ပူၤ ပှၤလၢစံးလီၤအသးလၢ ခရံာ်ဖိတဖၣ်န့ၣ် တၢ်အုၣ်အသးတအိၣ်လၢ သူဝဲထူၣ်စုညါလၢ အတၢ်ဘူၣ်ထီၣ်ဘါထီၣ်အပူၤဘၣ်. သနာ်က့ တုၤလၢနံၣ်ကယၤလွံၢ်အခါ ဘီမုၢ်စီၤပၤလၢ အစူၢ်ကမၣ်တၢ် ခီၣ်စထဲၣ်ထဲ န့ၣ်ဟဲနုာ်လီၤဆူ ခရံာ်ဖိတၢ်ဘူၣ်တၢ်ဘါလၢ အညိကွံာ်တၢ်နာ်ဒီး သဆၣ်ထီၣ်ဝဲလၢ ပှၤကသူထူၣ်စုညါဒ် ခရံာ်ဖိအတၢ်ပနီၣ်အသိးန့ၣ်လီၤ. ခီၣ်စထဲၣ်ထဲ အတၢ်တိာ်ပာ် အခီၣ်ထံးန့ၣ် မ့မ့ၢ်ဒ်လဲၣ်ဂ့ၤ ဒ်လဲၣ်ဂ့ၤ ထူၣ်စုညါန့ၣ် တဘၣ်ဃးဒီး ယ့ၣ်ၡူးခရံာ်ဘၣ်. နီၢ်နီၢ် ထူၣ်စုညါန့ၣ် ဟဲလီၤစၢၤလၢ ပှၤစူၢ်ကမၣ်နာ်ကမၣ် တၢ်ဖိတဖၣ်န့ၣ်လီၤ. ခဲးသလ့းအလံာ်ထံးလံာ်ယ့ၤအသီ အၢၣ်လီၤဝဲဒ်အံၤလီၤ– “ထူၣ်စုညါအံၤ ပထံၣ်ဘၣ်လၢ တချုးခရံာ်ဖိအစိၤဒီး ပှၤလၢတမ့ၢ်ခရံာ်ဖိတဖၣ် အတၢ်ဆဲးတၢ်လၤ ခံမံၤလၢာ်န့ၣ်လီၤ.” တၢ်ပာ်ဖျါအဂၤတဖၣ်စ့ၢ်ကီး ပာ်ဖျါသဃၢၤဝဲထူၣ်စုညါဒီး တၢ်ဘူၣ်ထီၣ်ဘါထီၣ်န့ဆၢၣ်, ဒီးပှၤစူၢ်ကမၣ်တၢ်တဖၣ် အတၢ်ဘူၣ်ထီၣ်ဘါထီၣ် တၢ်အမိၢ်အဖါန့ၣ်လီၤ.
မ့မ့ၢ်ဒ်န့ၣ်ဒီး ဘၣ်မနုၤအဃိ ဟ့ၣ်သဆၣ်ထီၣ်ဝဲ ပှၤစူၢ်ကမၣ်တၢ်တဖၣ် အတၢ်ပနီၣ်လဲၣ်. လီၤဂာ်လၢ ဒ်သိးဒီး ပှၤစူၢ်ကမၣ်တၢ်တဖၣ် ကတူၢ်လိာ် “ခရံာ်ဖိတၢ်ဘူၣ်တၢ်ဘါ” ညီညီအဂီၢ်လီၤ. မ့ၢ်စံးဒ်လဲၣ်ဂ့ၤဒ်လဲၣ်ဂ့ၤ တၢ်ယူးယီၣ် တၢ်စူၢ်ကမၣ်အတၢ်ပနီၣ် မနုၤဂ့ၤဂ့ၤန့ၣ် ဖျါတြၢၤကလာ်လၢ လံာ်စီဆှံစံးအၢဝဲလီၤ. (၂ကရံၣ်သူး ၆:၁၄-၁၈) လံာ်စီဆှံတြီဝဲ တၢ်အက့ၢ်အဂီၤလၢတၢ်ဘူၣ်ထီၣ်ဘါထီၣ်တၢ်ဂီၤခဲလၢာ်လီၤ. (၂မိၤၡ့ ၂၀:၄,၅; ၁ ကရံၣ်သူး ၁၀:၁၄) တၢ်ဂ့ၢ်အဂ့ၤအိၣ်အဃိ ခရံၣ်ဖိနီၢ်နီၢ်တဖၣ် တသူဝဲထူၣ်စုညါ လၢတၢ်ဘူၣ်ထီၣ်ဘါထီၣ်အပူၤဘၣ်. *
^ လံာ်အဆၢ. 8 တၢ်သမံသမိး လီၤတံၢ်လီၤဆဲးလၢ ဘၣ်ဃးဒီးထူၣ်စုညါအဂီၢ် ကွၢ်ယဟိဝၤ အပှၤအုၣ်အသးတဖၣ် ရၤလီၤဝဲ လံာ်လၢအမ့ၢ် ဆိကမိၣ် နီၤဖးတၢ်လၢလံာ်စီဆှံ [ပယီၤကျိာ်], လံာ်ကဘျံးပၤ ၃၀၀-၃၀၃.
