လံာ်စီဆှံ​တ​ပာ်ဖျါ​ဝဲ ယ့ၣ်ၡူး​အိၣ်ဖျဲၣ် အဆၢ​ကတီၢ်​ဘၣ်. ဘၣ်ဆၣ် ပာ်ဖျါ​ဝဲ တၢ်ဂ့ၢ်​လီၤ​တံၢ်​လၢ ပ​စံၣ်ညီၣ်​တဲာ်​သ့​လၢ ကစၢ်​အ​တၢ်​အိၣ်ဖျဲၣ် မုၢ်နံၤ​န့ၣ် တမ့ၢ်​လါ​ဒံၣ်​ဇ့​ဘၢၣ် ဘၣ်​န့ၣ်​လီၤ.

ဆိကမိၣ်​ကွၢ် ယ့ၣ်ၡူး​အိၣ်ဖျဲၣ်​အလီၢ် ဝ့ၢ်ဘ့ၤသလ့ဃ့ၣ်​အ​ပူၤ နံၣ်​အံၤ​အကတီၢ်​ဖဲ​န့ၣ် ​မူခိၣ်​မူ​လိၤ တၢ်အိၣ်​အသး​န့ၣ်​တက့ၢ်. ပှၤ​ယူဒၤ​ဖိ​အလါ ကံး​စ​လ့ၤ (လီၤပလိာ်​ဒီး လါနိၣ်ဝ့ဘၢၣ်/ ဒံၣ်​ဇ့​ဘၢၣ်​လီၤ) န့ၣ်​မ့ၢ်​လါ​လၢ မူခိၣ်စူၤ​ဒီး တၢ်ခုၣ်​လီၤ. လါ​အံၤ​ဝံၤဒီး​မ့ၢ် လါ​တ့ဘ့း (ဒံၣ်​ဇ့​ဘၢၣ်/ ယ​နူၤ​အါ​ရံၤ) လီၤ. လါ​အံၤ​မ့ၢ်​လါ​လၢ တၢ်ကိၢ်​စှၤ​ကတၢၢ်​ဒီး တၢ်လီၢ်​ထီၣ်ထီ​တဖၣ်​န့ၣ် တဘျီတခီၣ် ဘှ့ၣ်​လီၤ​ဝဲ​လီၤ. ပ​ကကွၢ်​သကိး လံာ်စီဆှံ​ပာ်ဖျါ​တၢ် ဘၣ်ဃး​ဒီး​တၢ်လီၢ်​အံၤ အ​မူခိၣ်​မူ​လိၤ​န့ၣ်​တက့ၢ်.

ပှၤ​ကွဲး​လံာ်စီဆှံ ဧ့စြၤ ပာ်ဖျါ​ဝဲ​လၢ လါကံးစလ့ၤ​န့ၣ် မ့ၢ်​လါ​နီၢ်နီၢ်​လၢ တၢ်ခုၣ်​ဒီး​တၢ်စူၤ​လီၤ. “လါ​ခွံ​လါ​တလါ [လါကံးစလ့ၤ], အသီ​ခံ​ဆံ” န့ၣ်​ပှၤကညီ​ခဲလၢာ် အိၣ်ဖှိၣ်​ရိဖှိၣ်​လၢ ဝ့ၢ်​ယရူၤၡလ့ၣ်​အ​ပူၤ​န့ၣ် ပာ်ဖျါ​ထီၣ်ဝဲ ဝံၤ​အလီၢ်​ခံ, ဧ့ၤ​စြၤ ကွဲးနီၣ်​ပာ်ဖျါ​ဝဲ​လၢ ပှၤ​ဂီၢ်မုၢ်​တဖၣ် “ကနိး​ကစုာ်​လၢ . . . တၢ်ဟဲစူၤ​ဖးဒိၣ်​အဃိ”လီၤ. ဖဲ​န့ၣ်​အကတီၢ် ဘၣ်ဃး​ဒီး မူခိၣ်​မူ​လိၤ​န့ၣ် ပှၤလၢ​အ​စူးရိ​ဖှိၣ်​ဖဲ​န့ၣ်​တဖၣ် အ​ကစၢ်​ဒၣ်ဝဲ စံး​ဝဲ​ဒ်အံၤ​လီၤ– “မ့ၢ်​တၢ်ဟဲစူၤ​ဖးဒိၣ် အဆၢ ကတီၢ်, ဒီး​ပ​ဆၢထၢၣ်​လၢ​ခိ တ​သ့​ဘၣ်.” (ဧ့စြၤ ၁၀:၉, ၁၃; ယံးရမံယၤ ၃၆:၂၂) ပှၤကွၢ်သိ​တဖၣ်​လၢ အ​အိၣ်​ဖဲ​တၢ်လီၢ်​လၢ ဝ့ၢ်​ဘၢး​သ​လံၣ်​ဟ့ၣ် အ​ဃၢၤ​န့ၣ်​လီၤတံၢ်​လၢ ဖဲ​လါ​ဒံၣ်​ဇ့​ဘၢၣ်​အ​ပူၤ အဝဲသ့ၣ်​ဒီး​အသိ​တဖၣ် တမ့ၢ်​က​ဟးထီၣ်​လၢ ဟံၣ်​အ​ချၢ​ဘၣ်​လီၤ.

ဘၣ်ဆၣ်, လံာ်စီဆှံ​ပာ်ဖျါ​ဝဲ​လၢ ဖဲ​ယ့ၣ်ၡူး​အိၣ်ဖျဲၣ်​အ​နၤ​န့ၣ် ပှၤကွၢ်သိ​တဖၣ် ကွၢ်​အသိ​လၢ ပျီပူၤ​လီၤ. မ့ၢ်​လီၤ, ပှၤ​ကွဲး​လံာ်စီဆှံ လူၤကၣ် ပာ်ဖျါ​ဝဲ​လၢ ဖဲ​န့ၣ်​အကတီၢ်​န့ၣ် ပှၤကွၢ်သိ​တဖၣ် “ကွၢ်​အသိ​လၢ မုၢ်နၤခီ​ဖဲ ပျီပူၤ” လၢ​အဘူး​ဒီး ဘ့ၤသလ့ဃ့ၣ်​န့ၣ်​လီၤ. (လူၤကၣ် ၂:၈-၁၂, ခစ) ပှၤကွၢ်သိ​တဖၣ်​န့ၣ် တမ့ၢ်​ထဲဒၣ် ဟးဝ့ၤဝီၤ​ကွၢ်​အသိ​လၢ မုၢ်ဆါ​အဆၢ​ကတီၢ်​ဘၣ်​ဒီး အိၣ်ဝဲ​သ့ၣ်​လၢ​ပျီပူၤ​လီၤ. မုၢ်နၤ​အဆၢ​ကတီၢ်​န့ၣ် အဝဲသ့ၣ် အိၣ်ဒီး​အသိ​တဖၣ်​လၢ ပျီပူၤ​လီၤ. ဖဲ​လါ​ဒံၣ်​ဇ့​ဘၢၣ်​အ​ပူၤ တၢ်စူၤ​ဒီး​တၢ်ဂိၢ်​အဃိ တၢ်​ပာ်ဖျါ​လၢ​အမ့ၢ် တၢ်​လဲၤ​တုၤလၢ ဟံၣ်​အ​ချၢ​အံၤန့ၣ် ကြၢး​ဝဲ​ဒီး ဝ့ၢ်ဘ့ၤသလ့ဃ့ၣ်​ဧါ. တ​ကြၢး​ဘၣ်. လၢတၢ်န့ၣ်​အဃိ, တၢ်မၤ​အသး​လၢ ယ့ၣ်ၡူး​အိၣ်ဖျဲၣ်​အကတီၢ်​န့ၣ် ပာ်ဖျါ​ဝဲ​လၢ ကစၢ်​တ​အိၣ်ဖျဲၣ်​ဖဲ လါ​ဒံၣ်​ဇ့​ဘၢၣ်​ဘၣ်​န့ၣ်​လီၤ. *

ယွၤ​ကလုၢ်​ကထါ ပာ်ဖျါ​ဝဲ ယ့ၣ်ၡူး​သံ​အဆၢ​ကတီၢ် လီၤတံၢ်​လီၤဆဲး​သနာ်က့ ကစၢ်​အိၣ်ဖျဲၣ် အဆၢ​ကတီၢ်​တခီ ပာ်ဖျါ​ဒၣ်ဝဲ စှၤ​ဘီ​လီၤ. တၢ်အံၤ ဒုး​သ့ၣ်နီၣ်ထီၣ်​က့ၤ​ပှၤလၢ စီၤပၤ​ၡလိၤမိၤ အ​တၢ်ကတိၤ တဖၣ်​အံၤ​လီၤ– “တၢ်​အ​မံၤ​အ​သၣ်ဂ့ၤ​န့ၣ် ဂ့ၤန့ၢ်​သိ​နၢမူ​လၢ အလုၢ်​ဒိၣ်​ပှ့ၤဒိၣ်​တက့ၢ်​လီၤ. ဒီး​ပှၤသံဝဲ အမုၢ်​တနံၤ​န့ၣ် ဂ့ၤန့ၢ်​အ​အိၣ်ဖျဲၣ် အမုၢ်​တနံၤ​န့ၣ် တက့ၢ်​လီၤ.” (စံၣ်တဲၤ. ၇:၁) လၢတၢ်န့ၣ်​အဃိ လံာ်စီဆှံ​ပာ်ဖျါ​ဝဲ ဘၣ်ဃး​ဒီး ယ့ၣ်ၡူး​အ​တၢ်သးခု​ကစီၣ်, အ​တၢ်သံ​တဖၣ် လီၤတံၢ်​လီၤဆဲး​သနာ်က့, ဘၣ်ဃး​ဒီး ကစၢ်​အ​တၢ်​အိၣ်ဖျဲၣ် အဆၢ​ကတီၢ်​တခီ ပာ်ဖျါ​ဒၣ်ဝဲ ဆံးကိာ်ဖိ​န့ၣ် တ​လီၤ​ကမၢ​ကမၣ်​ဘၣ်.