တၢ်နီၤဖး တဆံခွံ
အိၣ်ဂၢၢ်အိၣ်ကျၢၤလၢ ယွၤအတၢ်အဲၣ်တၢ်ကွံ အပူၤတက့ၢ်
-
တၢ်အဲၣ်ကစၢ်ယွၤ စံးတၢ်န့ၣ် မ့ၢ်မနုၤလဲၣ်.
-
ပအိၣ်ဂၢၢ်အိၣ်ကျၢၤလၢ ယွၤအတၢ်အဲၣ်အပူၤ ကသ့ဒ်လဲၣ်.
-
ပှၤလၢအအိၣ်ဂၢၢ်အိၣ်ကျၢၤလၢ ယွၤအတၢ်အဲၣ်ပူၤတဖၣ်န့ၣ် ကစၢ်ကဟ့ၣ်ဘျုးက့ၤအီၤဒ်လဲၣ်.
ပအိၣ်မူဘၣ်လၢ ကလံၤမုၢ်လီၤလၢ မုၢ်မဆါတနံၤအံၤန့ၣ် နဒုးကဲထီၣ် ယဟိဝၤလၢ နတၢ်အိၣ်တဒၢအလီၢ်ဧါ.
၁, ၂. မုၢ်မဆါတနံၤအံၤ ပဃုထံၣ်န့ၢ် တၢ်အိၣ်ပူၤဖျဲးအလီၢ် ကသ့ဖဲလဲၣ်.
ဆိကမိၣ်ကွၢ်လၢ နသးပူၤ နဟးလၢကျဲဖီခိၣ် ဖဲကလံၤမုၢ်လီၤ အနံၤန့ၣ်တက့ၢ်. မူခိၣ်ခံးသူထီၣ်ဝဲလီၤ. လီဝၢ်ဒံး, လီသီၣ် ဒီးမူခိၣ်စူၤလီၤ ဆူၣ်မးလီၤ. နမၤချ့ချ့ဒီး နလူၤဃုတၢ်အိၣ်သဒၢအလီၢ် ကီကီခဲခဲလီၤ. ထဲန့ၣ်ဒီး, ဖဲကျဲကနူၤန့ၣ် နထံၣ်တၢ်အိၣ်သဒၢအလီၢ် တတီၤန့ၣ်လီၤ. တၢ်လီၢ်အံၤန့ၣ် ကျၢၤဝဲ, ဃ့ထီဒီး, လီၢ်အိၣ်ဘၣ်နၤလီၤ. နကပာ်လုၢ်ပာ်ပှ့ၤ တၢ်အိၣ်ပူၤဖျဲး အလီၢ်အံၤ ဒိၣ်မးလီၤ.
၂ ပဝဲသ့ၣ်စ့ၢ်ကီး ပအိၣ်မူဘၣ်လၢ ကလံၤမုၢ်တွၤ ဆူၣ်အကတီၢ်န့ၣ်လီၤ. ဟီၣ်ခိၣ်တၢ်အိၣ်အသးန့ၣ် အၢထီၣ်သီထီၣ်လီၤ. ဘၣ်ဆၣ် တၢ်အိၣ်သဒၢ အလီၢ်အိၣ်ဝဲ တတီၤလၢ မၤပူၤဖျဲးပှၤသ့ထီဘိလၢ တၢ်ဘၣ်ယိၣ်ဘၣ်ဘီ တဖၣ်န့ၣ်လီၤ. တၢ်လီၢ်မနုၤလဲၣ်. တိၢ်နီၣ် လံာ်စီဆှံ သိၣ်လိတၢ်န့ၣ်တက့ၢ်– “ယစံးလၢ ယွၤအဂ့ၢ်အကျိၤန့ၣ်, ‘မ့ၢ်ယတၢ် အိၣ်တဒၢအလီၢ်, ဒီးယတိာ်တဖျၢၣ်န့ၣ် မ့ၢ်ယကစၢ်လီၤ. ယကသန့ၤယသးလၢအီၤလီၤ.’”—စံးထီၣ်ပတြၢၤ ၉၁:၂.
၃. ယဟိဝၤမ့ၢ် ပတၢ်အိၣ်သဒၢအလီၢ် ကသ့ဒ်လဲၣ်.
၃ ဆိကမိၣ်ကွၢ် တၢ်ပာ်ဖျါအံၤန့ၣ်တက့ၢ်! ယဟိဝၤ, မူဟီၣ်ကယၢ အတၢ်ဘၣ်တ့ကစၢ် ဒီးတၢ်ပၢအဒိၣ် ကတၢၢ်ကစၢ်န့ၣ် မ့ၢ်ပတၢ်အိၣ်သဒၢအလီၢ် လၢမၤပူၤဖျဲးပှၤ သ့န့ၣ်လီၤ. ကစၢ်အစိကမီၤ ဒိၣ်န့ၣ်တက့ၢ်ဒံး ပှၤလၢအကမၤဘၣ်ဒိပှၤ မ့တမ့ၢ် ကယဲၢ်တၢ်လၢ ကမၤဘၣ်ဒိပှၤအဃိ ကစၢ်မၤပူၤဖျဲးပှၤ သ့လီၤ. ပမ့ၢ်ဘၣ်ဒိဆါဒၣ်လဲာ် ယဟိဝၤမၤဟးဂီၤဝဲ တၢ်အဘျုးအၢခဲလၢာ်သ့လီၤ. ပဒုးကဲထီၣ် ယဟိဝၤလၢ ပတၢ်အိၣ်သဒၢအလီၢ် ကသ့ဒ်လဲၣ်. ခီဖျိလၢ ပသန့ၤပသး လၢအီၤန့ၣ်လီၤ. အါန့ၢ်အန့ၣ်, လံာ်စီဆှံ သဆၣ်ထီၣ်ပှၤ ဒ်အံၤလီၤ– “ဟံးဃာ်သုသးလၢ ယွၤအတၢ်အဲၣ် တၢ်ကွံအပူၤ” တက့ၢ်. (ယူၤဒၤ ၂၁) မ့ၢ်လီၤ, လိၣ်လၢပကဘၣ် အိၣ်ဂၢၢ်အိၣ်ကျၢၤလၢ ယွၤအတၢ်အဲၣ်တၢ်ကွံအပူၤ, ခီဖျိလၢ ပဟံးဃာ်ဂၢၢ်ကျၢၤ ပတၢ်အဲၣ် အတၢ်စၢဃာ်လိာ်သးဒီး ပပၢ်အိၣ်လၢ မူခိၣ်န့ၣ်လီၤ. မ့မ့ၢ်ဒ်န့ၣ်ဒီး, ပနာ်သ့လၢ ကစၢ်မ့ၢ် ပတၢ်အိၣ်သဒၢအလီၢ်န့ၣ်လီၤ. ဘၣ်ဆၣ် ပမၤကဲထီၣ် တၢ်စၢဃာ်အပျံၤအံၤ ကသ့ဒ်လဲၣ်.
အၢၣ်လီၤအီလီၤ ယွၤအတၢ်အဲၣ်ဒီး အဲၣ်ဆၢက့ၤအီၤတက့ၢ်
၄, ၅. ကျဲတနီၤလၢ ယဟိဝၤပာ်ဖျါ အတၢ်အဲၣ်ပှၤန့ၣ် မ့ၢ်မနုၤလဲၣ်.
၄ ပကအိၣ်ဂၢၢ်အိၣ်ကျၢၤလၢ ယွၤအတၢ်အဲၣ်တၢ်ကွံပူၤအဂီၢ် လိၣ်လၢပကဘၣ်နၢ်ပၢၢ် ယဟိဝၤပာ်ဖျါ တၢ်အဲၣ်လၢ ပဖီခိၣ်န့ၣ်လီၤ. ဆိကမိၣ်ကွၢ် လံာ်စီဆှံ အတၢ်သိၣ်လိတနီၤလၢ နမၤလိသ့ၣ်ညါဘၣ်လၢ လံာ်အံၤအတၢ်မၤစၢၤ န့ၣ်တက့ၢ်. ဒ်တၢ်ဘၣ်တ့ကစၢ်အသိး ယဟိဝၤ ဟ့ၣ်ပှၤဟီၣ်ခိၣ် ဒ်သိးဟံၣ်လၢ ပကမုာ်လၤသးခုအဂီၢ် န့ၣ်လီၤ. ဒုးပှဲၤဟီၣ်ခိၣ် အါအါဂီၢ်ဂီၢ်ဒီး တၢ်အီၣ်တၢ်အီ, န့ဆၢၣ်အတၢ်ထူးတၢ်တီၤ, ဆၣ်ဖိကီၢ်ဖိလၢ အလီၤဆီလီၤလးတဖၣ်, ဒီးန့ဆၢၣ် တၢ်ထံၣ်အပျီဃံလၤ တဖၣ်န့ၣ်လီၤ. ကစၢ်ယွၤလၢ အကွဲးအိၣ်ထီၣ် လံာ်စီဆှံန့ၣ် ပာ်ဖျါထီၣ်န့ၣ်ပှၤ အမံၤဒီး အတၢ်ဂ့ၢ်တၢ်ဝါ တဖၣ်လီၤ. တကးဘၣ်အမဲာ်ညါ, အကလုၢ်ကထါ ပာ်ဖျါထီၣ်ဝဲလၢ ကစၢ်ပျဲလီၤ အဖိခွါထဲတဂၤဧိၤလၢ ဟီၣ်ခိၣ်ချၢဒီး ပျဲတူၢ်ဝဲ တၢ်နးတၢ်ဖှီၣ်, ဒီးဒုးသံဝဲ လၢပဂီၢ်လီၤ. (ယိၤဟၣ် ၃:၁၆) တၢ်ဟ့ၣ်အံၤန့ၣ် အခီပညီအိၣ်လၢ ပဂီၢ်ဒ်လဲၣ်. တၢ်အံၤဒုးအိၣ်ထီၣ် ခါဆူညါတၢ်မုၢ်လၢ်လၢ အလီၤကမၢကမၣ်န့ၣ်လီၤ.
၅ ခါဆူညါအဂီၢ် ပတၢ်မုၢ်လၢ်န့ၣ် သန့ၤထီၣ်ဒံးအသးလၢ ကစၢ်ယွၤမၤတၢ် အဂၤတမံၤ အဖီခိၣ်န့ၣ်လီၤ. ယဟိဝၤသူၣ်ထီၣ်ဝဲ မူခိၣ်တၢ်ပၢတၢ်ပြး, မ့းၡံအၤအဘီမုၢ်လီၤ. ဘီမုၢ်အံၤ ကမၤကတၢၢ်ကွံာ် တၢ်နးတၢ်ဖှီၣ်ခဲလၢာ်ဒီး ကမၤကဲထီၣ်ဟီၣ်ခိၣ်လၢ ပၤရဒံစူးလီၤ. ဆိကမိၣ်ကွၢ်တက့ၢ်! ပကအိၣ်ဘၣ်ဖဲန့ၣ် မုာ်မုာ်ခုၣ်ခုၣ် လီၤစိၤလီၤထီလီၤ. (စံးထီၣ်ပတြၢၤ ၃၇:၂၉) ခဲကနံၣ်အံၤအတီၢ်ပူၤ ပအိၣ်မူသ့ကျဲလၢ အဂ့ၤကတၢၢ်န့ၣ် ကစၢ်ယွၤနဲၣ်လိပှၤ ခဲအံၤဒၣ်လဲာ်န့ၣ်လီၤ. ကစၢ်ဟ့ၣ်စ့ၢ်ကီးပှၤ တၢ်ဟ့ၣ်လၢအမ့ၢ် တၢ်ဃ့ထုကဖၣ်လၢ တၢ်ကတိၤဆဲးကျိးလိာ်သးဒီး ကစၢ်လၢတၢ်သဘျ့န့ၣ်လီၤ. တၢ်သ့ၣ်တဖၣ်အံၤ မ့ၢ်ဒၣ်နၤဒီး ပှၤဟီၣ်ခိၣ်ဖိခဲလၢာ်အဂီၢ် ကျဲလၢယွၤပာ်ဖျါ အတၢ်အဲၣ်အကျါ အိၣ်ဒၣ်တနီၤန့ၣ်လီၤ.
၆. ယဟိဝၤ ပာ်ဖျါအတၢ်အဲၣ်အံၤ နအဲၣ်ဆၢက့ၤကသ့ဒ်လဲၣ်.
၆ တၢ်သံကွၢ် အကါဒိၣ်လၢ ကြၢးနဆိကမိၣ်န့ၣ် မ့ၢ်ဒ်အံၤလီၤ– ယကဘၣ် ဟ့ၣ်ဆၢက့ၤ ယဟိဝၤ အတၢ်အဲၣ်ဒ်လဲၣ်. ပှၤအါဂၤ ကစံးဆၢဝဲလၢ “ဘၣ်အဲၣ်ဆၢက့ၤ ယဟိဝၤသၢၣ်.” နၤစ့ၢ်ကီး နကစံးဆၢဒ်န့ၣ်ဧါ. ယ့ၣ်ၡူးစံးဝဲလၢ တၢ်မၤလိာ်အံၤမ့ၢ် အဒိၣ်ကတၢၢ်န့ၣ်လီၤ– “အဲၣ်ယွၤနကစၢ်လၢ နသူၣ်ကံၢ်သးလဲ, ဒီးနသးဒီဖျၢၣ်ညါ, ဒီးနတၢ်ကူၣ်တၢ်ဖး တုၤအလၢာ်တက့ၢ်.” (မးသဲ ၂၂:၃၇) နအိၣ်ဒီးတၢ်ဂ့ၢ်အါမး နီၢ်နီၢ်လၢ နကအဲၣ် ယဟိဝၤ ကစၢ်ယွၤအဂီၢ်န့ၣ်လီၤ. ဘၣ်ဆၣ် ထဲဒၣ်သးအတၢ်တူၢ်ဘၣ်လၢ နအိၣ်ဒီးတၢ်အဲၣ်ဒ်သိးအံၤန့ၣ် လီၤဂာ်လၢ နအဲၣ်ယဟိဝၤလၢ နသးဒီဖျၢၣ်, ဒီးနတၢ်ကူၣ်တၢ်ဖး တုၤအလၢာ်န့ၣ်ဧါ.
၇. တၢ်အဲၣ်ယွၤ စံးတၢ်န့ၣ် ပာ်ဃုာ်အါန့ၢ်တက့ၢ်ဒ် တၢ်တူၢ်ဘၣ်ဧါ. တဲဖျါထီၣ်တက့ၢ်.
၇ ဒ်လံာ်စီဆှံပူၤ ပာ်ဖျါဝဲအသိး တၢ်အဲၣ်ကစၢ်ယွၤန့ၣ် တမ့ၢ်ထဲဒၣ် သးအတၢ်တူၢ်ဘၣ်တမံၤဘၣ်. သးအတၢ်တူၢ်ဘၣ်လၢ တၢ်အဲၣ်ယဟိဝၤန့ၣ် လိၣ်ဝဲသပှၢ်တၢၢ်သနာ်က့ တၢ်တူၢ်ဘၣ်အံၤန့ၣ် မ့ၢ်ဒံးဒၣ် တၢ်စးထီၣ်အဲၣ်နီၢ်နီၢ် ယဟိဝၤန့ၣ်လီၤ. ဖီသၣ်အထူၣ်လၢ အိၣ်ဒီးအသၣ်အါမး ကကဲထီၣ်အဂီၢ် ဖီသၣ်အချံတဖျၢၣ် လိၣ်ဝဲသပှၢ်တၢၢ်လီၤ. ဘၣ်ဆၣ် နမ့ၢ်သးလီ ဖီသၣ်တဖျၢၣ်ဒီး ပှၤတဂၤဂၤ မ့ၢ်ဟ့ၣ်နၤလၢ ဖီသၣ်အချံဖိတဖျၢၣ်န့ၣ် နသးကမံ ကစီဒီဧါ. တမ့ၢ်နသးကမံဘၣ်! ဒ်န့ၣ်သိးလီၤ, တၢ်တူၢ်ဘၣ်လၢ တၢ်အဲၣ်ယဟိဝၤ ယွၤန့ၣ်မ့ၢ်ဒၣ် တၢ်အစးခီၣ်ထံးလီၤ. လံာ်စီဆှံ သိၣ်လိဝဲဒ်အံၤလီၤ– “တၢ်အဲၣ်ယွၤ မ့ၢ်အအံၤ, လၢပတိၢ်န့ၢ်အတၢ်မၤလိာ်လီၤ. ဒီးအတၢ်မၤလိာ် န့ၣ်တကီတခဲဘၣ်လီၤ.” (၁ ယိၤဟၣ် ၅:၃) ပမ့ၢ်အဲၣ်နီၢ်နီၢ် ကစၢ်ယွၤဒီး ပကဘၣ်သၣ်တၤသၣ် လၢအဂ့ၤလီၤ. တၢ်အံၤ ပကဘၣ်ပာ်ဖျါလၢ တၢ်မၤတဖၣ်န့ၣ်လီၤ.—မးသဲ ၇:၁၆-၂၀.
၈, ၉. ပပာ်ဖျါထီၣ် တၢ်အဲၣ်ကစၢ်ယွၤဒီး တၢ်စံးဘျုးက့ၤအီၤ ကသ့ဒ်လဲၣ်.
၈ ဖဲပတိၢ်န့ၢ်ဖံးဃာ် ကစၢ်ယွၤ အတၢ်မၤလိာ်ဒီး ပအိၣ်မူထွဲမၤထွဲ အတၢ်သိၣ်တၢ်သီ မိၢ်ပှၢ်အခါ မ့ၢ်ဒၣ်ပပာ်ဖျါ ပတၢ်အဲၣ် ကစၢ်န့ၣ်လီၤ. ပကမၤ ဒ်န့ၣ်အဂီၢ် တကီခဲကဲၣ်ဆိးဘၣ်. ကကဲထီၣ် တၢ်ဝံတၢ်ယိး ယံၤဒီး, ယဟိဝၤ အတၢ်မၤလိာ်တဖၣ်န့ၣ် ကဲထီၣ်တၢ်မၤစၢၤလၢ ပကအိၣ်ဒီး တၢ်အိၣ်မူလၢ အဒုးမုာ်သူၣ်မုာ်သး, ဒုးသးခု, ဒီးဒုးမံသူၣ်မံသးပှၤန့ၣ်လီၤ. (ယၡါယၤ ၄၈:၁၇, ၁၈) ပမ့ၢ်အိၣ်မူဒ် ယဟိဝၤ အတၢ်နဲၣ်လိအသိးန့ၣ်, မ့ၢ်တၢ်ပာ်ဖျါထီၣ်လၢ ပပာ်လုၢ်ပာ်ပှ့ၤနီၢ်နီၢ် ပပၢ်အိၣ်လၢမူခိၣ် မၤန့ၢ်တၢ်လၢ ပဂီၢ်ခဲလၢာ်န့ၣ်လီၤ. လီၤသးအုးမးလၢ မုၢ်မဆါတနံၤအံၤ ပှၤပာ်ဖျါထီၣ် တၢ်ပာ်လုၢ်ပာ်ပှ့ၤ အိၣ်ဒၣ်စှၤဂၤလီၤ. ပတအဲၣ်ဒိးမ့ၢ် ပှၤလၢတသ့ၣ်ညါဆၢ တၢ်ဘျုး ဒ်ပှၤတနီၤလၢ အိၣ်မူဖဲ ယ့ၣ်ၡူးအိၣ်ဖဲဟီၣ်ခိၣ် အဆၢကတီၢ်အခါန့ၣ်ဘၣ်. ယ့ၣ်ၡူးမၤဘျါဝဲ ပှၤလိၤတဂ့ၤ အဂၤတဆံလီၤ, ဘၣ်ဆၣ် ပှၤဟဲက့ၤဆူ ကစၢ်အအိၣ်ဒီး စံးဝဲတၢ်ဘျုးန့ၣ် အိၣ်ထဲဒၣ်တဂၤဧိၤလီၤ. (လူၤကၣ် ၁၇:၁၂-၁၇) ပအဲၣ်ဒိးလီၤဂာ်ဒ်သိး ပှၤလၢအသ့ၣ်ညါဆၢ တၢ်ဘျုးအံၤလီၤ, တအဲၣ်ဒိးလီၤဂာ်ဒီး ပှၤလၢတသ့ၣ်ညါဆၢ တၢ်ဘျုးခွံဂၤဘၣ်.
၉ မ့မ့ၢ်ဒ်န့ၣ်ဒီး ယဟိဝၤ အတၢ်မၤလိာ်တဖၣ်လၢ ပကဘၣ် တိၢ်န့ၢ်ဖံးဃာ်န့ၣ် မ့ၢ်မနုၤလဲၣ်. အါတက့ၢ်န့ၣ် ပကတိၤသကိး ဝံၤတ့ၢ်လံလၢ လံာ်အံၤအပူၤလီၤ. ဘၣ်ဆၣ် ပကက့ၤကွၢ်ကဒါက့ၤ စှၤဘီန့ၣ်လီၤ. ပမ့ၢ်တိၢ်န့ၢ်ဖံးဃာ် ကစၢ်ယွၤ အတၢ်မၤလိာ်တဖၣ်န့ၣ် ကဲထီၣ်တၢ်မၤစၢၤလၢ ပကအိၣ်ဂၢၢ်အိၣ်ကျၢၤလၢ ယွၤအတၢ်အဲၣ်တၢ်ကွံ အပူၤန့ၣ်လီၤ.
သုးဘူးနသးဆူ ယွၤအအိၣ် အါန့ၢ်ဒံးလၢညါတက့ၢ်
၁၀. တဲဖျါထီၣ် တၢ်ဂ့ၢ်လၢ ဘၣ်မနုၤအဃိ ထီဘိပကဘၣ်မၤလိ တၢ်သ့ၣ်ညါလၢ ဘၣ်ဃးဒီး ယဟိဝၤယွၤန့ၣ် အကါဒိၣ်အဂ့ၢ်န့ၣ်တက့ၢ်.
၁၀ အါတက့ၢ်န့ၣ်, တၢ်သိၣ်လိမၤယုၤ ယဟိဝၤအဂ့ၢ်န့ၣ် မ့ၢ်ခီၣ်ခါ အကါဒိၣ်လၢ တၢ်သုးဘူးသးဆူ ကစၢ်အအိၣ်လီၤ. တၢ်အံၤပကဘၣ်မၤအီၤ ထီဘိလီၤ. ပစံးဒၣ်ကလိာ်လၢ ဖဲမုၢ်တနၤလၢ တၢ်ခူၣ်ဒိၣ်မးန့ၣ် နလဲၤတုၤလၢ ဟံၣ်အချၢဒီး နမၤကဲၤထီၣ် မ့ၣ်အူဒ်သိး နကလၢၤထီၣ်အဂီၢ်လီၤ. နကပျဲ လီၤပံာ်ကွံာ် မ့ၣ်အူလၣ် ကယီကယီဧါ. နတပျဲဘၣ်. နကထဲနုာ် သ့ၣ်မုၣ်ထီဘိလၢ မ့ၣ်အူကကဲၤဒီး တၢ်ကလၢၤအဂီၢ်လီၤ. ဘၣ်တဘၣ် လၢနဂီၢ်န့ၣ် တၢ်အံၤကမ့ၢ် တၢ်လၢအကါဒိၣ် ကတၢၢ်န့ၣ်လီၤ! ဒ်သ့ၣ်မုၣ်န့ၣ် ဒုးကဲၤမ့ၣ်အူအသိး ‘တၢ်သ့ၣ်ညါနၢ်ပၢၢ်လၢ ဘၣ်ဃးဒီးယွၤ’ န့ၣ်ဒုးဂၢၢ်ကျၢၤဝဲ ပတၢ်အဲၣ် ယဟိဝၤန့ၣ်လီၤ.—ကတိၤဒိ ၂:၁-၅, ဟသ.
ဒ်မ့ၣ်အူအသိး, နတၢ်အဲၣ် ယဟိဝၤ ကကဲၤထီဘိအဂီၢ် မ့ၣ်အူဆၣ်လိၣ်ဝဲ
၁၁. ယ့ၣ်ၡူးအတၢ်သိၣ်လိန့ၣ် အဘျုးအိၣ်လၢ အပျဲၢ်အဘီၣ်တဖၣ်အဖီခိၣ် ဒ်လဲၣ်.
၁၁ ယ့ၣ်ၡူးအဲၣ်ဒိးလၢ အပျဲၢ်အဘီၣ်တဖၣ် အသးဆူၣ်ဒိၣ်မး ထီဘိလၢ တၢ်အဲၣ်ယဟိဝၤ ဒီးကစၢ်အကလုၢ်ကထါ တၢ်မ့ၢ်တၢ်တီလၢ အလုၢ်ဒိၣ်ပှ့ၤဒိၣ် န့ၣ်လီၤ. ကစၢ်ဂဲၤဆၢထၢၣ် သမူထီၣ်က့ၤဝံၤအလီၢ်ခံ သိၣ်လိအပျဲၢ်အဘီၣ် ခံဂၤလၢ လံာ်ဧ့ၤဘြံၤအပူၤ ဝံအတၢ်စံးပာ်တနီၤန့ၣ် ဟဲလၢပှဲၤထီၣ်လၢအီၤ အဂ့ၢ်န့ၣ်လီၤ. အဘျုးမ့ၢ်ဝဲ မနုၤလဲၣ်. လၢခံအဝဲသ့ၣ် စံးဝဲဒ်အံၤလီၤ– “ဖဲအဝဲဒၣ် ကတိၤတၢ်ဒီးပှၤလၢကျဲဒီး တဲနၢ်ပၢၢ်ပှၤ ဘၣ်ဃးတၢ်ကွဲးအသးစီဆှံ တဖၣ်အဂ့ၢ်န့ၣ်, တၢ်မၤမးအသးဒ် မ့ၣ်အူအီၣ်တၢ်လၢ ပပူၤ တမ့ၢ်ဘၣ်ဧါ.”—လူၤကၣ် ၂၄:၃၂, ခစ.
၁၂, ၁၃. (က) ပှၤအါဂၤလၢ မုၢ်မဆါတနံၤအံၤ အတၢ်အဲၣ်ယွၤဒီး လံာ်စီဆှံန့ၣ် မၤအသးဒ်လဲၣ်. (ခ) ပတၢ်အဲၣ် သုတခုၣ်လီၤတဂ့ၤအဂီၢ် ပတြီသဒၢကသ့ဒ်လဲၣ်.
၁၂ ဖဲနစးထီၣ်မၤလိ လံာ်စီဆှံ သိၣ်လိတၢ် အမ့ၢ်အတီတဖၣ်အခါ နထံၣ်ဘၣ်လၢ တၢ်သးခု, တၢ်သးဆူၣ်, တၢ်အဲၣ်ယွၤ ဆူၣ်ထီၣ်လၢနသးပူၤ တမ့ၢ်ဘၣ်ဧါ. နကထံၣ်ဘၣ် သပှၢ်တၢၢ်လီၤ. ပှၤအါဂၤ တူၢ်ဘၣ်ဝဲ ဒ်သိးန့ၣ်လီၤ. ခဲအံၤ တၢ်အဲၣ်လၢအဆူၣ်အံၤ ကမူဝဲဒီး ကဒိၣ်ထီၣ်အဂီၢ် ကီဒိၣ်မးန့ၣ်လီၤ. ပဝဲသ့ၣ်တဖၣ် ပတအဲၣ်ဒိးလူၤပိာ်ထွဲ မုၢ်မဆါတနံၤအံၤ ဟီၣ်ခိၣ်တၢ်အိၣ်အသးတဖၣ် အခံဘၣ်. ယ့ၣ်ၡူးတဲဆိပာ်ဝဲ ဒ်အံၤလီၤ– “ပှၤအါဂၤ အတၢ်အဲၣ်တၢ်ကွံ ကစှၤလီၤဝဲလီၤ.” (မးသဲ ၂၄:၁၂) နတၢ်အဲၣ် ယဟိဝၤဒီး လံာ်စီဆှံ တၢ်မ့ၢ်တၢ်တီအံၤ သုတခုၣ်လီၤတဂ့ၤအဂီၢ် နတြီသဒၢအီၤကသ့ဒ်လဲၣ်.
၁၃ မၤလိကဒီးဆူညါ တၢ်သ့ၣ်ညါလၢ ဘၣ်ဃးဒီး ယဟိဝၤယွၤဒီး ယ့ၣ်ၡူးခရံာ်အဂ့ၢ်န့ၣ်တက့ၢ်. (ယိၤဟၣ် ၁၇:၃) တၢ်လၢနသ့ၣ်ညါဘၣ်လၢ ယွၤအကလုၢ်ကထါအပူၤတဖၣ်န့ၣ် ဆိကမိၣ်ထံအီၤ ဒိၣ်ဒိၣ်ယိာ်ယိာ်တက့ၢ်. သံကွၢ်လီၤနသးဒ်အံၤ– ‘တၢ်အံၤသိၣ်လိယၤလၢ ယဟိဝၤယွၤအဂ့ၢ် တၢ်မနုၤလဲၣ်. တၢ်ဂ့ၢ်အဂၤ မနုၤအိၣ်လၢ ယကအဲၣ်ကစၢ်လၢ ယသူၣ်ဒီဖျၢၣ်, သးဒီဖျၢၣ်အဂီၢ်လဲၣ်.’ (စံးထီၣ်ပတြၢၤ ၇၇:၁၂) တၢ်ဆိကမိၣ်တၢ် ဖးယိာ်ဒ်သိးအံၤန့ၣ် ကဒုးဆူၣ်ထီၣ် နတၢ်အဲၣ်ယဟိဝၤန့ၣ်လီၤ.
၁၄. ပတၢ်အဲၣ်ယဟိဝၤ ကမူဝဲအဂီၢ် တၢ်ဃ့ထုကဖၣ်အံၤ မၤစၢၤပှၤသ့ဒ်လဲၣ်.
၁၄ တၢ်ဃ့ထုကဖၣ် ဘၣ်ဆၢဘၣ်ကတီၢ်န့ၣ် မ့ၢ်ကျဲအဂၤတမံၤလၢ နတၢ်အဲၣ်ယဟိဝၤ ကဆူၣ်ထီဘိအဂီၢ်န့ၣ်လီၤ. (၁ သ့းစၤလနံ ၅:၁၇) တၢ်နီၤဖး ၁၇ လၢလံာ်အံၤအပူၤန့ၣ်, ပမၤလိဘၣ်လၢ တၢ်ထုကဖၣ်န့ၣ် မ့ၢ်တၢ်ဟ့ၣ်လုၢ်ပှ့ၤဒိၣ်လၢ ယွၤဟ့ၣ်ပှၤန့ၣ်လီၤ. တၢ်ကတိၤတၢ်ပျီပျီဒီး ဘၣ်ဆၢဘၣ်ကတီၢ် မ့ၢ်အိၣ်ဝဲဒီး ပှၤကညီအတၢ်ရ့လိာ်သး ဂုၤထီၣ်ပသီထီၣ်အသိး တၢ်ဃ့ထုကဖၣ် ဘၣ်ဆၢဘၣ်ကတီၢ် မ့ၢ်အိၣ်ဝဲဒီး ပတၢ်ရ့လိာ်သးဒီး ယဟိဝၤကမူဝဲန့ၣ်လီၤ. ပတၢ်ထုကဖၣ်န့ၣ် အကါဒိၣ်လၢ သုတမ့ၢ်နီတဘျီဒ်သိး စဲး—တၢ်မၤညီနုၢ်လၢ တၢ်ကတိၤဝံၤ ကတိၤက့ၤလၢ အခီပညီ မ့တမ့ၢ် တၢ်တူၢ်ဘၣ်နီၢ်နီၢ် တအိၣ်ဘၣ်—န့ၣ်လီၤ. လိၣ်လၢပကဘၣ်ကတိၤတၢ်ဒီး ယဟိဝၤဒ်သိးဒီး ဖိသၣ်တဂၤကတိၤတၢ်ဒီး ပၢ်လၢအလီၤအဲၣ် တဂၤန့ၣ်လီၤ. ပကအဲၣ်ဒိးကတိၤတၢ်လၢ တၢ်ယူးယီၣ်ပာ်ကဲ သနာ်က့ ကဘၣ်မ့ၢ် တၢ်ကတိၤလၢပျီပျီ, တီတီဒီး ဟဲလၢပသးပူၤန့ၣ်လီၤ. (စံးထီၣ်ပတြၢၤ ၆၂:၈) မ့ၢ်လီၤ, တၢ်မၤလိ လံာ်စီဆှံဒၣ်တၢ်ဒီး တၢ်ဃ့ထုကဖၣ်လၢသးဒီဖျၢၣ်န့ၣ် မ့ၢ်တၢ်အကါဒိၣ်တဖၣ်ဒီး မၤစၢၤပှၤလၢ ပကအိၣ်ဂၢၢ်အိၣ်ကျၢၤလၢ ယွၤအတၢ်အဲၣ်တၢ်ကွံအပူၤန့ၣ်လီၤ.
ဃုထံၣ်န့ၢ် တၢ်သးခုလၢ နတၢ်ဘူၣ်ထီၣ်ဘါထီၣ် အပူၤတက့ၢ်
၁၅, ၁၆. တၢ်စံၣ်တဲၤတဲလီၤ ဘီမုၢ်တၢ်ကစီၣ် အတၢ်မၤန့ၣ် ဘၣ်မနုၤအဃိ ပဘၣ်ထံၣ်အီၤလိၤလိၤဒ် တၢ်အခွဲးအယာ်လီၤဆီ, ဒီးတၢ်လုၢ်ဒိၣ်ပှ့ၤဒိၣ် တခါအသိးလဲၣ်.
၁၅ တၢ်မၤလိ လံာ်စီဆှံဒၣ်တၢ် ဒီးတၢ်ဃ့ထုကဖၣ်န့ၣ် မ့ၢ်တၢ်မၤလၢ ဘၣ်ဃးဒီး တၢ်ဘူၣ်ထီၣ်ဘါထီၣ်လၢ ပဝဲသ့ၣ် တဂၤစုာ်စုာ် ပမၤဒၣ်ထဲ ပကစၢ်ဒၣ်ဝဲသ့လီၤ. ဘၣ်ဆၣ်, ခဲအံၤပကဆိကမိၣ် ကွၢ်သကိး တၢ်ဘူၣ်တၢ်ဘါ အသနၢၣ် တမံၤလၢ ပဘၣ်မၤလၢ ကမျဲၢ်အမဲာ်ညါလၢအမ့ၢ် ပတဲဘၣ်ပှၤဂၤလၢ ပတၢ်စူၢ်တၢ်နာ် အဂ့ၢ်န့ၣ်တက့ၢ်. မ့ၢ်နဟ့ၣ်နီၤလီၤ ပှၤဂၤလၢ လံာ်စီဆှံ တၢ်မ့ၢ်တၢ်တီလံဧါ. နမ့ၢ်ဟ့ၣ်နီၤလီၤလံန့ၣ်ဒီး နဒိးန့ၢ်ဘၣ် တၢ်အခွဲးအယာ်လီၤဆီ တမံၤလံလီၤ. (လူၤကၣ် ၁:၆၈-၇၅) ပနီၤလီၤ ယဟိဝၤယွၤအဂ့ၢ် တၢ်မ့ၢ်တၢ်တီလၢ ပသ့ၣ်ညါပာ် တဖၣ်အခါ မ့ၢ်ဒၣ်ပတူၢ်လိာ် မူဒါလၢ အကါဒိၣ်ဒိၣ်မး လၢတၢ်ဟ့ၢ်တ့ၢ် ခရံာ်ဖိနီၢ်နီၢ်ခဲလၢာ်, လၢအမ့ၢ် တၢ်စံၣ်တဲၤတဲလီၤ ယွၤအဘီအမုၢ် တၢ်သးခုကစီၣ်န့ၣ်လီၤ.—မးသဲ ၂၄:၁၄; ၂၈:၁၉, ၂၀.
၁၆ တၢ်မၢဖိ ပီလူးထံၣ်ဝဲ အတၢ်သးခုကစီၣ် တၢ်မၤဒ် တၢ်လုၢ်ဒိၣ်ပှ့ၤဒိၣ် အသိးန့ၣ်လီၤ. (၂ ကရံၣ်သူး ၄:၇) တၢ်တဲနၢ်ဟူပှၤဂၤလၢ ယဟိဝၤယွၤဒီး ကစၢ်အတၢ်တိာ်ပာ်တဖၣ် အဂ့ၢ်န့ၣ် မ့ၢ်တၢ်မၤအဂ့ၤကတၢၢ်လၢ နမၤသ့လီၤ. တၢ်အံၤမ့ၢ်တၢ်မၤ ကစၢ်အတၢ်မၤ အဂ့ၤကတၢၢ်ဒီး ကဟ့ၣ်ပှၤ တၢ်ဘျုးတၢ်ဖှိၣ် အဂ့ၤကတၢၢ်လီၤ. ခီဖျိနပာ်ဃုာ်လၢ တၢ်မၤအံၤန့ၣ်မ့ၢ်န မၤစၢၤပှၤသူၣ်ဂ့ၤသးဝါ တဖၣ်လၢ ကသုးဘူးအသးဆူ ပၢ်အိၣ်လၢမူခိၣ်အအိၣ်ဒီး ကတုၤဆူ တၢ်မူအထူအယိာ် အကျဲဖီခိၣ်အဂီၢ်န့ၣ်လီၤ! တၢ်မၤလၢ ကဒုးသးမံပှၤ အါန့ၢ်ဒံးတၢ်မၤအံၤန့ၣ် ဘၣ်ကအိၣ်ဒံးဧါ. အါန့ၢ်အန့ၣ် တၢ်အုၣ်သးလၢ ယဟိဝၤဒီး ကစၢ်အကလုၢ်ကထါအဂ့ၢ်န့ၣ် ဒုးအါထီၣ်နနီၢ်ကစၢ် အတၢ်စူၢ်တၢ်နာ် ဒီးဒုးဂၢၢ်ကျၢၤထီၣ် နတၢ်အဲၣ်ကစၢ်န့ၣ်လီၤ. ယဟိဝၤ ပာ်လုၢ်ပာ်ပှ့ၤ နတၢ်ဂုာ်ကျဲးစၢးလီၤ. (ဧ့ၤဘြံၤ ၆:၁၀) နတၢ်မၤ မ့ၢ်အါလၢ တၢ်မၤအံၤန့ၣ် ကကဲထီၣ်တၢ်မၤစၢၤလၢ နကအိၣ်ဂၢၢ်အိၣ်ကျၢၤလၢ ယွၤအတၢ်အဲၣ်အပူၤန့ၣ်လီၤ.—၁ ကရံၣ်သူး ၁၅:၅၈.
၁၇. မုၢ်မဆါတနံၤအံၤ ဘၣ်မနုၤအဃိ ပဘၣ်ဂုာ်လိာ်မၤ ခရံာ်ဖိတၢ်သးခုကစီၣ်လဲၣ်.
၁၇ အကါဒိၣ်လၢ ပကဘၣ်သ့ၣ်နီၣ်လၢ တၢ်စံၣ်တဲၤတဲလီၤ ဘီမုၢ်တၢ်ကစီၣ်အတၢ်မၤန့ၣ် ဘၣ်ဂုာ်လိာ်မၤအီၤလီၤ. လံာ်စီဆှံ စံးဝဲဒ်အံၤလီၤ– “စံၣ်တဲၤတဲလီၤ တၢ်အကလုၢ်အကထါတက့ၢ်. ကျဲးစၢးလၢ တၢ်အကတီၢ်ဘၣ်လၢ အကတီၢ်တဘၣ်ဘၣ်တက့ၢ်.” (၂ တံၤမသ့း ၄:၂) မုၢ်မဆါတနံၤအံၤ ဘၣ်မနုၤအဃိ ပဘၣ်ဂုာ်လိာ်မၤ တၢ်အံၤလဲၣ်. ယွၤအကလုၢ်ကထါ ပာ်ဖျါဝဲဒ်အံၤလီၤ– “ယွၤအမုၢ်နံၤဖးဒိၣ်တနံၤ အိၣ်ဘူးထီၣ်လံ, အိၣ်ဘူးထီၣ်လံ, ဒီးဟဲဝဲချ့ချ့လီၤ.” (စဖါနယၤ ၁:၁၄) မ့ၢ်လီၤ, တၢ်ဆၢကတီၢ်လၢ ယဟိဝၤ ကမၤကတၢၢ်ကွံာ် တၢ်ရဲၣ်တၢ်ကျဲၤအံၤခဲလၢာ်န့ၣ် ဟဲဝဲချ့ချ့န့ၣ်လီၤ. ပှၤကညီတဖၣ် လိၣ်တၢ်ဟ့ၣ်ပလီၢ်လီၤ! လိၣ်လၢအဝဲသ့ၣ် ကဘၣ်သ့ၣ်ညါဝဲလၢ ဆၢကတီၢ်ခဲအံၤန့ၣ် ကဘၣ်ဃုထၢ ယဟိဝၤလၢ အတၢ်ပၢ အဒိၣ်ကတၢၢ် ကစၢ်န့ၣ်လီၤ. တၢ်အကတၢၢ်အံၤ “ကဟဲသပှၢၢ်တၢၢ် ဒီးတသုးနံၤသုးသီဘၣ်.”—ဃဘးကူာ် ၂:၃.
၁၈. ဘၣ်မနုၤအဃိ ပကြၢးဘူၣ်ထီၣ်ဘါထီၣ် ယဟိဝၤလၢ ကမျၢၢ်သ့ၣ်ညါ ဃုာ်ဒီးခရံာ်ဖိနီၢ်နီၢ်တဖၣ်လဲၣ်.
၁၈ ယဟိဝၤအဲၣ်ဒိး လၢပပာ်ဖှိၣ် ရ့လိာ်သးဒီး ခရံာ်ဖိနီၢ်နီၢ် တဖၣ်ဒီး ဘူၣ်ထီၣ်ဘါထီၣ်အီၤလၢ ကမျၢၢ်သ့ၣ်ညါန့ၣ်လီၤ. လၢတၢ်န့ၣ်အဃိ ကစၢ်အကလုၢ်ကထါ စံးဝဲဒ်အံၤလီၤ– “မ်ပကွၢ်လိာ်ပသး တဂၤဒီးတဂၤ, ဒ်သိးပကသဆၣ်ထီၣ်လိာ်ပခံဆူ တၢ်အဲၣ်တၢ်ကွံ, ဒီးတၢ်မၤဂ့ၤတၢ်န့ၣ်တက့ၢ်. ဟးဆှဲးတၢ်အိၣ်ဖှိၣ်ရိဖှိၣ်, ဒ်ပှၤတနီၤနီၤ အလုၢ်အလၢ် အသိးန့ၣ် တဂ့ၤ, ပသဆၣ်ထီၣ်လိာ်ပခံဒီး, ပထံၣ်အမုၢ်တနံၤ ဒံးဘူးထီၣ်ဒီး, မ်ပသဆၣ်ထီၣ်လိာ်ပခံ ဒံးအါထီၣ်တက့ၢ်.” (ဧ့ၤဘြံၤ ၁၀:၂၄, ၂၅) ဖဲပပာ်ဖှိၣ် လိာ်ပသးဒီး ပှၤလၢတၢ်နာ်ဒ်သိးပှၤ လၢခရံာ်ဖိတၢ်အိၣ်ဖှိၣ်ရိဖှိၣ် တဖၣ်အခါ ပဒိးန့ၢ်ဘၣ် တၢ်အခွဲးလၢ ပစံးထီၣ်ပတြၢၤဘၣ်, ဘူၣ်ထီၣ်ဘါထီၣ်ဘၣ် ယွၤလၢပအဲၣ်အီၤန့ၣ်လီၤ. ပဒိးန့ၢ်ဘၣ်စ့ၢ်ကီး တၢ်အခွဲးလၢ တဂၤဒီးတဂၤ မၤထီၣ်မၤထီ, ဟ့ၣ်ဂံၢ်ဟ့ၣ်ဘါလိာ်သးန့ၣ်လီၤ.
၁၉. ခရံာ်ဖိတၢ်အိၣ်ဖှိၣ်အပူၤ တၢ်အဲၣ်အပျံၤကဂၢၢ်ကျၢၤအဂီၢ် ပမၤတၢ်မနုၤသ့လဲၣ်.
၁၉ ဖဲပရ့လိာ်ပသးဒီး ပှၤဂၤလၢအဘူၣ်ထီၣ်ဘါထီၣ် ယဟိဝၤတဖၣ်အခါ မ့ၢ်ပမၤကျၢၤထီၣ်တၢ်အဲၣ်ဒီး တၢ်ရ့လိာ်သးအပျံၤလၢ တၢ်အိၣ်ဖှိၣ်ပူၤန့ၣ်လီၤ. ဒ်ယဟိဝၤ ထံၣ်ပတၢ်ဂ့ၤအသိး အကါဒိၣ်လၢ ပကဘၣ်ထံၣ် ပဝဲသ့ၣ်ကဒဲကဒဲ အတၢ်ဂ့ၤန့ၣ်လီၤ. တဘၣ်မုၢ်လၢ် တၢ်လၢတၢ်ပှဲၤလၢ ပှၤလၢတၢ်နာ် ဒ်သိးဒီးနၤအအိၣ်တဂ့ၤ. သ့ၣ်နီၣ်ထီၣ်လၢ ပဝဲသ့ၣ်ခဲလၢာ်န့ၣ် နီၢ်သးတၢ်ဒိၣ်ထီၣ်ထီထီၣ် တလီၤဂာ်လိာ်သးအဃိ, ပဝဲသ့ၣ်ကိးဂၤဒဲး ပမၤဘၣ် တၢ်ကမၣ်သ့လီၤ. (ကလီးစဲ ၃:၁၃) နမ့ၢ်ဂုာ်ကျဲးစၢး ရ့လိာ်သး ဘူးဘူးတံၢ်တံၢ်ဒီး ပှၤလၢအအဲၣ် ယဟိဝၤ ဒိၣ်မးတဖၣ်န့ၣ် နနီၢ်ကစၢ်ဒၣ်နဲ နကဂုၤထီၣ်ပသီထီၣ်လၢ နီၢ်သးတခီန့ၣ်လီၤ. မ့ၢ်လီၤ, တၢ်ဘူၣ်ထီၣ်ဘါထီၣ်သကိး ယဟိဝၤ ဃုာ်ဒီးနီၢ်သး ဒီပုၢ်ဝဲၢ်မုၢ်, ဒီပုၢ်ဝဲၢ်ခွါ တဖၣ်န့ၣ် ကမၤစၢၤနၤလၢ နကအိၣ်ဂၢၢ်အိၣ်ကျၢၤလၢ ယွၤအတၢ်အဲၣ် တၢ်ကွံအပူၤန့ၣ်လီၤ. ယဟိဝၤ ကဟ့ၣ်ဘျုးက့ၤ ပှၤလၢအအိၣ်ဂၢၢ်အိၣ်ကျၢၤလၢ အတၢ်အဲၣ်အပူၤတဖၣ်ဒ်လဲၣ်.
ယူာ်ဃီၤနစုဆူ “သးသမူနီၢ်နီၢ်” န့ၣ်တက့ၢ်
၂၀, ၂၁. ‘သးသမူနီၢ်နီၢ်’ န့ၣ်မ့ၢ်မနုၤလဲၣ်, ဘၣ်မနုၤအဃိ တၢ်အံၤမ့ၢ် တၢ်မုၢ်လၢ်လၢ အလီၤကမၢကမၣ်လဲၣ်.
၂၀ ယဟိဝၤ ဟ့ၣ်ဘျုး အခ့အပှၤလၢအတီ တဖၣ်လၢ သးသမူလီၤ, ဘၣ်ဆၣ် မ့ၢ်သးသမူဒ်လဲၣ်. ခဲအံၤသနာ်က့ ပအိၣ်မူတမ့ၢ်ဘၣ်ဧါ. ပဝဲအါဂၤ ကစံးဆၢလၢ ပအိၣ်မူမီၤလဲၣ်. ပသါထီၣ်သါလီၤ, ပအီၣ်တၢ်အီတၢ်လီၤ. လီၤတံၢ်လၢ ပအိၣ်မူန့ၣ်လီၤ. အါန့ၢ်အန့ၣ် ဖဲပသူၣ်ခုသးခု တစိၢ်ဖိန့ၣ် ပကစံး “ပအိၣ်မူ နီၢ်နီၢ် ခဲအံၤလီၤ.” ဘၣ်ဆၣ် မုၢ်မဆါတနံၤအံၤ ပှၤကညီတဖၣ် တအိၣ်မူနီၢ်နီၢ် နီတဂၤဘၣ်န့ၣ် လံာ်စီဆှံ ပာ်ဖျါဝဲ ဒ်တၢ်လၢအကါဒိၣ်န့ၣ်လီၤ.
ယဟိဝၤ အဲၣ်ဒိးဝဲလၢ နကအိၣ်မူ ဒ် ‘တၢ်အိၣ်မူနီၢ်နီၢ်‘ လၢအပှဲၤဒီး တၢ်သူၣ်ခုသးခု. မ့ၢ်နအဲၣ်ဒိး စ့ၢ်ကီးဧါ.
၂၁ ယွၤအကလုၢ်ကထါ ဆီၣ်ထွဲပှၤဒ်သိး ပက ‘ဟံးဃာ်ဂၢၢ်ကျၢၤ သးသမူနီၢ်နီၢ်’ န့ၣ်လီၤ. (၁ တံၤမသ့း ၆:၁၉, ဟသ) တၢ်ကတိၤတဖၣ်န့ၣ် ပာ်ဖျါဝဲလၢ ‘သးသမူနီၢ်နီၢ်’ န့ၣ် မ့ၢ်တၢ်လၢ ပကဒိးန့ၢ်အီၤလၢ ခါဆူညါန့ၣ်လီၤ. မ့ၢ်လီၤ, ဖဲပလၢထီၣ်ပှဲၤထီၣ်အခါ, ပကအိၣ်မူဘၣ် ဒ်ယွၤအတၢ်တိာ်ပာ် အခီၣ်ထံးအသိးအဃိ, ပကအိၣ်မူဘၣ် ဒ်တၢ်ကတိၤအံၤ အခီပညီလၢပှဲၤ အသိးန့ၣ်လီၤ. ဖဲပအိၣ်မူလၢ ပၤရဒံစူးလၢ အိၣ်ဒီးတၢ်အိၣ်ဆူၣ်အိၣ်ချ့ အလၢအပှဲၤ, တၢ်ဃူတၢ်ဖိး, တၢ်သူၣ်ခုသးခုအခါ, ပကမုာ်လၤဘၣ် ‘သးသမူနီၢ်နီၢ်’—တၢ်မူအထူအယိာ်—လၢအကတၢၢ် တအိၣ်ဘၣ်န့ၣ်လီၤ. (၁ တံၤမသ့း ၆:၁၂) တမ့ၢ်တၢ်မုၢ်လၢ်လၢ အဂ့ၤဒိၣ်မး ဘၣ်ဧါ.
၂၂. ပ‘ဟံးဃာ်ဂၢၢ်ကျၢၤ သးသမူနီၢ်နီၢ်’ ကသ့ဒ်လဲၣ်.
၂၂ ပ ‘ဟံးဃာ်ဂၢၢ်ကျၢၤ သးသမူနီၢ်နီၢ်’ ကသ့ဒ်လဲၣ်. လံာ်စီဆှံအဆၢအံၤ အဖီခိၣ်န့ၣ် ပီလူးဆီၣ်ထွဲ ခရံာ်ဖိတဖၣ်လၢ က“မၤဂ့ၤတၢ်” ဒီး “ထူးထီၣ်တီၤထီၣ်လၢ တၢ်မၤဂ့ၤတဖၣ်” န့ၣ်လီၤ. (၁ တံၤမသ့း ၆:၁၈) လၢတၢ်န့ၣ်အဃိ, ဖျါတြၢၤကလာ်လၢ တၢ်အံၤသန့ၤထီၣ်အသးလၢ ပမၤထွဲ တၢ်မ့ၢ်တၢ်တီလၢ ပမၤလိသ့ၣ်ညါပာ်လၢ လံာ်စီဆှံအပူၤန့ၣ်လီၤ. ဘၣ်ဆၣ် ပီလူးအဲၣ်ဒိးစံးဝဲလၢ ပမၤတၢ်ဂ့ၤအဃိ ပကဒိးန့ၢ်ဘၣ် ‘သးသမူနီၢ်နီၢ်’ န့ၣ်ဧါ. တမ့ၢ်ဘၣ်! တၢ်မုၢ်လၢ်လၢ အလီၤကမၢကမၣ်အံၤန့ၣ် ပဒိးန့ၢ်ဘၣ်လၢ ကစၢ်ယွၤ “အတၢ်ဟ့ၣ်ကလီ” ပှၤအဃိလီၤ. (ရိမ့ၤ ၅:၁၅, ခစ) ဘၣ်ဆၣ် ယဟိဝၤဘၣ်အသးလၢ ကဟ့ၣ်ဘျုးပှၤလၢ အဘူၣ်ထီၣ်ဘါထီၣ်အီၤလၢ အတီတဖၣ်န့ၣ်လီၤ. အဝဲအဲၣ်ဒိးလၢ နအိၣ်မူဘၣ်လၢ ‘သးသမူနီၢ်နီၢ်’ န့ၣ်လီၤ. ပှၤလၢအအိၣ်ဂၢၢ်အိၣ်ကျၢၤလၢ ယွၤအတၢ်အဲၣ်အပူၤတဖၣ်န့ၣ် ကဒိးန့ၢ်ဘၣ် တၢ်မူအထူအယိာ်လၢ အိၣ်ဒီးတၢ်သူၣ်ခုသးခုဒီး တၢ်ဃုတၢ်ဖိးန့ၣ်လီၤ.
၂၃. ဘၣ်မနုၤအဃိ အကါဒိၣ်လၢ ပကဘၣ်အိၣ်ဂၢၢ်အိၣ်ကျၢၤလၢ ယွၤအတၢ်အဲၣ်တၢ်ကွံအပူၤလဲၣ်.
၂၃ ပဝဲသ့ၣ်တဂၤစုာ်စုာ်န့ၣ် ပကြၢးသံကွၢ်လီၤက့ၤပသး ဒ်အံၤလီၤ– ‘မ့ၢ်ယဘူၣ်ထီၣ်ဘါထီၣ် ယွၤလၢ ကျဲလၢအဝဲပာ်လီၤဝဲလၢ လံာ်စီဆှံပူၤအသိးန့ၣ်ဧါ.’ နစံးဆၢမ့ၢ်သ့ ကိးနံၤဒဲးလၢ ယဘူၣ်ထီၣ်ဘါထီၣ်လီၤန့ၣ် မ့ၢ်နအိၣ်လၢ ကျဲမ့ၢ်ကျဲတီအဖီခိၣ်န့ၣ်လီၤ. ပနာ်သပှၢ်တၢၢ်သ့လၢ ယဟိဝၤမ့ၢ် ပတၢ်ပူၤဖျဲးအလီၢ်လီၤ. ကစၢ်ကတြီသဒၢ ပှၤလၢအတီဒီးအီၤတဖၣ်လၢ တၢ်ရဲၣ်တၢ်ကျဲၤ အလီၢ်လံၤအံၤ အမုၢ်နံၤလၢခံ လၢအပှဲၤဒီးတၢ်ကီတၢ်ခဲ ဒီကတီၢ်ညါန့ၣ်လီၤ. ယဟိဝၤ ကဆှၢပှၤဆူ တၢ်ရဲၣ်တၢ်ကျဲၤအသီလၢ အပှဲၤဒီးတၢ်လၤကပီၤ လၢကဟဲဘူးထီၣ်လံန့ၣ်လီၤ. ပကထံၣ်ဘၣ် တၢ်မၤအသးဒ်အံၤအဃိ မ့ၢ်တၢ်လၢ အလီၤသူၣ်ခုသးခုဒိၣ်မးလီၤ! ပကသးခုဒိၣ်မးလၢ ပဃုထၢဘၣ် တၢ်မ့ၢ်တၢ်တီလၢ မုၢ်နံၤခံကတၢၢ် အတီၢ်ပူၤအဃိလီၤ! ခဲကနံၣ်အံၤ နမ့ၢ်ဃုထၢမၤ တၢ်န့ၣ်ဒီး နကမုာ်လၤဘၣ်လၢ ယဟိဝၤယွၤ သုးကျဲၤပာ်ဝဲ ‘သးသမူနီၢ်နီၢ်’ အံၤလီၤထူလီၤယိာ်န့ၣ်လီၤ.
တၢ်ဂ့ၤအဂၤလၢ နကဘၣ်သး
ခဲၣ်ဖ့ လီၤဆီ
ဘၣ်မနုၤအဃိ ဘၣ်မၤလိလံာ်စီဆှံလဲၣ်—အထီ
လံာ်စီဆှံမၤစၢၤ ပှၤလၢအကကွဲၢ်တဖၣ် ဒ်သိးကသ့ၣ်ညါဝဲ တၢ်သံကွၢ်လၢ အရ့ဒိၣ်တဖၣ်အံၤအတၢ်စံးဆၢလီၤ
