တၢ်မၤလိ ၉
“ဃ့ၢ်ဟးဆှဲးကွံာ် တၢ်မၤကမၣ်မုၣ်ကမၣ်ခွါ”
“မၤသးဒ်န့ၣ်ဒီး, မၤသံသုဂီၤတဖၣ်လၢ ဟီၣ်ခိၣ်ချၢ, ဒ်ပစံးတၢ်အသိး, တၢ်မၤကမၣ်မုၣ်ကမၣ်ခွါ, တၢ်အဲၣ်တလ့ၤအဲၣ်တဘီ, တၢ်သးကတၢ, တၢ်သးကွံတၢ်လၢအအၢ, ဒီးတၢ်သးကွံစုလီၢ်ခီၣ်ခိၣ်လၢ အမ့ၢ်တၢ်ဘါတၢ်ဂီၤန့ၣ်တက့ၢ်.”—ကလီးစဲ ၃:၅.
၁, ၂. စီၤဘံးလၣ်ကူၣ်ထီၣ်ဖးလီၤဝဲလၢ ကမၤဘၣ်ဒိယဟိဝၤယွၤ အပှၤဂီၢ်မုၢ်လၢကျဲဒ်လဲၣ်.
ပှၤတခွဲညၣ်ဖိတဂၤ လဲၤဝဲဆူတၢ်လီၢ်လၢ အလဲၤဝဲမုာ်ကတၢၢ်တတီၤ ဒ်သိးကတခွဲညၣ်အဂီၢ်လီၤ. အဝဲသးလီဝဲ ညၣ်လီၤလီၤဆီဆီတကလုာ်န့ၣ်လီၤ. အဝဲဃုထၢဝဲ ညၣ်ဆၣ်ဒီးဘျးထီၣ်ဝဲ လၢတခွဲလိၤဝံၤအလီၢ်ခံ စဲၤလီၤဝဲတခွဲလၢ ထံကျါလီၤ. တယံာ်ဘၣ်န့ၣ် တခွဲပျံၤဖ့ၣ်ဆၢထီၣ်ဝဲ, တခွဲဘိက့ၣ်လီၤဒီး အဝဲထုးထီၣ်ဝဲတခွဲလီၤ.
၂ ပှၤဟီၣ်ခိၣ်ဖိတဖၣ်စ့ၢ်ကီး ဘၣ်ဘျးလၢကျဲအကလုာ်ကလုာ်လီၤ. အဒိ ဖဲပှၤအံၣ်စရ့လးဖိတဖၣ် လဲၤတၢ်ဘူးကတုၤလၢ ကီၢ်တၢ်စံးပာ်အခါ အဝဲသ့ၣ်သူၣ်ဒဲလၢ ကီၢ်မိၤအးပျီပူၤန့ၣ်လီၤ. ကီၢ်မိၤအးအစီၤပၤ အၢၣ်လီၤဝဲပှၤတဂၤလၢ အမံၤမ့ၢ် စီၤဘံးလၣ်လၢ နမ့ၢ်ဆိၣ်အၢ ပှၤအံၣ်စရ့လးဖိန့ၣ် ယကဟ့ၣ်နၤစ့အါမးလီၤ. လၢခံန့ၣ် စီၤဘံးလၣ်ဃုကျဲလၢ တၢ်ဆိၣ်အၢကလီၤဘၣ် ပှၤအံၣ်စရ့လးဖိတဖၣ်အဂီၢ်လီၤ. စီၤဘံးလၣ်ကူၣ်ထီၣ်ဖးလီၤဝဲလၢ အဝဲကသူဝဲညၣ်ဆၣ်လၢအမ့ၢ် ပှၤမိၤအးပိာ်မုၣ်သးစၢ်တဖၣ် လၢအလီၤထုးန့ၢ်သူၣ်ထုးန့ၢ်သးန့ၣ်လီၤ.—၄ မိၤၡ့ ၂၂:၁-၇; ၃၁:၁၅, ၁၆; လီၣ်ဖျါ ၂:၁၄.
၃. စီၤဘံးလၣ် အတၢ်ကူၣ်ထီၣ်ဖးလီၤန့ၣ် ကဲထီၣ်လိၣ်ထီၣ်ဝဲထဲလဲၣ်.
၃ မ့ၢ်စီၤဘံးလၣ် အတၢ်ကူၣ်ထီၣ်ဖးလီၤအံၤ ကဲထီၣ်လိၣ်ထီၣ်ဝဲဧါ. ပှၤအံၣ်စရ့လးပိာ်ခွါလၢ အကလးတဖၣ် “မၤကမၣ်မုၣ်ကမၣ်ခွါဒီး မိၤအးအဖိမုၣ်တဖၣ်လီၤ.” တကးဒံးဘၣ် အဝဲသ့ၣ် ဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ် ဃုာ်ဒီးဘဧၤလးပဧိၢ် န့ၣ်လီၤ. ဘဧၤလးပဧိၢ်န့ၣ် မ့ၢ်ယွၤလၢအလီၤသးဘၣ်အၢတဂၤ ဒီးဖဲပှၤကဘူၣ်ထီၣ်ဘါထီၣ်အီၤအခါ အဝဲသ့ၣ်ကဘၣ်မံဃုာ်လိာ်သးန့ၣ်လီၤ. လၢတၢ်ဂ့ၢ်တဖၣ်အံၤအဃိ ဖဲပှၤအံၣ်စရ့လးဖိ လဲၤတၢ်ဘူးကတုၤလၢ ကီၢ်တၢ်စံးပာ်အဆၢကတီၢ်န့ၣ် အဝဲသ့ၣ်ဘၣ်သံဝဲအဂၤ ၂၄,၀၀၀ န့ၣ်လီၤ.—၄ မိၤၡ့ ၂၅:၁-၉.
၄. ဘၣ်မနုၤအဃိ ပှၤအံၣ်စရ့လးဖိလၢ အကလးတဖၣ် မၤကမၣ်မုၣ်ကမၣ်ခွါလဲၣ်.
၄ ဘၣ်မနုၤအဃိ ပှၤအံၣ်စရ့လးဖိအါဂၤ မၤကမၣ်တၢ် ဒ်စီၤဘံးလၣ် ကူၣ်ထီၣ်ဖးလီၤဝဲအသိးလဲၣ်. ဖဲန့ၣ်အခါ အဝဲသ့ၣ်ဆိကမိၣ်ထဲ အနီၢ်ကစၢ်တၢ်သူၣ်လီသးကွံ ဒီးသးပ့ၤနီၣ်ကွံာ်တၢ်လၢ ယဟိဝၤယွၤ မၤန့ၢ်အီၤတဖၣ်န့ၣ်လီၤ. ယဟိဝၤယွၤ မၤထူၣ်ဖျဲးပှၤအံၣ်စရ့လးဖိလၢ ကီၢ်အဲၤကူပတူး, ဒုးအီၣ်ဒုးအီအဝဲသ့ၣ်လၢ ပှၢ်မုၢ်ကနၢ, ဒီသဒၢအဝဲသ့ၣ်ဒီး ဆှၢအဝဲသ့ၣ်ဘူးကတုၤလၢ ကီၢ်တၢ်စံးပာ်န့ၣ်လီၤ. လၢတၢ်န့ၣ်အဃိ ပှၤအံၣ်စရ့လးဖိတဖၣ် ကြၢးတီလၢ ကစၢ်ယွၤအဖီခိၣ်န့ၣ်လီၤ. (ဧ့ၤဘြံၤ ၃:၁၂) ဘၣ်ဆၣ် တၢ်ကွဲန့ၢ်လွဲန့ၢ်အဝဲသ့ၣ်လၢ ကမၤကမၣ်မုၣ်ကမၣ်ခွါန့ၣ်လီၤ. ဘၣ်ဃးဒီး တၢ်ဂ့ၢ်တခါအံၤ တၢ်မၢဖိပီလူးတဲဝဲလၢ “ဒီးသုတမၤကမၣ်မုၣ်ကမၣ်ခွါ, ဒ်အဝဲသ့ၣ်တနီၤနီၤ မၤကမၣ်မုၣ်ကမၣ်ခွါ, ဒီးလီၤဃံၤဝဲခံကလးသၢကထိလၢ မုၢ်တနံၤဃီအသိးန့ၣ်တဂ့ၤ.”—၁ ကရံၣ်သူး ၁၀:၈.
၅, ၆. ပှၤအံၣ်စရ့လးဖိ မၤတၢ်ဒဲးဘးလၢ မိၤအးပျီပူၤန့ၣ် ကဲထီၣ်တၢ်မၤလိလၢ ပဂီၢ်ဒ်လဲၣ်.
၅ ဟီၣ်ခိၣ်သီဘူးထီၣ်လံအဃိ ပလီၤဂာ်ဒ်ပှၤအံၣ်စရ့လးဖိလၢ အလဲၤတၢ်ဘူးကတုၤလၢ ကီၢ်တၢ်စံးပာ်အသိးန့ၣ်လီၤ. (၁ ကရံၣ်သူး ၁၀:၁၁) မုၢ်မဆါတနံၤညါအံၤ ဟီၣ်ခိၣ်ဒီဘ့ၣ် ပှဲၤဝဲဒီး ပှၤလၢအသူၣ်လီသးကွံ တၢ်မံဃုာ်အါန့ၢ်ဒံး ပှၤမိၤအးဖိတဖၣ်န့ၣ်လီၤ. ပမ့ၢ်တဲတီတီန့ၣ် ညၣ်ဆၣ်တကလုာ်လၢ မုၣ်ကီၤလံၢ်သူဝဲ ဒ်သိးကကွဲန့ၢ်လွဲန့ၢ် ယဟိဝၤယွၤအပှၤဂီၢ်မုၢ်အါကတၢၢ်န့ၣ် မ့ၢ်ဝဲတၢ်မၤကမၣ်မုၣ်ကမၣ်ခွါန့ၣ်လီၤ.—၄ မိၤၡ့ ၂၅:၆, ၁၄; ၂ ကရံၣ်သူး ၂:၁၁; ယူဒၤ ၄.
၆ သံကွၢ်လီၤနသးလၢ ‘မ့ၢ်ယအဲၣ်ဒိး မၤမုာ်ယသးထဲတစိၢ်ဖိဧါ မ့တမ့ၢ် မ့ၢ်ယအဲၣ်ဒိး အိၣ်မူလီၤထူလီၤယိာ်လၢ ဟီၣ်ခိၣ်သီအပူၤဧါ.’ ပဝဲခဲလၢာ် ပကြၢးဂုာ်ကျဲးစၢးလၢ အဂ့ၤကတၢၢ်ဒ်သိးပကမၤထွဲ ယဟိဝၤယွၤ အတၢ်သိၣ်တၢ်သီလၢအမ့ၢ် “ဃ့ၢ်ဟးဆှဲးကွံာ် တၢ်မၤကမၣ်မုၣ်ကမၣ်ခွါတက့ၢ်.”—၁ ကရံၣ်သူး ၆:၁၈.
တၢ်မၤကမၣ်မုၣ်ကမၣ်ခွါန့ၣ် အဲၣ်ဒိးတဲဝဲတၢ်မနုၤလဲၣ်
၇, ၈. “တၢ်မၤကမၣ်မုၣ်ကမၣ်ခွါ” န့ၣ်အဲၣ်ဒိးတဲဝဲတၢ်မနုၤလဲၣ်, ဒီးပှၤလၢအမၤကမၣ်မုၣ်ကမၣ်ခွါန့ၣ် အတၢ်အိၣ်မူဘၣ်ဒိဝဲဒ်လဲၣ်.
၇ မုၢ်မဆါတနံၤအံၤ ပှၤအါဂၤ မၤကမၣ်တၢ်လၢ တအိၣ်ဒီး တၢ်မဲာ်ဆှး ဒီးတပာ်ကဲ ကစၢ်ယွၤအတၢ်သိၣ်တၢ်သီ ဘၣ်ဃးဒီး တၢ်မံဃုာ်နီတစဲးဘၣ်. လၢလံာ်စီဆှံပူၤ တၢ်ကတိၤလၢအမ့ၢ် “တၢ်မၤကမၣ်မုၣ်ကမၣ်ခွါ” န့ၣ်အဲၣ်ဒိးတဲဝဲ ပှၤတဆီဟံၣ်ဆီဃီဒ် လံာ်စီဆှံအတၢ်သိၣ်တၢ်သီအိၣ်ဝဲအသိး ဘၣ်ဆၣ်မံဃုာ်လိာ်အသးလီၤ. တၢ်ကတိၤအံၤအခီပညီ ပၣ်ဃုာ်ဒီး တၢ်မံဃုာ်လၢတချုးဖျီအသး, ပှၤလၢတဖျီအသး မ့ၢ်မံဃုာ်လၢခံပူၤ မ့တမ့ၢ် ကိာ်ပူၤ, မ့တမ့ၢ် တၢ်ဖူးလဲးပှၤလၢပတဖျီပသးဒီးအီၤတဂၤ အမုၣ်ခွါက့ၢ်ဂီၤလၢ တၢ်သးကတၢအပူၤန့ၣ်လီၤ. တကးဒံးဘၣ် တၢ်ကတိၤအံၤအခီပညီ ပၣ်ဃုာ်စ့ၢ်ကီးဒီး ပှၤလၢအမၤပိာ်ခွါကဒဲကဒဲ, ပိာ်မုၣ်ကဒဲကဒဲ မ့တမ့ၢ် မၤဆၣ်ဖိကီၢ်ဖိတဖၣ် ဒ်လၢထးအံၤပာ်ဖျါထီၣ်ဝဲအသိးန့ၣ်လီၤ. ပကတဲဖျါထီၣ်တၢ်ဂ့ၢ်တဖၣ်အံၤန့ၣ် ကဲထီၣ်တၢ်မဲာ်ဆှး လၢပဂီၢ်သ့ဝဲဘၣ်ဆၣ် ပကဘၣ်သ့ၣ်ညါလီၤတံၢ်လီၤဆဲး ဒ်သိးပကဟးဆှဲး တၢ်လၢယဟိဝၤယွၤ သးဟ့ဝဲတဖၣ်လီၤ.—ကွၢ်တၢ်ဂ့ၢ် ၂၃ လၢလံာ်အကတၢၢ်တက့ၢ်.
၈ လံာ်စီဆှံပာ်ဖျါထီၣ်ဝဲ လီၤတံၢ်လီၤဆဲးလၢ ပှၤတဂၤမ့ၢ်ဆဲးမၤကမၣ်မုၣ်ကမၣ်ခွါန့ၣ် အဝဲအိၣ်လၢ ခရံာ်ဖိတၢ်အိၣ်ဖှိၣ်အပူၤ တသ့လၢၤဘၣ်. (၁ ကရံၣ်သူး ၆:၉; လီၣ်ဖျါ ၂၂:၁၅) တကးဒံးဘၣ် ပှၤတဂၤအံၤ အတၢ်ပာ်ကဲလီၤသး ကလီၤစှၤဝဲဒီး ပှၤအဂၤတဖၣ် တနာ်န့ၢ်အီၤအါအါလၢၤဘၣ်. ပှၤလၢအမၤကမၣ်မုၣ်ကမၣ်ခွါန့ၣ် ကထံၣ်ဘၣ်တၢ်ကီတၢ်ခဲ အကလုာ်ကလုာ်လီၤ. အဒိ အဝဲသ့ၣ် အသးလၢအသ့ၣ်ညါဒၣ်တၢ် ကပာ်တၢ်ကမၣ်လၢအလိၤ, ကအိၣ်ထီၣ်ဒီး အဟုးအသးလၢ တသးလီဝဲ, နီၢ်ဒီမါဝၤတၢ်အ့ၣ်လိာ်ဆိးက့အိၣ်ထီၣ် မ့တမ့ၢ် တၢ်ဆူးတၢ်ဆါကဘၣ်ကူအီၤ ဒီးသံဝဲသ့လီၤ. (ဖး ကလၤတံ ၆:၇, ၈ တက့ၢ်.) ပှၤတဂၤမ့ၢ်ဆိကမိၣ်ထံဝဲဘၣ်ဃးဒီး အတၢ်အိၣ်မူ ကဘၣ်ဒိဝဲဒ်လဲၣ်အဂ့ၢ်န့ၣ် ဘၣ်သ့ၣ်သ့ၣ်တမ့ၢ်လၢ အဝဲကအဲၣ်ဒိးမၤကမၣ်မုၣ်ကမၣ်ခွါလၢၤဘၣ်. ဘၣ်ဆၣ် အဆိကတၢၢ်ဖဲပှၤခါထီၣ်အခီၣ်လၢ ကမၤကမၣ်မုၣ်ကမၣ်ခွါအခါန့ၣ် အဝဲသ့ၣ်အါတက့ၢ် ဆိကမိၣ်ထဲအနီၢ်ကစၢ်အတၢ်သူၣ်လီသးကွံန့ၣ်လီၤ. ဒီးလၢပှၤအါဂၤအဂီၢ် ခီၣ်ခါအဆိကတၢၢ်တခါန့ၣ် မ့ၢ်ဝဲတၢ်ဂီၤဘ့ၣ်ဆ့န့ၣ်လီၤ.
တၢ်ဂီၤဘ့ၣ်ဆ့ မ့ၢ်ခီၣ်ခါအဆိကတၢၢ်
၉. ဘၣ်မနုၤအဃိ တၢ်ကွၢ်တၢ်ဂီၤဘ့ၣ်ဆ့ မ့ၢ်တၢ်လၢအလီၤဘၣ်ယိၣ်လဲၣ်.
၉ တၢ်ဂီၤဘ့ၣ်ဆ့န့ၣ် မၤကတၢထီၣ်ပှၤသးန့ၣ်လီၤ. မုၢ်မဆါတနံၤအံၤ တၢ်ဂီၤဘ့ၣ်ဆ့ ရၤလီၤအသးသကုၤဆးဒးလၢ တၢ်ဆါလံာ်တၢ်ကစီၣ်အလီၢ်, တၢ်သးဝံၣ် ဒီးလၢတၢ်ဂီၤမူအပူၤလီၤ. မ့မ့ၢ်အ့ထၢၣ်နဲး (Internet) န့ၣ်ပှဲၤဝဲဒီးတၢ်ဂီၤဘ့ၣ်ဆ့န့ၣ်လီၤ. ပှၤတနီၤဆိကမိၣ်ဝဲလၢ တၢ်ကွၢ်တၢ်ဂီၤဘ့ၣ်ဆ့န့ၣ် တမၤဘၣ်ဒိပှၤနီတဂၤဘၣ်. ဘၣ်ဆၣ် လ့ၤတက့ၤတမ့ၢ်ဒ်န့ၣ်ဘၣ်. ပှၤလၢအကွၢ်တၢ်ဂီၤဘ့ၣ်ဆ့န့ၣ် ဘၣ်သ့ၣ်သ့ၣ် အဝဲကကဲထီၣ်ပှၤလၢ အသးကွံထဲတၢ်မံဃုာ် ဒီးကအိၣ်ဒီးတၢ်သးကတၢလၢ အလီၤရၢၢ်လီၤစၢၢ်တဖၣ်န့ၣ်လီၤ. တကးဒံးဘၣ် ဘၣ်သ့ၣ်သ့ၣ် အဝဲကကဲထီၣ် ပှၤလၢအညီနုၢ်ဖူးလဲးအနီၢ်ကစၢ်မုၣ်ခွါက့ၢ်ဂီၤ (habit of masturbation) ဒီးကကဲထီၣ်တၢ်သဘံၣ်သဘုၣ်ဖးဒိၣ် တုၤလၢ နီၢ်ဒီမါဝၤလီၤဖးဝဲလီၤ.—ရိမ့ၤ ၁:၂၄-၂၇; အ့းဖ့းစူး ၄:၁၉; ကွၢ်တၢ်ဂ့ၢ် ၂၄ လၢလံာ်အကတၢၢ်တက့ၢ်.
၁၀. ဒ်သိးပဟးဆှဲး တၢ်မၤကမၣ်မုၣ်ကမၣ်ခွါကသ့အဂီၢ် ယၤကိာ် ၁:၁၄, ၁၅ မၤစၢၤပှၤကသ့ဒ်လဲၣ်.
၁၀ တၢ်မၤကမၣ်မုၣ်ကမၣ်ခွါ ထုးန့ၢ်ပသးသ့လၢ ကျဲဒ်လဲၣ်န့ၣ် ပကဘၣ်နၢ်ပၢၢ်လီၤတံၢ်လီၤဆဲးလီၤ. ဆိကမိၣ်ထံ တၢ်ဟ့ၣ်ပလီၢ်လၢ ယၤကိာ် ၁:၁၄, ၁၅ တက့ၢ်. လံာ်စီဆှံတဆၢအံၤ တဲဝဲလၢ “ပှၤတဂၤဂၤ အတၢ်သးကွံဒၣ်ဝဲထုးအီၤ, ဒီးကလံာ်န့ၢ်အီၤဒီး, အဝဲဒၣ်ဘၣ်တၢ်လ့ပစီအီၤလီၤ. လၢခံက့ၤဒီး တၢ်သးကွံန့ၣ်ဒၢထီၣ်, ဒီးဆံးစၢ်တၢ်ဒဲးဘး, ဒီးတၢ်ဒဲးဘးန့ၣ် လၢထီၣ်ပှဲၤထီၣ်, ဒီးဆံးစၢ်တၢ်သံလီၤ.” လၢတၢ်န့ၣ်အဃိ တၢ်ဆိကမိၣ်လၢအတဂ့ၤ မ့ၢ်နုာ်လီၤလၢနသးပူၤန့ၣ် ထုးထီၣ်ကွံာ်အီၤတဘျီဃီတက့ၢ်. အဒိ လၢတၢ်တပာ်သူၣ်ပာ်သးအပူၤ နမ့ၢ်ထံၣ်ဘၣ်တၢ်ဂီၤလၢ အကမၤကတၢထီၣ်နသးန့ၣ် ဃၣ်ကွံာ်နမဲာ်လၢအချ့, မၤပံးကွံာ်ခီၣ်ဖၠူထၢၣ် မ့တမ့ၢ် ဆီတလဲကွံာ်တၢ်ဂီၤမူအကျိၤတက့ၢ်. တၢ်မိၣ်န့ၢ်သးလီလၢအကမၣ် မ့ၢ်ဒိၣ်ထီၣ်လၢနသးပူၤန့ၣ် နပၢၤနသးတညီလၢၤဘၣ်. အဃိ မၤလီၤမၢ်ကွံာ် တၢ်မိၣ်န့ၢ်သးလီလၢအကမၣ်တဖၣ်အံၤ တဘျီဃီတက့ၢ်.—ဖး မးသဲ ၅:၂၉, ၃၀ တက့ၢ်.
၁၁. ပမ့ၢ်အိၣ်ဒီး တၢ်ဆိကမိၣ်လၢ အတဂ့ၤတဖၣ်န့ၣ် ယဟိဝၤယွၤမၤစၢၤပှၤသ့ဒ်လဲၣ်.
၁၁ ယဟိဝၤယွၤ သ့ၣ်ညါနၢ်ပၢၢ်ပှၤ ဒိၣ်န့ၢ်ဒံး ပသ့ၣ်ညါလီၤပနီၢ်ကစၢ်န့ၣ်လီၤ. အဝဲသ့ၣ်ညါလၢ ပတလၢတပှဲၤဘၣ်. ဘၣ်ဆၣ် အဝဲသ့ၣ်ညါစ့ၢ်ကီးလၢ ပမၤနၢၤကွံာ် ပတၢ်သူၣ်လီသးကွံလၢ အကမၣ်တဖၣ် သ့ဝဲလီၤ. ယဟိဝၤယွၤ တဲပှၤလၢ “မၤသးဒ်န့ၣ်ဒီး, မၤသံသုဂီၤတဖၣ်လၢ ဟီၣ်ခိၣ်ချၢ, ဒ်ပစံးတၢ်အသိး, တၢ်မၤကမၣ်မုၣ်ကမၣ်ခွါ, တၢ်အဲၣ်တလ့ၤအဲၣ်တဘီ, တၢ်သးကတၢ, တၢ်သးကွံတၢ်လၢအအၢ, ဒီးတၢ်သးကွံစုလီၢ်ခီၣ်ခိၣ်လၢအမ့ၢ် တၢ်ဘါတၢ်ဂီၤန့ၣ်တက့ၢ်.” (ကလီးစဲ ၃:၅) ပမၤထွဲလံာ်စီဆှံတဆၢအံၤ မ့ၢ်တညီဘၣ်သနာ်က့ ယဟိဝၤယွၤ ဝံသးစူၤပှၤဒီး ကမၤစၢၤပှၤလီၤ. (စံးထီၣ်ပတြၢၤ ၆၈:၁၉) ဒီပုၢ်ဝဲၢ်ခွါသးစၢ်တဂၤ ညီနုၢ်ကွၢ်ဝဲ တၢ်ဂီၤဘ့ၣ်ဆ့ဒီး ဖူးလဲးအနီၢ်ကစၢ် မုၣ်ခွါက့ၢ်ဂီၤစ့ၢ်ကီးလီၤ. အတံၤသကိးလၢကၠိတဖၣ် ဆိကမိၣ်ဝဲလၢ လုၢ်လၢ်သကဲာ်ပဝးဒ်အံၤန့ၣ် တမ့ၢ်တၢ်လီၤဆီနီတမံၤဘၣ်. ဘၣ်ဆၣ် အဝဲတဲဝဲလၢ “ယသးလၢ အသ့ၣ်ညါဒၣ်တၢ် တဟ့ၣ်ပလီၢ်ယၤ ဒ်သိးလၢညါလၢၤဘၣ်, ဒီးယဟးမၤကမၣ်မုၣ်ကမၣ်ခွါထီဘိလီၤ.” အဝဲသ့ၣ်ညါဝဲလၢ အဝဲကဘၣ်မၤနၢၤကွံာ် အတၢ်သူၣ်လီသးကွံလၢ အကမၣ်တဖၣ် ဒီးလၢယဟိဝၤယွၤ အတၢ်မၤစၢၤအဃိ အဝဲပာ်တ့ၢ်ကွံာ် လုၢ်လၢ်လၢအတကဆှီအံၤ န့ၢ်ဝဲလီၤ. နမ့ၢ်အိၣ်ဒီး တၢ်ဆိကမိၣ်လၢ အတကဆှီဘၣ်န့ၣ် ဃ့ထုကဖၣ်လၢ ယဟိဝၤယွၤကဟ့ၣ်လီၤနၤ “အစိအကမီၤဒိၣ်ကဲၣ်ဆိး” ဒ်သိး နကဆိကမိၣ် တၢ်လၢအကဆှီအဂီၢ်တက့ၢ်.—၂ ကရံၣ်သူး ၄:၇; ၁ ကရံၣ်သူး ၉:၂၇.
၁၂. ဘၣ်မနုၤအဃိ ပကဘၣ် ‘ပၢၤပသး’ လဲၣ်.
၁၂ စီၤၡလိၤမိၤကွဲးဝဲလၢ “လၢနပၢၤတၢ်ခဲလၢာ်အဖီခိၣ်န့ၣ် ပၢၤနသးတက့ၢ်. အဂ့ၢ်ဒ်အံၤ တၢ်အမူထီၣ်ပၢၤလၢအပူၤလီၤ.” (ကတိၤဒိ ၄:၂၃) ပ “သး” န့ၣ်အဲၣ်ဒိးတဲဝဲ တၢ်အိၣ်လၢ ပပူၤနီၢ်နီၢ်, ပတၢ်ဆိကမိၣ် ဒီးပတၢ်ပာ်သူၣ်ပာ်သးလၢ ကစၢ်ယွၤသ့ၣ်ညါဝဲလီၤတံၢ်လီၤဆဲးန့ၣ်လီၤ. တၢ်လၢပကွၢ်န့ၣ် ထုးန့ၢ်ပသးညီဝဲလီၤ. ပှၤတီပှၤလိၤစီၤယိၤဘးတဲဝဲလၢ “ယမၤတၢ်အၢၣ်လီၤအီလီၤဒီးယမဲာ်ဒီး ယကကွၢ်ပှၤမုၣ်လိၣ်ဘိ ကသ့ဒ်လဲၣ်.” (ယိၤဘး ၃၁:၁) ဒ်စီၤယိၤဘးအသိး ပကဘၣ်ပၢၤ ပမဲာ်ချံဒီး ပတၢ်ဆိကမိၣ်တဖၣ်လီၤ. ဒီးဒ်ပှၤကွဲးထါစံးထီၣ်ပတြၢၤတဂၤအသိး ပဘၣ်ဃ့ထုကဖၣ်ဒ်အံၤလီၤ. “ဒုးဃၣ်ကွံာ်ယမဲာ်လၢ တၢ်ကလီကလီန့ၣ်တက့ၢ်.”—စံးထီၣ်ပတြၢၤ ၁၁၉:၃၇.
နီၢ်ဒံနၤ အတၢ်ဆၢတဲာ်ကမၣ်
၁၃. နီၢ်ဒံနၤဃုထၢအတံၤသကိး လၢမတၤတဖၣ်လဲၣ်.
၁၃ ပတံၤသကိးတဖၣ် ဆီၣ်ထွဲပှၤလၢပကမၤတၢ်ဂ့ၤ မ့တမ့ၢ် မၤတၢ်အၢသ့ဝဲလီၤ. နမ့ၢ်ဃုထၢနတံၤသကိးလၢ အမၤထွဲကစၢ်ယွၤ အတၢ်သိၣ်တၢ်သီတဖၣ်န့ၣ် အဝဲသ့ၣ်ကမၤစၢၤနၤလၢ နကမၤဒ်န့ၣ်အသိးစ့ၢ်ကီးလီၤ. (ကတိၤဒိ ၁၃:၂၀; ဖး ၁ ကရံၣ်သူး ၁၅:၃၃ တက့ၢ်.) ပမ့ၢ်ဆိကမိၣ်ထံ နီၢ်ဒံနၤအဂ့ၢ်န့ၣ် ပကနၢ်ပၢၢ်ထီၣ်လၢ ပကဃုထၢတံၤသကိးဒ်လဲၣ်တဖၣ်လဲၣ်န့ၣ် မ့ၢ်တၢ်ဃုထၢလၢအရ့ဒိၣ်တခါလီၤ. နီၢ်ဒံနၤမ့ၢ်စီၤယၤကိာ်အဖိမုၣ် ဒီးအဟံၣ်ဖိဃီဖိန့ၣ် ဘူၣ်ထီၣ်ဘါထီၣ်ယဟိဝၤယွၤလီၤ. နီၢ်ဒံနၤမ့ၢ်ပှၤလၢ အအိၣ်ဒီးလုၢ်လၢ်သကဲာ်ပဝးလၢအဂ့ၤ ဘၣ်ဆၣ်လၢခံန့ၣ် အဝဲရ့တံၤရ့သကိးဒီး ပှၤကနၤဧၣ်မုၣ်တဖၣ်လၢ အတဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. ပှၤကနၤဧၣ်ဖိတဖၣ် အတၢ်ထံၣ်ဘၣ်ဃးဒီးတၢ်မံဃုာ်န့ၣ် တဒ်သိးဒီးကစၢ်ယွၤ အပှၤဂီၢ်မုၢ်အတၢ်ထံၣ်ဘၣ်. ဒီးအဝဲသ့ၣ် မ့ၢ်ပှၤလၢအမံၤဟူသၣ်ဖျါလၢ တၢ်မၤကမၣ်မုၣ်ကမၣ်ခွါလီၤ. (၃ မိၤၡ့ ၁၈:၆-၂၅) ဖဲနီၢ်ဒံနၤအိၣ်ဒီး အတံၤသကိးတဖၣ်အံၤအခါ အဝဲထံၣ်လိာ်အသးဒီး ပှၤကနၤဧၣ်ပိာ်ခွါသးစၢ်တဂၤလၢ အမံၤမ့ၢ်စီၤၡက့ၣ်, ဒီးစီၤၡက့ၣ်ကွၢ်ဂ့ၤအီၤလီၤ. စီၤၡက့ၣ် မ့ၢ်ပှၤလၢ “အလၤအကပီၤဒိၣ်” ကတၢၢ်လၢအပၢ်အဟံၣ်ပူၤ ဘၣ်ဆၣ်အဝဲတအဲၣ် ယဟိဝၤယွၤဘၣ်.—၁ မိၤၡ့ ၃၄:၁၈, ၁၉.
၁၄. တၢ်မၤအသးဒီး နီၢ်ဒံနၤဒ်လဲၣ်.
၁၄ ခီဖျိလၢ စီၤၡက့ၣ်ကွၢ်ဂ့ၤ နီၢ်ဒံနၤအဃိ “ဟံးန့ၢ်” ဝဲနီၢ်ဒံနၤဒီး “မၤဟးဂီၤ” အသူးသ့ၣ်လၤကပီၤန့ၣ်လီၤ. လၢစီၤၡက့ၣ်အတၢ်ထံၣ်န့ၣ် အဝဲမၤဝဲဒ်အံၤ တဘၣ်တၢ်နီတမံၤဘၣ်ဒီး တမ့ၢ်တၢ်လၢအကမၣ်စ့ၢ်ကီးဘၣ်. (ဖး ၁ မိၤၡ့ ၃၄:၁-၄ တက့ၢ်.) ဒီးပှၤလၢအဘၣ်ဒိ လၢတၢ်ဂ့ၢ်အံၤအဃိန့ၣ် တမ့ၢ်ထဲနီၢ်ဒံနၤတဂၤဧိၤဘၣ်. တၢ်လၢအဟဲကဲထီၣ်အသးတဖၣ် မၤမဲာ်ဆှးဒီးမၤကီမၤခဲ အဟံၣ်ဖိဃီဖိခဲလၢာ်လီၤ.—၁ မိၤၡ့ ၃၄:၇, ၂၅-၃၁; ကလၤတံ ၆:၇, ၈.
၁၅, ၁၆. ပကဲထီၣ် ပှၤကူၣ်တၢ်သ့ ကသ့ဒ်လဲၣ်.
၁၅ ဒ်သိးပကသ့ၣ်ညါနၢ်ပၢၢ်လၢ ယဟိဝၤယွၤအတၢ်သိၣ်တၢ်သီတဖၣ် မ့ၢ်တၢ်လၢအဂ့ၤကတၢၢ်လၢပဂီၢ်န့ၣ် တလိၣ်လၢပမၤကမၣ်တၢ်ဒ် နီၢ်ဒံနၤအသိးဘၣ်. လံာ်စီဆှံတဲဝဲလၢ “ပှၤလၢအလဲၤတၢ်ဒီး ပှၤကူၣ်တၢ်သ့န့ၣ် ကကဲထီၣ်ပှၤကူၣ်တၢ်သ့လီၤ. မ့မ့ၢ်ပှၤဒီတံၤဒီသကိးဒီး ပှၤဟးဂီၤဖိန့ၣ် ကတုၤလၢတၢ်ဟးဂီၤလီၤ.” (ကတိၤဒိ ၁၃:၂၀) ပမ့ၢ်ဂုာ်ကျဲးစၢးဃုသ့ၣ်ညါနၢ်ပၢၢ် “ကယဲၢ်ကျဲ . . . လၢအဂ့ၤအဘၣ်” န့ၣ်ပဟးဆှဲးတၢ်ကီတၢ်ခဲဒီး တၢ်လၢအကမၤဘၣ်ဒိပသးန့ၣ်သ့ဝဲလီၤ.—ကတိၤဒိ ၂:၆-၉; စံးထီၣ်ပတြၢၤ ၁:၁-၃.
၁၆ တချုးလၢ ပဆၢတဲာ်တၢ်အခါ ပမ့ၢ်ဂုာ်ကျဲးစၢးဃ့ထုကဖၣ်ဒီး မၤလိလံာ်စီဆှံဒီး တၢ်လၢကုၢ်လၢအကလုၢ်တီ ထုးထီၣ်ဝဲတဖၣ်န့ၣ် ပဒိးန့ၢ်ဘၣ်တၢ်ကူၣ်သ့လၢ ယွၤအအိၣ်သ့ဝဲလီၤ. (မးသဲ ၂၄:၄၅; ယၤကိာ် ၁:၅) နသ့ၣ်ညါလၢ ပဝဲခဲလၢာ် ပမ့ၢ်ပှၤလၢအဂံၢ်စၢ်ဘါစၢ် ဒီးပတလၢတပှဲၤဘၣ်. (ယံးရမံယၤ ၁၇:၉) ဘၣ်ဆၣ် ပှၤတဂၤမ့ၢ်ဟ့ၣ်ပလီၢ်နၤလၢ နလဲၤကျဲလၢ ကဆှၢနၤဆူတၢ်မၤကမၣ်မုၣ်ကမၣ်ခွါန့ၣ် မ့ၢ်နကသးထီၣ်အီၤဧါ မ့တမ့ၢ် မ့ၢ်နကတူၢ်လိာ် အတၢ်မၤစၢၤလၢ တၢ်ဆီၣ်လီၤသးအပူၤဧါ.—၂ စီၤပၤ ၂၂:၁၈, ၁၉.
၁၇. ဒီပုၢ်ဝဲၢ်အတၢ်ဟ့ၣ်ပလီၢ်ပှၤန့ၣ် ကဲထီၣ်တၢ်မၤစၢၤလၢပဂီၢ်သ့ဒ်လဲၣ်.
၁၇ ပကဆိကမိၣ်ကွၢ် တၢ်အဒိတခါလီၤ. ဒီပုၢ်ဝဲၢ်မုၣ်တဂၤ ဖဲအတၢ်မၤလီၢ်န့ၣ် ပိာ်ခွါတဂၤကွၢ်ဂ့ၤအီၤအဃိ ကိးအီၤလၢ ကလဲၤဟးဒ်သိးသိးလီၤ. ပိာ်ခွါတဂၤအံၤတဘူၣ်ထီၣ်ဘါထီၣ် ယဟိဝၤယွၤဘၣ်. ဘၣ်ဆၣ် ဖျါလၢအသးဂ့ၤမးလီၤ. ဖဲအဝဲသ့ၣ် ဟးတွဲလိာ်သးအခါ ဒီပုၢ်ဝဲၢ်မုၣ်အဂၤတဂၤ ထံၣ်အဝဲသ့ၣ်အဃိ လၢခံန့ၣ် အဝဲဟ့ၣ်ပလီၢ် ဒီပုၢ်ဝဲၢ်မုၣ်လၢ အဟးတွဲလိာ်သးဒီး ပှၤတၢ်ချၢတဂၤအံၤလီၤ. ဒီပုၢ်ဝဲၢ်မုၣ်တဂၤအံၤ ကမၤဝဲဒ်လဲၣ်. မ့ၢ်အဝဲကတဲပူၤဖျဲးအသး မ့တမ့ၢ် မ့ၢ်အဝဲကတူၢ်လိာ် ဒီပုၢ်ဝဲၢ်မုၣ်အဝဲတဂၤ အတၢ်ဟ့ၣ်ပလီၢ်အီၤဧါ. ဘၣ်သ့ၣ်သ့ၣ် ဒီပုၢ်ဝဲၢ်မုၣ်တဂၤအံၤ အဲၣ်ယဟိဝၤယွၤဒီး အဲၣ်ဒိးမၤတၢ်ဂ့ၤလီၤ. ဘၣ်ဆၣ် အဝဲမ့ၢ်ဆဲးတွဲဒီး ပိာ်ခွါတဂၤအံၤန့ၣ် မ့ၢ်ပတဲလၢ အဝဲ “ဃ့ၢ်ဟးဆှဲးကွံာ် တၢ်မၤကမၣ်မုၣ်ကမၣ်ခွါ” သ့ဧါ. မ့တမ့ၢ် မ့ၢ်အဝဲ “သန့ၤလီၤအသးလၢ အသးဒၣ်ဝဲ” ဧါ.—ကတိၤဒိ ၂၂:၃; ၂၈:၂၆; မးသဲ ၆:၁၃; ၂၆:၄၁.
ဟံးန့ၢ်တၢ်မၤလိလၢ စီၤယိၤသးအဒိအတဲာ်
၁၈, ၁၉. စီၤယိၤသး ဃ့ၢ်ဟးဆှဲး တၢ်မၤကမၣ်မုၣ်ကမၣ်ခွါ လၢကျဲဒ်လဲၣ်.
၁၈ ဖဲစီၤယိၤသးအသးစၢ်အခါ အဝဲကဲကုၢ်လၢ ကီၢ်အဲၤကူပတူးအပူၤလီၤ. တနံၤဘၣ်တနံၤ စီၤယိၤသးအကစၢ်အမါ ဃ့မံဃုာ်ဒီးအီၤဘၣ်ဆၣ် စီၤယိၤသးသ့ၣ်ညါဝဲလၢ အတဂ့ၤဘၣ်. စီၤယိၤသးအဲၣ်ယဟိဝၤယွၤ ဒီးအဲၣ်ဒိးမၤတၢ်ဘၣ်ယွၤအသးန့ၣ်လီၤ. လၢတၢ်န့ၣ်အဃိ ကိးဘျီဒဲးဖဲ ပိာ်မုၣ်တဂၤအံၤ ဂုာ်ကျဲးစၢးလ့ပစီအီၤ အဆၢကတီၢ်န့ၣ် အဝဲတတူၢ်လိာ်ဘၣ်. ဘၣ်ဆၣ် စီၤယိၤသးကဲကုၢ်အဃိ အဝဲဟးထီၣ်ကွံာ်လၢ အ တၢ်မၤတန့ၢ်ဘၣ်. ဘၣ်တနံၤ ဖဲစီၤယိၤသး အကစၢ်အမါ မၢဆူၣ်အီၤလၢ ကမံဃုာ်ဒီးအီၤအခါ အဝဲဘၣ် “ဃ့ၢ်ဝဲဒီးဟးထီၣ်” ဆူတၢ်ချၢန့ၣ်လီၤ.—ဖး ၁ မိၤၡ့ ၃၉:၇-၁၂ တက့ၢ်.
၁၉ စီၤယိၤသးမ့ၢ်ဟးဆိကမိၣ်ကြီ ဘၣ်ဃးဒီးပိာ်မုၣ်တဂၤအံၤ မ့တမ့ၢ် တၢ်မံဃုာ်အဂ့ၢ်န့ၣ် မ့ၢ်အဝဲပၢၤဃာ် အတၢ်သးတီဒီးယွၤကညီဒံးဧါ. လ့ၤတက့ၤ တညီလၢၤဘၣ်. ဘၣ်ဆၣ် စီၤယိၤသးပာ်လုၢ်ပာ်ပှ့ၤ အတၢ်ရ့လိာ်သးဒီး ယဟိဝၤယွၤ ဒိၣ်န့ၢ်ဒံးတၢ်အဂၤ ခဲလၢာ်လီၤ. အဃိ အဝဲတဲဘၣ်အကစၢ်အမါလၢ “ယကစၢ်. . .တတြီဃာ်ဘၣ်တၢ်လၢယၤနီတမံၤဘၣ်, တြီဃာ်ထဲနၤတဂၤဧိၤ, လၢနမ့ၢ်အမါအဃိလီၤ. ဒီးယကမၤတၢ်အၢတၢ်သီအဒိၣ်အယိာ်တမံၤအံၤ, ဒီးမၤကမၣ်ဘၣ်ယွၤဒ်လဲၣ်.”—၁ မိၤၡ့ ၃၉:၈, ၉.
၂၀. စီၤယိၤသးမၤသးခု ယဟိဝၤယွၤအသးန့ၣ် ပသ့ၣ်ညါသ့ဒ်လဲၣ်.
၂၀ စီၤယိၤသးအိၣ်ယံၤဒီး အဟံၣ်ဖိဃီဖိဘၣ်ဆၣ် အဝဲတီဒီးယဟိဝၤယွၤ ထီဘိအဃိ ယဟိဝၤယွၤဆိၣ်ဂ့ၤအီၤလီၤ. (၁ မိၤၡ့ ၄၁:၃၉-၄၉) ယဟိဝၤယွၤ ထံၣ်ဘၣ်ဝဲလၢ တနံၤဘၣ်တနံၤန့ၣ် စီၤယိၤသးတီဒီးအီၤအဃိ အဝဲကသးခုဝဲဒိၣ်မးလီၤ. (ကတိၤဒိ ၂၇:၁၁) ပကဟးဆှဲး တၢ်မၤကမၣ်မုၣ်ကမၣ်ခွါန့ၣ် တညီလၢပဂီၢ်ဘၣ်. ဘၣ်ဆၣ် ပကဘၣ်သ့ၣ်နီၣ် လံာ်စီဆှံတဆၢလၢအတဲဝဲ “ပှၤလၢအအဲၣ်ယွၤသ့ၣ်ဧၢ, သးဟ့တၢ်အၢတက့ၢ်. ပၢၤဝဲအပှၤစီဆှံအသးန့ၣ်, မၤပူၤမၤဖျဲးကွံာ်အီၤလၢ ပှၤတတီတလိၤအစုပူၤန့ၣ်လီၤ.”—စံးထီၣ်ပတြၢၤ ၉၇:၁၀.
၂၁. ဒီပုၢ်ဝဲၢ်ခွါသးစၢ်တဂၤ ကွၢ်လိမၤဒိး စီၤယိၤသးလၢ ကျဲဒ်လဲၣ်.
၂၁ ကိးနံၤဒဲး ပထံၣ်ဘၣ်လၢ ယဟိဝၤယွၤအပှၤဂီၢ်မုၢ်တဖၣ် ပာ်ဖျါထီၣ်ဝဲဒူဒူလၢ အဝဲသ့ၣ် “သးဟ့တၢ်အၢ, ဒီးအဲၣ်တၢ်ဂ့ၤ” လီၤ. (ဧၤမိၣ် ၅:၁၅) ဒီးနမ့မ့ၢ်ပှၤသးစၢ်ဂ့ၤ ပှၤသးပှၢ်ဂ့ၤ နတီဒီးယဟိဝၤယွၤ သ့ဝဲလီၤ. အဒိ ဒီပုၢ်ဝဲၢ်ခွါသးစၢ်တဂၤ ထံၣ်ဘၣ်ဝဲတၢ်မၤကွၢ်လၢ ကၠိန့ၣ်လီၤ. ပိာ်မုၣ်တဂၤတဲအီၤလၢ နမ့ၢ်မၤစၢၤယၤ ဖဲပဘၣ်ဒိးစဲးတၢ်ဒွးအဆၢကတီၢ်န့ၣ် ယကမံဃုာ်ဒီးနၤလီၤ. ဒီပုၢ်ဝဲၢ်ခွါတဂၤအံၤ မၤဝဲဒ်လဲၣ်. အဝဲမၤဝဲဒ် စီၤယိၤသးအသိးလီၤ. အဝဲတဲဝဲလၢ “ယတတူၢ်လိာ်အီၤနီတစဲးဘၣ်. ခီဖျိလၢ ယပၢၤဃာ်ယတၢ်သးတီအဃိ ယသူးသ့ၣ်လၤကပီၤဒီး ယတၢ်ပာ်ကဲလီၤယသးန့ၣ် အိၣ်ဒံးတုၤခဲအံၤလီၤ.” တၢ်မၤကမၣ်မုၣ်ကမၣ်ခွါ မ့ၢ်ဟ့ၣ်ပှၤတၢ်သူၣ်ဖှံသးညီ “တစိၢ်တလီၢ်” ဘၣ်ဆၣ် လၢခံန့ၣ်ကကဲထီၣ် တၢ်သးဘၣ်ဒိလၢပဂီၢ်အါမးလီၤ. (ဧ့ၤဘြံၤ ၁၁:၂၅) မ့မ့ၢ်တၢ်ဒိကနၣ် ယဟိဝၤယွၤ အကလုၢ်န့ၣ် ကဟ့ၣ်ပှၤ တၢ်သးခုနီၢ်ကီၢ်လၢ အတဟးဂီၤနီတဘျီဘၣ်.—ကတိၤဒိ ၁၀:၂၂.
တူၢ်လိာ် ယဟိဝၤယွၤ အတၢ်မၤစၢၤ
၂၂, ၂၃. ပမ့ၢ်မၤကမၣ်တၢ်ဖးဒိၣ် သနာ်က့ ယဟိဝၤယွၤ မၤစၢၤပှၤသ့ဒ်လဲၣ်.
၂၂ မုၣ်ကီၤလံၢ် အဲၣ်ဒိးကွဲန့ၢ်လွဲန့ၢ်ပှၤလၢ ပကမၤကမၣ်မုၣ်ကမၣ်ခွါအဃိ ပကတြီဆၢ တၢ်လ့ပစီတဖၣ်အံၤန့ၣ် ကကီလၢပဂီၢ်ဖးဒိၣ်ညါ. တဘျီတခီၣ် ပဝဲခဲလၢာ် ပကအိၣ်ဒီး တၢ်ဆိကမိၣ်လၢအကမၣ်လီၤ. (ရိမ့ၤ ၇:၂၁-၂၅) ဘၣ်ဆၣ် ယဟိဝၤယွၤနၢ်ပၢၢ်ဝဲ ဒီးအဝဲသ့ၣ်နီၣ်ထီၣ်လၢ “ပမ့ၢ်ဟီၣ်ခိၣ်အကမူၣ်လီၤ.” (စံးထီၣ်ပတြၢၤ ၁၀၃:၁၄) အဃိ ခရံာ်ဖိတဂၤ မ့ၢ်မၤဘၣ်တၢ်ကမၣ်ဖးဒိၣ်လၢအမ့ၢ် တၢ်မၤကမၣ်မုၣ်ကမၣ်ခွါန့ၣ် မ့ၢ်အတၢ်မုၢ်လၢ်လၢာ်လံဧါ. တလၢာ်ဒံးဘၣ်. အဝဲမ့ၢ်ပီၢ်ယၢ်လီၤက့ၤအသးနီၢ်ကီၢ်န့ၣ် ယဟိဝၤယွၤကမၤစၢၤအီၤလီၤ. ကစၢ်ယွၤမ့ၢ်ကစၢ်လၢအ “ပျၢ်ကွံာ်တၢ်ညီ” လီၤ.—စံးထီၣ်ပတြၢၤ ၈၆:၅; ယၤကိာ် ၅:၁၆; ဖး ကတိၤဒိ ၂၈:၁၃ တက့ၢ်.
၂၃ ယဟိဝၤယွၤ ဟ့ၣ်လီၤပှၤ “တၢ်ဘျုးတၢ်ဖှိၣ် လၢပှၤကညီ” လၢအမ့ၢ်ဝဲ တၢ်အိၣ်ဖှိၣ်သးပှၢ်တဖၣ်လၢ အကွၢ်ထွဲပှၤလၢ တၢ်အဲၣ်တၢ်ကွံအပူၤလီၤ. (အ့းဖ့းစူး ၄:၈, ၁၂; ယၤကိာ် ၅:၁၄, ၁၅) ကစၢ်ယွၤဟ့ၣ်လီၤပှၤ တၢ်အိၣ်ဖှိၣ်သးပှၢ်တဖၣ် ဒ်သိးကမၤစၢၤပှၤလၢ ပကမၤဂ့ၤထီၣ် ပတၢ်ရ့လိာ်သးဒီးအီၤအဂီၢ်လီၤ.—ကတိၤဒိ ၁၅:၃၂.
“ပှၤလၢအန့ၢ်ဘၣ် တၢ်ကူၣ်သ့”
၂၄, ၂၅. ဒ်သိး ပဟးဆှဲး တၢ်မၤကမၣ်မုၣ်ကမၣ်ခွါကန့ၢ်အဂီၢ် တၢ် “သးဆး” မၤစၢၤပှၤကသ့ဒ်လဲၣ်.
၂၄ ပမ့ၢ်နၢ်ပၢၢ်လၢ ယဟိဝၤယွၤ အတၢ်သိၣ်တၢ်သီတဖၣ် ကဲဘျုးလၢပဂီၢ်ဒ်လဲၣ် န့ၣ် ပဆၢတဲာ်တၢ်လၢ အဘၣ်ကသ့ဝဲလီၤ. ပတအဲၣ်ဒိးလီၤဂာ်ဒ်သိးဒီး ပိာ်ခွါသးစၢ်တဂၤလၢ ကတိၤဒိ ၇:၆-၂၃ ပာ်ဖျါဝဲန့ၣ်ဘၣ်. ဖဲန့ၣ်ပထံၣ်ဘၣ်လၢအဝဲအတၢ် “သးဆးတအိၣ်ဘၣ်” အဃိအဝဲဘျးဒီး တခွဲဆၣ်လၢအမ့ၢ် တၢ်မၤကမၣ်မုၣ်ကမၣ်ခွါလီၤ. တၢ်သးဆးန့ၣ် တဘၣ်ဃးထဲပခိၣ်နူာ်ဘၣ်. ပမ့ၢ်အိၣ်ဒီးတၢ်သးဆးန့ၣ် အခီပညီပဂုာ်ကျဲးစၢး ဃုသ့ၣ်ညါနၢ်ပၢၢ်ထီၣ်ကစၢ်ယွၤအတၢ်ထံၣ် ဒီးအိၣ်မူမၤထွဲအီၤလၢ ပတၢ်အိၣ်မူအပူၤလီၤ. ပကဘၣ်သ့ၣ်နီၣ်ထီၣ် လံာ်စီဆှံအဆၢလၢအတဲဝဲလၢ “ပှၤလၢအန့ၢ်ဘၣ်တၢ်ကူၣ်သ့န့ၣ် အဲၣ်အသးဒၣ်ဝဲလီၤ. ပှၤလၢအတိၢ်န့ၢ် တၢ်ကူၣ်တၢ်ဆးန့ၣ် ကထံၣ်န့ၢ်တၢ်ဂ့ၤလီၤ.”—ကတိၤဒိ ၁၉:၈.
၂၅ သံကွၢ်လီၤနသးလၢ ‘ယွၤအတၢ်သိၣ်တၢ်သီတဖၣ် မ့ၢ်တၢ်လၢ အဂ့ၤကတၢၢ်လၢ ယဂီၢ်န့ၣ် မ့ၢ်ယနာ်လၢ ယသးဒီဖျၢၣ်လံဧါ, မ့ၢ်ယနာ်သပှၢ်ကတၢၢ်လၢ ယမ့ၢ်မၤထွဲယွၤအတၢ်သိၣ်တၢ်သီန့ၣ် ယကဒိးန့ၢ်ဘၣ်တၢ်သးခုဧါ.’ (စံးထီၣ်ပတြၢၤ ၁၉:၇-၁၀; ယၡါယၤ ၄၈:၁၇, ၁၈) နသးမ့ၢ်ဒ့ဒီတစဲးဖိန့ၣ် သ့ၣ်နီၣ်ထီၣ်တၢ်ခဲလၢာ်လၢ ယဟိဝၤယွၤမၤန့ၢ်နၤတက့ၢ်. လံာ်စီဆှံတဲဝဲလၢ “လ့ၣ်ကွၢ်, ဒီးထံၣ်လၢယွၤမ့ၢ်တၢ်ဂ့ၤ” တက့ၢ်. (စံးထီၣ်ပတြၢၤ ၃၄:၈) နမ့ၢ်မၤဒ်န့ၣ်န့ၣ် နတၢ်အဲၣ်ယွၤ ဒံးယံာ်ဒံးဒိၣ်ထီၣ်ဝဲလီၤ. ဒီးနကအဲၣ်တၢ်လၢယွၤအဲၣ်ဝဲ ဒီးသးဟ့တၢ်လၢအဝဲသးဟ့ဝဲတဖၣ်လီၤ. တကးဒံးဘၣ် နကဘၣ်မၤပှဲၤနသးလၢ တၢ်ဆိကမိၣ်လၢ အဂ့ၤအဝါ, တၢ်လၢအမ့ၢ်အတီ, တၢ်လၢအတီအလိၤ, တၢ်လၢအစီအဆှံဒီး တၢ်လၢအိၣ်ဒီးအလၤကပီၤန့ၣ်လီၤ. (ဖံလံးပံၤ ၄:၈, ၉) ဒ်စီၤယိၤသး ဒိးန့ၢ်ဘၣ်တၢ်ကူၣ်သ့လၢ ယဟိဝၤယွၤအအိၣ်အသိး ပဝဲစ့ၢ်ကီးပဒိးန့ၢ်ဘၣ်သ့ဝဲလီၤ.—ယၡါယၤ ၆၄:၈.
၂၆. တၢ်မၤလိလၢခံ ခံခါကပာ်ဖျါထီၣ်တၢ်ဂ့ၢ်မနုၤလဲၣ်.
၂၆ နမ့မ့ၢ်ပှၤလၢ အထီၣ်ပှၢ်မ့ၢ်ဂ့ၤ အိၣ်သဘျ့မ့ၢ်ဂ့ၤ ယဟိဝၤယွၤ အဲၣ်ဒိးလၢ နကအိၣ်ဒီး တၢ်သူၣ်ဖှံသးညီ လၢနတၢ်အိၣ်မူအပူၤလီၤ. ဒ်သိးပတၢ်ဆီဟံၣ်ဆီဃီ ကပှဲၤဒီးတၢ်သးခုအဂီၢ် တၢ်မၤလိလၢခံ ခံခါကပာ်ဖျါထီၣ် တၢ်ဂ့ၢ်တၢ်ကျိၤလၢ ကမၤစၢၤပှၤန့ၣ်လီၤ.