တၢ်မၤလိ ၁၆
ထီဒါမုၣ်ကီၤလံၢ်
“ထီဒါမုၣ်ကီၤလံၢ်တက့ၢ်, ဒီးကဃ့ၢ်ထီၣ်ကွံာ်လၢ သုအိၣ်လီၤ.”—ယၤကိာ် ၄:၇.
၁, ၂. ဘၣ်ဃးဒီး မုၣ်ကီၤလံၢ်ဒီးအတၢ်ဝံတၢ်နါတဖၣ်န့ၣ် ပကဘၣ်နၢ်ပၢၢ်တၢ်မနုၤလဲၣ်.
တၢ်အိၣ်မူလၢ ယဟိဝၤယွၤအတၢ်ပၢဖီလာ် လၢဟီၣ်ခိၣ်သီအပူၤန့ၣ် ကပှဲၤဝဲဒီး တၢ်သူၣ်ဖှံသးညီလီၤ. ဖဲန့ၣ်အဆၢကတီၢ် ပကအိၣ်မူဘၣ်ဒ် ယဟိဝၤယွၤ တိာ်ပာ်ဝဲအသိးလီၤ. ဘၣ်ဆၣ် ခဲအံၤန့ၣ် ပအိၣ်မူဘၣ်လၢ ဟီၣ်ခိၣ်လၢ မုၣ်ကီၤလံၢ်ဒီး အတၢ်ဝံတၢ်နါတဖၣ်ပၢဝဲ အပူၤလီၤ. (၂ ကရံၣ်သူး ၄:၄) မုၣ်ကီၤလံၢ်ဒီး အတၢ်ဝံတၢ်နါတဖၣ်န့ၣ် ပထံၣ်အဝဲသ့ၣ်တသ့ဘၣ်သနာ်က့ အဝဲသ့ၣ်အိၣ်ဝဲနီၢ်ကီၢ်ဒီး အစိအကမီၤဒိၣ်ဝဲလီၤ.
၂ ပဒီသဒၢလီၤပသးလၢ မုၣ်ကီၤလံၢ် ဒီးပအိၣ်ဘူးဒီးယဟိဝၤယွၤ ကသ့ဒ်လဲၣ်န့ၣ် တၢ်မၤလိတခါအံၤ ကပာ်ဖျါထီၣ်န့ၢ်ပှၤလီၤ. ယဟိဝၤယွၤအၢၣ်လီၤပှၤလၢ အကမၤစၢၤပှၤန့ၣ်လီၤ. ဘၣ်ဆၣ် မုၣ်ကီၤလံၢ်ဒီး အတၢ်ဝံတၢ်နါတဖၣ် သူဝဲတၢ်ကူၣ်တၢ်ဖး ဒ်သိးကကွဲန့ၢ်လွဲန့ၢ်ပှၤလၢ ကျဲဒ်လဲၣ်န့ၣ် ပကဘၣ်နၢ်ပၢၢ်အီၤလီၤတံၢ်လီၤဆဲးလီၤ.
မုၣ်ကီၤလံၢ်ဟးဝ့ၤဝီၤ “ဒ်ခ့ယုၢ်ကညီၤရုၢ်ရုၢ်အသိး”
၃. မုၣ်ကီၤလံၢ် အဲၣ်ဒိးမၤပှၤဒ်လဲၣ်.
၃ မုၣ်ကီၤလံၢ်တဲဝဲလၢ ပဝဲပှၤဟီၣ်ခိၣ်ဖိတဖၣ် ပဘူၣ်ထီၣ်ဘါထီၣ် ယဟိဝၤယွၤလၢ ပနီၢ်ကစၢ်အဘျုးအဂီၢ် ဒီးပမ့ၢ်ထံၣ်ဘၣ်တၢ်ကီတၢ်ခဲအါတလၢန့ၣ် ပတမၤယွၤအတၢ်မၤလၢၤဘၣ်. (ဖး ယိၤဘး ၂:၄, ၅ တက့ၢ်.) ဖဲပှၤတဂၤဂၤ ပာ်ဖျါထီၣ်ဝဲလၢ အဝဲအဲၣ်ဒိးသ့ၣ်ညါအါထီၣ် ယဟိဝၤယွၤအဂ့ၢ်အဆၢကတီၢ်န့ၣ် မုၣ်ကီၤလံၢ်ဒီး အတၢ်ဝံတၢ်နါတဖၣ်ထံၣ်ဝဲဒီး ဂုာ်ကျဲးစၢးတြီအီၤန့ၣ်လီၤ. တကးဒံးဘၣ် ဖဲပှၤတဂၤဟ့ၣ်လုၢ်ထီၣ်အသးဆူ ယဟိဝၤယွၤအအိၣ် ဒီးဒိးဘျၢထံအခါန့ၣ် အဝဲသ့ၣ်သးပှံၢ်ထီၣ်တၢ်ဒိၣ်မးလီၤ. လၢတၢ်န့ၣ်အဃိ လံာ်စီဆှံတဲဝဲလၢ “ဒ်ခ့ယုၢ်ကညီၤရုၢ်ရုၢ်အသိးန့ၣ် . . . မုၣ်ကီၤလံၢ်ဟးဝ့ၤဝီၤဃုပှၤလၢအကယူၢ်လီၤဝဲလီၤ.” (၁ ပ့းတရူး ၅:၈) မုၣ်ကီၤလံၢ် အဲၣ်ဒိးမၤဟးဂီၤ ပတၢ်ရ့လိာ်သးဒီး ယဟိဝၤယွၤန့ၣ်လီၤ.—စံးထီၣ်ပတြၢၤ ၇:၁, ၂; ၂ တံၤမသ့း ၃:၁၂.
ဖဲပဟ့ၣ်လုၢ်ထီၣ်ပသးဆူ ယဟိဝၤယွၤအိၣ်အခါ မုၣ်ကီၤလံၢ် သးပှံၢ်ထီၣ်တၢ်ဒိၣ်မးလီၤ
၄, ၅. (က) မုၣ်ကီၤလံၢ် တြီတၢ်မနုၤ တန့ၢ်ဘၣ်လဲၣ်. (ခ) ပ “ထီဒါမုၣ်ကီၤလံၢ်” န့ၣ်အခီပညီဒ်လဲၣ်.
၄ ယဟိဝၤယွၤတပျဲ မုၣ်ကီၤလံၢ်ဒီး အတၢ်ဝံတၢ်နါတဖၣ်မၤဘၣ်ဒိပှၤ ဖဲအသးဘၣ်. လၢတၢ်န့ၣ်အဃိ ပတလိၣ်ပျံၤအဝဲသ့ၣ်ဘၣ်. ယဟိဝၤယွၤအၢၣ်လီၤဝဲလၢ “ပှၤဂီၢ်မုၢ်ဖးဒိၣ်” လၢအမ့ၢ်ခရံာ်ဖိနီၢ်နီၢ်တဖၣ်န့ၣ် ကလဲၤခီဖျိဝဲ “တၢ်နးတၢ်ဖှီၣ်ဖးဒိၣ်” လီၤ. (လီၣ်ဖျါ ၇:၉, ၁၄) ယဟိဝၤယွၤ ကဒီသဒၢအပှၤဂီၢ်မုၢ်အဃိ အတၢ်အၢၣ်လီၤအံၤ ကလၢထီၣ်ပှဲၤထီၣ်ဝဲ သပှၢ်ကတၢၢ်လီၤ. ဒီးမုၣ်ကီၤလံၢ်တြီဝဲ တန့ၢ်နီတစဲးဘၣ်.
၅ ပမ့ၢ်အိၣ်ဘူးဒီး ယဟိဝၤယွၤထီဘိန့ၣ် မုၣ်ကီၤလံၢ် မၤဟးဂီၤပတၢ်ရ့လိာ်သးဒီးယွၤ တန့ၢ်ဘၣ်. ကစၢ်ယွၤအကလုၢ်ကထါ အၢၣ်လီၤပှၤလၢ “တုၤသုအိၣ်ဒီးယွၤဒီး, ယွၤအိၣ်ဒီးသုလီၤ.” (၂ ကွဲးနီၣ်တၢ် ၁၅:၂; ဖး ၁ ကရံၣ်သူး ၁၀:၁၃ တက့ၢ်.) ပိာ်မုၣ်ဒီးပိာ်ခွါ လၢပျၢၤလၢ အတီဒီးကစၢ်ယွၤ ဒ်သိးဒီး စီၤဟ့းဘ့းလး, စီၤဃနိာ်, စီၤနိအၤ, နီၢ်စၤရါ ဒီးစီၤမိၤၡ့န့ၣ် ထီဒါမုၣ်ကီၤလံၢ်န့ၢ်ဝဲ ခီဖျိလၢ အဝဲသ့ၣ်အိၣ်ဘူးဒီး ယဟိဝၤယွၤထီဘိအဃိလီၤ. (ဧ့ၤဘြံၤ ၁၁:၄-၄၀) ပဝဲစ့ၢ်ကီး ပမၤဒ်အဝဲသ့ၣ်အသိး သ့ဝဲလီၤ. ကစၢ်ယွၤအကလုၢ်ကထါအၢၣ်လီၤပှၤလၢ “ထီဒါမုၣ်ကီၤလံၢ်တက့ၢ်, ဒီးကဃ့ၢ်ထီၣ်ကွံာ်လၢသုအိၣ်လီၤ.”—ယၤကိာ် ၄:၇.
“ပကနိဒီး . . . တၢ်နါအိၣ်လၢမူခိၣ်အလီၢ်တဖၣ်”
၆. ဒ်သိးပတၢ်ရ့လိာ်သးဒီး ယဟိဝၤယွၤကလီၤစၢ်အဂီၢ် မုၣ်ကီၤလံၢ်မၤဝဲဒ်လဲၣ်.
၆ မုၣ်ကီၤလံၢ်သ့ၣ်ညါဝဲလၢ ယဟိဝၤယွၤတဟ့ၣ်အခွဲးလၢ အဝဲကမၤပှၤ ဖဲအဝဲအဲၣ်ဒိးမၤဝဲန့ၣ်ဘၣ်. ဘၣ်ဆၣ် အဝဲဂုာ်ကျဲးစၢးသပှၢ်တၢၢ် ဒ်သိးကမၤစၢ်လီၤ ပတၢ်ရ့လိာ်သးဒီးယွၤအဂီၢ်လီၤ. မုၢ်မဆါတနံၤအံၤ မုၣ်ကီၤလံၢ်လ့ပစီပှၤလၢ ကျဲအါဘိဒီး အဝဲသူဝဲ တၢ်ကူၣ်တၢ်ဖးအကလုာ်ကလုာ် ဒ်အဝဲသူတ့ၢ်ဝဲလၢ အနံၣ်လၢအကထိတဖၣ်န့ၣ်လီၤ. မုၣ်ကီၤလံၢ်သူဝဲ တၢ်ကူၣ်တၢ်ဖးမနုၤတဖၣ်လဲၣ်.
၇. ဘၣ်မနုၤအဃိ မုၣ်ကီၤလံၢ်လ့ပစီအါထီၣ် ယဟိဝၤယွၤအပှၤဂီၢ်မုၢ်တဖၣ်လဲၣ်.
၇ တၢ်မၢဖိယိၤဟၣ်ကွဲးဝဲလၢ “ဟီၣ်ခိၣ်ခဲလၢာ်မံလီၤဝဲလၢ တၢ်အၢတၢ်သီတဂၤန့ၣ်အပူၤလီၤ.” (၁ ယိၤဟၣ် ၅:၁၉) မုၣ်ကီၤလံၢ်ပၢဝဲ ဟီၣ်ခိၣ်ဒီဘ့ၣ်ဒီး အဝဲအဲၣ်ဒိးပၢဝဲ ယဟိဝၤယွၤအပှၤဂီၢ်မုၢ်စ့ၢ်ကီးလီၤ. (မံကၤ ၄:၁; ယိၤဟၣ် ၁၅:၁၉; လီၣ်ဖျါ ၁၂:၁၂, ၁၇) မုၣ်ကီၤလံၢ်သ့ၣ်ညါဝဲလၢ အတၢ်ဆၢကတီၢ် အိၣ်တ့ၢ်ထဲတစိၢ်ဖိအဃိ အဝဲလ့ပစီပှၤအါထီၣ် ဒ်သိးကမၤဟးဂီၤ ပတၢ်သးတီလၢ ယဟိဝၤယွၤအဖီခိၣ်လီၤ. တဘျီတခီၣ် မုၣ်ကီၤလံၢ်သူဝဲ တၢ်မၤနးမၤဖှီၣ်ဒီး တဘျီတခီၣ်န့ၣ် အဝဲသူဝဲ တၢ်ကွဲန့ၢ်လွဲန့ၢ်န့ၣ်လီၤ.
၈. ခရံာ်ဖိတဂၤစုာ်စုာ် ကဘၣ်မၤဝဲတၢ်မနုၤလဲၣ်.
၈ အ့းဖ့းစူး ၆:၁၂ တဲဝဲလၢ “ပကနိဒီး . . . တၢ်နါအိၣ်လၢမူခိၣ်အလီၢ်တဖၣ်လီၤ.” ပကဘၣ်သ့ၣ်ညါပာ်စၢၤလၢ ကယဲၢ်ပှၤလၢအဟ့ၣ်လုၢ်ထီၣ်အသးဆူ ယဟိဝၤယွၤအအိၣ်န့ၣ် ကဘၣ်ကနိဒီး မုၣ်ကီၤလံၢ်ဒီး အတၢ်ဝံတၢ်နါတဖၣ်လီၤ. လၢတၢ်န့ၣ်အဃိ ဖဲစီၤပီလူး ကွဲးလံာ်ဆူ အ့းဖ့းစူးတၢ်အိၣ်ဖှိၣ်အအိၣ်အခါန့ၣ် အဝဲဟ့ၣ်သဆၣ်ထီၣ် ခရံာ်ဖိလၢအအိၣ်ဖဲန့ၣ်တဖၣ် သၢဘျီလၢ အဝဲသ့ၣ်ကဘၣ် “ဆၢထၢၣ်” ဂၢၢ်ဂၢၢ်ကျၢၤကျၢၤန့ၣ်လီၤ.—အ့းဖ့းစူး ၆:၁၁, ၁၃, ၁၄.
၉. မုၣ်ကီၤလံၢ်ဒီး အတၢ်ဝံတၢ်နါတဖၣ် ဂုာ်ကျဲးစၢးမၤဝဲဒ်လဲၣ်.
၉ မုၣ်ကီၤလံၢ်ဒီး အတၢ်ဝံတၢ်နါတဖၣ် ဂုာ်ကျဲးစၢးကွဲန့ၢ်လွဲန့ၢ်ပှၤလၢ ကျဲအါဘိန့ၣ်လီၤ. ပတြီဆၢမုၣ်ကီၤလံၢ် အတၢ်မၤကွၢ်တခါခါ မ့ၢ်န့ၢ်သနာ်က့ အဝဲကွဲန့ၢ်လွဲန့ၢ်ပှၤလၢ ကျဲအဂၤတဘိဘိသ့ဝဲလီၤ. ဖဲမုၣ်ကီၤလံၢ် ဂုာ်ကျဲးစၢးဃုသ့ၣ်ညါ ပတၢ်ဂံၢ်စၢ်ဘါစၢ်ဝံၤအလီၢ်ခံ အဝဲကဃုထၢ ပျံၤသကွီၤလၢအဂ့ၤကတၢၢ် ဒ်သိးကမၤလီၤဃံၢ်ပှၤအဂီၢ်လီၤ. ဘၣ်ဆၣ် လံာ်စီဆှံဒုးသ့ၣ်ညါပှၤ ဘၣ်ဃးဒီးမုၣ်ကီၤလံၢ် အတၢ်ကွဲန့ၢ်လွဲန့ၢ်တဖၣ် ဒ်သိးပသုတလီၤလၢ အပျံၤသကွီၤအပူၤတဂ့ၤအဂီၢ်လီၤ. (၂ ကရံၣ်သူး ၂:၁၁; ကွၢ်တၢ်ဂ့ၢ် ၃၁ လၢလံာ်အကတၢၢ်တက့ၢ်.) ခဲအံၤပကဃုသ့ၣ်ညါ မုၣ်ကီၤလံၢ် အပျံၤသကွီၤတခါလၢအမ့ၢ် တၢ်ဝံတၢ်နါ အတၢ်ဖံးတၢ်မၤန့ၣ်လီၤ.
ဟးဆှဲးတၢ်ဝံတၢ်နါ အတၢ်ဖံးတၢ်မၤ
၁၀. (က) တၢ်ဝံတၢ်နါအတၢ်ဖံးတၢ်မၤန့ၣ် မ့ၢ်တၢ်မနုၤလဲၣ်. (ခ) တၢ်ဝံတၢ်နါအတၢ်ဖံးတၢ်မၤတဖၣ်န့ၣ် ယဟိဝၤယွၤထံၣ်ဝဲဒ်လဲၣ်.
၁၀ တၢ်ဝံတၢ်နါ အတၢ်ဖံးတၢ်မၤန့ၣ် ပၣ်ဃုာ်ဒီးပှၤဖးတၢ်, ပှၤဟိၣ်တၢ်လိၣ်တၢ်, တၢ်အူတၢ်သမူ ဒီးတၢ်ဂုာ်ကျဲးစၢး ဆဲးကျိးဒီးပှၤသံတ့ၢ်တဖၣ်န့ၣ်လီၤ. လံာ်စီဆှံတဲဝဲလၢ တၢ်ဝံတၢ်နါအတၢ်ဖံးတၢ်မၤန့ၣ် မ့ၢ်တၢ်လၢအလီၤ “သးဘၣ်အၢ” န့ၣ်လီၤ. ပမၤဘၣ်ထွဲလိာ်ပသးဒီး တၢ်ဝံတၢ်နါအတၢ်ဖံးတၢ်မၤဒီး တကတီၢ်ဃီန့ၣ် ပဘူၣ်ထီၣ်ဘါထီၣ် ယဟိဝၤယွၤတန့ၢ်ဘၣ်. (၅ မိၤၡ့ ၁၈:၁၀-၁၂; လီၣ်ဖျါ ၂၁:၈) ခရံာ်ဖိတဖၣ် ကဘၣ်ဟးဆှဲး တၢ်ဝံတၢ်နါ အတၢ်ဖံးတၢ်မၤ ခဲလၢာ်ခဲဆ့လီၤ.—ရိမ့ၤ ၁၂:၉.
၁၁. ပမ့ၢ်သးအိၣ် တၢ်ဝံတၢ်နါအတၢ်ဖံးတၢ်မၤ ထဲတစဲးဖိဒၣ်လဲာ် တၢ်ဘၣ်ယိၣ်အလီၢ် အိၣ်ဒ်လဲၣ်.
၁၁ မုၣ်ကီၤလံၢ်သ့ၣ်ညါဝဲလၢ ပမ့ၢ်သးအိၣ် တၢ်ဝံတၢ်နါအတၢ်ဖံးတၢ်မၤ ထဲတစဲးဖိဒၣ်လဲာ် အဝဲကွဲန့ၢ်လွဲန့ၢ်ပှၤလၢ ပကမၤဘၣ်ဃးပသးဒီး တၢ်ဝံတၢ်နါ အတၢ်ဖံးတၢ်မၤန့ၣ်ညီဝဲလီၤ. ပမ့ၢ်မၤတၢ်ဝံတၢ်နါ အတၢ်ဖံးတၢ်မၤတခါဂ့ၤတခါဂ့ၤန့ၣ် ပတၢ်ရ့လိာ်သးဒီး ယဟိဝၤယွၤ ကဟးဂီၤဝဲလီၤ.
မုၣ်ကီၤလံၢ် အဲၣ်ဒိးလီန့ၢ်ပှၤ
၁၂. မုၣ်ကီၤလံၢ် အဲၣ်ဒိးမၤဘံဘူ ပခိၣ်နူာ်လၢကျဲဒ်လဲၣ်.
၁၂ မုၣ်ကီၤလံၢ် အဲၣ်ဒိးမၤဘံဘူပခိၣ်နူာ်လီၤ. အဝဲကဒုးအိၣ်ထီၣ် ပတၢ်သးဒ့ဒီကယီကယီ တုၤဒၣ်လဲာ်ပကပာ်ပနီၣ် “တၢ်အၢလၢတၢ်ဂ့ၤ, ဒီးတၢ်ဂ့ၤလၢတၢ်အၢ” န့ၣ်လီၤ. (ယၡါယၤ ၅:၂၀) ဒီးမုၣ်ကီၤလံၢ်အဲၣ်ဒိး ဒုးဆိကမိၣ်ပှၤလၢ ပမ့ၢ်တမၤထွဲ ကစၢ်ယွၤအတၢ်သိၣ်တၢ်သီတဖၣ်န့ၣ် ပကအိၣ်ဒီးတၢ်သးခု အါန့ၢ်ဒံးလၢညါလီၤ. တကးဒံးဘၣ် အဝဲအဲၣ်ဒိးလၢ ပကဆိကမိၣ်စ့ၢ်ကီးလၢ လံာ်စီဆှံအတၢ်ဟ့ၣ်ကူၣ်တဖၣ်န့ၣ် အဘျုးတအိၣ်လၢပဂီၢ်လၢၤဘၣ်.
၁၃. မုၣ်ကီၤလံၢ် ဂုာ်ကျဲးစၢးမၤဒ့ဒီ ပှၤသးဒ်လဲၣ်.
၁၃ မုၣ်ကီၤလံၢ် မၤဒ့ဒီပှၤသးသ့မးလီၤ. တၢ်ကွဲန့ၢ်လွဲန့ၢ်တခါအံၤ မုၣ်ကီၤလံၢ်သူအီၤ ဖးယံာ်လံ. အဒိ လၢဧ့ၤဒ့ၣ်တၤသၣ်အလီၢ်န့ၣ် အဝဲဂုာ်ကျဲးစၢး မၤဒ့ဒီနီၢ်အံၣ်အုအသး ခီဖျိလၢ အဝဲသံကွၢ်နီၢ်အံၣ်အုလၢ “ကယဲၢ်သ့ၣ်အိၣ်လၢတၤသၣ်အလီၢ်ပူၤ တထံးလၢ်လၢ်န့ၣ် ယွၤမၤလိာ်သု, အီၣ်အီၤတဂ့ၤန့ၣ်, သပှၢ်တၢၢ်ဧါ.” (၁ မိၤၡ့ ၃:၁) လၢခံ ဖဲစီၤယိၤဘးအစိၤန့ၣ် မုၣ်ကီၤလံၢ်သံကွၢ် ယဟိဝၤယွၤလၢ မူခိၣ်ကလူးတဖၣ်အမဲာ်ညါ ဒ်အံၤ “စီၤယိၤဘးပျံၤယွၤ လၢတၢ်ကလီကလီအဂီၢ်စ့ၢ်ကီးဧါ.” (ယိၤဘး ၁:၉) ဒီးဖဲယ့ၣ်ၡူးဒိးဘျၢထံဝံၤအလီၢ်ခံစ့ၢ်ကီး မုၣ်ကီၤလံၢ်အဲၣ်ဒိးတၤ ယ့ၣ်ၡူးအဃိတဲအီၤလၢ “နမ့မ့ၢ်ယွၤအဖိခွါဒီး, စံးတၢ်ဒ်သိးလၢၢ်တဖၣ်အံၤ ကကဲထီၣ်ကိၣ်တက့ၢ်.”—မးသဲ ၄:၃.
၁၄. ဒ်သိးမုၣ်ကီၤလံၢ် ကဒုးဆိကမိၣ်ပှၤလၢ တၢ်ဝံတၢ်နါအတၢ်ဖံးတၢ်မၤ တမ့ၢ်တၢ်လၢ အလီၤဘၣ်ယိၣ်ဘၣ်န့ၣ် အဝဲမၤဝဲဒ်လဲၣ်.
၁၄ မုၢ်မဆါတနံၤအံၤစ့ၢ်ကီး မုၣ်ကီၤလံၢ် အဲၣ်ဒိးမၤဒ့ဒီပသးလီၤ. အဝဲဂုာ်ကျဲးစၢး ဒုးဆိကမိၣ်ပှၤလၢ တၢ်ဝံတၢ်နါ အတၢ်ဖံးတၢ်မၤတနီၤနီၤန့ၣ် တအၢထဲန့ၣ်ညါဘၣ်. အဃိခရံာ်ဖိတနီၤဒၣ်လဲာ် ဆိကမိၣ်ဝဲလၢ တၢ်ဝံတၢ်နါအတၢ်ဖံးတၢ်မၤတဖၣ်အံၤ တမ့ၢ်တၢ်လၢအလီၤဘၣ်ယိၣ်လၢၤဘၣ်. (၂ ကရံၣ်သူး ၁၁:၃) မ့မ့ၢ်ဒ်န့ၣ်န့ၣ် ပဒီသဒၢလီၤပသး ကသ့ဒ်လဲၣ်. ဒီးဒ်သိး မုၣ်ကီၤလံၢ်လီန့ၢ်ပှၤသုတန့ၢ်တဂ့ၤအဂီၢ် ပကဘၣ်မၤဒ်လဲၣ်. ခဲအံၤ ပကဃုသ့ၣ်ညါ တၢ်ဂ့ၢ်ခံမံၤလၢ မုၣ်ကီၤလံၢ်သူဝဲဒ်သိး ကလီန့ၢ်ပှၤအဂီၢ်လီၤ. တၢ်ဂ့ၢ်ခံမံၤအံၤ မ့ၢ်ဝဲတၢ်မၤမုာ်မၤဖှံသးဒီး တၢ်ကူစါယါဘျါအကျိၤအကျဲန့ၣ်လီၤ.
မုၣ်ကီၤလံၢ် အဲၣ်ဒိးလ့ပစီပှၤ ခီဖျိတၢ်လၢပကွၢ်, ဖး မ့တမ့ၢ် တၢ်လၢပဒိကနၣ် ဒီးပတၢ်အိၣ်ဆူၣ်အိၣ်ချ့
၁၅. ပမၤဘၣ်ဃးပသးဒီး တၢ်ဝံတၢ်နါတဖၣ် ခီဖျိလၢ တၢ်မၤမုာ်မၤဖှံသး သ့လၢကျဲဒ်လဲၣ်.
၁၅ မုၢ်မဆါတနံၤအံၤ တၢ်ဂီၤမူ, တၢ်လိာ်ကွဲလၢ ခီၣ်ဖၠူထၢၣ်အပူၤ ဒီးအ့ထၢၣ်နဲးန့ၣ် ပာ်ဖျါထီၣ်ဝဲ တၢ်ဝံတၢ်နါ, တၢ်မၤကဒါပှၤမဲာ် ဒီးတၢ်လၢအလီၤဆီလီၤလးအါမးလီၤ. ပှၤအါဂၤ ထံၣ်ဝဲတၢ်သ့ၣ်တဖၣ်အံၤ ဒ်တၢ်လၢအလီၤသူၣ်ဖှံသးညီ ဒီးအတမ့ၢ်တၢ်နီတမံၤဘၣ်. အဝဲသ့ၣ် ဟ့ၣ်အခွဲးလၢ တၢ်ဝံတၢ်နါတဖၣ် ကဟဲနုာ်လီၤလၢ အတၢ်အိၣ်မူအပူၤ ဘၣ်ဆၣ် ဆိကမိၣ်ဝဲလၢ တၢ်ဘၣ်ယိၣ်အလီၢ်တအိၣ်ဘၣ်. တကးဒံးဘၣ် ပှၤတဂၤ မၤဘၣ်ဃးအသးဒီး တၢ်ဝံတၢ်နါအတၢ်ဖံးတၢ်မၤ သ့ခီဖျိလၢ တၢ်ဒွးတၢ်, တၢ်ကွၢ်စုတိၤ, ဖဲစးခိ မ့တမ့ၢ် တၢ်ကွၢ်လၢၢ်ဖျါကလၤန့ၣ်လီၤ. မုၣ်ကီၤလံၢ်အဲၣ်ဒိးလၢ ပကဆိကမိၣ်လၢ ပမ့ၢ်မၤတၢ်သ့ၣ်တဖၣ်အံၤသနာ်က့ တၢ်ဘၣ်ယိၣ်အလီၢ်တအိၣ်ဘၣ်, မ့ၢ်ဒၣ်ပမၤ သူၣ်ဖှံသးညီပသးလီၤ. တကးဒံးဘၣ် ပှၤတနီၤဆိကမိၣ်ဝဲလၢ ပမ့ၢ်ကွၢ် တၢ်ဝံတၢ်နါ အတၢ်ဖံးတၢ်မၤလၢ တၢ်ဂီၤမူအပူၤ သနာ်က့ ပမ့ၢ်တမၤ တၢ်ဝံတၢ်နါအတၢ်ဖံးတၢ်မၤန့ၣ် တဘၣ်တၢ်နီတမံၤဘၣ်. ဘၣ်ဆၣ် တၢ်ဆိကမိၣ်ဒ်အံၤန့ၣ် ဘၣ်မနုၤအဃိ မ့ၢ်တၢ်လၢ အလီၤဘၣ်ယိၣ်ဝဲလဲၣ်.—၁ ကရံၣ်သူး ၁၀:၁၂.
၁၆. လံာ်လဲၢ်, တၢ်ဂီၤမူ ဒီးတၢ်သးဝံၣ်လၢ အဘၣ်ထွဲလိာ်အသးဒီး တၢ်ဝံတၢ်နါအတၢ်ဖံးတၢ်မၤန့ၣ် ဘၣ်မနုၤအဃိ ပကြၢးဟးဆှဲးအီၤလဲၣ်.
၁၆ မုၣ်ကီၤလံၢ်ဒီး အတၢ်ဝံတၢ်နါတဖၣ် ဖးဝဲပတၢ်ဆိကမိၣ်တသ့ဘၣ်. ဘၣ်ဆၣ်ဒ်သိး အဝဲသ့ၣ် ကသ့ၣ်ညါဝဲ ပတၢ်ဂံၢ်စၢ်ဘါစၢ် ဒီးပတၢ်ဆိကမိၣ်တဖၣ်အဂီၢ် အဝဲသ့ၣ် ခိးကွၢ်ဝဲ တၢ်လၢပမၤ, ဖး, ကွၢ်ဒီး ဒိကနၣ်အီၤတဖၣ်န့ၣ်လီၤ. ပမ့ၢ်ဃုထၢ တၢ်ဂီၤမူ, တၢ်သးဝံၣ် မ့တမ့ၢ် လံာ်လဲၢ်တဖၣ်လၢ အဘၣ်ထွဲလိာ်အသးဒီး ပှၤမဲာ်ထံၣ်ဝံ, ပှၤသ့တၢ်အူတၢ်သမူ, ပှၤလၢတၢ်နါဒိးအီၤတဖၣ်, တၢ်တဃၣ်, တဲပြဲၢ် မ့တမ့ၢ် တၢ်ဂ့ၢ်လၢအလီၤဂာ် ဒီးတၢ်ဝံတၢ်နါအတၢ်ဖံးတၢ်မၤတဖၣ်န့ၣ် မုၣ်ကီၤလံၢ်ဒီး အတၢ်ဝံတၢ်နါတဖၣ် ကသ့ၣ်ညါဝဲလၢ ပသးအိၣ်ဃုသ့ၣ်ညါအါထီၣ် အဝဲသ့ၣ်အဂ့ၢ်န့ၣ်လီၤ. ဖဲန့ၣ်န့ၣ် အဝဲသ့ၣ်ကဂုာ်ကျဲးစၢးအါထီၣ် ဒ်သိးကလ့ပစီပှၤလၢ ပကမၤတၢ်ဝံတၢ်နါ အတၢ်ဖံးတၢ်မၤန့ၣ်လီၤ.—ဖး ကလၤတံ ၆:၇ တက့ၢ်.
၁၇. မ့ၢ်လၢပအဲၣ်ဒိးအိၣ်ဒီး တၢ်အိၣ်ဆူၣ်အိၣ်ချ့လၢအဂ့ၤအဃိ မုၣ်ကီၤလံၢ်ကဂုာ်ကျဲးစၢး လ့ပစီပှၤ လၢကျဲဒ်လဲၣ်.
၁၇ မ့ၢ်လၢပအဲၣ်ဒိးအိၣ်ဒီး တၢ်အိၣ်ဆူၣ်အိၣ်ချ့လၢအဂ့ၤအဃိ မုၣ်ကီၤလံၢ် ကဂုာ်ကျဲးစၢး ဟံးန့ၢ်တၢ်ခွဲးတၢ်ယာ်လၢ ကလ့ပစီပှၤန့ၣ်လီၤ. မုၢ်မဆါတနံၤညါအံၤ ပှၤအါဂၤန့ၣ် အတၢ်အိၣ်ဆူၣ်အိၣ်ချ့တဂ့ၤဘၣ်. ဒီးဘၣ်သ့ၣ်သ့ၣ် ပှၤတဂၤကကူစါယါဘျါအသး လၢကျဲအါဘိဘၣ်ဆၣ် အတၢ်ဆါတဘျါဘၣ်. (မၢ်ကူး ၅:၂၅, ၂၆) ဖဲန့ၣ်အခါ အသးဟးဂီၤသ့ ဒီးဘၣ်သ့ၣ်သ့ၣ် အဝဲကသးအိၣ်မၤကွၢ် ကယဲၢ်တၢ်ကူစါယါဘျါအကျိၤအကျဲ တခါဂ့ၤတခါဂ့ၤန့ၣ်လီၤ. ဘၣ်ဆၣ် ဒ်ပမ့ၢ်ခရံာ်ဖိအသိး ပကဘၣ်ပလီၢ်ပသး ဒ်သိးပသုတဃုထၢ တၢ်ကူစါယါဘျါ အကျိၤအကျဲလၢ အဘၣ်ထွဲလိာ်အသးဒီး “ပှၤသ့တၢ်အူတၢ်သမူ” တဖၣ်တဂ့ၤအဂီၢ်လီၤ.—၅ မိၤၡ့ ၁၈:၁၀-၁၂.
ဖဲနဆိးက့အခါ သန့ၤနသးလၢ ယဟိဝၤယွၤအအိၣ်တက့ၢ်
၁၈. ခရံာ်ဖိတဖၣ် ကဘၣ်ဟးဆှဲး တၢ်ကူစါယါဘျါ အကျိၤအကျဲ မနုၤတဖၣ်လဲၣ်.
၁၈ လၢညါန့ၣ် ပှၤအံၣ်စရ့လးဖိတနီၤ မၤဘၣ်ဃးအသးဒီး တၢ်ဝံတၢ်နါ အတၢ်ဖံးတၢ်မၤအဃိ ယဟိဝၤယွၤတဲအဝဲသ့ၣ်လၢ “တုၤသုယူာ်ထီၣ်သုစုဒီး, ယကပာ်တဒၢယမဲာ်ဒီးသု, ဒီးတုၤသုမၤအါထီၣ်သုတၢ်ထုကဖၣ်ဒီး, ယတဒိကနၣ်ဘၣ်တၢ်ဘၣ်.” (ယၡါယၤ ၁:၁၅) ဆိကမိၣ်ကွၢ်တက့ၢ်. ယဟိဝၤယွၤ တဒိကနၣ်အဝဲသ့ၣ် အတၢ်ထုကဖၣ်ဘၣ်. လီၤဆီဒၣ်တၢ် ဖဲပဆိးက့အခါ ပလိၣ်ဘၣ်ယဟိဝၤယွၤ အတၢ်မၤစၢၤအဃိ ပတအဲၣ်ဒိးမၤတၢ်လၢ ကမၤဘၣ်ဒိ ပတၢ်ရ့လိာ်သးဒီးယဟိဝၤယွၤ နီတမံၤဘၣ်. (စံးထီၣ်ပတြၢၤ ၄၁:၃) လၢတၢ်န့ၣ်အဃိ တချုးလၢပတူၢ်လိာ် တၢ်ကူစါယါဘျါ အကျိၤအကျဲ တခါဂ့ၤတခါဂ့ၤန့ၣ် ပကဘၣ်ဃုသ့ၣ်ညါဆိလၢ မ့ၢ်အဘၣ်ထွဲလိာ်အသးဒီး တၢ်ဝံတၢ်နါ အတၢ်ဖံးတၢ်မၤ မ့တမ့ၢ် တၢ်အူတၢ်သမူလၢ ကျဲတဘိဘိဧါ. (မးသဲ ၆:၁၃) ပမ့ၢ်ဆိကမိၣ်လၢ တၢ်ကူစါယါဘျါ အကျိၤအကျဲအံၤ ဘၣ်သ့ၣ်သ့ၣ် ကဘၣ်ထွဲလိာ်အသးဒီး တၢ်ဝံတၢ်နါအတၢ်ဖံးတၢ်မၤန့ၣ် ပကဘၣ်ဟးဆှဲးအီၤလီၤ.—ကွၢ်တၢ်ဂ့ၢ် ၃၂ လၢလံာ်အကတၢၢ်တက့ၢ်.
တၢ်ဃဲၤပူလၢ အဘၣ်ဃးဒီး တၢ်ဝံတၢ်နါတဖၣ်
၁၉. ဘၣ်မနုၤအဃိ ပှၤအါဂၤပျံၤဝဲ မုၣ်ကီၤလံၢ်ဒီး အတၢ်ဝံတၢ်နါတဖၣ်လဲၣ်.
၁၉ ပှၤတနီၤနီၤ ဆိကမိၣ်ဝဲလၢ မုၣ်ကီၤလံၢ် ဒီးတၢ်ဝံတၢ်နါတဖၣ်န့ၣ် တအိၣ်ဝဲအနီၢ်ကီၢ်ဘၣ်. မ့မ့ၢ်ပှၤအဂၤတဖၣ်န့ၣ် ခီဖျိလၢ အနီၢ်ကစၢ်အတၢ်လဲၤခီဖျိအဃိ သ့ၣ်ညါဝဲလၢ မုၣ်ကီၤလံၢ်ဒီး အတၢ်ဝံတၢ်နါတဖၣ်န့ၣ် အိၣ်ဝဲအနီၢ်ကီၢ်လီၤ. ပှၤအါဂၤ လူၤပိာ်ထွဲဝဲ တၢ်ဒုၣ်တၢ်ထုတဖၣ်အခံထီဘိ ခီဖျိလၢ အဝဲသ့ၣ် ပျံၤဝဲတၢ်နါတဖၣ်အဃိလီၤ. တကးဒံးဘၣ် ပှၤဟးတဲတၢ်ဃဲၤပူလၢ အဘၣ်ဃးဒီး တၢ်ဝံတၢ်နါတဖၣ် မၤအၢမၤသီ ပှၤဟီၣ်ခိၣ်ဖိအဂ့ၢ်န့ၣ်လီၤ. ပှၤအါဂၤ ဒိကနၣ်ဝဲမုာ်မး ဒီးအဝဲသ့ၣ်တဲကဒီးဝဲတၢ်ဂ့ၢ်တဖၣ်အံၤ ဆူပှၤဂၤအအိၣ်အဃိ ပှၤအါဂၤပျံၤဝဲ မုၣ်ကီၤလံၢ်ဒီး အတၢ်ဝံတၢ်နါတဖၣ်လီၤ.
၂၀. လၢတၢ်တပလီၢ်သးအပူၤ ပရၤလီၤဘၣ် မုၣ်ကီၤလံၢ်အတၢ်လံၣ်တၢ်လီတဖၣ် သ့လၢကျဲဒ်လဲၣ်.
၂၀ ဆိကမိၣ်ကွၢ် တၢ်ဂ့ၢ်အံၤတက့ၢ်. မုၣ်ကီၤလံၢ်မ့ၢ် ပှၤလံၣ်တၢ်လီတၢ်တဂၤ ဒီးအဝဲအဲၣ်ဒိးလၢ ပှၤအဂၤတဖၣ် ကပျံၤအီၤလီၤ. (၂ သ့းစၤလနံ ၂:၉, ၁၀) ဒီးပှၤလၢအသးအိၣ် တၢ်ဝံတၢ်နါ အတၢ်ဖံးတၢ်မၤတဖၣ်န့ၣ် မုၣ်ကီၤလံၢ်ကွဲန့ၢ်လွဲန့ၢ် အဝဲသ့ၣ်ညီဝဲလီၤ. တကးဒံးဘၣ် ဒ်သိးအဝဲသ့ၣ် ကနာ်တၢ်လၢ အတမ့ၢ် တၢ်မ့ၢ်တၢ်တီဘၣ်န့ၣ် မုၣ်ကီၤလံၢ်မၤဝဲသ့လီၤ. အဒိ ဘၣ်သ့ၣ်သ့ၣ် ပှၤသ့ၣ်တဖၣ်အံၤ ကဆိကမိၣ်ဝဲလၢ အဝဲသ့ၣ်ထံၣ်ဝဲတၢ်တမံၤမံၤ မ့တမ့ၢ် နၢ်ဟူဝဲတၢ်တမံၤမံၤအနီၢ်ကီၢ်လီၤ. ဒီးအဝဲသ့ၣ်ကဟးတဲဘၣ် အတၢ်လဲၤခီဖျိအံၤဆူ ပှၤဂၤအအိၣ်လီၤ. ခီဖျိလၢ ပှၤဟးတဲဝဲအတၢ်လဲၤခီဖျိအံၤ တဘျီဝံၤတဘျီအဃိ ဒ်တၢ်ဆၢကတီၢ်လဲၤပူၤကွံာ်ဝဲအသိး တၢ်ဂ့ၢ်တၢ်ကျိၤလၢအပိၣ်တဖၣ် ဟဲနုာ်လီၤဝဲကွ့ၢ်ကွ့ၢ်လီၤ. ပသ့ၣ်ညါလၢ မုၣ်ကီၤလံၢ် အဲၣ်ဒိးလၢပှၤဂၤ ကပျံၤအီၤလီၤ. မ့မ့ၢ်ဒ်န့ၣ်န့ၣ် ပတအဲၣ်ဒိးဆီၣ်ထွဲမၤစၢၤအီၤ ခီဖျိလၢ ပဟးတဲပှၤဂၤလၢ တၢ်ဂ့ၢ်တဖၣ်အံၤအဃိဘၣ်.—ယိၤဟၣ် ၈:၄၄; ၂ တံၤမသ့း ၂:၁၆.
၂၁. လၢပကတဲဖျါထီၣ် တၢ်လဲၤခီဖျိ ဘၣ်ဃးဒီးတၢ်ဝံတၢ်နါတဖၣ်အလီၢ် ပကြၢးတဲသကိး တၢ်ဂ့ၢ်မနုၤလဲၣ်.
၂၁ ယဟိဝၤယွၤ အခ့အပှၤတဂၤ မ့ၢ်ဘၣ်သဂၢၢ်ဒီး တၢ်ဝံတၢ်နါ အနီၢ်ကီၢ်သနာ်က့ အဝဲတကြၢးဟးတဲဝဲ အတၢ်လဲၤခီဖျိအံၤ ဒ်သိးပှၤဂၤကနၣ်ဝဲ ကမုာ်အဂီၢ်ဘၣ်. ယဟိဝၤယွၤ အပှၤဂီၢ်မုၢ်တဖၣ် တလိၣ်ပျံၤ မုၣ်ကီၤလံၢ်ဒီး အတၢ်ဝံတၢ်နါတဖၣ်ဘၣ်. လၢတၢ်န့ၣ်အလီၢ် ပကဘၣ်သးစၢၢ်ဆၢ ယ့ၣ်ၡူးခရံာ် ဒီးတၢ်စိတၢ်ကမီၤလၢ ယဟိဝၤယွၤဟ့ၣ်လီၤအီၤန့ၣ်လီၤ. (ဧ့ၤဘြံၤ ၁၂:၂) ယ့ၣ်ၡူးတဟးတဲ တၢ်ဂ့ၢ်လၢအဘၣ်ဃးဒီး တၢ်ဝံတၢ်နါတဖၣ် ဆူအပျဲၢ်အဘီၣ်တဖၣ်အအိၣ် ဒ်သိးအဝဲသ့ၣ် ကနၣ်ဝဲကမုာ်အဂီၢ်ဘၣ်. ထီဘိန့ၣ် အဝဲသးစၢၢ်ဆၢလၢ ဘီမုၢ်တၢ်သးခုကစီၣ်ဒီး “ယွၤအတၢ်လီၤလိၢ်လီၤလး” တဖၣ်န့ၣ်လီၤ.—မၤတၢ် ၂:၁၁; လူၤကၣ် ၈:၁; ရိမ့ၤ ၁:၁၁, ၁၂.
၂၂. နပာ်လီၤနသးလၢ နကမၤတၢ်မနုၤလဲၣ်.
၂၂ မုၣ်ကီၤလံၢ် အဲၣ်ဒိးမၤဟးဂီၤ ပတၢ်ရ့လိာ်သးဒီး ယဟိဝၤယွၤန့ၣ် တဘၣ်သးပ့ၤနီၣ် နီတဘျီတဂ့ၤ. ဒ်သိးကမၤဟးဂီၤ ပတၢ်ရ့လိာ်သးဒီးယွၤအဂီၢ် အဝဲကဂုာ်ကျဲးစၢးသပှၢ်တၢၢ် လၢကျဲအကလုာ်ကလုာ်လီၤ. ဘၣ်ဆၣ် ပသ့ၣ်ညါမုၣ်ကီၤလံၢ် အတၢ်ကူၣ်တၢ်ဖးဒီး ပပာ်လီၤပသးလၢ ပကဟးဆှဲး တၢ်ဝံတၢ်နါအတၢ်ဖံးတၢ်မၤ ကိးမံၤဒဲးလီၤ. ပတ “ဟ့ၣ်မုၣ်ကီၤလံၢ်အလီၢ်” လၢကမၤလီၤစၢ် ပနီၢ်သးနီတစဲးဘၣ်. (ဖး အ့းဖ့းစူး ၄:၂၇ တက့ၢ်.) ပမ့ၢ်ထီဒါမုၣ်ကီၤလံၢ်န့ၣ် ပတလီၤလၢ အပျံၤသကွီၤအပူၤ နီတခါဘၣ်, ဒီးယဟိဝၤယွၤ ကဒီသဒၢပှၤထီဘိလီၤ.—အ့းဖ့းစူး ၆:၁၁.
တၢ်ဂ့ၤအဂၤလၢ နကဘၣ်သး
တၢးထီခိးတၢ်
ပလီၢ်သုသးတက့ၢ် စၤတၣ် အဲၣ်ဒိးယူၢ်လီၤသုလီၤ
စၤတၣ်မ့ၢ်ဒုၣ်ဒါလၢအလီၤပျံၤလီၤဖုးလၢတၢ်ဂ့ၢ်သၢမံၤအဃိလီၤ.
