တၢ်မၤလိ ၄
ဘၣ်မနုၤအဃိ ပဘၣ်ပာ်ကဲ ပှၤလၢအအိၣ်ဒီးတၢ်စိတၢ်ကမီၤလဲၣ်
“ယူးယီၣ်ပှၤကညီခဲလၢာ်တက့ၢ်. အဲၣ်ဒီပုၢ်ဝဲၢ်ခဲလၢာ်တက့ၢ်. ပျံၤယွၤတက့ၢ်. ယူးယီၣ်စီၤပၤတက့ၢ်.”—၁ ပ့းတရူး ၂:၁၇.
၁, ၂. (က) ပကဘၣ်မၤထွဲ မတၤတဖၣ် အတၢ်ဟံးစုနဲၣ်ကျဲလဲၣ်. (ခ) လၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
ဖဲနမ့ၢ်ဒံးဖိသၣ်အခါ တဘျီတခီၣ် နမိၢ်ပၢ်ကမၢနမၤတၢ်တမံၤမံၤ ဘၣ်ဆၣ် နတအဲၣ်ဒိးမၤဘၣ်. နအဲၣ်နမိၢ်နပၢ် ဒီးနသ့ၣ်ညါလၢနကြၢးဒိကနၣ် အဝဲသ့ၣ်အကလုၢ်သနာ်က့ တဘျီတခီၣ်န့ၣ် နတအဲၣ်ဒိးဒိကနၣ် အဝဲသ့ၣ်အကလုၢ်ဘၣ်.
၂ ပသ့ၣ်ညါလၢ ပပၢ်ယဟိဝၤယွၤ အဲၣ်ပှၤဒိၣ်မးလီၤ. အဝဲကွၢ်ထွဲပှၤ ဒီးဟ့ၣ်ပှၤတၢ်လၢပလိၣ်ဘၣ်တဖၣ် ဒ်သိးပကအိၣ်ဒီး တၢ်သူၣ်ဖှံသးညီအဂီၢ်လီၤ. တကးဒံးဘၣ် အဝဲဟ့ၣ်ပှၤတၢ်ဟံးစုနဲၣ်ကျဲ ဒ်သိးပတၢ်အိၣ်မူကလဲၤအသး ဘျ့ဘျ့ဆှီဆှီအဂီၢ်လီၤ. ဒီးတဘျီတခီၣ်န့ၣ် အဝဲသူပှၤအဂၤတဖၣ် လၢကဟံးစုနဲၣ်ကျဲပှၤန့ၣ်လီၤ. ပကဘၣ်ပာ်ကဲ တၢ်ရဲၣ်တၢ်ကျဲၤလၢ ယဟိဝၤယွၤ ပာ်လီၤဝဲတဖၣ်န့ၣ်လီၤ. (ကတိၤဒိ ၂၄:၂၁) ဘၣ်ဆၣ် တၢ်သံကွၢ်ဟဲအိၣ်ထီၣ်ဝဲတနီၤလီၤ. ဘၣ်မနုၤအဃိ ကီဝဲလၢပကတူၢ်လိာ် ပှၤဂၤအတၢ်ဟံးစုနဲၣ်ကျဲလဲၣ်. ဘၣ်မနုၤအဃိ ယဟိဝၤယွၤ မၢပမၤထွဲ ပှၤဂၤအတၢ်ဟံးစုနဲၣ်ကျဲလဲၣ်. ဒီးပပာ်ဖျါထီၣ်လၢ ပပာ်ကဲတၢ်ရဲၣ်တၢ်ကျဲၤလၢ ယဟိဝၤယွၤ ပာ်လီၤဝဲတဖၣ်န့ၣ် ကသ့ဒ်လဲၣ်.—ကွၢ်တၢ်ဂ့ၢ် ၉ လၢလံာ်အကတၢၢ်တက့ၢ်.
ဘၣ်မနုၤအဃိ ကီလၢပကပာ်ဖျါထီၣ် တၢ်ပာ်ကဲလဲၣ်
၃, ၄. ပှၤဟီၣ်ခိၣ်ဖိတဖၣ် ကဲထီၣ်ပှၤတလၢတပှဲၤဘၣ် လၢကျဲဒ်လဲၣ်, ဒီးဘၣ်မနုၤအဃိ ပတူၢ်လိာ် ပှၤဂၤအတၢ်ဟံးစုနဲၣ်ကျဲ တညီဘၣ်လဲၣ်.
၃ ကစၢ်ယွၤတ့လီၤ နီၢ်အံၣ်အုဒီးစီၤအၤဒၣ် ဒ်ပှၤလၢပှၤပှဲၤအသိး ဘၣ်ဆၣ်လၢခံန့ၣ် အဝဲသ့ၣ်ထီဒါ တၢ်ရဲၣ်တၢ်ကျဲၤလၢ ကစၢ်ယွၤပာ်လီၤဝဲတဖၣ် ဒီးမၤဝဲတၢ်ဒဲးဘးလီၤ. လၢတၢ်န့ၣ်အဃိ ပဝဲခဲလၢာ် ပတလၢတပှဲၤဘၣ်ဒီး ပအိၣ်ဒီးသးလၢ အအဲၣ်ဒိးထီဒါတၢ်န့ၣ်လီၤ. ခီဖျိလၢ ပမ့ၢ်ပှၤတလၢတပှဲၤဘၣ်အဃိ ပကတူၢ်လိာ်တၢ်ဟံးစုနဲၣ်ကျဲလၢ ယဟိဝၤယွၤ ဒီးပှၤဂၤတဖၣ်အအိၣ်န့ၣ် တညီလၢပဂီၢ်ထီဘိဘၣ်. အဂၤတမံၤန့ၣ် ယဟိဝၤယွၤသူဝဲ ပှၤတလၢတပှဲၤဘၣ်တဖၣ် လၢကဟံးစုနဲၣ်ကျဲပှၤအဃိ ပကတူၢ်လိာ်အဝဲသ့ၣ် အတၢ်ဟံးစုနဲၣ်ကျဲန့ၣ် တညီလၢပဂီၢ်ထီဘိဘၣ်.—၁ မိၤၡ့ ၂:၁၅-၁၇; ၃:၁-၇; စံးထီၣ်ပတြၢၤ ၅၁:၅; ရိမ့ၤ ၅:၁၂.
၄ ခီဖျိလၢ ပမ့ၢ်ပှၤတၢ်ဒဲးဘးဖိအဃိ တၢ်ပာ်ထီၣ်ထီသး ဟဲဒိၣ်ထီၣ်လၢပသးပူၤညီဝဲလီၤ. ဒီးပမ့ၢ်အိၣ်ဒီး တၢ်ပာ်ထီၣ်ထီသးန့ၣ် ပတူၢ်လိာ်ပှၤဂၤအတၢ်ဟံးစုနဲၣ်ကျဲ တညီဘၣ်. အဒိ လၢညါယဟိဝၤယွၤ ဃုထၢထီၣ်စီၤမိၤၡ့ ဒ်သိးကတီခိၣ်ရိၤမဲဝဲ အပှၤဂီၢ်မုၢ်အဂီၢ်လီၤ. ဘၣ်ဆၣ် ပှၤအိၣ်ဝဲတဂၤလၢအမံၤမ့ၢ် စီၤကိၤရးန့ၣ် အဝဲမၤတ့ၢ်ယဟိဝၤယွၤအတၢ်မၤ အနံၣ်ဖးယံာ်လံ. ဒီးလၢခံန့ၣ် အဝဲပာ်ထီၣ်ထီအသး ဒီးတပာ်ကဲစီၤမိၤၡ့ နီတစဲးလၢၤဘၣ်. မ့မ့ၢ်စီၤမိၤၡ့န့ၣ် အဝဲတီခိၣ်ရိၤမဲ ကစၢ်ယွၤအပှၤဂီၢ်မုၢ်သနာ်က့ တပာ်ထီၣ်ထီအသးဘၣ်. လၢတၢ်န့ၣ်အလီၢ် လံာ်စီဆှံပာ်ဖျါထီၣ်လၢ ဖဲန့ၣ်အဆၢကတီၢ် အဝဲမ့ၢ်ပှၤတဂၤလၢ အိၣ်ဒီးတၢ်ဆီၣ်လီၤသး ဒီးအသးစူၤဒိၣ်ကတၢၢ်လီၤ. ဘၣ်ဆၣ် စီၤကိၤရးန့ၣ် တူၢ်လိာ်ဝဲစီၤမိၤၡ့ အတၢ်ဟံးစုနဲၣ်ကျဲတကဲဘၣ်. တကးဒံးဘၣ် အဝဲဟ့ၣ်သဆၣ်ထီၣ်ဝဲ ပှၤဂီၢ်မုၢ်ဖးဒိၣ်လၢ အဝဲသ့ၣ်ကအိၣ်ဃူအီၤ ဒ်သိးကထီဒါ စီၤမိၤၡ့အဂီၢ်န့ၣ်လီၤ. တၢ်မၤအသးဒီး စီၤကိၤရးဒီး ပှၤလၢအထီဒါက့ၤ စီၤမိၤၡ့တဖၣ်အံၤဒ်လဲၣ်. အဝဲသ့ၣ် တုၤလၢတၢ်ဟးဂီၤလီၤ. (၄ မိၤၡ့ ၁၂:၃; ၁၆:၁-၃, ၃၁-၃၅) ပှၤအါဂၤအဒိအတဲာ်လၢ လံာ်စီဆှံပာ်ဖျါထီၣ်ဝဲန့ၣ် သိၣ်လိပှၤလၢတၢ်ပာ်ထီၣ်ထီသး မ့ၢ်တၢ်လၢအလီၤဘၣ်ယိၣ်ဒိၣ်မးလီၤ.—၂ ကွဲးနီၣ်တၢ် ၂၆:၁၆-၂၁; ကွၢ်တၢ်ဂ့ၢ် ၁၀ လၢလံာ်အကတၢၢ်တက့ၢ်.
၅. ပှၤဟီၣ်ခိၣ်ဖိတနီၤ သူကမၣ်အတၢ်စိတၢ်ကမီၤ လၢကျဲဒ်လဲၣ်.
၅ စးထီၣ်လၢအခီၣ်ထံး တုၤခဲအံၤ ပှၤဟီၣ်ခိၣ်ဖိအါဂၤန့ၣ် သူကမၣ်အတၢ်စိတၢ်ကမီၤလီၤ. (ဖး စံၣ်တဲၤတဲလီၤတၢ် ၈:၉ တက့ၢ်.) အဒိ ဖဲယဟိဝၤယွၤဃုထၢထီၣ် စီၤစီလူးလၢစီၤပၤအခါ အဝဲမ့ၢ်ပှၤလၢအသးဂ့ၤ ဒီးအိၣ်ဒီးတၢ်ဆီၣ်လီၤသးန့ၣ်လီၤ. ဘၣ်ဆၣ်လၢခံန့ၣ် အဝဲအိၣ်ဒီးတၢ်သူၣ်က့ၣ်သးကါဒီး တၢ်ပာ်ထီၣ်ထီသးအဃိ အဝဲမၤအၢမၤသီ ပှၤတီပှၤလိၤစီၤဒၤဝံးန့ၣ်လီၤ. (၁ ၡမူၤအ့လး ၉:၂၀, ၂၁; ၁၀:၂၀-၂၂; ၁၈:၇-၁၁) လၢခံန့ၣ် စီၤဒၤဝံးကဲထီၣ် အံၣ်စရ့လးအစီၤပၤလၢ အဂ့ၤကတၢၢ်တဂၤလီၤ. ဘၣ်ဆၣ် အဝဲသူကမၣ် အတၢ်စိတၢ်ကမီၤ ခီဖျိလၢ အဝဲမၤကမၣ်မုၣ်ကမၣ်ခွါဒီး စီၤအူၤရံယၤအမါဝံၤဒီး ဆှၢလီၤစီၤအူၤရံယၤဆူ တၢ်မဲာ်ညါလၢတၢ်ဒုးပျီပူၤ ဒ်သိးပှၤကမၤသံ အီၤအဂီၢ်လီၤ.—၂ ၡမူၤအ့လး ၁၁:၁-၁၇.
ဘၣ်မနုၤအဃိ ပဘၣ်ပာ်ကဲ တၢ်ရဲၣ်တၢ်ကျဲၤလၢ ယဟိဝၤယွၤ ပာ်လီၤဝဲတဖၣ်လဲၣ်
၆, ၇. (က) ပတၢ်အဲၣ် ယဟိဝၤယွၤန့ၣ် ထိၣ်ဟူးထိၣ်ဂဲၤထီၣ်ပှၤလၢ ပကမၤတၢ်မနုၤလဲၣ်. (ခ) မ့ၢ်ကီလၢပဂီၢ်သနာ်က့ တၢ်မနုၤကမၤစၢၤပှၤလၢ ပကအိၣ်ဒီးတၢ်ဒိကနၣ်လဲၣ်.
၆ ခီဖျိလၢ ပအဲၣ်ယဟိဝၤယွၤအဃိ ပပာ်ကဲဒီးဒိကနၣ် အတၢ်ဟံးစုနဲၣ်ကျဲန့ၣ်လီၤ. ပအဲၣ်ယဟိဝၤယွၤ ဒိၣ်န့ၢ်ဒံးပှၤအဂၤ ဒီးတၢ်အဂၤကိးမံၤဒဲးအဃိ ပအဲၣ်ဒိးမၤသးခုအသး ထီဘိလီၤ. (ဖး ကတိၤဒိ ၂၇:၁၁; မၢ်ကူး ၁၂:၂၉, ၃၀ တက့ၢ်.) စးထီၣ်ဖဲ နီၢ်အံၣ်အုဒီးစီၤအၤဒၣ် အိၣ်ဘၣ်လၢ ဧ့ၤဒ့ၣ်တၤသၣ်လီၢ်အခါ မုၣ်ကီၤလံၢ်တအဲၣ်ဒိးလၢ ပှၤကတူၢ်လိာ် တၢ်ရဲၣ်တၢ်ကျဲၤလၢ ယဟိဝၤယွၤ ပာ်လီၤဝဲတဖၣ်ဘၣ်. မုၣ်ကီၤလံၢ်အဲၣ်ဒိးလၢ ပကဆိကမိၣ်လၢ ယဟိဝၤယွၤတအိၣ်ဒီး တၢ်ခွဲးတၢ်ယာ်လၢ ကပာ်လီၤတၢ်သိၣ်တၢ်သီလၢပဂီၢ်ဘၣ်. ဘၣ်ဆၣ် မုၣ်ကီၤလံၢ်မ့ၢ်ပှၤလၢ အလံၣ်တၢ်လီတၢ်န့ၣ်လီၤ. ပတူၢ်လိာ် တၢ်ကတိၤဖဲ လီၣ်ဖျါ ၄:၁၁ လၢအတဲဝဲ “ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်” န့ၣ်လီၤ.
၇ ဖဲနမ့ၢ်ဒံးဖိသၣ်အခါ နမိၢ်ပၢ်ကသိၣ်လိနၤလၢ နမ့ၢ်တအဲၣ်ဒိး ဒိကနၣ်အဝဲသ့ၣ် အကလုၢ်သနာ်က့ နကဘၣ်ဒိကနၣ်အီၤလီၤ. ဒ်ပမ့ၢ်ယဟိဝၤယွၤ အခ့အပှၤအသိး ပကဒိကနၣ် ယဟိဝၤယွၤ အကလုၢ်န့ၣ် တညီဝဲလၢပဂီၢ်ထီဘိဘၣ်. ဘၣ်ဆၣ် မ့ၢ်လၢပအဲၣ်ယဟိဝၤယွၤ ဒီးပပာ်ကဲအီၤအဃိ ပဂုာ်ကျဲးစၢးလၢအဂ့ၤကတၢၢ် ဒ်သိး ပကဒိကနၣ်အကလုၢ်န့ၣ်လီၤ. ယ့ၣ်ၡူးပာ်လီၤဝဲ ဒိဂ့ၤတဲာ်ဘၣ်လၢပဂီၢ်လီၤ. အဒိ မ့ၢ်ကီလၢ ယ့ၣ်ၡူးအဂီၢ်သနာ်က့ အဝဲဒိကနၣ်အပၢ် ယဟိဝၤယွၤ အကလုၢ်ထီဘိလီၤ. လၢတၢ်န့ၣ်အဃိ ယ့ၣ်ၡူးတဲဘၣ်အပၢ်လၢ “ဖဲယသးဒၣ်ယဲတမ့ၢ်ဘၣ်, မ့ၢ်ဖဲဒၣ်နသးဒၣ်နဲ” လီၤ.—လူၤကၣ် ၂၂:၄၂; ကွၢ်တၢ်ဂ့ၢ် ၁၁ လၢလံာ်အကတၢၢ်တက့ၢ်.
၈. ယဟိဝၤယွၤ ဟံးစုနဲၣ်ကျဲပှၤလၢ ကျဲဒ်လဲၣ်. (ကွၢ်တၢ်လွံၢ်နၢၣ်လၢ အခိၣ်တီမ့ၢ်ဝဲ “ ဒိကနၣ်တၢ်ဟ့ၣ်ကူၣ်.”)
၈ မုၢ်မဆါတနံၤညါအံၤ ယဟိဝၤယွၤ ဟံးစုနဲၣ်ကျဲပှၤလၢ ကျဲအကလုာ်ကလုာ်လီၤ. အဒိ အဝဲဟ့ၣ်ပှၤ လံာ်စီဆှံ ဒီးတၢ်အိၣ်ဖှိၣ်သးပှၢ်တဖၣ်န့ၣ်လီၤ. ပမ့ၢ်ပာ်ကဲ ပှၤလၢယဟိဝၤယွၤ သူဝဲလၢကတီခိၣ်ရိၤမဲ ပှၤတဖၣ်န့ၣ် ပပာ်ဖျါထီၣ်လၢ ပပာ်ကဲယဟိဝၤယွၤလီၤ. ပမ့ၢ်တတူၢ်လိာ် အဝဲသ့ၣ်အတၢ်မၤစၢၤန့ၣ် ကလီၤဂာ်ဒ်ပတတူၢ်လိာ် ယဟိဝၤယွၤ အတၢ်မၤစၢၤဘၣ်. အဒိ ဖဲပှၤအံၣ်စရ့လးဖိတဖၣ် ထီဒါဒီးကဒူးကဒ့ၣ် စီၤမိၤၡ့အခါ ယဟိဝၤယွၤ တူၢ်ဘၣ်ဝဲလၢ အဝဲသ့ၣ်ထီဒါက့ၤအီၤစ့ၢ်ကီးလီၤ.—၄ မိၤၡ့ ၁၄:၂၆, ၂၇; ကွၢ်တၢ်ဂ့ၢ် ၁၂ လၢလံာ်အကတၢၢ်တက့ၢ်.
၉. ဘၣ်မနုၤအဃိ ပတဲသ့လၢ တၢ်အဲၣ်န့ၣ်ဆီၣ်ထွဲပှၤလၢ ပကဒိကနၣ် ပှၤလၢအတီခိၣ်ရိၤမဲတၢ်တဖၣ် အတၢ်ဟံးစုနဲၣ်ကျဲလဲၣ်.
၉ မ့ၢ်လၢပအဲၣ် ပဒီပုၢ်ဝဲၢ်တဖၣ်အဃိ ပပာ်ကဲပှၤလၢ အအိၣ်ဒီး တၢ်စိတၢ်ကမီၤန့ၣ်လီၤ. ဘၣ်မနုၤအဃိ ပတဲဒ်အံၤသ့လဲၣ်. အဒိ ဆိကမိၣ်ကွၢ်လၢ နကဲသုးဖိတဂၤတက့ၢ်. ဒ်သိးသုးမုၢ်တဖု ကမၤနၢၤတၢ်ဒီး အိၣ်ဂၢၢ်ဆိးကျၢၤအဂီၢ် သုးဖိတဂၤစုာ်စုာ် ကဘၣ်ပာ်ကဲဒီး ဒိကနၣ်တၢ်ကလုၢ်လၢ ဟဲလၢထးန့ၣ်လီၤ. နမ့ၢ်တဒိကနၣ်န့ၣ် ကဲထီၣ်တၢ်ဘၣ်ယိၣ်လၢ သုးဖိကိးဂၤဒဲးအဂီၢ်သ့ဝဲလီၤ. ဒ်န့ၣ်အသိး ပမ့ၢ်တဒိကနၣ် ယဟိဝၤယွၤ အတၢ်ဟံးစုနဲၣ်ကျဲ မ့တမ့ၢ် ပှၤလၢအဝဲသူဝဲလၢ ကတီခိၣ်ရိၤမဲတၢ်အဂီၢ်န့ၣ် ပှၤဂၤတဖၣ် ဘၣ်ဒိသ့ဝဲစ့ၢ်ကီးလီၤ. ဘၣ်ဆၣ် ပမ့ၢ်ဒိကနၣ် ယဟိဝၤယွၤ အကလုၢ်န့ၣ် ပပာ်ဖျါထီၣ်လၢ ပအဲၣ်ပဒီပုၢ်ဝဲၢ်တဖၣ် ဒီးပပာ်ကဲတၢ်ရဲၣ်တၢ်ကျဲၤလၢ ယဟိဝၤယွၤ ပာ်လီၤဝဲတဖၣ်န့ၣ်လီၤ.—၁ ကရံၣ်သူး ၁၂:၁၄, ၂၅, ၂၆.
၁၀, ၁၁. ခဲအံၤ ပကဃုသ့ၣ်ညါ တၢ်ဂ့ၢ်မနုၤတဖၣ်လဲၣ်.
၁၀ ကယဲၢ်တၢ်လၢ ယဟိဝၤယွၤမၢပမၤ ကိးမံၤဒဲးန့ၣ် ကဲဘျုးလၢပဂီၢ်လီၤ. ဖဲဖိသၣ်တဖၣ် ပာ်ကဲအမိၢ်အပၢ်, ပပာ်ကဲပှၤလၢ အတီခိၣ်ရိၤမဲတၢ်လၢ တၢ်အိၣ်ဖှိၣ်အပူၤ, မ့တမ့ၢ် ပပာ်ကဲ ပဒိၣ်ပပှၢ်အခါန့ၣ် ပှၤခဲလၢာ် ကဒိးန့ၢ်ဘၣ်အဘျုးလီၤ.—၅ မိၤၡ့ ၅:၁၆; ရိမ့ၤ ၁၃:၄; အ့းဖ့းစူး ၆:၂, ၃; ဧ့ၤဘြံၤ ၁၃:၁၇.
၁၁ ဘၣ်မနုၤအဃိ ယဟိဝၤယွၤ အဲၣ်ဒိးလၢပပာ်ကဲ ပှၤဂၤလဲၣ်န့ၣ် ပသ့ၣ်ညါဘၣ်လံ. ခီဖျိလၢ ပသ့ၣ်ညါ တၢ်ဂ့ၢ်တဖၣ်အံၤအဃိ ကဲထီၣ်တၢ်မၤစၢၤဒ်သိး ပကပာ်ကဲ အဝဲသ့ၣ်အဂီၢ်လီၤ. ဘၣ်ဆၣ် ပပာ်ဖျါထီၣ်လၢ ပပာ်ကဲပှၤလၢအအိၣ်ဒီး တၢ်စိတၢ်ကမီၤ ကသ့ဒ်လဲၣ်. ခဲအံၤပကဃုသ့ၣ်ညါ ကျဲသၢဘိလီၤ.
ပာ်ဖျါထီၣ်တၢ်ပာ်ကဲလၢ ဟံၣ်ပူၤဃီပူၤ
၁၂. ဝၤန့ၣ် ပာ်ဖျါထီၣ်လၢ အပာ်ကဲယဟိဝၤယွၤ ကသ့ဒ်လဲၣ်.
၁၂ ယဟိဝၤယွၤ ဒုးအိၣ်ထီၣ်ဝဲ ဟံၣ်ဖိဃီဖိအတၢ်ရဲၣ်တၢ်ကျဲၤ ဒီးဟ့ၣ်လီၤဝဲ ဟံၣ်ဖိဃီဖိတဂၤစုာ်စုာ် အမူဒါလီၤ. အဝဲသ့ၣ် တဂၤစုာ်စုာ် မ့ၢ်မၤလၢပှဲၤအမူဒါလၢ ယဟိဝၤယွၤဟ့ၣ်လီၤဝဲန့ၣ် ဟံၣ်ဖိဃီဖိကိးဂၤဒဲး ကဒိးန့ၢ်ဘၣ်တၢ်အဘျုး ဒီးတၢ်ခဲလၢာ် ကလဲၤအသးဘျ့ဘျ့ဆှီဆှီန့ၣ်လီၤ. (၁ ကရံၣ်သူး ၁၄:၃၃) ယဟိဝၤယွၤ ပာ်လီၤဝဲဝၤ ဒ်ဟံၣ်ခိၣ်အသိးလီၤ. အဃိ ယဟိဝၤယွၤ မုၢ်လၢ်ဝဲလၢ အဝဲကအံးထွဲကွၢ်ထွဲ ဒီးဟံးစုနဲၣ်ကျဲ အဖိဒီးအမါ လၢတၢ်အဲၣ်တၢ်ကွံအပူၤလီၤ. ဝၤကမၤလၢပှဲၤအမူဒါအံၤ ဒ်လဲၣ်ဒ်လဲၣ်န့ၣ် အဝဲကဘၣ်ဟ့ၣ်တၢ်စံးဆၢ လၢယဟိဝၤယွၤအအိၣ်လီၤ. ဒီးအဝဲကဘၣ်ပာ်ဖျါထီၣ် တၢ်သးကညီၤဒီး တၢ်အဲၣ်တၢ်ကွံ လၢအဟံၣ်ဖိဃီဖိအဖီခိၣ် ဒ်ယ့ၣ်ၡူးတီခိၣ်ရိၤမဲဝဲ တၢ်အိၣ်ဖှိၣ်အသိးန့ၣ်လီၤ. အဝဲမ့ၢ်မၤဝဲဒ်န့ၣ်န့ၣ် မ့ၢ်ဒၣ်အပာ်ဖျါထီၣ်လၢ အပာ်ကဲယဟိဝၤယွၤလီၤ.—အ့းဖ့းစူး ၅:၂၃; ကွၢ်တၢ်ဂ့ၢ် ၁၃ လၢလံာ်အကတၢၢ်တက့ၢ်.
ပၢ်တဂၤန့ၣ်ကဘၣ်ကွၢ်လိမၤဒိး ယ့ၣ်ၡူးခရံာ်ဒီး အံးထွဲကွၢ်ထွဲ အဟံၣ်ဖိဃီဖိလၢ တၢ်အဲၣ်တၢ်ကွံအပူၤ
၁၃. မါန့ၣ်ပာ်ဖျါထီၣ်လၢ အပာ်ကဲ တၢ်ရဲၣ်တၢ်ကျဲၤလၢ ယဟိဝၤယွၤ ပာ်လီၤဝဲတဖၣ် ကသ့ဒ်လဲၣ်.
၁၃ မါန့ၣ်အိၣ်ဒီးမူဒါ အရ့ဒိၣ်လၢ ဟံၣ်ပူၤဃီပူၤစ့ၢ်ကီးလီၤ. အဝဲကဘၣ်ဆီၣ်ထွဲမၤစၢၤအဝၤ ဒ်သိးအဝၤကကဲထီၣ် ဟံၣ်ခိၣ်လၢအဂ့ၤအဂီၢ်လီၤ. ဒီးအဝဲကဘၣ်မၤသကိးတၢ်ဒီးအဝၤ ဒ်သိးကသိၣ်လိနဲၣ်လိ အဖိတဖၣ်အဂီၢ်လီၤ. ဒ်သိးအဖိကအိၣ်ဒီး တၢ်ပာ်ကဲအဂီၢ် အဝဲသိၣ်လိအဖိ ခီဖျိလၢ အဒိအတဲာ်သ့ဝဲလီၤ. (ကတိၤဒိ ၁:၈) အဝဲကဘၣ်ပာ်ကဲအဝၤ ဒီးဆီၣ်ထွဲအဝၤအတၢ်ဆၢတဲာ်လၢ တၢ်ဆီၣ်လီၤသးအပူၤလီၤ. ဖဲအသးတလီၤပလိာ်ဒီး အဝၤအဆၢကတီၢ် အဝဲတဲဖျါထီၣ် အတၢ်တူၢ်ဘၣ်ဒီး အတၢ်ထံၣ်လၢ တၢ်ယူးယီၣ်ပာ်ကဲအပူၤသ့ဝဲလီၤ. အဒိ ဒီပုၢ်ဝဲၢ်မုၣ်တဂၤအဝၤမ့တမ့ၢ် ယဟိဝၤပှၤအုၣ်အသးဘၣ်န့ၣ် အဝဲကထံၣ်ဘၣ် တၢ်ကီတၢ်ခဲတနီၤလီၤ. ဘၣ်ဆၣ် အဝဲမ့ၢ်ပာ်ကဲအဝၤ ဒီးပာ်ဖျါထီၣ် တၢ်အဲၣ်လၢအဖီခိၣ်န့ၣ် ဘၣ်သ့ၣ်သ့ၣ် မုၢ်ကအိၣ်ဝဲတနံၤလၢ အဝၤကအဲၣ်ဒိး သ့ၣ်ညါအါထီၣ် ယဟိဝၤယွၤအဂ့ၢ်ဒီး ဘူၣ်ထီၣ်ဘါထီၣ်အီၤန့ၣ်လီၤ.—ဖး ၁ ပ့းတရူး ၃:၁ တက့ၢ်.
၁၄. ဖိတဖၣ် ပာ်ဖျါထီၣ်လၢ အပာ်ကဲတၢ်ရဲၣ်တၢ်ကျဲၤလၢ ယဟိဝၤယွၤ ပာ်လီၤဝဲတဖၣ်န့ၣ် ကသ့ဒ်လဲၣ်.
၁၄ ယဟိဝၤယွၤ ပာ်လုၢ်ပာ်ပှ့ၤ ဖိသၣ်တဖၣ်ဒိၣ်မး ဒီးအဝဲသ့ၣ်လိၣ်ဘၣ်ဝဲ တၢ်ဒီသဒၢဒီး တၢ်ဟံးစုနဲၣ်ကျဲ သပှၢ်ကတၢၢ်လီၤ. ဖဲဖိသၣ်တဖၣ် ဒိကနၣ်မိၢ်ပၢ် အကလုၢ်အဆၢကတီၢ်န့ၣ် မိၢ်ပၢ်ကသးခုဝဲလီၤ. တကးဒံးဘၣ် အဝဲသ့ၣ် မ့ၢ်ဒိကနၣ်မိၢ်ပၢ်အကလုၢ်န့ၣ် မ့ၢ်ဒၣ်အပာ်ဖျါထီၣ်ဝဲလၢ အပာ်ကဲ ယဟိဝၤယွၤ ဒီးယဟိဝၤယွၤ ကသးခုဝဲဒိၣ်မးလီၤ. (ကတိၤဒိ ၁၀:၁) ဖိသၣ်လၢ အအိၣ်ထဲအမိၢ်တဂၤ မ့တမ့ၢ် ထဲအပၢ်တဂၤန့ၣ် အိၣ်ဝဲအါမးလီၤ. ခီဖျိလၢ တၢ်အိၣ်သးဒ်အံၤအဃိ ကကီဝဲလၢမိၢ် မ့တမ့ၢ် ပၢ်အဂီၢ်တကးဒံးဘၣ် ကကီဝဲလၢ ဖိသၣ်အဂီၢ်စ့ၢ်ကီးလီၤ. ဘၣ်ဆၣ် ဖိတဖၣ်အံၤမ့ၢ်ဒိကနၣ်ဒီး ဆီၣ်ထွဲမၤစၢၤအမိၢ် မ့တမ့ၢ် အပၢ်န့ၣ် တၢ်အိၣ်အသးလၢ ဟံၣ်ပူၤဃီပူၤ ကမုာ်ထီၣ်ဝဲလီၤ. ဒ်လဲၣ်ဂ့ၤဒ်လဲၣ်ဂ့ၤ ဟံၣ်ဖိဃီဖိလၢ အလၢအပှဲၤန့ၣ် တအိၣ်နီတဒူၣ်ဘၣ်. ဘၣ်ဆၣ် ဟံၣ်ဖိဃီဖိတဂၤစုာ်စုာ် မ့ၢ်မၤထွဲယဟိဝၤယွၤ အတၢ်ဟံးစုနဲၣ်ကျဲန့ၣ် အဝဲသ့ၣ်ကအိၣ်ဒီး တၢ်သးခုလီၤ. ဒီးဟံၣ်ဖိဃီဖိလၢ အမၤဝဲဒ်အံၤန့ၣ် ကကဲထီၣ်တၢ်စံးထီၣ်ပတြၢၤ လၢယဟိဝၤယွၤလၢ အဒုးအိၣ်ထီၣ် ဟံၣ်ဖိဃီဖိအဂီၢ်န့ၣ်လီၤ.—အ့းဖ့းစူး ၃:၁၄, ၁၅.
ပာ်ဖျါထီၣ်တၢ်ပာ်ကဲလၢ တၢ်အိၣ်ဖှိၣ်အပူၤ
၁၅. ပပာ်ဖျါထီၣ်လၢ ပပာ်ကဲ ပှၤလၢအတီခိၣ်ရိၤမဲတၢ်လၢ တၢ်အိၣ်ဖှိၣ်အပူၤကသ့ဒ်လဲၣ်.
၁၅ ယဟိဝၤယွၤ ဟံးစုနဲၣ်ကျဲပှၤ ခီဖျိလၢ ခရံာ်ဖိတၢ်အိၣ်ဖှိၣ်ဒီး အဝဲပာ်ထီၣ်ဝဲယ့ၣ်ၡူးလၢ တၢ်အိၣ်ဖှိၣ်အခိၣ်န့ၣ်လီၤ. (ကလီးစဲ ၁:၁၈) ဒီးယ့ၣ်ၡူးဟ့ၣ်လီၤမူဒါလၢ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” အအိၣ်ဒ်သိး ကအံးထွဲကွၢ်ထွဲ ကစၢ်ယွၤအပှၤဂီၢ်မုၢ် လၢဟီၣ်ခိၣ်ချၢအဂီၢ်လီၤ. (မးသဲ ၂၄:၄၅-၄၇) မုၢ်မဆါတနံၤညါအံၤ ပှၤပၢဆှၢတၢ်ကမံးတံာ်န့ၣ် မ့ၢ်ဝဲ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” န့ၣ်လီၤ. ပှၤပၢဆှၢတၢ်ကမံးတံာ် ကတဲာ်ကတီၤဝဲ နီၢ်သးအတၢ်အီၣ်တၢ်အီ ဘၣ်ဆၢဘၣ်ကတီၢ် ဒ်သိးပတၢ်နာ် ကဂၢၢ်ကျၢၤဝဲထီဘိအဂီၢ်လီၤ. တၢ်အိၣ်ဖှိၣ်သးပှၢ်, တၢ်အိၣ်ဖှိၣ်အပှၤမၤစၢၤတၢ် ဒီးကဝီၤအပှၤကွၢ်တၢ်တဖၣ် ဆီၣ်ထွဲမၤစၢၤ တၢ်အိၣ်ဖှိၣ်တဖၣ်လၢ ဟီၣ်ခိၣ်ဒီဘ့ၣ် ဒီးအဝဲသ့ၣ်ဒိးန့ၢ်ဘၣ်ဝဲ တၢ်ဟံးစုနဲၣ်ကျဲလၢ ပှၤပၢဆှၢတၢ်ကမံးတံာ်အအိၣ်န့ၣ်လီၤ. ဒီပုၢ်ဝဲၢ်ခွါတဖၣ်အံၤ ကိးဂၤဒဲးန့ၣ် အိၣ်ဒီးမူဒါလၢ ကကွၢ်ထွဲမၤစၢၤပှၤလီၤ. ဒီးအဝဲသ့ၣ် မၤလၢပှဲၤအမူဒါ ဒ်လဲၣ်ဒ်လဲၣ်န့ၣ် အဝဲသ့ၣ်ကဘၣ်ဟ့ၣ် တၢ်စံးဆၢလၢ ယဟိဝၤယွၤအအိၣ်န့ၣ်လီၤ. လၢတၢ်န့ၣ်အဃိ ပမ့ၢ်ပာ်ကဲဒီပုၢ်ဝဲၢ်ခွါတဖၣ်အံၤန့ၣ် မ့ၢ်ဒၣ်ပပာ်ဖျါထီၣ်လၢ ပပာ်ကဲယဟိဝၤယွၤန့ၣ်လီၤ.—ဖး ၁ သ့းစၤလနံ ၅:၁၂; ဧ့ၤဘြံၤ ၁၃:၁၇ တက့ၢ်; ကွၢ်တၢ်ဂ့ၢ် ၁၄ လၢလံာ်အကတၢၢ်တက့ၢ်.
၁၆. ဘၣ်မနုၤအဃိ ပတဲသ့လၢ တၢ်အိၣ်ဖှိၣ်သးပှၢ်ဒီး တၢ်အိၣ်ဖှိၣ်အပှၤမၤစၢၤတၢ်တဖၣ်န့ၣ် ဘၣ်တၢ်ပာ်ထီၣ်အဝဲသ့ၣ်လၢ သးစီဆှံလဲၣ်.
၁၆ တၢ်အိၣ်ဖှိၣ်သးပှၢ်ဒီး တၢ်အိၣ်ဖှိၣ်အပှၤမၤစၢၤတၢ်တဖၣ် မၤစၢၤဝဲတၢ်အိၣ်ဖှိၣ်ဖိတဖၣ် ဒ်သိးအဝဲသ့ၣ် ကမၤသကိးတၢ်ဃူဃူဖိးဖိးဒီး ကတီဒီးကစၢ်ယွၤအဂီၢ်လီၤ. ဘၣ်ဆၣ် အဝဲသ့ၣ်မ့ၢ်ပှၤတလၢတပှဲၤဘၣ် ဒ်ပဝဲဒၣ်အသိးလီၤ. မ့မ့ၢ်ဒ်န့ၣ်န့ၣ် အဝဲသ့ၣ်ဘၣ်တၢ်ပာ်ထီၣ်အီၤ လၢသးစီဆှံလၢကျဲဒ်လဲၣ်. ဒီပုၢ်ဝဲၢ်ခွါတဖၣ်အံၤ အတၢ်အိၣ်မူ လုၢ်လၢ်သကဲာ်ပဝး ကဘၣ်တုၤထီၣ်ထီၣ်ဘးဒ် ကစၢ်ယွၤအကလုၢ်ကထါလၢ ဘၣ်တၢ်ကွဲးအီၤလၢသးစီဆှံ ပာ်ဖျါဝဲအသိးန့ၣ်လီၤ. (၁ တံၤမသ့း ၃:၁-၇, ၁၂; တံတူး ၁:၅-၉) အဂၤတမံၤန့ၣ် ဒီပုၢ်ဝဲၢ်ခွါလၢအကကဲထီၣ်တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ်န့ၣ်, တၢ်အိၣ်ဖှိၣ်သးပှၢ်တဖၣ် ကဘၣ်သမံသမိးဆိ အဝဲသ့ၣ်အတၢ်ဂ့ၤတၢ်ဝါတဖၣ်န့ၣ်လီၤ. မ့ၢ်ဒီပုၢ်ဝဲၢ်ခွါတဖၣ်အံၤ တုၤထီၣ်ထီၣ်ဘးလံဧါ တတုၤထီၣ်ထီၣ်ဘးဒံးဧါန့ၣ် တၢ်အိၣ်ဖှိၣ်သးပှၢ်တဖၣ် ဃ့ထုကဖၣ်ဝဲလၢ ယွၤအသးစီဆှံ ကဟံးစုနဲၣ်ကျဲအီၤ ဒ်သိးကဆၢတဲာ်တၢ်အဂီၢ်လီၤ. အဃိ ပထံၣ်ဘၣ်လၢ တၢ်အိၣ်ဖှိၣ်တဖၣ် အိၣ်လၢယဟိဝၤယွၤဒီး ယ့ၣ်ၡူးအတၢ်ဟံးစုနဲၣ်ကျဲ အဖီလာ်န့ၣ်လီၤ. (မၤတၢ် ၂၀:၂၈) ပိာ်ခွါတဖၣ်လၢ ဘၣ်တၢ်ဃုထၢထီၣ်အီၤလၢ ကကွၢ်ထွဲမၤစၢၤပှၤန့ၣ် လီၤဂာ်ဒ်တၢ်ဟ့ၣ်လၢ အဟဲလၢယဟိဝၤယွၤ အအိၣ်န့ၣ်လီၤ.—အ့းဖ့းစူး ၄:၈.
၁၇. ဒ်သိးဒီပုၢ်ဝဲၢ်မုၣ်ကပာ်ဖျါထီၣ် တၢ်ပာ်ကဲအဂီၢ် တဘျီတခီၣ် အဝဲကဘၣ်မၤဝဲဒ်လဲၣ်.
၁၇ တဘျီတခီၣ် လၢတၢ်အိၣ်ဖှိၣ်အပူၤ တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ် လၢကဟံးထီၣ်ဖီၣ်ထီၣ်မူဒါန့ၣ် တအိၣ်ဝဲဘၣ်. ဖဲန့ၣ်အဆၢကတီၢ် ဒီပုၢ်ဝဲၢ်ခွါလၢ အဘျၢထံဝံၤတဂၤဂၤ ဟံးထီၣ်မူဒါသ့ဝဲလီၤ. ဘၣ်ဆၣ် ဒီပုၢ်ဝဲၢ်ခွါမ့ၢ်တအိၣ်ဘၣ်န့ၣ် ဘၣ်သ့ၣ်သ့ၣ် ဒီပုၢ်ဝဲၢ်မုၣ်တဂၤဂၤ ကဘၣ်ဟံးထီၣ်ဖီၣ်ထီၣ်မူဒါလီၤ. ဘၣ်ဆၣ် ဖဲဒီပုၢ်ဝဲၢ်မုၣ်တဂၤ ဟံးထီၣ်ဖီၣ်ထီၣ်မူဒါလၢ ညီနုၢ်ဘၣ်တၢ်ဟ့ၣ်လီၤအီၤလၢ ဒီပုၢ်ဝဲၢ်ခွါတဂၤအအိၣ်အခါ အဝဲကဘၣ်ဖၢၣ်အခိၣ် မ့တမ့ၢ် ဖျီၣ်ခိၣ်ဖျီၣ်န့ၣ်လီၤ. (၁ ကရံၣ်သူး ၁၁:၃-၁၀) ဖဲဒီပုၢ်ဝဲၢ်မုၣ်မၤဒ်အံၤအခါ မ့ၢ်ဒၣ်အဝဲပာ်ဖျါထီၣ် တၢ်ပာ်ကဲယဟိဝၤယွၤ အတၢ်ရဲၣ်တၢ်ကျဲၤ လၢဟံၣ်ပူၤဃီပူၤ ဒီးလၢတၢ်အိၣ်ဖှိၣ်အပူၤန့ၣ်လီၤ.—ကွၢ်တၢ်ဂ့ၢ် ၁၅ လၢလံာ်အကတၢၢ်တက့ၢ်.
ပာ်ဖျါထီၣ်တၢ်ပာ်ကဲ ပဒိၣ်ပပှၢ်
၁၈, ၁၉. (က) ရိမ့ၤ ၁၃:၁-၇ န့ၣ်သိၣ်လိပှၤတၢ်မနုၤလဲၣ်. (ခ) ပပာ်ဖျါထီၣ်လၢ ပပာ်ကဲ ပဒိၣ်ပပှၢ်တဖၣ် ကသ့ဒ်လဲၣ်.
၁၈ မုၣ်မဆါတနံၤညါအံၤ ယဟိဝၤယွၤ ဟ့ၣ်အခွဲးလၢ ပဒိၣ်ပပှၢ်တဖၣ် ကအိၣ်ဒီးတၢ်စိတၢ်ကမီၤအဃိ ပကဘၣ်ပာ်ကဲ အဝဲသ့ၣ်လီၤ. ပဒိၣ်ပပှၢ်တဖၣ် ထုးထီၣ်တၢ်သိၣ်တၢ်သီဒီး တၢ်ရဲၣ်တၢ်ကျဲၤတဖၣ်လၢ အကဲဘျုးလၢ ထံဖိကီၢ်ဖိတဖၣ်အဂီၢ်လီၤ. ခရံာ်ဖိသ့ၣ်တဖၣ် ကဘၣ်ဒိကနၣ်တၢ်ဟံးစုနဲၣ်ကျဲဖဲ ရိမ့ၤ ၁၃:၁-၇ န့ၣ်လီၤ. (ဖးတက့ၢ်.) ပပာ်ကဲ “တၢ်စိတၢ်ကမီၤအဒိၣ်တဖၣ်” ဒီးပဒိကနၣ်ထံကီၢ်ဒီး လီၢ်ကဝီၤအတၢ်သိၣ်တၢ်သီတဖၣ်န့ၣ်လီၤ. တၢ်သိၣ်တၢ်သီတဖၣ်အံၤ ကဘၣ်ထွဲလိာ်အသးဒီး ပဟံၣ်ဖိဃီဖိ အတၢ်ဖံးတၢ်မၤ မ့တမ့ၢ် ပတၢ်စုလီၢ်ခီၣ်ခိၣ်န့ၣ်လီၤ. အဒိ ပကဘၣ်ဟ့ၣ်တၢ်ခိတၢ်သွဲ ဒီးတီၣ်ဖျါထီၣ်တၢ်ဂ့ၢ်တၢ်ကျိၤလၢ ပဒိၣ်မၢပတီၣ်ဖျါထီၣ်သ့ၣ်တဖၣ်န့ၣ်လီၤ. ဘၣ်ဆၣ် ပဒိၣ်ပပှၢ်တဖၣ် မ့ၢ်မၢပမၤတၢ်တမံၤမံၤလၢ အထီဒါလိာ်အသးဒီး ယွၤအတၢ်သိၣ်တၢ်သီန့ၣ် ပကဘၣ်မၤဒ်လဲၣ်. ဒ်တၢ်မၢဖိပ့းတရူး တဲဝဲအသိး “ပဘၣ်စူၢ်ယွၤအါန့ၢ် ပစူၢ်ပှၤကညီတက့ၢ်လီၤ.”—မၤတၢ် ၅:၂၈, ၂၉.
၁၉ ပမ့ၢ်ဘၣ်တဲသကိးတၢ်ဒီး ပဒိၣ်ပပှၢ်မ့ၢ်ဂ့ၤ, စံၣ်ညီၣ်ကွီၢ်မ့ၢ်ဂ့ၤ, ပလံးမ့ၢ်ဂ့ၤ ထီဘိန့ၣ် ပကဘၣ်အိၣ်ဒီး တၢ်ပာ်ကဲန့ၣ်လီၤ. ခရံာ်ဖိသးစၢ်တဖၣ် ကဘၣ်ပာ်ကဲအသရၣ်လၢကၠိ ဒီးကၠိအပှၤမၤတၢ်ဖိတဖၣ်န့ၣ်လီၤ. တကးဒံးဘၣ် လၢပတၢ်မၤအလီၢ် ပှၤမၤတၢ်ဖိအဂၤတဖၣ် မ့ၢ်တပာ်ကဲ တၢ်မၤခိၣ်သနာ်က့ ပကဘၣ်ပာ်ကဲအီၤလီၤ. ဖဲပမၤဒ်န့ၣ်အခါ မ့ၢ်ဒၣ်ပကွၢ်လိမၤဒိး တၢ်မၢဖိပီလူးန့ၣ်လီၤ. မ့ၢ်ကီလၢ စီၤပီလူးအဂီၢ်သနာ်က့ အဝဲပာ်ကဲ ပဒိၣ်ပပှၢ်တဖၣ် ထီဘိန့ၣ်လီၤ. (မၤတၢ် ၂၆:၂, ၂၅) ဒ်န့ၣ်အသိး ပှၤဂၤမ့ၢ်တဂ့ၤလၢ ပဖီခိၣ်သနာ်က့ ပကဘၣ်ပာ်ကဲအဝဲသ့ၣ်ဒံးလီၤ.—ဖး ရိမ့ၤ ၁၂:၁၇, ၁၈ တက့ၢ်; ၁ ပ့းတရူး ၃:၁၅.
၂၀, ၂၁. ပမ့ၢ်ပာ်ကဲပှၤဂၤန့ၣ် ကကဲဘျုးဒ်လဲၣ်.
၂၀ မုၢ်မဆါတနံၤညါအံၤ ပှၤအါတက့ၢ် အတၢ်ပာ်ကဲ တအိၣ်ဘၣ်. ဘၣ်ဆၣ် ယဟိဝၤယွၤ အပှၤဂီၢ်မုၢ်တဖၣ်န့ၣ် တမ့ၢ်ဒ်န့ၣ်ဘၣ်. ပမၤထွဲ တၢ်မၢဖိပ့းတရူး အတၢ်ဟံးစုနဲၣ်ကျဲလၢအမ့ၢ် “ယူးယီၣ်ပှၤကညီ ခဲလၢာ်တက့ၢ်.” (၁ ပ့းတရူး ၂:၁၇) လၢတၢ်န့ၣ်အဃိ ပဂုာ်ကျဲးစၢးပာ်ကဲ ပှၤကိးဂၤဒဲးန့ၣ်လီၤ. ပမ့ၢ်ပာ်ကဲပှၤဂၤန့ၣ် အဝဲသ့ၣ်ကဘၣ်သူၣ်ဘၣ်သးဝဲလီၤ. ဒီးဒ်ယ့ၣ်ၡူးတဲဝဲအသိး “သုတၢ်ကပီၤန့ၣ် ဒုးကပီၤထီၣ်အီၤလၢ ပှၤကညီအမဲာ်ညါ ဒ်သိးအကထံၣ်ဘၣ် သုမၤတၢ်ဂ့ၤ, ဒီးကစံးထီၣ်ပတြၢၤ သုပၢ်အိၣ်လၢမူခိၣ်န့ၣ်တက့ၢ်.”—မးသဲ ၅:၁၆.
၂၁ ပမ့ၢ်ပာ်ဖျါထီၣ် တၢ်ပာ်ကဲလၢ ပဟံၣ်ပူၤဃီပူၤ, တၢ်အိၣ်ဖှိၣ်အပူၤ ဒီးလၢတၢ်လီၢ်အဂၤတဖၣ် ကိးဆၢကတီၢ်ဒဲးန့ၣ် ပတၢ်ဒိဂ့ၤတဲာ်ဘၣ် ကထုးန့ၢ်ပှၤဂၤအသး ဒီးဘၣ်သ့ၣ်သ့ၣ် အဝဲသ့ၣ်ကအဲၣ်ဒိးသ့ၣ်ညါအါထီၣ် ယဟိဝၤယွၤအဂ့ၢ်န့ၣ်လီၤ. တကးဒံးဘၣ် ပပာ်ကဲပှၤဂၤန့ၣ် မ့ၢ်ကျဲတဘိလၢ ပပာ်ဖျါထီၣ်တၢ်ပာ်ကဲ ယဟိဝၤယွၤစ့ၢ်ကီးလီၤ. ဒီးပမ့ၢ်မၤဒ်န့ၣ်န့ၣ် မ့ၢ်ဒၣ်ပပာ်ဖျါထီၣ်လၢ ပအဲၣ်ယဟိဝၤယွၤဒီး အဝဲကသးခုဝဲဒိၣ်မးလီၤ.
တၢ်ဂ့ၤအဂၤလၢ နကဘၣ်သး
အိၣ်မူမၤထွဲ လံာ်စီဆှံအတၢ်ဟံးစုနဲၣ်ကျဲ
ပမ့ၢ်ဒိကနၣ် တၢ်ဟ့ၣ်ကူၣ်န့ၣ် ပကအိၣ်ဒီးတၢ်ကူၣ်သ့
သးစၢၢ်ဆၢလၢ တၢ်ဟ့ၣ်ကူၣ်, တဘၣ်သးစၢၢ်ဆၢလၢ ပှၤဟ့ၣ်ကူၣ်တၢ်တဂ့ၤ. တၢ်ဟ့ၣ်ကူၣ်လၢအဂ့ၤလၢ အဟဲလၢ ခရံာ်ဖိ တၢ်အိၣ်ဖှိၣ်သးပှၢ်တဖၣ်အအိၣ်န့ၣ် မ့ၢ်တၢ်အုၣ်အသးလၢ ယဟိဝၤယွၤအဲၣ်ပှၤ.
