တၢ်မၤလိ ၈
ယဟိဝၤယွၤ အဲၣ်ဒိးလၢ အပှၤဂီၢ်မုၢ်တဖၣ် အိၣ်ကဆှီ
“လၢပှၤကဆှီန့ၣ် နကပာ်ကဆှီနသး” လီၤ.—စံးထီၣ်ပတြၢၤ ၁၈:၂၆.
၁-၃. (က) ဘၣ်မနုၤအဃိ မိၢ်တဂၤ ကဒုးလုၢ်အဖိထံ ဒီးကဒုးကူဒုးကၤထီၣ်အီၤ ဆ့ကူဆ့ကၤလၢ အကဆှီလဲၣ်. (ခ) ဘၣ်မနုၤအဃိ ယဟိဝၤယွၤအဲၣ်ဒိးလၢ အပှၤဂီၢ်မုၢ်တဖၣ် ကအိၣ်ကဆှဲကဆှီလဲၣ်.
အဒိ မိၢ်တဂၤ ကတဲာ်ကတီၤထီၣ် အဖိခွါဆံးလၢ ကလဲၤထီၣ်ကၠိအဂီၢ်လီၤ. မိၢ်တဂၤအံၤ ကဒုးလုၢ်အဖိထံ ဒီးဒုးကူဒုးကၤထီၣ်ဝဲ အဖိခွါဆ့ကူဆ့ကၤလၢ အကဆှီလီၤ. ခီဖျိလၢ အဝဲမၤဝဲဒ်န့ၣ်အဃိ အဖိခွါကအိၣ်ဆူၣ်အိၣ်ချ့ ဒီးကပာ်ဖျါန့ၢ်ပှၤဂၤလၢ အမိၢ်အပၢ်န့ၣ် ကွၢ်ထွဲအီၤဂ့ၤဂ့ၤဘၣ်ဘၣ်န့ၣ်လီၤ.
၂ ဒ်န့ၣ်အသိး ပပၢ်ယဟိဝၤယွၤ အဲၣ်ဒိးလၢ ပကအိၣ်ကဆှဲကဆှီဒီး စီဆှံလီၤ. (စံးထီၣ်ပတြၢၤ ၁၈:၂၆) အဝဲသ့ၣ်ညါလၢ ပမ့ၢ်အိၣ်ကဆှဲကဆှီန့ၣ် ကကဲဘျုးလၢပဂီၢ်လီၤ. ဒီးပမ့ၢ်အိၣ်ကဆှဲကဆှီန့ၣ် ကကဲထီၣ်တၢ်လၤကပီၤလၢ ယဟိဝၤယွၤအဂီၢ်စ့ၢ်ကီးလီၤ.—ယဃ့းစက့လး ၃၆:၂၂; ဖး ၁ ပ့းတရူး ၂:၁၂ တက့ၢ်.
၃ တၢ်အိၣ်ကဆှဲကဆှီန့ၣ် အဲၣ်ဒိးတဲဝဲတၢ်မနုၤလဲၣ်, ဒီးပမ့ၢ်အိၣ်ကဆှဲကဆှီန့ၣ် ကဲဘျုးလၢပဂီၢ်ဒ်လဲၣ်. ဖဲပဃုသ့ၣ်ညါ တၢ်သံကွၢ်တဖၣ်အံၤ အတၢ်စံးဆၢအခါ ဘၣ်သ့ၣ်သ့ၣ် ပကသ့ၣ်ညါလီၤပသးလၢ တၢ်လၢပကဘၣ်ဆီတလဲန့ၣ် အိၣ်ဝဲတနီၤလီၤ.
ဘၣ်မနုၤအဃိ ပဘၣ်အိၣ်ကဆှဲကဆှီလဲၣ်
၄, ၅. (က) ဘၣ်မနုၤအဃိ ပဘၣ်အိၣ်ကဆှဲကဆှီလဲၣ်. (ခ) ခီဖျိလၢ ယဟိဝၤယွၤ အတၢ်ဘၣ်တ့အဃိ ပထံၣ်ဘၣ်လၢ အဝဲမ့ၢ်ပှၤဒ်လဲၣ်တဂၤလဲၣ်.
၄ ယဟိဝၤယွၤပာ်လီၤန့ၢ်ပှၤ တၢ်အဒိအတဲာ်လၢအဂ့ၤကတၢၢ်လီၤ. ယဟိဝၤယွၤ မ့ၢ်ကစၢ်လၢအကဆှဲကဆှီဒီး စီဆှံဝဲလၢ တၢ်ခဲလၢာ်အပူၤလီၤ. (၃ မိၤၡ့ ၁၁:၄၄, ၄၅) ပကဘၣ် “ကဲထီၣ်ပှၤကွၢ်လိယွၤ” အဃိ ပဝဲစ့ၢ်ကီး ပကဘၣ်အိၣ်ကဆှဲကဆှီလီၤ.—အ့းဖ့းစူး ၅:၁.
၅ ယဟိဝၤယွၤမ့ၢ် ကစၢ်လၢအကဆှဲကဆှီန့ၣ် ပထံၣ်ဘၣ်သ့ ခီဖျိလၢအတၢ်ဘၣ်တ့တဖၣ်အဃိလီၤ. အဒိ ယဟိဝၤယွၤတ့လီၤဝဲ ထံဒီးကလံၤအတၢ်လဲၤတရံးအသးဒ်သိး ကမၤကဆှီကလံၤ ဒီးထံအဂီၢ်လီၤ. (ယံးရမံယၤ ၁၀:၁၂) ဒ်သိးဟီၣ်ခိၣ်အံၤကကဆှဲကဆှီအဂီၢ် ဖဲကစၢ်ယွၤတ့လီၤဟီၣ်ခိၣ်အခါ တ့လီၤဃုာ်ဝဲဒီးတၢ်လၢ ကမၤကဆှီဝဲဟီၣ်ခိၣ်အဂီၢ်လီၤ. အဒိ ယဟိဝၤယွၤ တ့လီၤဝဲတၢ်ဃၢ်ပြံကဒံဖိတဖၣ် ဒ်သိးကမၤကဆှီထီၣ်က့ၤ တၢ်အ့ၣ်တၢ်ဆံၣ် အစုၣ်တဖၣ်လီၤ. ဒီးပှၤစဲအ့ၣ်ဖိတဖၣ် သူဝဲတၢ်ဃၢ်ပြံကဒံဖိတဖၣ်အံၤ ဒ်သိးကမၤကဆှီထီၣ်က့ၤ တၢ်ဘၣ်အၢဘၣ်သီလၢ ပှၤဟီၣ်ခိၣ်ဖိ ဒုးအိၣ်ထီၣ်ဝဲတဖၣ်န့ၣ်လီၤ.—ရိမ့ၤ ၁:၂၀.
၆, ၇. ပှၤလၢအဘူၣ်ထီၣ်ဘါထီၣ် ယဟိဝၤယွၤ ကဘၣ်အိၣ်ကဆှဲကဆှီဝဲန့ၣ် စီၤမိၤၡ့အတၢ်သိၣ်တၢ်သီ ပာ်ဖျါထီၣ်ဝဲဒ်လဲၣ်.
၆ တၢ်သိၣ်တၢ်သီလၢ ယဟိဝၤယွၤ ဟ့ၣ်လီၤပှၤအံၣ်စရ့လးဖိ ခီဖျိလၢ စီၤမိၤၡ့န့ၣ် ပာ်ဖျါထီၣ်လၢ တၢ်အိၣ်ကဆှဲကဆှီ မ့ၢ်တၢ်လၢအရ့ဒိၣ်ဒိၣ်မးလီၤ. အဒိ ဒ်သိးယဟိဝၤယွၤ ကတူၢ်လိာ် ပှၤအံၣ်စရ့လးဖိတဖၣ် အတၢ်ဘူၣ်ထီၣ်ဘါထီၣ်အဂီၢ် အဝဲသ့ၣ် ကဘၣ်အိၣ်ကဆှဲကဆှီလၢ နီၢ်ခိတခီလီၤ. ဒီးဖဲတၢ်မၤပူၤဖျဲးအနံၤန့ၣ် ပှၤလုၢ်တၢ်အခိၣ် ကဘၣ်လုၢ်ထံခံဘျီလီၤ. (၃ မိၤၡ့ ၁၆:၄, ၂၃, ၂၄) တကးဒံးဘၣ် တချုးလၢ ပှၤလုၢ်တၢ်အဒိၣ်အဂၤတဖၣ် ဟ့ၣ်လုၢ်ထီၣ်တၢ်အဆၢကတီၢ် အဝဲသ့ၣ်ကဘၣ်သ့ဆိ အစုဒီးအခီၣ်န့ၣ်လီၤ. (၂ မိၤၡ့ ၃၀:၁၇-၂၁; ၂ ကွဲးနီၣ်တၢ် ၄:၆) ဒီးလၢတၢ်အိၣ်အသးတနီၤအဖီခိၣ် အဝဲသ့ၣ် မ့ၢ်တဒိကနၣ် တၢ်သိၣ်တၢ်သီလၢ ဘၣ်ဃးဒီး တၢ်ကဆှဲကဆှီန့ၣ် အဝဲသ့ၣ်ဘၣ်သံဝဲလီၤ.—၃ မိၤၡ့ ၁၅:၃၁; ၄ မိၤၡ့ ၁၉:၁၇-၂၀.
၇ ပမ့ၢ်ဆိကမိၣ်ထံ စီၤမိၤၡ့အတၢ်သိၣ်တၢ်သီတဖၣ်အံၤန့ၣ် မၤစၢၤပှၤလၢ ပကနၢ်ပၢၢ်ထီၣ် ကစၢ်ယွၤအတၢ်ထံၣ် လၢဘၣ်ဃးဒီးတၢ်ကဆှဲကဆှီအဂ့ၢ်န့ၣ်လီၤ. (မၤလကံ ၃:၆) ပထံၣ်ဘၣ် လီၤတံၢ်လီၤဆဲးလၢ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် အဝဲသ့ၣ်ကဘၣ်အိၣ်ကဆှီလီၤ. ယဟိဝၤယွၤ အတၢ်ထံၣ်န့ၣ် တဆီတလဲဝဲဘၣ်. မုၢ်မဆါတနံၤညါအံၤစ့ၢ်ကီး အဝဲအဲၣ်ဒိးလၢ ပှၤလၢအဘူၣ်ထီၣ်ဘါထီၣ်အီၤတဖၣ် ကကဆှဲကဆှီဒီး စီဆှံဝဲလီၤ.—ယၤကိာ် ၁:၂၇.
တၢ်အိၣ်ကဆှဲကဆှီန့ၣ် အဲၣ်ဒိးတဲဝဲအခီပညီဒ်လဲၣ်
၈. ဒ်သိးပကကဆှီလၢ ယဟိဝၤယွၤအမဲာ်ညါအဂီၢ် ပကဘၣ်မၤဒ်လဲၣ်.
၈ ပကကဆှီလၢ ယဟိဝၤယွၤအမဲာ်ညါန့ၣ် တဘၣ်ဃးထဲ ပနီၢ်ခိ, ပတၢ်ကူတၢ်သိးဒီး ပဟံၣ်ပဃီဘၣ်. ပကဘၣ်ကဆှီလၢ ပတၢ်အိၣ်မူ ကိးသနၢၣ်ဒဲးအပူၤလီၤ. ဒ်သိးပကကဆှီလၢ ယဟိဝၤယွၤ အမဲာ်ညါအဂီၢ်န့ၣ် ပတၢ်ဘူၣ်ထီၣ်ဘါထီၣ်, လုၢ်လၢ်သကဲာ်ပဝး ဒီးတၢ်ဆိကမိၣ် ကဘၣ်ကဆှီစ့ၢ်ကီးလီၤ.
၉, ၁၀. တၢ်ဘူၣ်ထီၣ်ဘါထီၣ် လၢအကဆှီန့ၣ် အဲၣ်ဒိးတဲဝဲအခီပညီဒ်လဲၣ်.
၉ တၢ်ဘူၣ်ထီၣ်ဘါထီၣ်လၢ အကဆှီ. ပတဘၣ်မၤ ဘၣ်ထွဲလိာ်ပသးဒီး တၢ်ဘူၣ်တၢ်ဘါ အကမၣ်နီတစဲးဘၣ်. ဖဲပှၤအံၣ်စရ့လးဖိတဖၣ် အိၣ်လၢဘၤဘူၤလိၣ်ပူၤအခါ ပှၤလၢအဘူၣ်ထီၣ်ဘါထီၣ် ယွၤလၢအကမၣ်တဖၣ် အိၣ်ဘူးဒီးအဝဲသ့ၣ်လီၤ. ဘၣ်ဆၣ် ဝံယၡါယၤ တဲပာ်စၢၤဝဲလၢ ပှၤအံၣ်စရ့လးဖိ ကက့ၤကဒါက့ၤလၢ ကီၢ်အံၣ်စရ့လး ဒီးကသူၣ်ထီၣ်က့ၤ တၢ်ဘူၣ်တၢ်ဘါလၢ အမ့ၢ်အတီလီၤ. လၢတၢ်န့ၣ်အဃိ ယဟိဝၤယွၤ တဲဘၣ်အဝဲသ့ၣ်လၢ “ဟးထီၣ် . . . ဖဲန့ၣ်တက့ၢ်. တၢ်တကဆှီဘၣ်န့ၣ် ထိးဘၣ်အီၤနီတမံၤတဂ့ၤ. ဟးထီၣ်လၢအသးကံၢ်ပူၤန့ၣ်တက့ၢ်. ကဆှီထီၣ် တက့ၢ်.” အဃိအဝဲသ့ၣ် အတၢ်ဘူၣ်တၢ်ဘါန့ၣ် တဘၣ်ဘၣ်ထွဲလိာ်အသးဒီး တၢ်ဘူၣ်တၢ်ဘါအကမၣ်အတၢ်သိၣ်တၢ်သီ, တၢ်သကဲာ်ပဝးဒီး လုၢ်လၢ်တဖၣ်လၢ အဟဲလီၤစၢၤလီၤသွဲၣ်လၢ ဘၤဘူၤလိၣ်န့ၣ်ဘၣ်.—ယၡါယၤ ၅၂:၁၁.
၁၀ မုၢ်မဆါတနံၤညါအံၤစ့ၢ်ကီး ခရံာ်ဖိနီၢ်နီၢ်တဖၣ်န့ၣ် အဝဲသ့ၣ်တမၤဘၣ်ဃးအသးဒီး တၢ်ဘူၣ်တၢ်ဘါလၢ အကမၣ်ဘၣ်. (ဖး ၁ ကရံၣ်သူး ၁၀:၂၁ တက့ၢ်.) လၢဟီၣ်ခိၣ်ဒီဘ့ၣ်န့ၣ် ပထံၣ်ဘၣ်လၢ တၢ်စူၢ်တၢ်နာ်, လုၢ်လၢ်ဒီးမူးပွဲအါမး ဘၣ်ထွဲလိာ်အသးဒီး တၢ်ဘူၣ်တၢ်ဘါအကမၣ် အတၢ်သိၣ်တၢ်သီတဖၣ်လီၤ. အဒိ ပှၤအါဂၤနာ်ဝဲလၢ ပမ့ၢ်သံသနာ်က့ ပအိၣ်ဒီးကလၤလၢ အသံတသ့ဘၣ်ဒီး အဝဲသ့ၣ်မၤထွဲဝဲ လုၢ်လၢ်တဖၣ်လၢ အဘၣ်ထွဲလိာ်အသးဒီး တၢ်သိၣ်လိလၢ အကမၣ်တခါအံၤလီၤ. (စံၣ်တဲၤတဲလီၤတၢ် ၉:၅, ၆, ၁၀) ခရံာ်ဖိတဖၣ် ကဘၣ်ဟးဆှဲး လုၢ်လၢ်တဖၣ်အံၤလီၤ. ပဘူးပတံၢ် မ့တမ့ၢ် ပဟံၣ်ဖိဃီဖိ မ့ၢ်မၢဆူၣ်ပှၤလၢ ပကမၤထွဲ လုၢ်လၢ်တဖၣ်အံၤသနာ်က့ ပအဲၣ်ဒိးအိၣ်ကဆှီလၢ ယဟိဝၤယွၤအမဲာ်ညါအဃိ ပတမၤဘၣ်.—မၤတၢ် ၅:၂၉.
၁၁. ပအိၣ်ဒီးလုၢ်လၢ်သကဲာ်ပဝးလၢ အကဆှီန့ၣ် အဲၣ်ဒိးတဲဝဲဒ်လဲၣ်.
၁၁ လုၢ်လၢ်သကဲာ်ပဝးလၢ အကဆှီ. ဒ်သိးပကကဆှီလၢ ယဟိဝၤယွၤအမဲာ်ညါအဂီၢ် ပကဘၣ်ဟးဆှဲး တၢ်မၤကမၣ်မုၣ်ကမၣ်ခွါ ကိးကလုာ်ဒဲးန့ၣ်လီၤ. (ဖး အ့းဖ့းစူး ၅:၅ တက့ၢ်.) လၢလံာ်စီဆှံပူၤ ယဟိဝၤယွၤတဲဘၣ်ပှၤလၢ “ဃ့ၢ်ဟးဆှဲးကွံာ် တၢ်မၤကမၣ်မုၣ်ကမၣ်ခွါ” လီၤ. တကးဒံးဘၣ် ကစၢ်ယွၤဒုးသ့ၣ်ညါပှၤလၢ ပှၤမၤကမၣ်မုၣ်ကမၣ်ခွါ လၢတပီၢ်ယၢ်လီၤက့ၤအသးန့ၣ် “တန့ၢ်ဘၣ်သါယွၤအဘီအမုၢ်ဘၣ်.”— ၁ ကရံၣ်သူး ၆:၉, ၁၀, ၁၈; ကွၢ်တၢ်ဂ့ၢ် ၂၂ လၢလံာ်အကတၢၢ်တက့ၢ်.
၁၂, ၁၃. ဘၣ်မနုၤအဃိ ပကဘၣ်ဆိကမိၣ် တၢ်လၢအကဆှီတဖၣ်လဲၣ်.
၁၂ တၢ်ဆိကမိၣ်လၢ အကဆှီ. ပဝဲသ့ၣ်တဖၣ်န့ၣ် ပမၤထွဲဒ်ပတၢ်ဆိကမိၣ်အသိးလီၤ. (မးသဲ ၅:၂၈; ၁၅:၁၈, ၁၉) ပမ့ၢ်ဆိကမိၣ်တၢ်လၢ အကဆှီန့ၣ် ကမၤစၢၤပှၤဒ်သိး ပကအိၣ်ဒီး လုၢ်လၢ်သကဲာ်ပဝးလၢအဂ့ၤန့ၣ်လီၤ. ဘၣ်ဆၣ် ပဝဲခဲလၢာ် ပတလၢတပှဲၤဘၣ်အဃိ တဘျီတခီၣ် ပကဆိကမိၣ် တၢ်လၢအအၢအသီန့ၣ်လီၤ. ဖဲတၢ်ဆိကမိၣ် လၢအအၢအသီဟဲနုာ်လီၤလၢ ပသးပူၤအခါ ပကဘၣ်ထုးထီၣ်ကွံာ်အီၤ တဘျီဃီလီၤ. ပမ့ၢ်တမၤဒ်န့ၣ်န့ၣ် လၢခံပကအဲၣ်ဒိးမၤ ဒ်တၢ်လၢ ပဆိကမိၣ်အီၤတဖၣ်အသိးန့ၣ်လီၤ. လၢတၢ်န့ၣ်အလီၢ် ပကဘၣ်ဆိကမိၣ်ထဲ တၢ်လၢအကဆှီတဖၣ်လီၤ. (ဖး ဖံလံးပံၤ ၄:၈ တက့ၢ်.) အဃိပကြၢးဟးဆှဲး တၢ်ဂီၤမူ, တၢ်သးဝံၣ်ဒီးတၢ်အဂၤတဖၣ် လၢအပာ်ဖျါထီၣ်ဝဲ တၢ်မၤဆူၣ်မၤစိးဒီး တၢ်မၤကမၣ်မုၣ်ကမၣ်ခွါန့ၣ်လီၤ. တကးဒံးဘၣ် ပကဘၣ်ပလီၢ်ပသး ဘၣ်ဃးဒီး တၢ်လၢပဖး, တၢ်လၢပကွၢ်ဒီးတၢ်ဂ့ၢ်လၢ ပတဲသကိးတဖၣ်န့ၣ်လီၤ.—စံးထီၣ်ပတြၢၤ ၁၉:၈, ၉.
၁၃ ဒ်သိးပကအိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံအပူၤအဂီၢ် ပကဘၣ်ကဆှီလၢ တၢ်ဘူၣ်ထီၣ်ဘါထီၣ်, ပလုၢ်လၢ်သကဲာ်ပဝး ဒီးပတၢ်ဆိကမိၣ်န့ၣ်လီၤ. ဘၣ်ဆၣ် နီၢ်ခိတၢ်ကဆှဲကဆှီ မ့ၢ်တၢ်လၢအရ့ဒိၣ်လၢ ယဟိဝၤယွၤအဂီၢ်စ့ၢ်ကီးလီၤ.
ပကဆှဲကဆှီလၢနီၢ်ခိတခီ ကသ့ဒ်လဲၣ်
၁၄. နီၢ်ခိအတၢ်ကဆှဲကဆှီန့ၣ် ဘၣ်မနုၤအဃိ မ့ၢ်တၢ်လၢအရ့ဒိၣ်လဲၣ်.
၁၄ ပမ့ၢ်ကွၢ်ထွဲလီၤက့ၤ ပနီၢ်ကစၢ်ဒီး တၢ်အိၣ်လၢပခိၣ်ပဃၢၤဒ်သိး ကကဆှဲကဆှီအဂီၢ်န့ၣ် ကကဲဘျုးလၢပဂီၢ် တကးဒံးဘၣ် ပှၤလၢပခိၣ်ပဃၢၤတဖၣ်စ့ၢ်ကီး ကဒိးန့ၢ်ဘၣ်တၢ်အဘျုးလီၤ. အဒိ ပကအိၣ်ဆူၣ်အိၣ်ချ့ ဒီးပှၤဂၤသ့ၣ်တဖၣ် အိၣ်လၢပကျါကမုာ်ဝဲလီၤ. ဒီးပနီၢ်ခိအတၢ်ကဆှဲကဆှီန့ၣ် ကကဲထီၣ်တၢ်လၤကပီၤလၢ ယွၤအမံၤအဂီၢ်စ့ၢ်ကီးလီၤ. ဆိကမိၣ်ကွၢ် တၢ်အဒိတခါအံၤတက့ၢ်. နမ့ၢ်ထံၣ်ဘၣ် ဖိသၣ်တဂၤလၢ အတၢ်ကူတၢ်ကၤဘၣ်အၢဘၣ်သီထီဘိန့ၣ် ဘၣ်သ့ၣ်သ့ၣ် နကဆိကမိၣ်ဆံး အမိၢ်အပၢ်န့ၣ်လီၤ. ဒ်န့ၣ်အသိး ပမ့ၢ်တကွၢ်ထွဲလီၤ ပနီၢ်ကစၢ် ဒီးပနီၢ်ခိ မ့ၢ်တကဆှဲကဆှီဘၣ်န့ၣ် ဘၣ်သ့ၣ်သ့ၣ် ပှၤအဂၤတဖၣ် ကဒုၣ်ဒွဲၣ်စံးအၢ ယဟိဝၤယွၤလီၤ. စီၤပီလူးတဲဝဲလၢ “ဒ်သိးတၢ်အခ့အပှၤအတၢ်မၤသုတဘၣ် တၢ်ပာ်တၢ်ကမၣ်လၢအလိၤတဂ့ၤဒီး, ပတဟ့ၣ်ဘၣ်တၢ်လီၤကမၣ်အလီၢ်လၢ တၢ်နီတမံၤဘၣ်. မ့မ့ၢ်ပပာ်ဖျါထီၣ်ပသးလၢ ပမ့ၢ်ယွၤအခ့အပှၤ လၢတၢ်ခဲလၢာ်အပူၤ” လီၤ.—၂ ကရံၣ်သူး ၆:၃, ၄.
၁၅, ၁၆. ဒ်သိးပက ကဆှဲကဆှီအဂီၢ်န့ၣ် ပကဘၣ်မၤဒ်လဲၣ်.
၁၅ ပနီၢ်ခိဒီး ပတၢ်ကူတၢ်ကၤ. ပနီၢ်ခိကဘၣ်ကဆှဲကဆှီ ကိးနံၤဒဲးလီၤ. အဒိ မ့ၢ်သ့န့ၣ် ပကြၢးလုၢ်ထံကိးနံၤဒဲးလီၤ. တကးဒံးဘၣ် တချုးလၢပအီၣ်တၢ်အီတၢ် မ့တမ့ၢ် ပဖီအီၣ်တၢ်အခါ, ဒီးဖဲပလဲၤတၢ်ဟးလီၢ် မ့တမ့ၢ် ဖီၣ်တၢ်လၢအဘၣ်အၢတမံၤမံၤ ဝံၤအလီၢ်ခံန့ၣ် ပကဘၣ်သ့ပစုလၢ ဆးပၠၣ်လီၤ. တၢ်သ့စုလၢဆးပၠၣ်န့ၣ် မ့ၢ်တၢ်ယိယိဖိတခါဘၣ်ဆၣ် ကဲထီၣ်တၢ်ဒီသဒၢလၢ ပသးသမူဒီး ပှၤဂၤအသးသမူအဂီၢ်သ့ဝဲလီၤ. တကးဒံးဘၣ် ဒီသဒၢပှၤလၢ တၢ်ဆါဃၢ်ဒီး တၢ်ဆူးတၢ်ဆါတဖၣ်စ့ၢ်ကီးလီၤ. တၢ်လီၢ်လၢတၢ်ရဲၣ်လီၤကျဲၤလီၤ လၢတၢ်ဒုးယွၤလီၤကွံာ် တၢ်အ့ၣ်တၢ်ဆံၣ် မ့ၢ်တအိၣ်ဘၣ်န့ၣ် ပကဘၣ်တၢၤကွံာ်အီၤလၢ ကျဲအဂၤတဘိဘိလီၤ. အဒိ ပှၤအံၣ်စရ့လးဖိလၢပျၢၤတဖၣ် ဘျၢလီၤဝဲ တၢ်အ့ၣ်တၢ်ဆံၣ်တဖၣ်လၢဟီၣ်ခိၣ်လာ် လၢအယံၤဒီးပှၤဟံၣ်ဒီး ထံကျိတဖၣ်န့ၣ်လီၤ.—၅ မိၤၡ့ ၂၃:၁၂, ၁၃.
၁၆ တၢ်ကူတၢ်သိးန့ၣ် တလိၣ်လၢအပှ့ၤကဘၣ်ဒိၣ် ဒီးတလိၣ်လၢ ပကူကၤ တၢ်လၢ အဟဲထီၣ်သီသ့ၣ်တဖၣ်ဘၣ်. ဘၣ်ဆၣ် ပတၢ်ကူတၢ်ကၤတဖၣ် ကြၢးဖျါကဆှဲကဆှီလီၤ. (ဖး ၁ တံၤမသ့း ၂:၉, ၁၀ တက့ၢ်.) ထီဘိန့ၣ် ပအဲၣ်ဒိးဖျါကဆှဲကဆှီ ဒ်သိးပှၤကမၤလၤကပီၤ ယဟိဝၤယွၤအဂီၢ်လီၤ.—တံတူး ၂:၁၀.
၁၇. ဘၣ်မနုၤအဃိ ပအဲၣ်ဒိးလၢ ပဟံၣ်ပဃီဒီး ပခိၣ်ပဃၢၤ ဖျါကဆှဲကဆှီလဲၣ်.
၁၇ ပဟံၣ်ပဃီ ဒီးတၢ်အိၣ်လၢပခိၣ်ပဃၢၤတဖၣ်. ဖဲပအိၣ်တၢ်လီၢ် တပူၤဂ့ၤတပူၤဂ့ၤ ပဟံၣ်ကဘၣ်ဖျါ ကဆှဲကဆှီဝဲလီၤ. တကးဒံးဘၣ် ပကါမ့ၢ်ဂ့ၤ, ပလ့ၣ်ယီၢ်မ့ၢ်ဂ့ၤ ကဘၣ်ဖျါကဆှဲကဆှီ ဖဲပလဲၤထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်အခါန့ၣ်လီၤ. အဒိ ဖဲပဟးစံၣ်တဲၤတဲလီၤတၢ်အခါ ပတဲဘၣ်ပှၤဂၤလၢ ဟီၣ်ခိၣ်ပၤရဒံစူးအပူၤန့ၣ် တၢ်ခဲလၢာ်ကဖျါဃံလၤ ဒီးကဆှဲကဆှီဝဲလီၤ. (လူၤကၣ် ၂၃:၄၃; လီၣ်ဖျါ ၁၁:၁၈) လၢတၢ်န့ၣ်အဃိ ပအဲၣ်ဒိးလၢ ပဟံၣ်ပဃီဒီး ပခိၣ်ပဃၢၤ ဖျါကဆှဲကဆှီလၢ ပှၤဂၤအမဲာ်ညါ ဒ်သိးအဝဲသ့ၣ် ကထံၣ်ဝဲလၢ ပမ့ၢ်ပှၤလၢ အကြၢးအိၣ်မူဘၣ်လၢ ဟီၣ်ခိၣ်သီအပူၤန့ၣ်လီၤ.
၁၈. ဘၣ်မနုၤအဃိ ပအဲၣ်ဒိးလၢ ပတၢ်ဘူၣ်ထီၣ်ဘါထီၣ်အလီၢ် ဖျါကဆှဲကဆှီလဲၣ်.
၁၈ ပတၢ်ဘူၣ်ထီၣ်ဘါထီၣ်တၢ်အလီၢ်. ဒ်သိးပဘီမုၢ်ဘျီၣ်ဒိၣ် မ့တမ့ၢ် ပတၢ်အိၣ်ဖှိၣ်ဖးဒိၣ်အလီၢ် ကဖျါဃံဖျါလၤဒီး ကကဆှီအဂီၢ် ပကဘၣ်မၤကဆှဲကဆှီ ဒီးဘှီဂ့ၤထီၣ်က့ၤအီၤ ထီဘိလီၤ. ဖဲပှၤအသီတဖၣ် ဟဲထီၣ်ပဘီမုၢ်ဘျီၣ်ဒိၣ် အဆိကတၢၢ်တဘျီန့ၣ် အါတက့ၢ် အဝဲသ့ၣ်ပာ်သူၣ်ပာ်သးလၢ ပဘီမုၢ်ဘျီၣ်ဒိၣ်န့ၣ် ဖျါကဆှဲကဆှီလီၤ. အဃိ ကဲထီၣ်ဝဲ တၢ်လၤကပီၤလၢ ယဟိဝၤယွၤအဂီၢ်လီၤ. ပဝဲခဲလၢာ် ဒ်ပမ့ၢ်တၢ်အိၣ်ဖှိၣ်ဖိအသိး ပအိၣ်ဒီးတၢ်ခွဲးတၢ်ယာ်လၢ ပကမၤကဆှဲကဆှီ ပဘီမုၢ်ဘျီၣ်ဒိၣ်ဒီး ဘှီဂ့ၤထီၣ်က့ၤအီၤလီၤ.—၂ ကွဲးနီၣ်တၢ် ၃၄:၁၀.
ပာ်တ့ၢ်လုၢ်လၢ်လၢ အတကဆှီဘၣ်တဖၣ်
၁၉. ပကဘၣ်ဟးဆှဲး တၢ်မနုၤလဲၣ်.
၁၉ လုၢ်လၢ်လၢ အတကဆှီဘၣ်တဖၣ်န့ၣ် လံာ်စီဆှံ တပာ်ဖျါထီၣ်ဝဲ ခဲလၢာ်ဘၣ်. ဘၣ်ဆၣ် လံာ်စီဆှံပာ်ဖျါထီၣ်ဝဲ တၢ်ဟံးစုနဲၣ်ကျဲတဖၣ် ဒ်သိးကမၤစၢၤပှၤလၢ ပကနၢ်ပၢၢ်ထီၣ် ယဟိဝၤယွၤ အတၢ်ထံၣ်ဘၣ်ဃးဒီး လုၢ်လၢ်တဖၣ်အံၤန့ၣ်လီၤ. ယဟိဝၤယွၤ တအဲၣ်ဒိးလၢပကအီမီာ်, အီမူၤသံး မ့တမ့ၢ် သူကသံၣ်မူၤဘှီးဘၣ်. ပမ့မ့ၢ်ယွၤအတံၤသကိးန့ၣ် ပကဘၣ်ဟးဆှဲး လုၢ်လၢ်တဖၣ်အံၤလီၤ. ဘၣ်မနုၤအဃိ ပတဲဒ်န့ၣ်သ့လဲၣ်. မ့ၢ်လၢပကဘၣ်ပာ်လုၢ်ပာ်ပှ့ၤ ကစၢ်ယွၤအတၢ်ဟ့ၣ်လၢအမ့ၢ် သးသမူအဃိလီၤ. မ့မ့ၢ်လုၢ်လၢ်လၢ ပပာ်ဖျါထီၣ်လၢထးတဖၣ်အံၤန့ၣ် မၤဘၣ်ဒိပတၢ်အိၣ်ဆူၣ်အိၣ်ချ့, ပှၤလၢပခိၣ်ပဃၢၤတဖၣ် အတၢ်အိၣ်ဆူၣ်အိၣ်ချ့ ဒီးမၤဖုၣ်လီၤပသးသမူသ့ဝဲလီၤ. ပှၤအါဂၤ အဲၣ်ဒိးပာ်တ့ၢ်ကွံာ် လုၢ်လၢ်တဖၣ်အံၤလၢ အတၢ်အိၣ်ဆူၣ်အိၣ်ချ့အဂီၢ်လီၤ. ဘၣ်ဆၣ် ဒ်ပမ့ၢ်ယဟိဝၤယွၤအတံၤသကိးအသိး ပတၢ်အဲၣ်အီၤန့ၣ်မ့ၢ် တၢ်ဂ့ၢ်အဂ့ၤကတၢၢ်တခါလၢ ကထိၣ်ဟူးထိၣ်ဂဲၤထီၣ်ပှၤဒ်သိး ပကပာ်တ့ၢ်ကွံာ် လုၢ်လၢ်တဖၣ်အံၤအဂီၢ်လီၤ. ပိာ်မုၣ်သးစၢ်တဂၤ တဲဝဲဒ်အံၤ “ခီဖျိလၢယဟိဝၤယွၤ အတၢ်မၤစၢၤအဃိ ယဆီတလဲယတၢ်အိၣ်မူန့ၢ် ဒီးတၢ်မူၤတၢ်ဘှီးလၢ ယစွဲတဖၣ်န့ၣ် ယပာ်တ့ၢ်ကွံာ်အီၤ န့ၢ်ဝဲခဲလၢာ်လီၤ. မ့မ့ၢ်လၢ ယနီၢ်ကစၢ်အဂံၢ်အဘါန့ၣ် ယဆိကမိၣ်လၢ ယဆီတလဲ ယတၢ်အိၣ်မူတန့ၢ်ဘၣ်.” ခဲအံၤ ပကဃုသ့ၣ်ညါ လံာ်စီဆှံအတၢ်ဟံးစုနဲၣ်ကျဲ ယဲၢ်ခါလၢ ကမၤစၢၤပှၤလၢအအဲၣ်ဒိး ပာ်တ့ၢ်ကွံာ်လုၢ်လၢ်လၢ အတကဆှီဘၣ်တဖၣ်န့ၣ်လီၤ.
၂၀, ၂၁. ယဟိဝၤယွၤ အဲၣ်ဒိးလၢပကဟးဆှဲး လုၢ်လၢ်မနုၤတဖၣ်လဲၣ်.
၂၀ “ပှၤသးဘိသ့ၣ်သုဧၢ, ပအိၣ်ဒီးတၢ်စံးပာ်တဖၣ်အံၤဒီး, မ်ပမၤကဆှီပသးလၢ ကယဲၢ်တၢ်ဃံၣ်တၢ်မူး, ဘၣ်ဃးဒီးပဖံးပညၣ်, ဒီးပသူၣ်ပသးခဲလၢာ်တက့ၢ်. ဒီးလၢတၢ်ပျံၤယွၤအပူၤန့ၣ်, မ်ပမၤလၢထီၣ်ပှဲၤထီၣ်တၢ်စီဆှံတက့ၢ်.” (၂ ကရံၣ်သူး ၇:၁) ယဟိဝၤယွၤ အဲၣ်ဒိးလၢ ပကဟးဆှဲးလုၢ်လၢ်လၢ အမၤဘၣ်ဒိပခိၣ်နူာ်ဒီး ပနီၢ်ခိအတၢ်အိၣ်ဆူၣ်အိၣ်ချ့လီၤ.
၂၁ ဘၣ်မနုၤအဃိ ပကဘၣ်မၤ “ကဆှီပသးလၢကယဲၢ် တၢ်ဃံၣ်တၢ်မူး” လဲၣ်. ဖဲ ၂ ကရံၣ်သူး ၆:၁၇, ၁၈ န့ၣ်ယဟိဝၤယွၤတဲပှၤလၢ “ထိးဘၣ်တၢ်တကဆှီဘၣ်န့ၣ်တဂ့ၤ.” ပမ့ၢ်မၤဒ်န့ၣ်န့ၣ် အဝဲအၢၣ်လီၤပှၤလၢ “ယကတူၢ်လိာ်သု, ဒီးယကကဲလၢသုပၢ်, ဒီးသုကကဲလၢယဖိမုၣ်, ဒီးယဖိခွါတဖၣ်လီၤ.” ပမ့ၢ်ဟးဆှဲး ကယဲၢ်လုၢ်လၢ်လၢ ယဟိဝၤယွၤထံၣ်ဝဲလၢ အတကဆှီဘၣ်တဖၣ်န့ၣ် အဝဲကအဲၣ်ပှၤဒ် ပၢ်တဂၤအဲၣ်ဝဲအဖိမုၣ်ဒီး အဖိခွါအသိးလီၤ.
၂၂-၂၅. ဒ်သိးပဟးဆှဲး လုၢ်လၢ်လၢအတကဆှီဘၣ်တဖၣ်ကန့ၢ်အဂီၢ် လံာ်စီဆှံအတၢ်ဟံးစုနဲၣ်ကျဲ မနုၤတဖၣ်မၤစၢၤပှၤသ့လဲၣ်.
၂၂ “အဲၣ်ယွၤနကစၢ်လၢ နသူၣ်ကံၢ်သးလဲ, ဒီးနသးဒီဖျၢၣ်ညါ, ဒီးနတၢ်ကူၣ်တၢ်ဖးတုၤအလၢာ်တက့ၢ်.” (မးသဲ ၂၂:၃၇) တၢ်မၤလိာ်အံၤ မ့ၢ်တၢ်မၤလိာ်လၢ အရ့ဒိၣ်ကတၢၢ်လီၤ. (မးသဲ ၂၂:၃၈) ယဟိဝၤယွၤကြၢးဒိးန့ၢ်ဘၣ်ဝဲ ပတၢ်အဲၣ်သပှၢ်ကတၢၢ်လီၤ. ပမ့ၢ်မၤတၢ်တမံၤမံၤလၢ အမၤဖုၣ်လီၤပသးသမူ မ့တမ့ၢ် မၤဘၣ်ဒိပခိၣ်နူာ်န့ၣ် ပတဲလၢပအဲၣ်ယဟိဝၤယွၤ လၢပသးဒီဖျၢၣ်ကသ့ဧါ. တသ့ဘၣ်. လၢတၢ်န့ၣ်အလီၢ် ပဂုာ်ကျဲးစၢးပလီၢ်ပသးလၢ အဂ့ၤကတၢၢ် ဒ်သိးပကပာ်ဖျါထီၣ်လၢ ပပာ်လုၢ်ပာ်ပှ့ၤပသးသမူလၢ ယဟိဝၤယွၤဟ့ၣ်လီၤပှၤန့ၣ်လီၤ.
၂၃ “[ယဟိဝၤယွၤ] ဟ့ၣ်ပှၤခဲလၢာ်အသးသမူ, ဒီးအသါ, ဒီးအတၢ်ခဲလၢာ်လီၤ.” (မၤတၢ် ၁၇:၂၄, ၂၅) နသကိးတဂၤ မ့ၢ်ဟ့ၣ်နၤတၢ်ဟ့ၣ်ဂ့ၤဂ့ၤတခါန့ၣ် မ့ၢ်နကတၢၤကွံာ် မ့တမ့ၢ် မၤဟးဂီၤကွံာ်အီၤဧါ. နတမၤဒ်န့ၣ်ဘၣ်. ဒ်န့ၣ်အသိး ပသးသမူန့ၣ် မ့ၢ်တၢ်ဟ့ၣ်အဂ့ၤတခါလၢ ယဟိဝၤယွၤ ဟ့ၣ်လီၤပှၤန့ၣ်လီၤ. လၢတၢ်န့ၣ်အဃိ ပအဲၣ်ဒိးပာ်လုၢ်ပာ်ပှ့ၤ တၢ်ဟ့ၣ်တခါအံၤ ဒီးသူအီၤလၢအဂ့ၤကတၢၢ် ဒ်သိးကကဲထီၣ် တၢ်လၤကပီၤလၢ ယဟိဝၤယွၤအဂီၢ်န့ၣ်လီၤ.—စံးထီၣ်ပတြၢၤ ၃၆:၉.
၂၄ “အဲၣ်ပှၤလၢ နဃၢၤဒ် နအဲၣ်လီၤနသး ဒၣ်နဲအသိးန့ၣ်တက့ၢ်.” (မးသဲ ၂၂:၃၉) လုၢ်လၢ်သကဲာ်ပဝးလၢ အတကဆှီဘၣ်တဖၣ်န့ၣ် မၤဘၣ်ဒိပနီၢ်ကစၢ်တကးဒံးဘၣ် မၤဘၣ်ဒိစ့ၢ်ကီး ပှၤလၢပဃၢၤ, လီၤဆီဒၣ်တၢ် ပှၤလၢပအဲၣ်ဘၣ်အီၤတဖၣ်န့ၣ်လီၤ. အဒိ ပှၤလၢအအိၣ်ဟံၣ်တဖျၢၣ်ဃီဒီး ပှၤလၢအအီမီာ်တဂၤန့ၣ် အဝဲသ့ၣ်ကနၢဘၣ် မီာ်အခုၣ်အဃိ ကမၤဘၣ်ဒိအတၢ်အိၣ်ဆူၣ်အိၣ်ချ့ သပှၢ်ကတၢၢ်လီၤ.—၁ ယိၤဟၣ် ၄:၂၀, ၂၁.
၂၅ “ဒုးသ့ၣ်နီၣ်ထီၣ်က့ၤအီၤလၢ အဘၣ်ပာ်အသးလၢပှၤအခိၣ်, ပှၤအိၣ်ဒီးအစိအကမီၤတဖၣ်အဖီလာ်, လၢအဘၣ်စူၢ်ပဒိၣ်တဖၣ်” န့ၣ်တက့ၢ်. (တံတူး ၃:၁) လၢထံကီၢ်အါဘ့ၣ်အပူၤ ပှၤမ့ၢ်သူကသံၣ်မူၤဘှီးန့ၣ် မ့ၢ်အမၤကမၣ်ထံကီၢ်အတၢ်သိၣ်တၢ်သီလီၤ. ယဟိဝၤယွၤတဲဝဲလၢ ပကဘၣ်ပာ်ကဲ ပဒိၣ်ပပှၢ်တဖၣ်အဃိ ပကဘၣ်ဒိကနၣ် အတၢ်သိၣ်တၢ်သီတဖၣ်အံၤလီၤ.—ရိမ့ၤ ၁၃:၁.
၂၆. (က) ဒ်သိး ယဟိဝၤယွၤကတူၢ်လိာ် ပတၢ်ဘူၣ်ထီၣ်ဘါထီၣ်အဂီၢ် ပကဘၣ်မၤဒ်လဲၣ်. (ခ) ပမ့ၢ်အိၣ်ကဆှဲကဆှီလၢ ကစၢ်ယွၤအမဲာ်ညါန့ၣ် ဘၣ်မနုၤအဃိ ပတဲသ့လၢ ပကအိၣ်ဒီးတၢ်အိၣ်မူလၢ အဂ့ၤကတၢၢ်လဲၣ်.
၂၆ ပမ့ၢ်အဲၣ်ဒိးကဲထီၣ် ယဟိဝၤယွၤ အတံၤသကိးန့ၣ် ဘၣ်သ့ၣ်သ့ၣ် တၢ်လၢပကဘၣ်ဆီတလဲန့ၣ် ကအိၣ်ဝဲတနီၤလီၤ. ပမ့ၢ်ဘၣ်မၤဒ်န့ၣ်န့ၣ် ပတကြၢးမၤယံာ်မၤနီၢ်ပသးဘၣ်. ပကဘၣ်ပာ်တ့ၢ်ကွံာ် လုၢ်လၢ်လၢအတကဆှီဘၣ်တခါခါန့ၣ် တမ့ၢ်တၢ်ညီလၢပဂီၢ်ဘၣ်. ဘၣ်ဆၣ်သနာ်က့ ပမၤသ့လီၤ. ဒီးယဟိဝၤယွၤအၢၣ်လီၤဝဲလၢ အဝဲကမၤစၢၤပှၤလီၤ. အဝဲတဲဝဲလၢ “ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢ ကျဲလၢနဂ့ၤလဲၤန့ၣ်လီၤ.” (ယၡါယၤ ၄၈:၁၇) အဃိ ပမ့ၢ်ဂုာ်ကျဲးစၢးလၢအဂ့ၤကတၢၢ် ဒ်သိးပကအိၣ်ကဆှဲကဆှီ ဒီးအိၣ်စီဆှံလၢ ကစၢ်ယွၤအမဲာ်ညါန့ၣ် ပနာ်သ့လၢ ပတၢ်အိၣ်မူကကဲထီၣ် တၢ်လၤကပီၤလၢ ကစၢ်ယွၤအဂီၢ်သပှၢ်ကတၢၢ်လီၤ.