တၢ်မၤလိ ၁
ယွၤအတၢ်အဲၣ်န့ၣ် ဂၢၢ်ကျၢၤဝဲထီဘိ
“တၢ်အဲၣ်ယွၤမ့ၢ်အအံၤ, လၢပတိၢ်န့ၢ်အတၢ်မၤလိာ်လီၤ. ဒီးအတၢ်မၤလိာ်န့ၣ် တကီတခဲဘၣ်လီၤ.”—၁ ယိၤဟၣ် ၅:၃.
၁, ၂. ဘၣ်မနုၤအဃိ နအဲၣ်ယဟိဝၤယွၤလဲၣ်.
မ့ၢ်နအဲၣ် ကစၢ်ယွၤဧါ. ဘၣ်သ့ၣ်သ့ၣ် ခီဖျိလၢ နအဲၣ်အီၤ ဒိၣ်မးအဃိ နဟ့ၣ်လုၢ်ထီၣ်နသးဆူ အအိၣ်ဝံၤလံ. တကးဒံးဘၣ် နကတူၢ်ဘၣ်လၢ အဝဲမ့ၢ်နတံၤသကိးလၢ အဂ့ၤကတၢၢ်တဂၤလီၤ. ဘၣ်ဆၣ် တချုးလၢ နအဲၣ်ယဟိဝၤယွၤန့ၣ် အဝဲအဲၣ်ဆိနၤလီၤ. ဒ်လံာ်စီဆှံတဲဝဲအသိး “ပအဲၣ်တၢ်ကွံတၢ်လီၤ, အဂ့ၢ်ဒ်အံၤ, အဝဲဒၣ် [ယဟိဝၤယွၤ] အဲၣ်ဆိပှၤလီၤ.”—၁ ယိၤဟၣ် ၄:၁၉.
၂ ယဟိဝၤယွၤ ပာ်ဖျါထီၣ် တၢ်အဲၣ်လၢပဖီခိၣ် လၢကျဲအကလုာ်ကလုာ်လီၤ. အဒိ အဝဲကတဲာ်ကတီၤန့ၢ်ပှၤ ဟီၣ်ခိၣ်လၢ အဃံအလၤ ဒ်သိးပကအိၣ်ကဆိးလၢ အပူၤအဂီၢ်လီၤ. (မးသဲ ၅:၄၃-၄၈; လီၣ်ဖျါ ၄:၁၁) ကစၢ်ယွၤဟ့ၣ်လီၤပှၤ တၢ်လၢပလိၣ်ဘၣ်လၢ နီၢ်ခိတခီစ့ၢ်ကီးလီၤ. အဝဲမၤစၢၤပှၤလၢ ပကဃုသ့ၣ်ညါအါထီၣ်အဂ့ၢ် ဒီးအဝဲအဲၣ်ဒိးလၢ ပကအိၣ်ဒီး တၢ်ရ့လိာ်သးဒီးအီၤ ဘူးဘူးတံၢ်တံၢ်လီၤ. ဖဲပဖးလံာ်စီဆှံအခါ လီၤဂာ်ဒ်သိး ပဒိကနၣ် ယဟိဝၤယွၤအကလုၢ်န့ၣ်လီၤ. ဒီးဖဲပဃ့ဘါထုကဖၣ်အခါ အဝဲဒိကနၣ်ပှၤလီၤ. (စံးထီၣ်ပတြၢၤ ၆၅:၂) ကစၢ်ယွၤဟ့ၣ်ပှၤအသးစီဆှံ ဒ်သိးကဟံးစုနဲၣ်ကျဲပှၤ ဒီးမၤဆူၣ်ထီၣ်ပဂံၢ်ပဘါအဂီၢ်လီၤ. (လူၤကၣ် ၁၁:၁၃) တကးဒံးဘၣ် အဝဲဆှၢလီၤအဖိခွါလၢ အလုၢ်ဒိၣ်ပှ့ၤဒိၣ်ကတၢၢ်တဂၤ ဒ်သိး ပကထူၣ်ဖျဲးထီၣ်ကွံာ်လၢ တၢ်သံဒီးတၢ်ဒဲးဘးအဂီၢ်လီၤ.—ဖး ယိၤဟၣ် ၃:၁၆; ရိမ့ၤ ၅:၈ တက့ၢ်.
၃. ဒ်သိးပတၢ်ရ့လိာ်သးဒီးကစၢ်ယွၤ ကဂၢၢ်ကျၢၤထီဘိအဂီၢ် ပကဘၣ်မၤဒ်လဲၣ်.
၃ ဆိကမိၣ်ထီၣ် နတံၤသကိးလၢ နအဲၣ်အီၤတဂၤ အဂ့ၢ်န့ၣ်တက့ၢ်. ဖဲနအိၣ်ဘၣ်မုာ်မုာ် အခါမ့ၢ်ဂ့ၤ ဖဲနဘၣ်ကီဘၣ်ခဲ အခါမ့ၢ်ဂ့ၤ အဝဲအိၣ်လၢနကပၤထီဘိလီၤ. ဘၣ်ဆၣ် ဒ်သိးနတၢ်ရ့လိာ်သးဒီးအီၤ ကဂၢၢ်ကျၢၤ ထီဘိအဂီၢ် နကဘၣ်ဂုာ်ကျဲးစၢးလီၤ. ဒ်န့ၣ်အသိး ယဟိဝၤယွၤ မ့ၢ်ပတံၤသကိးလၢ အဂ့ၤကတၢၢ်အဃိ ပအဲၣ်ဒိးဂုာ်ကျဲးစၢး အဂ့ၤကတၢၢ် ဒ်သိးပတၢ်ရ့လိာ်သး ဒီးအီၤ ကဂၢၢ်ကျၢၤဝဲ ထီဘိအဂီၢ်လီၤ. လံာ်စီဆှံ ဆီၣ်ထွဲပှၤလၢ “ဟံးဃာ်သုသးလၢ ယွၤအတၢ်အဲၣ်တၢ်ကွံအပူၤ” တက့ၢ်. (ယူဒၤ ၂၁) ပမၤကသ့ဒ်လဲၣ်. လံာ်စီဆှံတဲဘၣ်ပှၤလၢ “တၢ်အဲၣ်ယွၤမ့ၢ်အအံၤ, လၢပတိၢ်န့ၢ်အတၢ်မၤလိာ်လီၤ. ဒီးအတၢ်မၤလိာ်န့ၣ် တကီတခဲဘၣ်လီၤ.”—၁ ယိၤဟၣ် ၅:၃.
“တၢ်အဲၣ်ယွၤမ့ၢ်အအံၤ”
၄, ၅. နတၢ်အဲၣ်ယဟိဝၤယွၤန့ၣ် စးထီၣ်အသးလၢကျဲဒ်လဲၣ်.
၄ ဘၣ်ဃးဒီး “တၢ်အဲၣ်ယွၤ” န့ၣ်လံာ်စီဆှံတဲဝဲ အခီပညီဒ်လဲၣ်. ဘၣ်သ့ၣ်သ့ၣ် နကဆိကမိၣ်ထီၣ်က့ၤ ဖဲနစးထီၣ်အဲၣ် ယဟိဝၤယွၤ သီသီအခါန့ၣ်လီၤ.
ဖဲနဟ့ၣ်လုၢ်ထီၣ်နသးလၢ ယဟိဝၤယွၤအအိၣ် ဒီးဒိးဘျၢထံအခါန့ၣ် မ့ၢ်ဒၣ်နပာ်ဖျါထီၣ်လၢ နအဲၣ်အီၤဒီး နအဲၣ်ဒိးဒိကနၣ်အကလုၢ်ထီဘိလီၤ
၅ အဒိ ဖဲနမၤလိဘၣ်လၢ ယဟိဝၤယွၤအဲၣ်ဒိးလၢ နကအိၣ်မူဘၣ်လၢ ဟီၣ်ခိၣ်သီအပူၤ လီၤထူလီၤယိာ်အခါန့ၣ် မ့ၢ်နတူၢ်ဘၣ်ဒ်လဲၣ်. ဖဲန့ၣ်အခါ နသ့ၣ်ညါအါထီၣ် ဘၣ်ဃးဒီးကစၢ်ယွၤ အတၢ်တိာ်ပာ်စ့ၢ်ကီးလီၤ. ဒီးနသ့ၣ်ညါထီၣ်လၢ ယဟိဝၤယွၤဟ့ၣ်လီၤနၤ တၢ်ဟ့ၣ်လၢအလုၢ်ဒိၣ်ပှ့ၤဒိၣ်တခါ ခီဖျိလၢအဆှၢလီၤအဖိခွါဆူ ဟီၣ်ခိၣ်ချၢန့ၣ်လီၤ. (မးသဲ ၂၀:၂၈; ယိၤဟၣ် ၈:၂၉; ရိမ့ၤ ၅:၁၂, ၁၈) တၢ်ဂ့ၢ်သ့ၣ်တဖၣ်အံၤ ထုးန့ၢ်နသးအဃိ နစးထီၣ်အဲၣ်အီၤစ့ၢ်ကီးလီၤ.—ဖး ၁ ယိၤဟၣ် ၄:၉, ၁၀ တက့ၢ်.
၆. ပမ့ၢ်အဲၣ် ပှၤတဂၤဂၤန့ၣ် ပကပာ်ဖျါထီၣ်ဒ်လဲၣ်, ဒီးနတၢ်အဲၣ်ကစၢ်ယွၤန့ၣ် ထိၣ်ဟူးထိၣ်ဂဲၤထီၣ်နၤလၢ နကမၤတၢ်မနုၤလဲၣ်.
၆ ဘၣ်ဆၣ် နတူၢ်ဘၣ်ဒ်အံၤန့ၣ် တလၢပှဲၤဒံးဘၣ်. အဒိ ပမ့ၢ်အဲၣ်ပှၤတဂၤဂၤန့ၣ် တမ့ၢ်ထဲပကတဲလၢ “ယအဲၣ်နၤ” ဘၣ်. ပမ့ၢ်အဲၣ်အီၤနီၢ်ကီၢ်န့ၣ် ပကဂုာ်ကျဲးစၢး မၤသးခုအသးလီၤ. ဒ်န့ၣ်အသိး ခီဖျိလၢ နအဲၣ်ယဟိဝၤယွၤ အဃိ နဆီတလဲနတၢ်အိၣ်မူ ဒ်သိးကမၤသးခု ယဟိဝၤယွၤအဂီၢ်လီၤ. ဖဲနတၢ်အဲၣ်ယွၤဒိၣ်ထီၣ်အခါ နကဟ့ၣ်လုၢ်ထီၣ်နသးဆူအအိၣ် ဒီးဒိးဘျၢထံလီၤ. ဒီးဖဲနဟ့ၣ်လုၢ်ထီၣ်နသးလၢ ယဟိဝၤယွၤအအိၣ်အခါ မ့ၢ်ဒၣ်နအၢၣ်လီၤအီၤလၢ နကမၤအတၢ်မၤ လီၤထူလီၤယိာ်န့ၣ်လီၤ. (ဖး ရိမ့ၤ ၁၄:၇, ၈ တက့ၢ်.) နမၤလၢပှဲၤ နတၢ်အၢၣ်လီၤအံၤ ကသ့လၢကျဲဒ်လဲၣ်.
“ပတိၢ်န့ၢ်အတၢ်မၤလိာ်”
၇. ပမ့ၢ်အဲၣ် ယဟိဝၤယွၤန့ၣ် ပကမၤမနုၤလဲၣ်, ဒီးယဟိဝၤယွၤ အတၢ်မၤလိာ်တနီၤန့ၣ် မ့ၢ်မနုၤလဲၣ်.
၇ ခီဖျိ ပအဲၣ်ယဟိဝၤယွၤ အဃိ “ပတိၢ်န့ၢ်အတၢ်မၤလိာ်” လီၤ. ပတိၢ်န့ၢ်အတၢ်မၤလိာ်န့ၣ် အဲၣ်ဒိးတဲဝဲဒ်လဲၣ်. အဲၣ်ဒိးတဲဝဲ ပဒိကနၣ် အကလုၢ်လီၤ. လံာ်စီဆှံ ပာ်ဖျါထီၣ်ဝဲ ယဟိဝၤယွၤ အတၢ်မၤလိာ်တဖၣ်လီၤ. အဒိ လံာ်စီဆှံပာ်ဖျါထီၣ်ဝဲလၢ ပတဘၣ်အီမူၤသံး, ဟုၣ်တၢ်, လံၣ်တၢ်လီတၢ်, မၤကမၣ်မုၣ်ကမၣ်ခွါ မ့တမ့ၢ် ဘါတၢ်ဂီၤတၢ်ဖှီၣ်ဘၣ်.—၁ ကရံၣ်သူး ၅:၁၁; ၆:၁၈; ၁၀:၁၄; အ့းဖ့းစူး ၄:၂၈; ကလီးစဲ ၃:၉.
၈, ၉. လံာ်စီဆှံ မ့ၢ်တပာ်ဖျါထီၣ် တၢ်သိၣ်တၢ်သီ လီၤတံၢ်လီၤဆဲးသနာ်က့ ပမၤတၢ်ဘၣ်ယွၤအသးကသ့ဒ်လဲၣ်, ဟ့ၣ်တၢ်အဒိတက့ၢ်.
၈ ဒ်သိး ပကမၤတၢ်ဘၣ် ယဟိဝၤယွၤ အသးအဂီၢ် ထဲပမၤထွဲ အတၢ်မၤလိာ်န့ၣ် တလၢပှဲၤဒံးဘၣ်. ယဟိဝၤယွၤ တဟ့ၣ်လီၤပှၤ တၢ်မၤလိာ်လီၤတံၢ်လီၤဆဲးလၢ အကဖီၣ်ဃံး ပတၢ်အိၣ်မူ ကိးသနၢၣ်ဒဲး အဂီၢ်ဘၣ်. အဃိ ဖဲလံာ်စီဆှံ တပာ်ဖျါထီၣ် တၢ်သိၣ်တၢ်သီ လီၤတံၢ်လီၤဆဲးအခါ ပဆၢတဲာ်တၢ်လၢအဘၣ် ကသ့ဒ်လဲၣ်. (အ့းဖ့းစူး ၅:၁၇) လၢလံာ်စီဆှံပူၤန့ၣ် ပထံၣ်ဘၣ် တၢ်ဟံးစုနဲၣ်ကျဲလၢ ကမၤစၢၤပှၤဒ်သိး ပကသ့ၣ်ညါ ယဟိဝၤယွၤ အတၢ်ထံၣ်အဂီၢ်လီၤ. ဒီးဖဲပဖး လံာ်စီဆှံအခါ ပကနၢ်ပၢၢ်ထီၣ်လၢ ယဟိဝၤယွၤ မ့ၢ်ပှၤဒ်လဲၣ် တဂၤလဲၣ်န့ၣ်လီၤ. တကးဒံးဘၣ် ပနၢ်ပၢၢ်ထီၣ် ကစၢ်ယွၤ အတၢ်ဆိကမိၣ်, တၢ်လၢအဝဲအဲၣ်ဝဲ ဒီးတၢ်လၢအဝဲသးဟ့ဝဲတဖၣ်လီၤ.—ဖး စံးထီၣ်ပတြၢၤ ၉၇:၁၀ တက့ၢ်; ကတိၤဒိ ၆:၁၆-၁၉; ကွၢ်တၢ်ဂ့ၢ် ၁ လၢလံာ်အကတၢၢ်တက့ၢ်.
၉ အဒိ လၢတၢ်ဂီၤမူအပူၤမ့ၢ်ဂ့ၤ လၢအ့ထၢၣ်နဲးအပူၤမ့ၢ်ဂ့ၤ တၢ်လၢပကွၢ်သ့ ဒီးတၢ်လၢပကွၢ် တသ့ဘၣ်တဖၣ်န့ၣ် ယဟိဝၤယွၤတပာ်လီၤ တၢ်သိၣ်တၢ်သီ လီၤတံၢ်လီၤဆဲးဘၣ်. ဘၣ်ဆၣ် ဒ်သိးပဆၢတဲာ်တၢ်လၢ အဘၣ်ကသ့အဂီၢ် အဝဲဟ့ၣ်လီၤပှၤ တၢ်ဟံးစုနဲၣ်ကျဲတဖၣ်လီၤ. မုၢ်မဆါတနံၤအံၤ တၢ်ဂီၤမူဒီး အ့ထၢၣ်နဲးန့ၣ် ပှဲၤဝဲဒီးတၢ်မၤ ကမၣ်မုၣ်ကမၣ်ခွါ ဒီးတၢ်မၤဆူၣ်မၤစိးန့ၣ်လီၤ. လံာ်စီဆှံတဲဘၣ်ပှၤလၢ ယဟိဝၤယွၤ “သးဟ့ပှၤလၢအအဲၣ် တၢ်စုဆူၣ်ခီၣ်တကး” လီၤ. ဒီးတဲစ့ၢ်ကီးဝဲလၢ “ပှၤမၤကမၣ်ပိာ်မုၣ်ပိာ်မၢၤ . . . န့ၣ်, ယွၤကစံၣ်ညီၣ်အီၤလီၤ.” (စံးထီၣ်ပတြၢၤ ၁၁:၅, ခ့ခါစှီၤကျိာ်; ဧ့ၤဘြံၤ ၁၃:၄) ဒ်သိးပဆၢတဲာ်တၢ် လၢအဘၣ်ကသ့အဂီၢ် လံာ်စီဆှံ အတၢ်ဟံးစုနဲၣ်ကျဲအံၤ မၤစၢၤပှၤကသ့ဒ်လဲၣ်. ပမ့ၢ်သ့ၣ်ညါလၢ ယဟိဝၤယွၤသးဟ့ မ့တမ့ၢ် သးဘၣ်အၢတၢ်တမံၤမံၤန့ၣ် ပတကြၢးကွၢ်အီၤဘၣ်.
၁၀, ၁၁. ဘၣ်မနုၤအဃိ ပဒိကနၣ် ယဟိဝၤယွၤအကလုၢ်လဲၣ်.
၁၀ ဘၣ်မနုၤအဃိ ပဒိကနၣ်ယဟိဝၤယွၤ အကလုၢ်လဲၣ်. ပဃုထၢလၢ ပကမၤထွဲယွၤ အတၢ်မၤလိာ်န့ၣ် တမ့ၢ်ထဲလၢ ပအဲၣ်ဒိးပူၤဖျဲးလၢ တၢ်စံၣ်ညီၣ်ဒီး ဟးဆှဲး တၢ်လီၤဘၣ်ယိၣ်လၢ အကဟဲကဲထီၣ်အသး ဒီးပှၤအဃိဘၣ်. (ကလၤတံ ၆:၇) ပဒိကနၣ် ယဟိဝၤယွၤ အကလုၢ်န့ၣ် မ့ၢ်လၢပအဲၣ်အီၤအဃိလီၤ. ဒ်ဖိသၣ်တဂၤ အဲၣ်ဒိးမၤသးခု အပၢ်အသးအသိး ပဝဲစ့ၢ်ကီး ပအဲၣ်ဒိးမၤသးခု ပပၢ်အိၣ်လၢမူခိၣ် ယဟိဝၤယွၤ အသးန့ၣ်လီၤ. ပမ့ၢ်သ့ၣ်ညါလၢ ပအိၣ်မူဒ် တၢ်ဘၣ်ယွၤ အသးအသိးန့ၣ် ပအိၣ်ဒီး တၢ်သူၣ်မံသးမုာ် ဒီးတၢ်သးခုအဒိၣ်ကတၢၢ်လီၤ.—စံးထီၣ်ပတြၢၤ ၅:၁၂; ကတိၤဒိ ၁၂:၂; ကွၢ်တၢ်ဂ့ၢ် ၂ လၢလံာ်အကတၢၢ်တက့ၢ်.
၁၁ ပဒိကနၣ် ကစၢ်ယွၤအကလုၢ်န့ၣ် တမ့ၢ်လၢ တၢ်မၢဆူၣ်အဃိဘၣ်. ပဃုထၢလၢ ပကဒိကနၣ်ယွၤ အတၢ်သိၣ်တၢ်သီတနီၤ, တဒိကနၣ်အတၢ်သိၣ်တၢ်သီတနီၤန့ၣ် တသ့ဘၣ်. ဒီးပတဘၣ်ဒိကနၣ် ထဲတၢ်သိၣ်တၢ်သီလၢ ပမၤထွဲအီၤညီတဖၣ်ဘၣ်. (၅ မိၤၡ့ ၁၂:၃၂) လၢတၢ်န့ၣ်အလီၢ် ပကဘၣ်ဒိကနၣ် ကစၢ်ယွၤအကလုၢ်လၢ တၢ်ခဲလၢာ်အပူၤလီၤ. ပတူၢ်ဘၣ်ဒ် ပှၤကွဲးထါစံးထီၣ်ပတြၢၤအသိး, အဝဲတဲဝဲလၢ “ယကသူၣ်ဖှံသးညီလၢ နတၢ်မၤလိာ်လၢ ယအဲၣ်အီၤအပူၤန့ၣ်လီၤ.” (စံးထီၣ်ပတြၢၤ ၁၁၉:၄၇; ရိမ့ၤ ၆:၁၇) ပအဲၣ်ဒိးလီၤဂာ် စီၤနိအၤဒီးပာ်ဖျါထီၣ် ပတၢ်အဲၣ်ယဟိဝၤယွၤန့ၣ်လီၤ. လံာ်စီဆှံတဲဝဲလၢ ကယဲၢ်တၢ်လၢ ယဟိဝၤယွၤ မၤလိာ်စီၤနိအၤန့ၣ် စီၤနိအၤ “မၤဝဲဒ်န့ၣ်အသိးလီၤ.” (၁ မိၤၡ့ ၆:၂၂) မ့ၢ်နအဲၣ်ဒိးလၢ ယဟိဝၤယွၤကထံၣ်နၤ ဒ်စီၤနိအၤအသိးစ့ၢ်ကီးဧါ.
၁၂. ပမၤသးခု ယဟိဝၤယွၤအသး ကသ့ဒ်လဲၣ်.
၁၂ ပမ့ၢ်ဒိကနၣ် ယဟိဝၤယွၤ အကလုၢ်န့ၣ် အဝဲကတူၢ်ဘၣ်ဝဲ ဒ်လဲၣ်. လံာ်စီဆှံတဲဝဲလၢ ပမ့ၢ်မၤဒ်န့ၣ်န့ၣ် မ့ၢ်ပမၤ ‘ခုအသး’ လီၤ. (ကတိၤဒိ ၁၁:၂၀; ၂၇:၁၁) ပတၢ်ဒိကနၣ်န့ၣ် မၤသးခုတၢ်ဘၣ်တ့ကစၢ် ယဟိဝၤယွၤအသးသ့ဝဲအနီၢ်ကီၢ်ဧါ. သ့ဝဲလီၤ. ဘၣ်ဆၣ် အဝဲတမၢဆူၣ်ပှၤလၢ ပကဒိကနၣ်အကလုၢ်ဘၣ်. အဝဲတ့လီၤပှၤ ဃုာ်ဒီးတၢ်သဘျ့လီၤ. အဃိ ပကမၤတၢ်ဂ့ၤဧါ, တၢ်အၢဧါန့ၣ် ပဃုထၢလၢ ပနီၢ်ကစၢ်သ့ဝဲလီၤ. ယဟိဝၤယွၤ အဲၣ်ဒိးလၢ ပကဆၢတဲာ်တၢ်လၢအဘၣ် ဒီးဒိကနၣ်အကလုၢ် ခီဖျိပအဲၣ်အီၤလၢ ပသးဒီဖျၢၣ်အဃိလီၤ. ပမ့ၢ်မၤဒ်န့ၣ်န့ၣ် မ့ၢ်ဒၣ်ပဃုထၢတၢ်အိၣ်မူလၢ အဂ့ၤကတၢၢ်န့ၣ်လီၤ.—၅ မိၤၡ့ ၃၀:၁၅, ၁၆, ၁၉, ၂၀; ကွၢ်တၢ်ဂ့ၢ် ၃ လၢလံာ်အကတၢၢ်တက့ၢ်.
“အတၢ်မၤလိာ်န့ၣ် တကီတခဲဘၣ်”
၁၃, ၁၄. ယွၤအတၢ်မၤလိာ်တဖၣ် တဃံးတလၢ လၢပဂီၢ်န့ၣ် ပသ့ၣ်ညါဘၣ်ဒ်လဲၣ်, ဟ့ၣ်တၢ်အဒိတက့ၢ်.
၁၃ ယဟိဝၤယွၤ အတၢ်သိၣ်တၢ်သီတဖၣ်န့ၣ် ကဲထီၣ်တၢ်ဝံဃၢလၢပဂီၢ်ဧါ. လံာ်စီဆှံတဲဝဲလၢယွၤ “အတၢ်မၤလိာ်န့ၣ် တကီတခဲဘၣ်.” (၁ ယိၤဟၣ် ၅:၃) အဃိ ယဟိဝၤယွၤ အတၢ်သိၣ်တၢ်သီန့ၣ် တဃံးတလၢဘၣ်. ဒီးအဝဲတမုၢ်လၢ်တၢ်အါတလၢ လၢပအိၣ်စ့ၢ်ကီးဘၣ်.
၁၄ ပကကွၢ်သကိးတၢ်အဒိတခါလီၤ. နသကိးတဂၤ ကသုးဟံၣ်အဃိ အဝဲဃ့နၤတၢ်မၤစၢၤလီၤ. နသကိးတဂၤအံၤ အတၢ်ဘံၣ်တၢ်ဘိၣ်အိၣ်ဝဲအါမးလီၤ. တၢ်ဘိၣ်တနီၤနီၤန့ၣ် ဖှံဝဲအဃိပှၤစိာ်အီၤတဂၤန့ၢ်ဝဲ, ဒီးအဂၤတနီၤနီၤန့ၣ်ဃၢဝဲအဃိ ပှၤခံဂၤကဘၣ်စိာ်ဝဲလီၤ. ဆိကမိၣ်ကွၢ် မ့ၢ်အဝဲကမၢ နစိာ်တၢ်ဘံၣ်တၢ်ဘိၣ်လၢအဃၢတလၢ လၢနဂီၢ်ဧါ. မ့ၢ်လၢအဝဲတအဲၣ်ဒိးလၢ နကဘၣ်ဒိဘၣ်ထံးအဃိ အဝဲတမၢနမၤဒ်န့ၣ်ဘၣ်. ဒ်န့ၣ်အသိး ယဟိဝၤယွၤတပာ်လီၤန့ၢ်ပှၤ တၢ်သိၣ်တၢ်သီလၢအကီတလၢ လၢပကဘၣ်မၤထွဲအီၤအဂီၢ်ဘၣ်. (၅ မိၤၡ့ ၃၀:၁၁-၁၄) ယဟိဝၤယွၤ နၢ်ပၢၢ်ပတၢ်အိၣ်သး လီၤတံၢ်လီၤဆဲးဒီး “သ့ၣ်နီၣ်ထီၣ်က့ၤဝဲလၢ ပမ့ၢ်ဟီၣ်ခိၣ်အကမူၣ်လီၤ.”—စံးထီၣ်ပတြၢၤ ၁၀၃:၁၄.
၁၅. ဘၣ်မနုၤအဃိ ပနာ်သ့လၢ ယဟိဝၤယွၤ အတၢ်မၤလိာ်တဖၣ်န့ၣ် မ့ၢ်ဝဲလၢပတၢ်ဂ့ၤအဂီၢ်လဲၣ်.
၁၅ စီၤမိၤၡ့တဲဘၣ် ပှၤအံၣ်စရ့လးဖိလၢ ယဟိဝၤယွၤ အတၢ်မၤလိာ်တဖၣ်န့ၣ် မ့ၢ်ဝဲလၢ အဝဲသ့ၣ်အ “တၢ်ဂ့ၤအဂီၢ်” လီၤ. ဒီးအဝဲသ့ၣ် မ့ၢ်မၤထွဲ တၢ်မၤလိာ်တဖၣ်အံၤန့ၣ် ကမၤစၢၤအဝဲသ့ၣ် ဒ်သိးအကဆဲးအိၣ် “မူဒံး” အဂီၢ်လီၤ. (၅ မိၤၡ့ ၅:၂၈-၃၃; ၆:၂၄) မုၢ်မဆါ တနံၤညါအံၤစ့ၢ်ကီး ကယဲၢ်တၢ်လၢ ယဟိဝၤယွၤ မၢပမၤတဖၣ်န့ၣ် ကဲဘျုးလၢ ပတၢ်အိၣ်မူအဂီၢ်လီၤ. (ဖး ယၡါယၤ ၄၈:၁၇ တက့ၢ်.) ပပၢ်ယဟိဝၤယွၤ သ့ၣ်ညါတၢ်လၢအဂ့ၤကတၢၢ် လၢပဂီၢ်လီၤ. (ရိမ့ၤ ၁၁:၃၃) လံာ်စီဆှံ တဲဘၣ်ပှၤလၢ “ယွၤမ့ၢ်တၢ်အဲၣ်တၢ်ကွံလီၤ.” (၁ ယိၤဟၣ် ၄:၈) ကယဲၢ်တၢ်လၢ ယဟိဝၤယွၤ တဲဒီးမၤဝဲခဲလၢာ်န့ၣ် မ့ၢ်လၢတၢ်အဲၣ်တၢ်ကွံ ထိၣ်ဟူးထိၣ်ဂဲၤထီၣ်အီၤအဃိလီၤ.
၁၆. ပတလၢတပှဲၤဘၣ် ဒီးပအိၣ်မူဘၣ်လၢ ပှၤအၢပှၤသီတဖၣ်အကျါသနာ်က့ ပဒိကနၣ်ကစၢ်ယွၤအကလုၢ် သ့ဒ်လဲၣ်.
၁၆ ခီဖျိလၢ မုၣ်ကီၤလံၢ်ပၢဟီၣ်ခိၣ်အဃိ ပအိၣ်မူဘၣ်လၢ ပှၤအၢပှၤသီတဖၣ်အကျါလီၤ. တကးဒံးဘၣ် မုၣ်ကီၤလံၢ် ဂုာ်ကျဲးစၢးလ့ပစီပှၤဒ်သိး ပကမၤတၢ်အၢတၢ်သီအဂီၢ်လီၤ. (၁ ယိၤဟၣ် ၅:၁၉) ဒီးမ့ၢ်လၢပတလၢတပှဲၤဘၣ်အဃိ ထီဘိန့ၣ်ပကဘၣ်တြီဆၢ ပတၢ်မိၣ်န့ၢ်သးလီလၢ အတကြၢးတဘၣ်တဖၣ်န့ၣ်လီၤ. လၢတၢ်န့ၣ်အဃိ ပကဒိကနၣ်ကစၢ်ယွၤအကလုၢ်န့ၣ် တညီလၢပဂီၢ်ထီဘိဘၣ်. (ရိမ့ၤ ၇:၂၁-၂၅) ဘၣ်ဆၣ် ပတၢ်အဲၣ်ယဟိဝၤယွၤန့ၣ် ဟ့ၣ်ဆူၣ်ထီၣ်ပဂံၢ်ပဘါလၢ ပကမၤတၢ်ဂ့ၤအဂီၢ်လီၤ. ဖဲပဂုာ်ကျဲးစၢး ဒိကနၣ်အကလုၢ်အခါ အဝဲထံၣ်ဝဲ ဒီးအဝဲကဟ့ၣ်ပှၤအသးစီဆှံ ဒ်သိးကမၤစၢၤပှၤအဂီၢ်လီၤ. (၁ ၡမူၤအ့လး ၁၅:၂၂, ၂၃; မၤတၢ် ၅:၃၂) သးစီဆှံ ဒုးအိၣ်ထီၣ်ပတၢ်ဂ့ၤတၢ်ဝါတဖၣ်လၢ အကဲထီၣ်တၢ်မၤစၢၤဒ်သိး ပကဒိကနၣ် ကစၢ်ယွၤအကလုၢ်န့ၣ်လီၤ.—ကလၤတံ ၅:၂၂, ၂၃.
၁၇, ၁၈. (က) လၢလံာ်အံၤအပူၤ ပကဃုသ့ၣ်ညါ တၢ်ဂ့ၢ်မနုၤလဲၣ်. (ခ) တၢ်မၤလိလၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.
၁၇ လံာ်တဘ့ၣ်အံၤ ကမၤစၢၤပှၤဒ်သိး ပအိၣ်မူဒ် တၢ်ဘၣ်ယဟိဝၤယွၤအသး ကသ့အဂီၢ်န့ၣ်လီၤ. တကးဒံးဘၣ် ပာ်ဖျါထီၣ်ဝဲ လံာ်စီဆှံ အတၢ်ဟံးစုနဲၣ်ကျဲဒီး တၢ်ဘျၢတဖၣ် စ့ၢ်ကီးလီၤ. ဘၣ်ဆၣ် ပကဘၣ်သ့ၣ်နီၣ်ထီၣ်က့ၤလၢ ယဟိဝၤယွၤ တမၢဆူၣ်ပှၤလၢ ပကဒိကနၣ် အကလုၢ်ဘၣ်. ပမ့ၢ်ဃုထၢလၢ ပကဒိကနၣ်ယွၤအကလုၢ်န့ၣ် ပတၢ်အိၣ်မူကဂ့ၤထီၣ်ဝဲ ဒီးပကအိၣ်ဒီး တၢ်မုၢ်လၢ်လၢအဂ့ၤကတၢၢ်လၢ ခါဆူညါအဂီၢ်န့ၣ်လီၤ. ခဲအံၤပမ့ၢ်ဒိကနၣ် ကစၢ်ယွၤအကလုၢ်န့ၣ် မ့ၢ်ဒၣ်ပပာ်ဖျါထီၣ်န့ၢ်အီၤလၢ ပအဲၣ်အီၤဒိၣ်မးန့ၣ်လီၤ.—ကွၢ်တၢ်ဂ့ၢ် ၄ လၢလံာ်အကတၢၢ်တက့ၢ်.
၁၈ ဒ်သိးပနီၤဖး တၢ်ဂ့ၤဒီးတၢ်အၢ ကသ့အဂီၢ် ယဟိဝၤယွၤဟ့ၣ်လီၤပှၤ သးလၢအသ့ၣ်ညါဒၣ်တၢ်လီၤ. ပမ့ၢ်သိၣ်လိ ပသးလၢအသ့ၣ်ညါဒၣ်တၢ်န့ၣ် ကမၤစၢၤပှၤဒ်သိး “ပတိၢ်န့ၢ်အတၢ်မၤလိာ်” ကသ့အဂီၢ်လီၤ. မ့မ့ၢ်ဒ်န့ၣ်န့ၣ် ပသးလၢအသ့ၣ်ညါဒၣ်တၢ်န့ၣ် မ့ၢ်တၢ်မနုၤလဲၣ်, ဒီးပသိၣ်လိအီၤကသ့ဒ်လဲၣ်. တၢ်မၤလိလၢခံတခါ ကပာ်ဖျါထီၣ်န့ၢ်ပှၤလီၤ.
တၢ်ဂ့ၤအဂၤလၢ နကဘၣ်သး
တၢးထီခိးတၢ်
မ့ၢ်ပမၤ တၢ်ဘၣ်ယွၤအသး သ့သပှၢ်တၢၢ်ဧါ
တၢ်စံးဆၢန့ၣ် ပထံၣ်ဘၣ်အီၤသ့ လၢစီၤယိၤဘး, စီၤလိာ် ဒီးစီၤဒၤဝံး အတၢ်အိၣ်မူ, အဝဲသ့ၣ်ကိးဂၤဒဲး မၤကမၣ်ဘၣ်တၢ်ကမၣ်ဖးဒိၣ်န့ၣ်လီၤ.
အိၣ်မူမၤထွဲ လံာ်စီဆှံအတၢ်ဟံးစုနဲၣ်ကျဲ
ယဟိဝၤယွၤ ကမၤစၢၤနၤ
နကမၤ ကစၢ်ယွၤအတၢ်မၤအဂီၢ် တလိၣ်လၢ နကဲထီၣ်ပှၤလၢပှၤပှဲၤဘၣ်. အဝဲအဲၣ်ဒိးလၢ နကမၤနၢၤတၢ် ဒီးကဆီၣ်ထွဲမၤစၢၤနၤ.
