တၢ်မၤလိ ၁၇
အိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံအပူၤ
“သူၣ်လီၤသုသးလၢ သုတၢ်နာ်စီဆှံကတၢၢ်အဖီခိၣ် . . . ဟံးဃာ်သုသးလၢ ယွၤအတၢ်အဲၣ်တၢ်ကွံအပူၤ” တက့ၢ်.—ယူဒၤ ၂၀, ၂၁.
၁, ၂. ဒ်သိး ပအိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံအပူၤ ကသ့အဂီၢ် ပကဘၣ်မၤဒ်လဲၣ်.
ပဝဲခဲလၢာ် ပအဲၣ်ဒိးအိၣ်ဆူၣ်အိၣ်ချ့လီၤ. လၢတၢ်န့ၣ်အဃိ ပအီၣ်တၢ်အီၣ်လၢ အကဲဂံၢ်ကဲဘါ, ပမၤတၢ်ဟူးတၢ်ဂဲၤ ဒီးကွၢ်ထွဲလီၤပနီၢ်ကစၢ်ဂ့ၤဂ့ၤလီၤ. ဒ်သိးပကမၤဒ်အံၤအဂီၢ် ပကဘၣ်ထဲးဂံၢ်ထဲးဘါ သနာ်က့ ပမ့ၢ်တဟ့ၣ်အၡူန့ၣ် ပကသးခု ဒီးပတၢ်အိၣ်ဆူၣ်အိၣ်ချ့ ကဂ့ၤထီၣ်ဝဲလီၤ. ဘၣ်ဆၣ် ပတဘၣ်မၤဆူၣ်ထီၣ် ပဂံၢ်ဘါထဲလၢနီၢ်ခိတကပၤဘၣ်.
၂ ပစးထီၣ်ဃုသ့ၣ်ညါ ယဟိဝၤယွၤအဂ့ၢ်န့ၣ် ဂ့ၤဝဲလီၤ. ဘၣ်ဆၣ် ပကဘၣ်မၤဂ့ၤထီၣ် ပတၢ်ရ့လိာ်သးဒီးအီၤထီဘိလီၤ. စီၤယူဒၤဟ့ၣ်ဂံၢ်ဟ့ၣ်ဘါ ခရံာ်ဖိတဖၣ်လၢ “ဟံးဃာ်သုသးလၢ ယွၤအတၢ်အဲၣ်တၢ်ကွံအပူၤ” တက့ၢ်. အဝဲသ့ၣ်မၤဝဲကသ့ဒ်လဲၣ်. စီၤယူဒၤတဲဖျါထီၣ်ဝဲလၢ အဝဲသ့ၣ်ကဘၣ် ‘သူၣ်လီၤအသးလၢအတၢ်နာ်စီဆှံကတၢၢ်အဖီခိၣ်’ လီၤ. (ယူဒၤ ၂၀, ၂၁) ပဝဲစ့ၢ်ကီး ပမၤဂၢၢ်ကျၢၤထီၣ် ပတၢ်နာ်ကသ့ဒ်လဲၣ်.
မၤဒိၣ်ထီၣ်နတၢ်နာ်
၃-၅. (က) ယဟိဝၤယွၤ အတၢ်သိၣ်တၢ်သီတဖၣ်န့ၣ် မုၣ်ကီၤလံၢ်အဲၣ်ဒိးလၢ နကထံၣ်အီၤဒ်လဲၣ်. (ခ) ယဟိဝၤယွၤ အတၢ်သိၣ်တၢ်သီဒီး အတၢ်ဟံးစုနဲၣ်ကျဲတဖၣ်န့ၣ် နထံၣ်အီၤဒ်လဲၣ်.
၃ အဆိကတၢၢ်န့ၣ် နကဘၣ်နာ်လၢ ယဟိဝၤယွၤအတၢ်သိၣ်တၢ်သီန့ၣ် မ့ၢ်တၢ်လၢအဂ့ၤကတၢၢ် လၢနဂီၢ်လီၤ. မုၣ်ကီၤလံၢ်အဲၣ်ဒိးလၢ နကဆိကမိၣ်လၢ ကစၢ်ယွၤအတၢ်သိၣ်တၢ်သီတဖၣ်န့ၣ် ကီခဲဝဲဒိၣ်မးအဃိ နအိၣ်မူမၤထွဲအီၤတန့ၢ်ဘၣ်. တကးဒံးဘၣ် အဝဲအဲၣ်ဒိးဒုးဆိကမိၣ်နၤလၢ နမ့ၢ်ပာ်ပနီၣ် တၢ်ဂ့ၤဒီးတၢ်အၢ လၢနနီၢ်ကစၢ်န့ၣ် နကသးခုဒိၣ်ကတၢၢ်လီၤ. မုၣ်ကီၤလံၢ် လီန့ၢ်နီၢ်အံၣ်အု လၢကျဲဒ်အံၤလီၤ. (၁ မိၤၡ့ ၃:၁-၆) စးထီၣ်ဖဲန့ၣ်အဆၢကတီၢ် တုၤလီၤလၢပစိၤခဲအံၤန့ၣ် မုၣ်ကီၤလံၢ် ဆဲးဂုာ်ကျဲးစၢး ကွဲန့ၢ်လွဲန့ၢ်ပှၤဂၤလၢကျဲဒ်အံၤလီၤ.
၄ တၢ်လၢမုၣ်ကီၤလံၢ်တဲဝဲန့ၣ် မ့ၢ်အဘၣ်စ့ၢ်ကီးဧါ. မ့ၢ်ယဟိဝၤယွၤအတၢ်သိၣ်တၢ်သီန့ၣ် ဃံးတလၢဧါ. တဃံးတလၢဘၣ်. အဒိ နလဲၤဟးလိာ်ကွဲလၢ ဖီကရၢၢ်ဃံလၤတကရၢၢ်အပူၤ ဒီးနထံၣ်ဘၣ်လၢ ဖီကရၢၢ်အံၤဘၣ်တၢ်ကရၢၢ်ဃာ်အီၤလၢပျံၤထးလီၤ. ဒီးနထံၣ်ဘၣ်လၢဖီကရၢၢ်အချၢန့ၣ် ဃံလၤဝဲဒိၣ်မးလီၤ. အဃိ နကဆိကမိၣ်ဘၣ်လၢ ပှၤတကြၢးကရၢၢ်ဃာ် ဖီကရၢၢ်အံၤလၢပျံၤထးဘၣ်. ဘၣ်ဆၣ် ဖဲန့ၣ်အခါ လၢကရၢၢ်ချၢန့ၣ် နနၢ်ဟူဘၣ်ခ့ယုၢ်အၢသံတဒု ကညီၤတၢ်န့ၣ်လီၤ. တဘျီအံၤ နသ့ၣ်ညါဘၣ်လၢ တၢ်ကရၢၢ်ဃာ်ဖီကရၢၢ်လၢပျံၤထးအံၤန့ၣ် ကဲထီၣ်တၢ်ဒီသဒၢလၢနဂီၢ်အဃိ နကသးခုဒိၣ်မးလီၤ. ယဟိဝၤယွၤအတၢ်သိၣ်တၢ်သီတဖၣ်န့ၣ် လီၤဂာ်ဒီးပျံၤထးအံၤဒီး မ့မ့ၢ်ခ့ယုၢ်န့ၣ် အဲၣ်ဒိးတဲဝဲ မုၣ်ကီၤလံၢ်လီၤ. ကစၢ်ယွၤအကလုၢ်ကထါဟ့ၣ်ပလီၢ်ပှၤလၢ “ကီၤသုသးတက့ၢ်. ဆိးသီတက့ၢ်. အဂ့ၢ်ဒ်အံၤ, ဒ်ခ့ယုၢ်ကညီၤရုၢ်ရုၢ်အသိးန့ၣ်, သုဒုၣ်သုဒါမုၣ်ကီၤလံၢ်ဟးဝ့ၤဝီၤဃုပှၤလၢ အကယူၢ်လီၤဝဲလီၤ.”—၁ ပ့းတရူး ၅:၈.
၅ ယဟိဝၤယွၤအဲၣ်ဒိးလၢ ပကအိၣ်မူဘၣ်လၢ အဂ့ၤကတၢၢ်လီၤ. အဝဲတအဲၣ်ဒိးလၢ မုၣ်ကီၤလံၢ် ကကွဲန့ၢ်လွဲန့ၢ်ပှၤဘၣ်. လၢတၢ်န့ၣ်အဃိ အဝဲဟ့ၣ်လီၤပှၤ တၢ်ဟံးစုနဲၣ်ကျဲဒီး တၢ်သိၣ်တၢ်သီတဖၣ် ဒ်သိးကဒီသဒၢပှၤ ဒီးပကအိၣ်မူဘၣ်ပှဲၤဒီး တၢ်သးခုအဂီၢ်လီၤ. (အ့းဖ့းစူး ၆:၁၁) စီၤယၤကိာ်ကွဲးဝဲလၢ “ပှၤလၢအကွၢ်ထံကွၢ်ဆး တၢ်သိၣ်တၢ်သီအလၢအပှဲၤ ဘၣ်ဃးဒီးတၢ်ထူၣ်ဖျဲး, ဒီးအိၣ်ဝဲဆိးဝဲလၢအပူၤန့ၣ် . . . ကဘၣ်တၢ်ဆိၣ်ဂ့ၤလၢ အမၤတၢ်အပူၤလီၤ.”—ယၤကိာ် ၁:၂၅.
၆. ဒ်သိးပကသ့ၣ်ညါလၢ ကစၢ်ယွၤအတၢ်သိၣ်တၢ်သီ မ့ၢ်တၢ်လၢအဂ့ၤကတၢၢ်လၢပဂီၢ်န့ၣ် ပကဘၣ်ဆိကမိၣ် တၢ်ဂ့ၢ်မနုၤလဲၣ်.
၆ ပမ့ၢ်အိၣ်မူမၤထွဲ ယဟိဝၤယွၤ အတၢ်ဟံးစုနဲၣ်ကျဲန့ၣ် ပတၢ်အိၣ်မူကဂ့ၤထီၣ် ဒီးပတၢ်ရ့လိာ်သးဒီးအီၤ ကဘူးထီၣ်စ့ၢ်ကီးလီၤ. အဒိ ယဟိဝၤယွၤမၢ ပဃ့ထုကဖၣ်ဆူအအိၣ်ထီဘိ, ဒီးပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ်အဘျုးလီၤ. (မးသဲ ၆:၅-၈; ၁ သ့းစၤလနံ ၅:၁၇) အဂၤတမံၤန့ၣ် ယဟိဝၤယွၤမၤလိာ်ပှၤလၢ ပကထီၣ်တၢ်အိၣ်ဖှိၣ် ဒ်သိးပကဘူၣ်ထီၣ်ဘါထီၣ်အီၤ ဒီးပကဟ့ၣ်ဂံၢ်ဟ့ၣ်ဘါလိာ်သးအဂီၢ်လီၤ. တကးဒံးဘၣ် ကစၢ်ယွၤမၤလိာ်စ့ၢ်ကီးပှၤလၢ ပကဂုာ်ကျဲးစၢးလၢအဂ့ၤကတၢၢ်လၢ တၢ်စံၣ်တဲၤတဲလီၤတၢ်မၤအဂီၢ်န့ၣ်လီၤ. ပမ့ၢ်မၤထွဲ ယွၤအတၢ်ဟံးစုနဲၣ်ကျဲတဖၣ်အံၤန့ၣ် ပကသးခုလီၤ. (မးသဲ ၂၈:၁၉, ၂၀; ကလၤတံ ၆:၂; ဧ့ၤဘြံၤ ၁၀:၂၄, ၂၅) ပမ့ၢ်ဆိကမိၣ်ကွၢ်န့ၣ် ခီဖျိလၢ ပဃ့ထုကဖၣ်, ထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ် ဒ်ယဟိဝၤယွၤမၤလိာ်ပှၤအသိးအဃိ ကဲထီၣ်တၢ်မၤစၢၤဒ်သိး ပတၢ်နာ်ကဂၢၢ်ကျၢၤထီဘိအဂီၢ်လီၤ. လၢတၢ်န့ၣ်အဃိ ပသ့ၣ်ညါလီၤတံၢ်လီၤဆဲးလၢ ယဟိဝၤယွၤအတၢ်သိၣ်တၢ်သီတဖၣ်န့ၣ် မ့ၢ်တၢ်လၢအဂ့ၤကတၢၢ် လၢပဂီၢ်လီၤ.
၇, ၈. ဒ်သိးပသုတဘၣ်ယိၣ်တၢ် ဘၣ်ဃးဒီးတၢ်မၤကွၢ် လၢကဟဲခါဆူညါတဂ့ၤအဂီၢ် တၢ်မနုၤကမၤစၢၤပှၤလဲၣ်.
၇ ဘၣ်သ့ၣ်သ့ၣ် နကဘၣ်ယိၣ်တၢ်လၢ ခါဆူညါန့ၣ် နကထံၣ်ဘၣ်တၢ်မၤကွၢ်တဖၣ်လၢ အကကီတလၢ လၢနဂီၢ်လီၤ. နမ့ၢ်တူၢ်ဘၣ်ဒ်န့ၣ်န့ၣ် နကဘၣ်သ့ၣ်နီၣ်ထီၣ်က့ၤ ယဟိဝၤယွၤအတၢ်ကတိၤတဖၣ်လၢအမ့ၢ် “ယဲဒၣ်အံၤ, ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢကျဲလၢ နဂ့ၤလဲၤန့ၣ်လီၤ. အိ, မ်နကနၣ်တ့ၢ်ယတၢ်မၤလိာ်တက့ၢ်. မ့မ့ၢ်ဒ်န့ၣ်ဒီး နတၢ်ဃူတၢ်ဖိးကမၤသးဒ်ထံမိၢ်ပှၢ်အသိး, ဒီးနတၢ်တီတၢ်လိၤဒ်ပီၣ်လဲၣ်အလပီအသိးန့ၣ်လီၤ.”—ယၡါယၤ ၄၈:၁၇, ၁၈.
၈ ပမ့ၢ်ဒိကနၣ် ယဟိဝၤယွၤအကလုၢ်န့ၣ် ပတၢ်ဃူတၢ်ဖိးကမၤအသးဒ်သိးဒီး ထံကျိလၢအ ယွၤလီၤ တကတၢၢ်နီတဘျီဘၣ်. ဒီးပတၢ်တီတၢ်လိၤ ကလီၤဂာ်ဒ်ပီၣ်လဲၣ်အလပီတဖၣ်အသိး အဃိ ပမ့ၢ်ထံၣ်ဘၣ်တၢ်မၤကွၢ်ဒ်လဲၣ်ဂ့ၤ ဒ်လဲၣ်ဂ့ၤသနာ်က့ ပတီဒီးကစၢ်ယွၤကန့ၢ်ဝဲ ထီဘိလီၤ. လံာ်စီဆှံအၢၣ်လီၤပှၤလၢ “ပာ်တၢ်လၢအဟ့ၣ်လီၤနၤန့ၣ် လၢယွၤအလိၤတက့ၢ်. ဒီးကမၤစၢၤနၤလီၤ. တဟ့ၣ်ဟူးဝး ပှၤတီပှၤလိၤန့ၣ် နီတစုဘၣ်.”—စံးထီၣ်ပတြၢၤ ၅၅:၂၂.
ဂုာ်ကျဲးစၢးကဲထီၣ် ‘ပှၤဒိၣ်တုာ်ခိၣ်ပှဲၤ’
၉, ၁၀. ပကဲထီၣ်ပှၤဒိၣ်တုာ်ခိၣ်ပှဲၤန့ၣ် အခီပညီဒ်လဲၣ်.
၉ ဒ်နမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤအသိး နကကဲထီၣ်ပှၤလၢအ “ဒိၣ်တုာ်ခိၣ်ပှဲၤ” န့ၣ်လီၤ. (ဧ့ၤဘြံၤ ၆:၁, ခ့ခါစှီၤကျိာ်) ပကဲထီၣ်ပှၤဒိၣ်တုာ်ခိၣ်ပှဲၤန့ၣ် အခီပညီဒ်လဲၣ်.
၁၀ ခီဖျိလၢပသးပှၢ်ထီၣ်အဃိ ပကဲထီၣ်ခရံာ်ဖိလၢ အဒိၣ်တုာ်ခိၣ်ပှဲၤတမ့ၢ်ဘၣ်. ပကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ ခီဖျိလၢ ပဒုးကဲထီၣ်ယဟိဝၤယွၤလၢ ပတံၤသကိးလၢအဂ့ၤကတၢၢ်ဒီး ပဂုာ်ကျဲးစၢးအိၣ်ဒီး တၢ်ထံၣ်ဒ်သိးဒီးအီၤန့ၣ်လီၤ. (ယိၤဟၣ် ၄:၂၃) စီၤပီလူးကွဲးဝဲလၢ “ပှၤဘၣ်ဃးဒီးတၢ်ဖံးတၢ်ညၣ်တဖၣ်န့ၣ်, သးအိၣ်တၢ်ဖံးတၢ်ညၣ်အတၢ်လီၤ. မ့မ့ၢ်ပှၤဘၣ်ဃးဒီးသးတဖၣ်န့ၣ်, လၢသးန့ၣ်အတၢ်လီၤ.” (ရိမ့ၤ ၈:၅) ပှၤတဂၤလၢအဒိၣ်တုာ်ခိၣ်ပှဲၤ လၢနီၢ်သးတခီန့ၣ် တဆိကမိၣ် ဟီၣ်ခိၣ်အတၢ်ထူးတၢ်တီၤ ဒီးတၢ်မၤမုာ်မၤဖှံသးအါတလၢဘၣ်. လၢတၢ်န့ၣ်အလီၢ် အဝဲသးစၢၢ်ဆၢဝဲ ယဟိဝၤယွၤအတၢ်မၤ ဒီးလၢအတၢ်အိၣ်မူအပူၤန့ၣ် အဝဲဆၢတဲာ်တၢ်လၢ တၢ်ကူၣ်သ့အပူၤလီၤ. (ကတိၤဒိ ၂၇:၁၁; ဖး ယၤကိာ် ၁:၂, ၃ တက့ၢ်.) ဒီးအဝဲတဟ့ၣ်အခွဲးလၢ ပှၤဂၤကဆီၣ်သနံးအီၤလၢ ကမၤတၢ်ကမၣ်အဂီၢ်ဘၣ်. ပှၤလၢအဒိၣ်တုာ်ခိၣ်ပှဲၤတဂၤန့ၣ် သ့ၣ်ညါဝဲတၢ်လၢအဘၣ် ဒီးပာ်လီၤအသး ဂၢၢ်ဂၢၢ်ကျၢၤကျၢၤလၢ ကမၤထွဲဝဲလီၤ.
၁၁, ၁၂. (က) ဘၣ်ဃးဒီးခရံာ်ဖိက “နီၤဖးတၢ်ဂ့ၤဒီးတၢ်အၢအဆၢ” န့ၣ်စီၤပီလူးတဲဝဲဒ်လဲၣ်. (ခ) ဒ်ပှၤလိာ်ကွဲဖိတဂၤမၤဝဲအသိး ပှၤတဂၤကကဲထီၣ် ခရံာ်ဖိလၢအဒိၣ်တုာ်ခိၣ်ပှဲၤအဂီၢ် အဝဲကဘၣ်မၤဝဲဒ်လဲၣ်.
၁၁ ဒ်သိးပကကဲထီၣ် ပှၤလၢအဒိၣ်တုာ်ခိၣ်ပှဲၤအဂီၢ် ပကဘၣ်ထဲးဂံၢ်ထဲးဘါလီၤ. တၢ်မၢဖိပီလူးကွဲးဝဲလၢ “တၢ်အီၣ်အသံးအကာ်န့ၣ် မ့ၢ်လၢပှၤဒိၣ်တုာ်ခိၣ်ပှဲၤအဂီၢ်, ပှၤလၢအအိၣ်ကတဲာ်ကတီၤအသး, ဒီးညီနုၢ်နီၤဖးတၢ်ဂ့ၤဒီးတၢ်အၢ အဆၢန့ၣ်လီၤ.” (ဧ့ၤဘြံၤ ၅:၁၄) ပမ့ၢ်ဆိကမိၣ်ထံ တၢ်ကတိၤလၢအမ့ၢ် “ကတဲာ်ကတီၤအသး” န့ၣ်ဘၣ်သ့ၣ်သ့ၣ် ပကဆိကမိၣ်ဘၣ် ပှၤလိာ်ကွဲဖိတဖၣ် ကဘၣ်အိၣ်ကတဲာ်ကတီၤအသးဒီး မၤလိအသးဂ့ၤဂ့ၤဘၣ်ဘၣ် ဒ်သိးဂဲၤလိာ်ကွဲဝဲကသ့ဂ့ၤဂ့ၤအဂီၢ်လီၤ.
၁၂ ဖဲပထံၣ်ဘၣ် ပှၤလိာ်ကွဲဖိတဂၤ ဂဲၤလိာ်ကွဲဝဲသ့ဂ့ၤဂ့ၤအခါ ပသ့ၣ်ညါလၢ အဝဲအတၢ်သ့တၢ်ဘၣ်တဖၣ်အံၤ တဟဲကဲထီၣ်အသးဒၣ်ဝဲဘၣ်. အဝဲကဘၣ်မၤလိသ့ထီၣ်အသး ကယီကယီလီၤ. ဒ်န့ၣ်အသိး ဖဲဖိသၣ်အိၣ်ဖျဲၣ်ထီၣ်သီသီအခါ အဝဲဖီၣ်ဃာ်တၢ်ဒီး ဟးလၢအခီၣ် တသ့ဒံးဘၣ်. ဘၣ်ဆၣ် လၢခံန့ၣ်အဝဲမၤလိအသး ကယီကယီတုၤလၢ အဝဲဖီၣ်ဃာ်တၢ် ဒီးဟးလၢအခီၣ် သ့ဝဲလီၤ. ဒီးလၢခံ အဝဲမ့ၢ်မၤလိအါထီၣ်အသးန့ၣ် အဝဲကဲထီၣ် ပှၤလိာ်ကွဲဖိသ့ဝဲလီၤ. ပဝဲစ့ၢ်ကီး ဒ်သိးပကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤအဂီၢ် ပလိၣ်ဘၣ်တၢ်ဆၢကတီၢ်လၢ ပကဘၣ်မၤလိပသးန့ၣ်လီၤ.
၁၃. ပကဆိကမိၣ်တၢ်ဒ် ယဟိဝၤယွၤအသိးအဂီၢ် တၢ်မနုၤကမၤစၢၤပှၤလဲၣ်.
၁၃ လၢလံာ်အံၤအပူၤ ပမၤလိဘၣ်တၢ်ဂ့ၢ်အါမံၤ လၢအမၤစၢၤပှၤဒ်သိး ပကဆိကမိၣ်တၢ်ဒ် ယဟိဝၤယွၤ ဆိကမိၣ်ဝဲအသိး ဒီးအိၣ်ဒီးတၢ်ထံၣ် ဒ်သိးအီၤလီၤ. တကးဒံးဘၣ် လံာ်တဘ့ၣ်အံၤ ကဲထီၣ်တၢ်မၤစၢၤလၢ ပကပာ်လုၢ်ပာ်ပှ့ၤ ဒီးအဲၣ်ယဟိဝၤယွၤ အတၢ်ဟံးစုနဲၣ်ကျဲတဖၣ်လီၤ. ဘၣ်ဃးဒီးတၢ်ဂ့ၢ်တခါဂ့ၤတခါဂ့ၤန့ၣ် တချုးဖဲ ပဆၢတဲာ်တၢ်အခါ ပကဘၣ်သံကွၢ်လီၤပသးလၢ ‘လံာ်စီဆှံအတၢ်သိၣ်တၢ်သီ မ့တမ့ၢ် အတၢ်ဟံးစုနဲၣ်ကျဲန့ၣ် ဘၣ်ထွဲလိာ်အသးဒီး တၢ်ဂ့ၢ်အံၤဒ်လဲၣ်. ဘၣ်ဃးဒီးတၢ်သိၣ်တၢ်သီဒီး တၢ်ဟံးစုနဲၣ်ကျဲတဖၣ်အံၤန့ၣ် ယမၤထွဲအီၤကသ့ဒ်လဲၣ်. ယဟိဝၤယွၤ အဲၣ်ဒိးလၢ ယကမၤတၢ်မနုၤလဲၣ်.’—ဖး ကတိၤဒိ ၃:၅, ၆; ယၤကိာ် ၁:၅ တက့ၢ်.
၁၄. ပမ့ၢ်အဲၣ်ဒိးမၤဒိၣ်ထီၣ် ပတၢ်နာ်န့ၣ် ပကဘၣ်မၤဒ်လဲၣ်.
၁၄ ပကဘၣ်ဆဲးမၤ ဒိၣ်ထီၣ်အါထီၣ် ပတၢ်နာ် ယဟိဝၤယွၤထီဘိလီၤ. အဒိ ဒ်သိးပှၤတဂၤအနီၢ်ခိဂံၢ်ဘါ ကဆူၣ်ဝဲအဂီၢ် အဝဲကဘၣ်အီၣ်တၢ်အီၣ်လၢ အကဲဂံၢ်ကဲဘါန့ၣ်လီၤ. ဒ်န့ၣ်အသိး ပမ့ၢ်ဆဲးဃုသ့ၣ်ညါအါထီၣ် ယဟိဝၤယွၤအဂ့ၢ်ထီဘိန့ၣ် ကမၤစၢၤပှၤဒ်သိး ပတၢ်နာ်ကဆူၣ်ထီၣ်အဂီၢ်လီၤ. ဖဲပစးထီၣ်မၤလိလံာ်စီဆှံသီသီအခါ ပနၢ်ပၢၢ်ထီၣ် လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိလၢ ဘၣ်ဃးဒီးယဟိဝၤယွၤ ဒီးအတၢ်သိၣ်တၢ်သီသ့ၣ်တဖၣ်န့ၣ်လီၤ. ဘၣ်ဆၣ် ဒ်တၢ်ဆၢကတီၢ်လဲၤပူၤကွံာ်ဝဲအသိး ပကဘၣ်နၢ်ပၢၢ်တၢ်ဂ့ၢ်လၢ အဒိၣ်အယိာ်စ့ၢ်ကီးလီၤ. လၢတၢ်န့ၣ်အဃိ စီၤပီလူးတဲဝဲလၢ “တၢ်အီၣ်အသံးအကာ်န့ၣ် မ့ၢ်လၢပှၤဒိၣ်တုာ်ခိၣ်ပှဲၤအဂီၢ်” လီၤ. ပမ့ၢ်အိၣ်မူမၤထွဲ တၢ်လၢပမၤလိသ့ၣ်တဖၣ်န့ၣ် ပကဒိးန့ၢ်ဘၣ် တၢ်ကူၣ်သ့လီၤ. ဒီးလံာ်စီဆှံတဲဝဲလၢ “တၢ်မၤန့ၢ်တၢ်ကူၣ်သ့, မ့ၢ်တၢ်အကါဒိၣ်ကတၢၢ်လၢ နမၤအီၤသ့လီၤ.”—ကတိၤဒိ ၄:၅-၇, ခ့ခါစှီၤကျိာ်; ၁ ပ့းတရူး ၂:၂.
၁၅. ပတၢ်အဲၣ်ယဟိဝၤယွၤ ဒီးပတၢ်အဲၣ်ပဒီပုၢ်ဝဲၢ်တဖၣ်န့ၣ် အရ့ဒိၣ်ထဲလဲၣ်.
၁၅ ပှၤတဂၤ မ့ၢ်အိၣ်ဆူၣ်အိၣ်ချ့ဒီး အနီၢ်ခိဂံၢ်ဘါ မ့ၢ်ဆူၣ်လၢဆၢကတီၢ်ခဲအံၤသနာ်က့ ဒ်သိးအဂံၢ်ဘါ ကဆူၣ်ထီဘိအဂီၢ် အဝဲကဘၣ်ကွၢ်ထွဲလီၤအသး ထီဘိလီၤ. ဒ်န့ၣ်အသိး ခရံာ်ဖိလၢ အဒိၣ်တုာ်ခိၣ်ပှဲၤတဂၤ ကဘၣ်ဆဲးဂုာ်ကျဲးစၢးဝဲထီဘိ ဒ်သိးအတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤထီဘိအဂီၢ်လီၤ. စီၤပီလူးဒုးသ့ၣ်နီၣ်ပှၤလၢ “သုဝဲဒၣ်အံၤသုအိၣ်လၢတၢ်နာ်အပူၤ, သုတအိၣ်ဘၣ်လဲၣ်န့ၣ်, သံကွၢ်သံဒိးလီၤသုသးတက့ၢ်. ပစီကွၢ်လီၤသုသးတက့ၢ်.” (၂ ကရံၣ်သူး ၁၃:၅) ဘၣ်ဆၣ် ပလိၣ်ဘၣ်တၢ်နာ်လၢ အဂၢၢ်ကျၢၤတကးဒံးဘၣ် ပတၢ်အဲၣ်ယဟိဝၤယွၤ ဒီးပတၢ်အဲၣ်ပဒီပုၢ်ဝဲၢ်တဖၣ်စ့ၢ်ကီး ကဘၣ်ဒိၣ်ထီၣ်အါထီၣ်ဝဲ ကွ့ၢ်ကွ့ၢ်လီၤ. စီၤပီလူးတဲဝဲလၢ “ယမ့ၢ်သ့ၣ်ညါတၢ်ခဲလၢာ်, ဒီးယမ့ၢ်န့ၢ်ဘၣ်တၢ်နာ်ခဲလၢာ်, တုၤယမၤသုးကစၢၢ်ကလိသ့, ဘၣ်ဆၣ်ဒီး ယတၢ်အဲၣ်တၢ်ကွံမ့ၢ်တအိၣ်ဘၣ်ဒီး, ယမ့ၢ်တၢ်ကလီကလီလီၤ.”—၁ ကရံၣ်သူး ၁၃:၁-၃.
ဆိကမိၣ်ထံ နတၢ်မုၢ်လၢ်ထီဘိ
၁၆. မုၣ်ကီၤလံၢ်အဲၣ်ဒိးဝဲလၢ ပကတူၢ်ဘၣ်ဒ်လဲၣ်.
၁၆ မုၣ်ကီၤလံၢ်အဲၣ်ဒိးလၢ ပကဆိကမိၣ်လၢ ပမ့ၢ်ဂုာ်ကျဲးစၢးထဲလဲၣ်သနာ်က့ ပမၤတၢ်ဘၣ်ယဟိဝၤယွၤအသး တသ့ဘၣ်. အဝဲအဲၣ်ဒိးလၢ ပသးအဂံၢ်ဘါ ကလီၤစၢ်ဒီး အဝဲအဲၣ်ဒိးဒုးဆိကမိၣ်ပှၤလၢ ပတၢ်ကီတၢ်ခဲတဖၣ် ကအိၣ်ဒ်အလီၢ်လီၢ်ထီဘိလီၤ. တကးဒံးဘၣ် အဝဲတအဲၣ်ဒိးလၢ ပကနာ်ပဒီပုၢ်ဝဲၢ်တဖၣ်ဘၣ် ဒီးတအဲၣ်ဒိးစ့ၢ်ကီးလၢ ပကအိၣ်ဒီး တၢ်သးခုဘၣ်. (အ့းဖ့းစူး ၂:၂) မုၣ်ကီၤလံၢ်သ့ၣ်ညါဝဲလၢ ပမ့ၢ်အိၣ်ဒီးတၢ်ထံၣ်လၢ အတဂ့ၤတဘၣ်န့ၣ် ပကဘၣ်ဒိ ဒီးပတၢ်ရ့လိာ်သးဒီးယွၤစ့ၢ်ကီး ကဘၣ်ဒိဝဲလီၤ. ဘၣ်ဆၣ် ဒ်သိးပတြီဆၢ တၢ်ထံၣ်လၢအတဂ့ၤတဘၣ်ကသ့အဂီၢ် ယဟိဝၤယွၤဟ့ၣ်လီၤပှၤ တၢ်မုၢ်လၢ်န့ၣ်လီၤ.
၁၇. တၢ်မုၢ်လၢ်န့ၣ် အရ့ဒိၣ်ထဲလဲၣ်.
၁၇ ဖဲ ၁ သ့းစၤလနံ ၅:၈ န့ၣ်လံာ်စီဆှံတဲဝဲလၢ ပတၢ်မုၢ်လၢ်န့ၣ် လီၤဂာ်ဒ်ပှၤသုးဖိတဂၤအခိၣ်ဖျီၣ်ထးလၢ အဒီသဒၢအခိၣ်သၣ်ဃံ ဖဲအဝဲလဲၤဒုးတၢ်အခါန့ၣ်လီၤ. ဒီးလံာ်စီဆှံတဆၢအံၤ ပာ်ဖျါထီၣ်ဝဲလၢ ခိၣ်ဖျီၣ်ထးအံၤမ့ၢ်ဝဲပ “တၢ်မုၢ်လၢ်ဘၣ်ဃးဒီးတၢ်အုၣ်က့ၤခီၣ်က့ၤ” လီၤ. ပမ့ၢ်မုၢ်လၢ် ယဟိဝၤယွၤ အတၢ်အၢၣ်လီၤအီလီၤတဖၣ်ထီဘိန့ၣ် ကဒီသဒၢပတၢ်ဆိကမိၣ် ဒ်သိးပသုတအိၣ်ဒီးတၢ်ထံၣ်လၢ အတကြၢးတဘၣ်တဂ့ၤအဂီၢ်လီၤ.
၁၈, ၁၉. ယ့ၣ်ၡူးအတၢ်မုၢ်လၢ်န့ၣ် မၤဆူၣ်ထီၣ်အသးလၢ ကျဲဒ်လဲၣ်.
၁၈ ယ့ၣ်ၡူးအတၢ်မုၢ်လၢ်န့ၣ် မၤဆူၣ်ထီၣ်အသးထီဘိလီၤ. အဒိ ဖဲယ့ၣ်ၡူးအတၢ်အိၣ်မူလၢဟီၣ်ခိၣ်ချၢ အလီၢ်ခံကတၢၢ်တနၤန့ၣ် အဝဲဘၣ်လဲၤခီဖျိဝဲတၢ်ကီတၢ်ခဲ တခါဝံၤတခါလီၤ. ယ့ၣ်ၡူးအတံၤသကိးလၢ အရ့ဒီးအီၤဘူးဘူးတံၢ်တံၢ်တဂၤ ဆါလီၤကွံာ်အီၤန့ၣ်လီၤ. အတံၤသကိးလၢအဂၤတဂၤန့ၣ် တဲဝဲလၢအတသ့ၣ်ညါအီၤဘၣ်. ဒီးအတံၤသကိးအဂၤတဖၣ်စ့ၢ်ကီး ပာ်တ့ၢ်အီၤဒီးဃ့ၢ်ကွံာ်ဝဲလီၤ. တကးဒံးဘၣ် အပှၤကလုာ်ဒၣ်လဲာ်ထီဒါအီၤ ဒီးကိးပသူထီၣ်ဝဲဒ်သိး ပှၤကမၤသံအီၤအဂီၢ်လီၤ. မ့မ့ၢ်ဒ်န့ၣ်န့ၣ် ဒ်သိးယ့ၣ်ၡူးတူၢ်တၢ် တုၤလၢအကတၢၢ်ကန့ၢ်အဂီၢ် တၢ်မနုၤမၤစၢၤအီၤလဲၣ်. လံာ်စီဆှံတဲဝဲလၢ “အဝဲဒၣ်ဒိးထူၣ်စုညါ, ဒီးပာ်တၢ်မဲာ်ဆှးလၢတၢ်နီတမံၤဘၣ်, လၢတၢ်သးခုအိၣ်ပာ်လီၤအသးလၢ အမဲာ်ညါအဃိ, ဒီးဆ့ၣ်နီၤဝဲလၢယွၤအလီၢ်ပစိာ် အစုထွဲတခီလီၤ.”—ဧ့ၤဘြံၤ ၁၂:၂.
၁၉ ယ့ၣ်ၡူးသ့ၣ်ညါဝဲလၢ အဝဲမ့ၢ်အိၣ်ဒီးတၢ်သးတီန့ၣ် အပၢ်အမံၤ ကဘၣ်တၢ်မၤလၤကပီၤအီၤလီၤ. တကးဒံးဘၣ် ယ့ၣ်ၡူးသ့ၣ်ညါစ့ၢ်ကီးဝဲလၢ အဝဲကပာ်ဖျါထီၣ်ဝဲလၢ မုၣ်ကီၤလံၢ်မ့ၢ်ပှၤလၢအလီတၢ်န့ၣ်လီၤ. ဖဲယ့ၣ်ၡူးဆိကမိၣ်ထီၣ် အတၢ်မုၢ်လၢ်အံၤအခါ အဝဲသးခုဒိၣ်မးလီၤ. အဂၤတမံၤန့ၣ် ယ့ၣ်ၡူးသ့ၣ်ညါဝဲလၢ တယံာ်တမီၢ် အဝဲကက့ၤအိၣ်ဘၣ်ဒီးအပၢ် လၢမူခိၣ်န့ၣ်လီၤ. ဒီးအတၢ်မုၢ်လၢ်အံၤ မၤစၢၤအီၤဒ်သိး အတူၢ်တၢ်ကန့ၢ်ခီၣ်တၢ်ကကဲအဂီၢ်လီၤ. ဒ်ယ့ၣ်ၡူးအသိး ပကဘၣ်ဆိကမိၣ်ထံ ပတၢ်မုၢ်လၢ်ထီဘိလီၤ. ပမ့ၢ်မၤဒ်န့ၣ်န့ၣ် ပမ့ၢ်ထံၣ်ဘၣ်တၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤ ပလဲၤခီဖျိအီၤ ကန့ၢ်ဝဲလီၤ.
၂၀. ဒ်သိးနကအိၣ်ဒီး တၢ်ထံၣ်လၢအဂ့ၤအဂီၢ် တၢ်မနုၤကမၤစၢၤနၤလဲၣ်.
၂၀ ဖဲနလဲၤခီဖျိ နတၢ်ကီတၢ်ခဲလၢ တၢ်သးတီပူၤအခါ ယဟိဝၤယွၤထံၣ်ဝဲလီၤ. (ယၡါယၤ ၃၀:၁၈; ဖး မၤလကံ ၃:၁၀ တက့ၢ်.) ဒီးအဝဲအၢၣ်လီၤဝဲလၢ “ကဟ့ၣ်နၤ တၢ်လၢနသးဆၢန့ၢ်ဘၣ်အီၤန့ၣ်လီၤ.” (စံးထီၣ်ပတြၢၤ ၃၇:၄, ခ့ခါစှီၤကျိာ်) အဃိ ဆိကမိၣ်ထံ နတၢ်မုၢ်လၢ်ထီဘိတက့ၢ်. မုၣ်ကီၤလံၢ်အဲၣ်ဒိးဝဲလၢ နတၢ်မုၢ်လၢ်ကလီၤမၢ်ဝဲ ဒီးအဲၣ်ဒိးဝဲလၢ နကဆိကမိၣ်လၢ ယဟိဝၤယွၤ အတၢ်အၢၣ်လီၤတဖၣ် တလၢထီၣ်ပှဲၤထီၣ် နီတဘျီလၢၤဘၣ်. ဘၣ်ဆၣ် နတဘၣ်ဟ့ၣ်အခွဲးလၢ တၢ်ထံၣ်လၢ အတဂ့ၤတဘၣ် ကဒိၣ်စိလၢနဖီခိၣ်တဂ့ၤ. နမ့ၢ်တူၢ်ဘၣ်လၢ နတၢ်မုၢ်လၢ်လီၤစၢ်လံန့ၣ် ဃ့ယဟိဝၤယွၤ အတၢ်မၤစၢၤတက့ၢ်. ဒီးနကဘၣ်သ့ၣ်နီၣ် လံာ်စီဆှံတဆၢဖဲ ဖံလံးပံၤ ၄:၆, ၇ လၢအတဲဝဲ “သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ်လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီး တၢ်စံးထီၣ်ပတြၢၤတၢ်အဘျုး အဖှိၣ်အပူၤန့ၣ်, ဘိးဘၣ်သ့ၣ်ညါယွၤ လၢသုတၢ်အဲၣ်ဒိးတဖၣ်န့ၣ်တက့ၢ်. ဒီးယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ်ကယဲၢ်ပသ့ၣ်ညါ နၢ်ပၢၢ်တၢ်န့ၣ်ကပၢၤသုသူၣ်သုသးဒီး သုဆိကမိၣ်တၢ်လၢ ယ့ၣ်ၡူးခရံာ်အပူၤလီၤ.”
၂၁, ၂၂. (က) ယဟိဝၤယွၤအတၢ်တိာ်ပာ်လၢ ဟီၣ်ခိၣ်အဂီၢ်မ့ၢ်မနုၤလဲၣ်. (ခ) နပာ်လီၤနသးလၢ နကမၤတၢ်မနုၤလဲၣ်.
၂၁ နအိၣ်ဒီးတၢ်မုၢ်လၢ်လၢ အလီၤသးခုသပှၢ်ကတၢၢ်အဃိ ဟံးန့ၢ်တၢ်ဆၢကတီၢ်လၢ နကဆိကမိၣ်ထံ နတၢ်မုၢ်လၢ်အံၤ ထီဘိတက့ၢ်. တယံာ်တမီၢ်န့ၣ် ပှၤကိးဂၤဒဲး ကဘူၣ်ထီၣ်ဘါထီၣ် ယဟိဝၤယွၤလီၤ. (လီၣ်ဖျါ ၇:၉, ၁၄) ဆိကမိၣ်ကွၢ် လၢဟီၣ်ခိၣ်သီအပူၤန့ၣ် နတၢ်အိၣ်မူကမၤအသးဒ်လဲၣ်. နီၢ်နီၢ်န့ၣ် ပတၢ်အိၣ်မူကဂ့ၤဒိၣ်န့ၢ်ဒံး ကယဲၢ်တၢ်လၢ ပဆိကမိၣ်ကွၢ်သ့ဝဲန့ၣ်လီၤ. ဖဲန့ၣ်အဆၢကတီၢ် မုၣ်ကီၤလံၢ်, အတၢ်ဝံတၢ်နါ ဒီးတၢ်အၢတၢ်သီ တအိၣ်လၢၤဘၣ်. နတဆိးက့လၢၤဘၣ်, ဒီးတၢ်သံတအိၣ်လၢၤဘၣ်. လၢတၢ်န့ၣ်အလီၢ် ကိးနံၤဒဲးနကပၢၢ်ထီၣ် ပှဲၤဒီးတၢ်ဂံၢ်တၢ်ဘါ ဒီးတၢ်သူၣ်ဖှံသးညီန့ၣ်လီၤ. ပှၤကိးဂၤဒဲး ကမၤသကိးတၢ် ဒ်သိးဟီၣ်ခိၣ်ကကဲထီၣ် ပၤရဒံစူးအဂီၢ်လီၤ. ဒီးပဝဲခဲလၢာ် ပကအီၣ်ဘၣ်တၢ်အီၣ်လၢ အဝံၣ်အဘဲ ဒီးပကအိၣ်ဒီးတၢ်ဘံၣ်တၢ်ဘၢလီၤ. တကးဒံးဘၣ် တၢ်မၤဆူၣ်မၤစိး တအိၣ်လၢၤဘၣ်. ပှၤကအဲၣ်လိာ်ကွံလိာ်အသး တဂၤဒီးတဂၤလီၤ. ဒီးလၢခံန့ၣ် ပှၤဟီၣ်ခိၣ်ဖိကိးဂၤဒဲး “ကလဲၤနုာ်ဆူယွၤအဖိတဖၣ် အတၢ်ထူၣ်ဖျဲးအလၤကပီၤအပူၤလီၤ.”—ရိမ့ၤ ၈:၂၁.
၂၂ ယဟိဝၤယွၤအဲၣ်ဒိးလၢ နကဒုးကဲထီၣ်အီၤလၢ နတံၤသကိးလၢ အဂ့ၤကတၢၢ်တဂၤန့ၣ်လီၤ. လၢတၢ်န့ၣ်အဃိ ဂုာ်ကျဲးစၢးသပှၢ်ကတၢၢ်လၢ နကဒိကနၣ် ယဟိဝၤယွၤအကလုၢ် ဒီးသုးဘူးနသးဆူအအိၣ် ကိးနံၤဒဲးတက့ၢ်. ပဝဲခဲလၢာ် မ်ပအိၣ်ဂၢၢ်ဆိးကျၢၤလၢ ကစၢ်ယွၤအတၢ်အဲၣ်တၢ်ကွံအပူၤ လီၤထူလီၤယိာ်တက့ၢ်.—ယူဒၤ ၂၁.
တၢ်ဂ့ၤအဂၤလၢ နကဘၣ်သး
လံာ်တဖၣ် ဒီးဘရိၣ်ခၠၣ်တဖၣ်
ကွၢ်လိမၤဒိးအဝဲသ့ၣ်အတၢ်နာ်
ပမ့ၢ်မၤလိဘၣ် ပှၤတီပှၤလိၤတဖၣ်လၢလံာ်စီဆှံပူၤအဂ့ၢ်န့ၣ် ကကဲဘျုးလၢ ပဂီၢ်လၢမုၢ်မဆါတနံၤအံၤဒ်လဲၣ်.
